Luke 13
13
Avuteghqellusi Seghleghqennanightek
1Tamaani pilleghni ilangi yuget tamaanteftut, ungipaatkaat Jesus Pilate‑mun tuqutesimaniluki ilangi Galilee‑eghmiit aghqerraaghumaluki Kiyaghneghmun. Aawitlu akumutesimaniluki aawitnun teghikusat. 2Jesus‑em aaptekii, “Sumeghpesinii taakut Galilee‑ghmiit seghleghqengngaaghataghaghpetaat ilangitneng Galilee‑ghmiineng qayughllak tawaten tuqutkaalghiit? 3Ungipaatamsi, nakaa! Avuteghqellusi seghleghqennaniimakufsi taawa qamagllusi elpesillu tuqullequsi ellngistun. 4Neqamikenghistekii Siloam‑emi qula pingayuneng inglulek yuget tower‑em ulleghvikluki tuququqii? Sumeghpesinii taakut seghleghqengngaaghataghaghtaat Jerusalem‑emi kiyaghlleghhiineng? 5Ungipaatamsi, nakaa! Avuteghqellusi seghleghqennaniimakufsi taawa qamagllusi elpesillu tuqullequsi ellngistun.”
Jesus‑em Ungipaghaatkegkanga Figs‑em Uqfiga Piitestinghilnguq
6Taagken Jesus‑em ungipaghaatkii, “Yugem piitesighaghtestekaa figs‑em uqfiga grapes‑mun piitesighaghvigmini. Esghaghyaghtughaqegkanga piitestimanayukan, iwernga avangitaqelghii. 7Enkaam piitesighaghteni pikaa, ‘Ii‑i, pingayuni ayumiqulleghni esghaghyaghtughaqsaghaqa uqfik piitestimanayukan iwernga avangitaquq. Kepigu! Piitfigillghaannaquq.’ 8Iwernga piitesighaghtem pikaa, ‘Yuguniiq, wiin whani ayumiqulleghmi avelghaghhu. Uvitanga laagnaqaqa, enkaam katagughvikelleqaqa piinnaasimeng. 9Ayumiqun piitquumakumi pinighllequq, enan piitestinghilkan, kepesnaken.’”
Sabbath‑mi Jesus‑em Naallghuskanga Aghnaq
10Taagken ataasimi Sabbath‑em aghneghani, synagogue‑mi Jesus apeghtughikaq. 11Tawanteftughnguq aghnaq qula pingayuneng inglulek ayumiqulleghni tughneghaam kayaaleghqegkaa. Pakegngastekaa enkaam taklaghruketun nekevigalnguq. 12Jesus‑em esghaghyamigu tagsighluku pikaa, “Aghnaq, itemutamken kayaaleghqengngalleghpeneng.” 13Taagken saaftekaa, enkaam taklaghrukguutnginaamaghmi pikaq, usuqikaqlu Kiyaghneghmeng.
14Synagogue‑em igleghutistengan ugumiyagutkaa Jesus qayughllak naallghutilghii Sabbath‑mi. Enkaam pikii yuget, “Aghvinleguut aghneghet qepghaghvigkaput, enkaam tagiiqitek taakuni aghneghni naallghutesqellusi, nakaan Sabbath‑mi!”
15Atanghem pikaa, “Uyuq piniiyugneq! Sabbath‑mi, tamaghaghpesi ox‑esi nalighmeng donkey‑si itemulluki meghesaghtughaqasi. 16Una aghnaq kingunqaa Abraham‑em, Tughneghaam asighqegkaqaa qula pingayuneng inglulegni ayumiqulleghni. Ipapestaaq anaggutellghunghituq itemutelleghqaa Sabbath‑mi!” 17Jesus‑em tawaten piyisteng, qamaglluteng anguyagi kaynguyugutkat. Enkaam qamaglluteng yuget quyateghllakat pinighrakegtaneng apeghiiqaaneng.
Jesus‑em Ungipaghaatkegkanga Mustard‑em Piitutanga
18Taagken Jesus‑em aaptekii, “Nateta Kiyaghneghem Ataneghpagullgha? Samun inglunnaqsikun? 19Mustard‑em piitutangatun ayuquq, yugem tuguluku piitesighaqanga piitesighaghvigmikun. Naguyalghiimi uqfigughtekaq, enkaam avayaakun qawaaget unglusikat.”
Jesus‑em Ungipaghaatkegkanga Yeast‑a
20Allameng Jesus‑em aaptekii, “Samun inglunnaqsikun Ataneghpagullgha Kiyaghneghem? 21Yeast‑atun ayuquq aghnam akuututaqegkanga avlawaghllagmun, enkaam akuutaghllak ghhuughtesteghllakaa.”
Kagpestaaghhaq Amik
22Jesus aglaatkelluku Jerusalem‑emun, apeghtughimaghmi pikaq nenillu, nengiighhaghnillu. 23Kitum aaptekaa, “Ataneq, palasqughhaawaat yuget yuguliyaghqat?”
Jesus‑em kiimsiqii, 24“Sagiqlusi iteghnaqutkitek kagpestaaghhaghqun amigkun. Ungipaatamsi, uglaapiglleghiit yuget iteghnaqutkellequt, taawanginaq iteghpagningitut. 25Mangtegham yugan makelluni amik umegyaghtughlleqaa. Enkaam tesqakmani nekevghallequsi, tenglugtughllequsillu whaten pimaghpesi, ‘Ataneq, qelpeghutaghtikut!’ Kiimsighlleqiisi, ‘Nallukamsi, nallukaqallu naken pingutsi.’ 26Taagken pilleqaghsi, ‘Neghelghusighaqamkenllu, meghelghusighaqamkenllu, apeghtughikaagutenllu tumemnni.’ 27Iwernga pilaataghlleqiisi, ‘Ungipaatamsi, nallukamsi, nallukaqallu naken pingutsi. Iqillaghaatek whangamneng elpesi seghletun pisteni!’ 28Taagken qiyaaghwaghllagllequsi, ggutesillu terqitaagtaamiita. Tawaten pillequsi esghaqufsiki Abraham‑enkut Isaac‑enkut Jacob‑enkut, qamagllukillu uuknaliqistet. Ellngit Ataneghpagullghanillequt Kiyaghneghem, iwernga elpesi eslatmun miluulleqiisi! 29Enkaam yuget tagillequt asivaghmeng, pakfallameng, aywaaneng, ikevaghmeng. Taagken aqumellequt tipelegni Ataneghpagullghani Kiyaghneghem. 30Nagataghtekqun, tamaakut ukaliit megnunaghsaghqaagut, enkaam megnunalghiit ukaliighsaghqaagut.”
Jesus‑em Piniqillgha Jerusalem‑emun
31Tawani pilleghmi ilangita Pharisees‑et takuluku Jesus pikaat, “Maaken iqilluten natmun aghulaqi qayughllak Herod‑em tuqutestesugaqaaten.”
32Jesus‑em pikii, “Ungipaasaghtughteggu taana kaviiq, ‘Nagaten, aghneghmi aanesquugunga tughneghaghneng, naallghuquugungallu qinuyulghiineng. Unaamillu tawateghpigaq pillequnga. Taagken pingayaani aghneghem qepghaqaqa apeghiighlleqaqa.’ 33Naqamllu igleghsaghqapestaaghuunga aghneghmi, unaami, awakaghaanillu, qayughllak itagnanghituq uuknaliqista tuqusaghqaaluni nani alngunak iwerngaqun Jerusalem‑emi.
34“Kaay Jerusalem, Jerusalem! Tuququqaqaten uuknaliqistet, milughpagaataghlukillu tuququqaqaten Kiyaghneghem kayagtekii elpenun. Uglaapiglluku qerngughsugaqsaghanka yugten whangamnun, katam tawaten qawaagem yaqugmi asinganun qerngughtellghatun amaaghani. Iwernga tawaten pistesimangitaghpenga! 35Nagaten, mangteghan paaghqiilleqaa qayughllak Kiyaghneghem uninnaqaatenllu paqniighsaghnanighnaqaatenllu. Ungipaatamken, esghaghnaanghitaghpenga kenlanga whaten pilleghqaghpenun, ‘Kiyaghneghem quyasligu tagilghii aatghakun Atanghem!’”
Արդեն Ընտրված.
Luke 13: ess
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2018, Wycliffe Bible Translators, Inc. All rights reserved.