Luke 14
14
Jesus‑em Naallghuskanga Qinuyulghii Yuuk
1Ataasimi Sabbath‑mi, Jesus neghyaghtughyan ataasimun igleghutistengitnun Pharisees‑et, tawanlenguut yuget riirngingwaaqaat. 2Jesus‑em manunganiteftuq yuuk, ighukeklu, tallikekllu puuvngalghiik. 3Jesus‑em aleghquqii apeghtughikayuget Liilightuusaneng, Pharisees‑etlu, aaptekii, “Liilightuusamtaa naallghutisqinkuut Sabbath‑mi, nalighmeng pisnanightinkuut?” 4Iwernga nepiighwaaghutkat. Taagken saafluku yuuk naallghulluku, aglaghtestekaa. 5Taagken aaptekii, “Nalighsi ighnelgukumi, nalighmeng ox‑elgukumi, Sabbath‑mi meghtaghvigmun ifkaqan, tawaninginaq sayugnayaghtaguu Sabbath‑ngughngaan?” 6Taawa kiimsighpagningitkaat.
Jesus‑em Apeghtuusaqegkanga Qusevegngalleq
7Jesus‑em esghaqii ilangi aqellqat aqumuullghiit aangwaaghet aqumutiitgun. Enkaam ungipaghaatkii, 8“Tagsiqlillengegkuvek nengughhnaqelghiik neqenghaghqellghegkenun, aqumefqaavek pilghaaten aangwaaghet aqumutiitgun, kina tagsiqliqaanayukan aangwaaghataghalghii elpeneng. 9Tagsiqlighikam elpetegneng tagiluni whaten pilleqaaten, ‘Aqumestigu taana aqumvigpegun.’ Elngaatall tawani kaynguyugllequten nuugtekuvek ukavanlenguum aqumutagkenun. 10Iwernga tagsiqliqangaten, aqumyaghtughhaaten aqumutam ukavantellghanun. Tagsiqlightegpek tagiluni pilleqaaten, ‘Ilakumtaamni, aqumyaghtaa aangwaaghughtekat aqumutiitnun.’ Elngaatall quulvallengellequten aqelqalghutet esghaamanghitni. 11Tamaghhaghmeng ellmeggneng aangwaaghughtekat qusevegtellengyaghqaagut, iwernga tamaghhaghmeng ellmeggneng quseveglleghhiit, taawa aangwaaghughtellengyaghqaagut.”
12Taagken Jesus‑em tagsiqlighteni pikaa, “Neghyaghtiisqikuvek tagsiqlifqiita ilakumtaaghten, angleguteten, ilakwaaghten, nalighmeng aklungilnguut uvilighneghten, qayughllak uteghmun ellngitallu ellmeggnun neghyaghtiisqennayukangaten. Tawaten pikufki akitkallghuughlleqaaten. 13Iwernga neqenghaghqestinaqngukuvek, tagsiqlighnaketen aklumalghiit, yugusiit nalighneghllugmelnguut, ighullugmelnguut, ayaakatlu. 14Enkaam quyastellengellequten qayughllak tamaakut akitepagningitaaten. Kiyaghneghem akileghtughlleqaaten unguvaghtekumiki qaatkutngalghiit yuget.”
Jesus‑em Ungipaghaatkegkanga Neqenghaghqelleghllak
15Tipelegni ataasim aqumgalghiim nagalluku Jesus pikaa, “Quyastekaagut neghyaghtughyaghqat neqenghaghqellghanun Ataneghpagullghan Kiyaghneghem!”
16Iwernga Jesus‑em pikaa, “Yuuk neqenghaghqinaqumalghii, uglaqlu tagsiqliqaa. 17Neqet apeghiighyata, qepghaghteni kayagtekaa whaten piyaghtiisqelluki tagsiqliqani, ‘Tagilaghaatek, neghyaqleggiinaaghtukut!’ 18Iwernga qamaglluteng tagsiqliqii apghusiighutkat. Sivuliim qepghaghta pikaa, ‘Piitesighaghvingumaanga, esghaghyaghtupestaaghnaqngwaaqa. Umiilgen ungipaataghnaken, qivghukaqanguq neghyaghtughpagningilnguunga!’ 19Tuunglighhaan pikaa, ‘Tallimat inglukullghiit ox‑et tukfiimaanka, nanghiiquyaghtughnaqaqanka qepghallegtulngit. Umiilgen ungipaataghhnaken, qivghukaqanguq neghyaghtughpagningilnguunga.’ 20Enkaam ilangan pikaa, ‘Nulightunghhaagunga, enkaam neghyaghtughpagningitunga.’ 21Qepghaghtem tagiluni umiilegminun aapqii sameng pillghit. Taagken umiilgem sakriteghllagumaghmi qepghaghteni pikaa, ‘Aanqaghlluten neghllagem tuumngitneng tagiquutiki aklumalghiit, yugusiit nalighneghllugmelnguut, ayaakat, ighullugmelnguut.’ 22Mulugpenani qepghaghtem pikaa, ‘Yuguniiq, qelelleghpetun apeghiightuq, iwernga paninang nekaghqaghllaguuq.’ 23Umiilgem pikaa, ‘Aanluten neghllagmeng tumenilnguut yuget tagilaghaatesqiki enkaam mangteghaqa esleqaghaghlli. 24Ungipaatamsi, tamaakut tagsiqliqaqsaqenka neghnaanghitut neqenghaghqusimneng.’”
Maligsaaghtengulleq
25Yulghuteghllaget maliglleghaatkaat Jesus. Qiivluki pikii, 26“Kina alngunak tagilghii whangamnun maligsaaghteknaanghitaqa wetkuqun piniqataghaquminga pakiggullunga atamineng, naamineng, nuliighmineng, avaqutamineng, anglegutmineng, nayagmineng, ellminengllu katam. 27Kitum alngunak ellmi katam qaquurani uyaminghilkumigullu maligtekumingallu, maligsaaghtekepagningitaqa.” 28Taagken Jesus‑em pikii, “Nalighsi tower‑engllaghyugukumi, sivukluni aqumluni akitulanga naraqelleqaa naamayaghqaanayukan manini. 29Naraqenghilkumigu manini, tunemangllaghluku tower‑a peglleqaa. Enkaam yuget esghaghluku nenglaghyugsaatkelleqaat. 30Pillequt, ‘Uum yugem piinlighluku nekeftekani taaqepagningitaa.’” 31Taagken Jesus‑em aaptekii, “Sanayaghtatuq umiilek ilangan umiilgem sughugnaqngukangatni? Sivukluni aqumaghlluni akuzimghhutkennayaghaa ilaminun kayaalqiiyaghqaanayukami 10,000‑meng pilluwaghtelighluni, pilluwaghyaghyaqumigu umiilek 20,000‑meng pilluwaghtelek. 32Iwernga kayaalqiipagningilkumi, taagken umiilek salin uyavanteghllagluku kayaglleqii akuzistekaghqani ellnganun. Whaten piyaghtiisqelleqaa, ‘Sasqesugsikut nekeggmetunnaluta?’” 33Jesus‑em nagneghutkii, “Enkaam una sumegtaghaatkiteggu, kitum alngunak pegsunghilkumiki qamaglluki ellmi pini, maligsaaghtekepagningitaqa.”
Sasiinghilnguq Taghyuq
34Jesus‑em taaqniqii, “Taghyuq pinightuq, iwernga taghyughningiiskumi allamengllu taghyughnighunnaanghituq. 35Taawa pinighnaanghituq sunamun, nalighmeng piinnaasiiluni piitesighaghvigmun, enkaam yuget eglleqaat. Nagatek, sigutelguusi!”
Արդեն Ընտրված.
Luke 14: ess
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2018, Wycliffe Bible Translators, Inc. All rights reserved.