Lucas 17
17
I tzaqik chupam i mak atzalal lik naj ti o wi
1I Jesús xub'ij chke utijoxelab': “I winaq chwach i jyub' ta'aj lik arewi o ni tzaqsab'al ke pa mak, xwiri ¡To' uwach i jun chi kutzaqsaj jun chik chupam umak! 2Mas utz ke'el che, wetene kxim jun ka' rij uqul i kk'aq b'i pa ya ji'sab'al re, chwach we kutzaqsaj jun chke i ch'utiqi chupam umak. 3Mi'an yix ile.”
“We jun awachalal chwach i Cristo o umak xu'an chawe, chapixb'aj uri. Xwiri we ire kutz'onoj kuyb'al mak, chakuyu uri umak”. 4Ire, we xmakun chawe wuqmul jun ij, xaq we wuqmul kub'ij chawe “Chi lik ku'an ti chik” o chaqul uri kakuy umak. Xcha i Jesús chke.
Ucho'ab' i kub'ib'al k'uxij
5I apostolab' xkib'ij che i Ajwal:
—Chaya mas ukub'ib'al qak'ux che i Dios —xecha.
6Are uri i Ajwal xub'ij chke:
—Yix, wetene o pich' ukub'ib'al ik'ux che i Dios, chi pacha unimal jun ija re i mostas, kixtiki uri chub'ixkil che i che'i: “Chat-el chi, jat jeqel pa mar”; i nim laj che' le lik kkojon uri chiwe —xcha i Jesús chke.
I o chuqul i jun ajchak
7We o jun chi we yix o jun umokom chi ya xpe che uchak re xutik awab'ix o xaq we re xuchajij achikop, are kk'un che uchak ¿Xatab'a kab'ij che: Chatok la loq, chatkuloq xaq chatija awa? Keje taj. 8Are i kab'ij che, xa are iri: “Chayijb'a chwe wach i kintijo xaq chinawila na wach i rajwaxik chwe tz'aqat kintijin chwa'im; we xwelej wa'im, te'uri katij ni awa yet”; katcha ni che. 9Xaq katioxij ti ne uri che, man xu'an ire pacha i ab'im che. 10Xaq keje yix chi ix rajchak i Dios. Are kixutzin che ronojel ni'pa ix utaqom b'i chu'ankil, miwoy-ej i tioxb'al che. Are i ki'ano, chib'ij: “Yoj xa oj mokom; nti uchak kutioxij chqe. Xwi xqa'ano wach i b'ital chqe.” Keje ile chib'ij.#17.10 Are i tijojb'al tzij ile xub'ij i Jesús chke.
I Jesús kerutzirsaj lajuj chi o i yob'il che i kitz'umalil
11I Jesús, are ktijin u'enam pa Jerusalén, xik'aw pa mojon chuxol i Samaria xaq i Galilea. 12Are xupon che jun komon, xe'el li lajuj achiyab' chuk'ulaxik. Ike le, o yob'il che i kitz'umalil, rumali xekanaj kan k'a naj che i Jesús, 13i xesik'in che:
—¡Jesús, Tijonel, chawila ni tob'al qawach! —Xecha che.
14I Jesús, are xerilo, xub'ij chke:
—Jix, je ik'utu iwib' che i rajpatan i Dios —xcha.
Ike xkimaj b'i kib'e; are ketijin che i b'e juntir xutzir i k'ax chke.
15O jun chke ike, are xrilo chi chom chik uch'akul, xtzalijik i ksik'in chukojik u'ij i Dios. 16Are xupon ru' i Jesús, xxuki chwach k'a xuqajsaj upalaj pulew lik xutioxij che. I achi le aj Samaria winaq. 17Te'uri i Jesús xub'ij:
—¿Xatab'a je lajuj ti b'awa xeutzirik? ¿Ipa je o wi i b'elejeb' chik? 18¿Xwi b'awa i juni xtzalij loq chukojik u'ij i Dios? ¿Xwi ire le xk'unik, chi qach ti aj tinimit? —Xcha.
19Te'uri xub'ij che i achi:
—Chatwalijoq i jat; xatutzirik rumal ukub'ib'al ak'ux che i Dios —xcha.
Wach uk'unik i ajawinik re i Dios
20O jujun aj fariseo xkitz'onoj che i Jesús: ¿Junpa kjeqan i ajawinik re i Dios chwach i jyub' ta'aj? Are uri Ire xub'ij chke:
—I uk'unik i ajawinik re i Dios k-iltaj taj. 21Mijun krilo xaq mijun kub'ij: “¡Riy oliki!” O xaq “¡Ley o jela le!” Man i ajawinik re i Dios ya o chik chixol yix xaq ya o chik pik'ux. Keje ile xcha i Jesús chke.
22Te'uri xub'ij chke i utijoxelab':
—Kpe ni i ij chi yix lik kiwaj ni kiwil i jun che taq i ij le re i pacha Winaq chi Xolalaxoq chwach Ulew, xwiri lik kiwil taj. 23O ni jujun kkib'ij chiwe: “¡Riy oliki!” O xaq kkib'ij: “¡Ley o jela le!” Kecha. Xwiri mix-ek xaq mixterej chkij. 24Are kuriq i ij re i pacha Winaq chi Xolalaxoq chwach Ulew, ku'an na pacha ku'an uwach i kaj are kpe jun nim laj urep ray, chi kreplaj utzunb'al k'ulala chikaj. Keje u'ij i pacha Winaq ile chi Xolalaxoq chwach Ulew —xcha.
25Xaq xub'ij:
—Xwiri, nab'e o uchak lik kutij ni k'ax, xaq kxutux ni kumal i winaq je re i wo'or. 26Are kuriq i ij re i pacha Winaq chi Xolalaxoq chwach Ulew, keje ni kki'an i winaq pacha xki'an che taq i ij re i mam Noé ujer. 27Ike to' xkitij kiwa, xkitu' kiya', xaq to' xek'uli'ik, chi achiyab', chi ixoqib'. Keje ketijin ile chu'anik k'a xuriq i ij are xok i mam Noé chupam i nim laj barco, are uri xpe i nim laj jab' xaq konojel xekamik. 28Xaq keje ile xki'an i winaq ujer, pa tinimit Sodoma are k'as i mam Lot. To' xkitij kiwa, xkitu' kiya'; to' xek'ayinik, xelo'onik; to' xetikanik, xejach'anik, xaq to' xkiyak i kachoch. 29Xwiri, are xel i mam Lot pa tinimit Sodoma, juntir xtzaq li a' chikaj xaq i asufra chi pacha ab'aj a'al; lik xekam konojel. 30Keje ku'an i ij ile are k-iltaj ni uwach i pacha Winaq chi Xolalaxoq chwach Ulew.
31Are kuriq i ij le, jun we o puwi i rachoch kok ti chik uri pa ja chrelsaxik li ub'itaq re; xaq keje i jun we o pa chak pa taq es, matzalij chal chi rachoch. 32Chk'un chik'ux wach xu'an i rixoqil i mam Lot#17.32 Are xe'anmajik, ire xtak'i'ik i xtzun chrij, i rumal ile xkamik. Génesis 19.26.. 33Pachin jun xa ku'on pen re kutob'ej uk'aslemal, xa kusach uri uk'aslemal saqil. Xwiri, we o jun ksachsax ni uwach uk'aslemal xa wumal yin, kya' ni uri uk'aslemal saqil.
34Kinb'ij chiwe: Are kuriq i ij le, je o ni keb' kewar junam chwi ch'at; jun kk'am nu b'ik, i jun kkanax kanoq. 35Xaq we keb' ixoqib' ketijin che i ke'em junam; jun kk'am nu b'ik, i jun kkanax kanoq. 36#17.36 I versículo 36 ri kriqtaj ti chupam konojel i wuj chi o utzij i Dios chupam: Xaq we keb' achiyab' je o pa taq tikon, jun kk'am nu b'ik, i jun kkanax ni kanoq. (Keje xub'ij i Jesús ile chke utijoxelab'.)
37Are uri xkitz'onoj che:
—Ajwal ¿Ipa ka'ani wi i xab'ij le? —Xecha.
Ire xub'ij chke:
—Chila pa o wi jun ch'akulaj kamnaq xaq chila uri kemoltaj wi i k'uch —xcha.
Արդեն Ընտրված.
Lucas 17: ACHICUB
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© Biblia Achí de Cubulco, Derechos reservados de Sociedad Bíblica de Guatemala