Lucas 18
18
I tijojb'al tzij chrij jun ixoq malkan xaq i aj-atol tzij
1I Jesús xub'ij chik jun tijojb'al tzij chke, k'utb'al re chke chi o uchak kkimayij ti lapanik ru' i Dios, xaq mb'a'krij kik'ux. 2Xub'ij chke: “Che jun tinimit o jun atol tzij kuxij ti rib' che i Dios, xaq kukoj ti ki'ij i winaq. 3Xaq che i tinimit le o jun ixoq malkan. Ire kupon ru' i atol tzij, kutz'onoj atb'al tzij puwi jun ajch'oj chrij. 4Lik o tan chi ij i atol tzij kraj ti ku'an i atb'al tzij che, xwiri xuriq i ij chi xub'ij puk'ux: Qatzij yin kinxij ti wib' che i Dios xaq kinkoj ti ki'ij i winaq, 5xwiri i ixoq malkan le kumayij ti k'unik wu', rumali kin-an ni atb'al tzij che, keje ile kk'un ti chik xaq krix ti chik ink'ux che, xcha.”#18.5 Are i tijojb'al tzij ile xub'ij i Ajwal chke.
6Xaq xub'ij chke: “Chita ut wach xub'ij i utz ti laj atol tzij. 7B'ay, ¿Xatab'a i Dios keuto ti je re ire chipa'ij, chicha'ab' chi are kkitz'onoj i kitob'al che? ¿Xatab'a kb'aytaj ni uri chu'ankil wach kkitz'onoj che? 8Kinb'ij chiwe: I Dios lik kb'aytaj ti chkito'ik; Ire lik ku'an la i atb'al tzij chke. Xwiri are kk'un i pacha Winaq chi Xolalaxoq chwach Ulew ¿K'a o nawi uri jujun chwach ulew chi k'a kul kik'ux che i Dios?” Keje ile xcha i Jesús chke.
I tijojb'al tzij chrij i aj fariseo xaq chrij i ajtz'onol alkawal
9Je o jujun winaq kkib'ij chi lik je utz, xwiri xa kkiqajsaj ki'ij i jub'an chik. Kumal i winaq le, i Jesús xub'ij i tijojb'al tziji:
10—Je o keb' achiyab' xe'e chutz'onoxik prachoch i Dios. Jun aj fariseo i jun chik ajtz'onol alkawal. 11I aj fariseo tak'alik keje iri ktijin chub'ixkil: Dios, kintioxij chawe, man yin in keje taj pacha i jub'an winaq. Ike xa je ili'omab', je utz ti laj taq winaq, xaq i jub'an chi to' kkimin kib' ru' i jun chi je k'ulinaq ti ru'. Lik kintioxij chawe in keje taj pacha i ajtz'onol alkawali. 12Kamul kinmayij wa'im pa seman. Ni'pa i kinch'ako, kinya jun tant re i lajuj chawe.#18.12 Keje xub'ij i aj fariseo ile che i Dios. 13I ajtz'onol alkawal keje ti xu'an ire ile. Ire, naj xkanaj wi i xtzun ti chikaj. Xwiri are i xu'ano, xuch'ay uwach uk'ux xaq xub'ij: “¡Dios, chawila tob'al inwach, xa in ajmak laj winaq!”#18.13 Keje utzij ile xub'ij che i Dios. 14Yin kinb'ij chiwe, i ajtz'onol alkawal xtzalij chi rachoch lik kuytajnaq chik umak chwach i Dios; kumaj taj pacha i aj fariseo. Keje ile xe'eloq, man pachin ku'on nim che rib', ire ut xa kqajsax ni u'ij; xaq pachin ku'on ch'utin che rib', are knimarsax ni uri u'ij. Keje i tijojb'al tzij ile xub'ij i Jesús chke.
I Jesús kuya utzil chomal pkiwi ak'alab'
15O i winaq xekik'am li ral taq kak'al ru' i Jesús man kuya ni u'ab' pkiwi. I utijoxelab' are xkilo, xe'ok chi ki'atixik i je k'amawnaq b'i i ak'alab'. 16Xwiri, i Jesús xeusik'ij i ak'alab' ru' i xub'ij:
—Chiya chke i ak'alab' kek'un wu', mei'atij man ni'pa i je pacha ak'alab' pkik'ux, o ke ike che i ajawinik re i Dios. 17Saq laj tzij kinb'ij chiwe, jun we kukoj ti utzij i Dios, we ku'an ti che uk'ux pacha uk'ux jun ak'al, kok ti uri che i ajawinik re i Dios —xcha chke.
Jun achi b'eyom klapan ru' i Jesús
18Jun aj-atzil ke i Judío, xupon ru' i Jesús i xutz'onoj che:
—Nim laj winaq, at utz laj Tijonel, ¿Wach i kin-an na re kinriqb'ej ink'aslemal chi nti uk'isik? —Xcha.
19I Jesús xula' uwach che:
—¿B'uchak kab'ij chwe chi in utz? Nti jun utz chi, xwi Dios —xcha. 20Yet aweta'am i lajuj tzij pixab': “Mamin awib' ru' jun chi at k'ulinaq ti ru'; matkamsanik; ma'an ela'; matt'oron chrij jun winaq, chakojo ki'ij aqajaw achuch.” —Xcha i Jesús che.
21—Ronojel ile is in-anom loq k'a are in ch'utin —xcha i achi che.
22I Jesús are xuta ile, xub'ij:
—K'a o ni rajwaxik chawe. Chak'ayij ronojel ub'itaq awe xaq chaya i pwaq chke i nib'a'ib'; keje ile kariq uri ab'eyomal chikaj. Te'uri chatpetoq xaq chatterej chwij —xcha che.
23I achi are xuta ile, xok chi b'is man lik b'eyom. 24I Jesús are xrilo chi kb'isonik, xub'ij:
—I b'eyomab', lik k'ax kokik pa ajawinik re i Dios. 25K'ax teneri rik'awik jun kamey che i tel re jun akuxa, chwach rokik jun b'eyom che i ajawinik re i Dios —xcha i Jesús chke.
26Are uri, ni'pa i xkita ile xkitz'onoj:
—¿Pachin jun uri ktiki chuto'ik rib' chwach i kamik? —Xecha.
27I Jesús xula' uwach chke:
—I Dios ktiki che wach i ketiki ti winaq chu'ankil —xcha.
28Te'uri i ma Pedro xub'ij che:
—Ajwal, yoj qakanam kanoq ni'pa i o qu', xaq oj terejnaq chawij —xcha.
29I Jesús xub'ij chke:
—Qatzij i kinb'ij chiwe, pachin jun ro'tam kan ub'itaq re man k'ax kuna i ajawinik re i Dios, nim ni kuch'ak na. We ukanam kan i rachoch, o we uchuch uqajaw, o we i ratz ucha', o we i rixoqil, xaq we i rak'al, rumal ni i ajawinik re i Dios, 30nim ni uri kuch'ak puwi ile waral chwach i jyub' ta'aj; xaq k-on panoq o ni uk'aslemal chi kk'is ti chik —xcha i Jesús chke.
I Jesús xuroxmulij ub'ixkil ukamik
31I Jesús xeusik'ij i kab'lajuj utijoxelab' ru' are kitukel, xub'ij chke: “Chita pe', ya xqamaj b'i qab'e pa Jerusalén. Chila k-an ni che i pacha Winaq chi Xolalaxoq chwach Ulew, ronojel ni'pa i kitz'ib'am kan i profeta chrij. 32Ire kjach ni pki'ab' i ne te aj Israel winaq. Ike kkiyo'ya na, kkib'ij ni k'ax che, xaq kkichub'aj ni upalaj. 33Kkijik ni ulo'xik, te'uri kkikamsaj na, xwiri churox ij kwalij chkixol i kamnaq.” Xcha i Jesús chke.
34I utijoxelab' xkita ti ub'e wach i xub'ij le. Xketamaj taj wach usuk' i xulapo; xkita ti ub'e wach i ke'eloq.
I Jesús xutzunsaj jun mawach aj Jericó
35I Jesús ktijin che i b'e naqaj chik o wi che i tinimit Jericó. O jun mawach kul pa b'e, ktijin chutz'onoxik pwaq chke i winaq. 36Are xuta chi je k'i i winaq ktijin kik'awik, ¿Wach kopis ile? Xcha. 37Xkib'ij che chi are i Jesús aj Nazaret ktijin rik'awik. 38Are uri xsik'in che:
—¡Ajwal Jesús! ¡Yet chi at umuq uxikin kan i mam David! ¡Chawila tob'al inwach! —Xcha che.
39I winaq chi je nab'e b'i chwach i Jesús, xkiyajo man kkaj taj chi ksik'inik. Xwiri ire xa xukowij mas ub'ixkil che i Jesús:
—¡Yet chi at umuq uxikin kan i mam David, chawila tob'al inwach! —Xcha.
40Are uri i Jesús xtak'i'ik xaq xutaq uk'amik. Are xtejeb' li ru', xutz'onoj che:
41—¿Wach kawaj kin-an chawe? —Xcha.
I mawach xub'ij che:
—Nim laj winaq, kwaj yin kinatzunsaj —xcha che.
42I Jesús xub'ij che:
—¡Chattzunoq! Xatutzirik man xakub'a ak'ux che i Dios —Xcha che.
43Juntir xtzun i mawach xaq xterej b'i chrij i Jesús, ktijin chuk'amwaxik xaq ktijin chutioxixik che i Dios. Xaq ni'pa i winaq chi xeilaw ile xaq lik xkikoj u'ij i Dios.
Արդեն Ընտրված.
Lucas 18: ACHICUB
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© Biblia Achí de Cubulco, Derechos reservados de Sociedad Bíblica de Guatemala