Luke 15
15
Jesus‑em Ungipaghaatkegkanga Iflakaq Penniiq
1Ataasimi aghneghmi, tax‑meng qerngughtistelghutetlu, ilangillu seghleghqestelghutet nagasaatkat Jesus‑mun. 2Pharisees‑etlu, apeghtughikayugetlu Liilightuusaneng qikeghqukat, “Uum yugem tuguklighaqii seghleghqestet, neghelgusighaqiillu.”
3Enkaam Jesus‑em ungipaghaatkii, 4“Nalighsi 100‑meng penniilguyaqumi, ataasiq iflayaqumigu, sanayaghta? Unilluki 99‑et penniini neghumaluki vegaaghtuqami, ivaghyaghtughnayaghaa iflakaq penniini kenlanga naalkelleghminun. 5Naalkesamigu, quyapiglluni uyamikaa. 6Ellmeggnun kaalluni tagsiqliqii ilakumtaani, uviqlinillu pikii, ‘Quyalgusiqaghtengnga, qayughllak naalkaqa penniiqa iflakaayalghii!’ 7Ungipaatamsi, tawateghpigaq qilagmi quyakataghaghlleqaat ataasiq seghleghqesta avuteghqelluni seghleghqennanilghii, pakiggulluku taakuneng 99‑eghyagneng pinilghiineng yugneng avuteghqesaghqaanghilngughneng.”
Jesus‑em Ungipaghaatkegkanga Iflakaq Coin‑a
8Taagken Jesus‑em ilanganeng ungipaghaatkii, “Aghnaq qulaghyak silver‑meng coin‑elguyaqumi, ataasiq iflayaqumigu, sanayaghta? Kenelghutak kumaghllukek mangteghani allegnayaghaa ivaghingwaaghumaghmi kenlanga naalkelleghminun. 9Naalkesamigu tagsiqliqii ilakumtaani, uviqlinillu pikii, ‘Quyalgusiqaghtengnga, qayughllak naalkaqa coin‑eka iflakaqsaqegka!’ 10Ungipaatamsi, tawateghpigaq Kiyaghneghem yaqulgi quyaaqut ataasiq seghleghqesta avuteghqelluni seghleghqennanilghii.”
Jesus‑em Ungipaghaatkegkanga Ighneghem Sakusiiqillgha Unguvalleghmineng
11Taagken Jesus‑em ilanganeng ungipaghaatkii, “Taawanguq yuuk maalghugegneng ighnelek. 12Uyuqliim ighneghan pikaa atani, ‘Ataay, saghyagpeneng tuuninga nengighqamneng.’ Enkaam atangan tuunegkakek ighneghegni nengighqagkeneng. 13Mulunghituq, uyuqliim ighneghan akikughluki nengini aghulaqegkaq uyavanlengughmun nunamun. Tamaani manini sakusiiqluku, 14saqraggiighutkaq. Enraqlu tamaana nuna neqangisagllagughtekaq enkaam nuughteghllagughtekaq. 15Enkaam qepghaghyaqaq yugmun tamaanlengughmun; taagken yugem qepghaqalitkaa neghqistenguluku kurugaghneng. 16Iyatam angtalanganeng kurugaat neghqutkiitneng neghyaghngaaghmi lliiqaq, kitumllu alngunak neghyaghqalisigalkanga. 17Qenwatlu liisaaghaqaq, ‘Paneghniqumalunga maani, qamaglluteng atama akileghtughluteng qepghaghtengi neghaqut kepsuulluteng, masisu siiptiigaqut! 18Aglaghnaqunga atamnun whaten pinaluku, Ataay, seghleghqumaanga Kiyaghneghmunllu, elpenunllu. 19Ighneghulungangam piyaghqaananighnga. Akileghtuqayugestun qepghaghtegpetun lliightestinga.’ 20Enkaam nekevluni ataminun aglaqaq. Iwernga salin uyavanlluku atangan esghaqaa. Nangllegyaguteghllagluku aqfaasnaq payeghluku qetqaghlluku naaqaa. 21Ighneghan pikaa, ‘Ataay, seghleghqumaanga Kiyaghneghmunllu elpenunllu. Ighneghulungangam piyaghqaananighnga.’ 22Iwernga atangan pikii qepghaghteni, ‘Uuhuk, pinilleghpigaak atkuyaaghek tagillukek aatestekek, alangqughiitighteggullu, kamegteggullu. 23Enkaam quwintallghaneng kaawaghaam tuqutiighuteggu. Neqenghaghqeghllagnaqukut quyaghllagem angtalanganeng, 24qayughllak ighneqa una tuqukaayalghii, unguvaamaaq; iflakaayalghii naalkumaaq.’ Enkaam neqenghaghqeghllakat.
25“Tawani pilleghmi, nuyekliq ighnegha piitesighaghvigmelnguq. Mangteghamun kaasaghtughluni nagaquqii aynganangalghiitlu tukalegalghiitlu. 26Ataasiq qepghagata tuqlughluku aaptekaa saaqutangi. 27Qepghaghtem pikaa, ‘Uyughaan kaasimaaq. Atagpek tuqutiighutesimaa quwintallghaneng kaawaghaam, qayughllak kaallghii yaywaaseng pinighluni.’ 28Anengaa sakritkaq, iteghyugumangitkaqlu. Atangan aanvikluku iitghesqughaaqaa. 29Iwernga atani pikaa, ‘Ayumiqullelghutni qepghaateghllagamken, qaatkenghisigatanka qelghutkaghten. Tawalliima goat‑aaghaghmeng tuqutiighusigataghpenga ilakumtaaqullghiini neqenghaghqesqelluta. 30Iwernga uum ighneghpek sakusiiqegkaqaa manin aghnanun yugusimeggneng akikikayugneng. Enkaam uteghnighyan whaa elpek tuqutiighutestan quwintallghaneng kaawaghaam!’ 31Atangan pikaa, ‘Ighnemni, quunpeng elpek whangkunnitaquten. Qamaglluki saghyanka elpek pikaten. 32Iwernga quyaluta neqenghaghqengnguukut, qayughllak una uyughaan tuqukaayalghii, unguvaamaaq; iflakaayalghii naalkumaaq.’”
Արդեն Ընտրված.
Luke 15: ess
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2018, Wycliffe Bible Translators, Inc. All rights reserved.