Jɔn 21
21
Yecu acï Tuöl tëde Kɔcpiööcë Kadhorou
1Na wën, aacï kakë wan, ke Yecu be rɔt nyuöth kɔckɛn ë piööcë ë wɛ̈ɛ̈r yɔu, wɛ̈ɛ̈r cɔl Tiberia. Go rɔt nyuɔɔth alë. 2Thimon Petero, ku Thoma cɔl Didima, ku Nathanyel ë Kana nu Galili, ku wɛ̈ɛ̈t ke Dhebedayo, ku kɔc kɔ̈k kaarou ë kɔckɛn ë piööcë yiic, aake nu ëtök. 3#Luk 5:5. Na wën, ke ke yöök e Thimon Petero an, “Yɛn lɔ dep.”
Gokï lueel an, “Ayï wook, wo lɔ ë yïn ëtök.” Gokï jäl lekkï abëlic ënɔnthiinë, ku ɣɔn awakɔ̈uwë acïn kë cïk yök. 4Na wën, aacï piny guɔ ruu, ke Yecu kääc e wɛ̈ɛ̈r yɔu: ku akuc kɔcpiööcë nɔn ee yen Yecu. 5Go Yecu ke thiëëc an, “Wäthii, de këcam cath ke week?”
Gokï bɛ̈ɛ̈r an, “Ei, acïn këdäŋ.”
6 #
Luk 5:6. Go ke yɔ̈ɔ̈k an, “Dɛɛnykï bɔi ë abël baŋ cuëc, ke we bï yök.” Agokï dɛɛny, na wën, ke dhal keek ë mïït bei në juëc de rec.
7Go raanpiööcë raan nhiɛɛr Yecu go Petero yɔ̈ɔ̈k an, “Bɛ̈nydït ka!” Na wën, a piŋ Thimon Petero yen nɔn ee yen Bɛ̈nydït, ke jɔ alulutde tääu ë yekɔ̈u (wënthɛɛr aa cïn kɔ̈u lupɔ), go rɔt cuat wïïr. 8Go kɔc kɔ̈k ë piööcë gokï bɛ̈n ë abël thiinë yic (acïkï mec në biic, acït bot kaarou ke akeem tei), ke ke thel bɔi deyic rec. 9Na wën, aa cïk bɛ̈n, ke ke tïŋ many ë cool ëtɛ̈ɛ̈n, ku nu rɛ̈c ë mac nɔm, ku kuïn cï pam. 10Go Yecu ke yɔ̈ɔ̈k an, “Bɛ̈ɛ̈ikï rec kɔ̈k wën cäk dɔm.”
11Go Thimon Petero lɔ wïïr, le ku mïït bɔi bei, ë thiäŋ ke rec dït, bɔt tök ku thiërdhïc ku diäk, ku acakaa wën juëc kek aläl, ke bɔi akën bɛ̈n tuɛny. 12Go Yecu ke cɔɔl an, “Bäk cämkï.” Ku acïn raan töŋ ë kɔcpiööcë duëër e thiëëc an, “Ee yïn ŋa?” Aŋickï nɔn ee yen Bɛ̈nydït. 13Go Yecu bɛ̈n, bï ku nööm kuïn cï pam, gɛ̈m keek, ayï rec aya.
14Nyuöth cïï Yecu rɔt nyuöth kɔckɛn ë piööcë acï aa diäk ee kënë, të wään jɔt en rɔt ë kɔc cï thou yiic.
Yecu ku Petero
15Na wën, aa cïk thök ë cäm, ke Yecu thiëc Thimon Petero an, “Thimon, wën e Jona, nhiaar ɛn awär kɔckë?”
Go gam an, “Ɣɛɛ, Bɛ̈nydït, aŋic nɔn nhiaar ɛn yïn.”
Go yɔ̈ɔ̈k an, “Nyuääthë amithöökkiën amɛ̈l.” 16Go bɛ thiëëc raanrou, an, “Thimon, wën ë Jona, nhiaar ɛn?”
Go bɛ̈ɛ̈r an, “Ɣɛɛ, Bɛ̈nydït, aŋic nɔn nhiaar ɛn yïn.”
Go yɔ̈ɔ̈k an, “Tit amɛ̈lkï.” 17Go bɛ thiëëc raandiäk an, “Thimon, wën ë Jona, nhiaar ɛn?”
Petero piɔ̈u diu luɔi cï en e thiëëc raandiäk an, “Nhiaar ɛn?” Go lueel an, “Bɛ̈nydït, yïn ŋic këriëëc ëbɛ̈n, aŋic nɔn nhiaar ɛn yïn.”
Go Yecu yɔ̈ɔ̈k an, “Nyuääthë amɛ̈lkï.” 18Yïn yɔ̈ɔ̈k ë yic an, “Wään koor yïn, yïn ee yïthar duut, ago aa cath lɔɔr tëduön ë yïnpiɔ̈u: rial, të cï yïn dhiɔp, ka yïn bï yïcin riny, ago raan däŋ yï duut, ku leer yï të liu ë yïpiɔ̈u.” 19(Aa luel kënë nyooth en thon bï en thou, ago Nhialic tɔ lec.) Na wën, aacï kënë lueel, ke yöök an, “Kuany a cök!”
Yecu kekë Kɔcpiööcë Kɔ̈k
20 #
Jɔn 13:25. Go Petero rɔt puk, ku tïŋ raanpiööcë raan nhiɛɛr Yecu, ke kuany kecök, yen aye raan wään kɛn rɔt ë yeyɔu tëde cäm thëën, raan wään thiëc an, “Bɛ̈nydït, eeŋa ee raan bï yï nyiɛɛn?” 21Të cï Petero ye tïŋ, ke jɔ Yecu thiëëc an, “Bɛ̈nydït, ku raanë bï yiɛ̈ndï?”
22Go Yecu lueel an, “Të dɛ yɛn piɔ̈u luɔi bï en tɔ̈u aɣet të bä yɛn lɔ bɛ̈n, ke eeŋödu thïn? Yïn, kuany a cök!”
23Go jamë tɛɛi ë wäthii yiic an, cï raanëpiööcëyë bï thou. Ku akënë Yecu e lueel, nɔn cïï en bï thou, aa lueel an, “Të dɛ yɛn piɔ̈u luɔi bï en tɔ̈u aɣet të bä yɛn lɔ bɛ̈n, ke eeŋödu thïn?”
24Yen raanëpiööcëyë ee yen ee cäätɔ de ee kakë, ku yen aa gäär kakë, ku wo ŋic jamde nɔn ee yen yic.
Thök
25Ku ade kajuëc kɔ̈k aya, ka cïï Yecu looi, ku tëë ke cï gɔ̈ɔ̈r kedhie, në tök tök, acakaa piny nɔm ëbɛ̈n acïï kacïgɔ̈ɔ̈r duëër muk kacïgɔ̈ɔ̈r bïï keek gɔ̈ɔ̈r. Amiin.
Արդեն Ընտրված.
Jɔn 21: dip-JPB
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
The Bible in Jieeng de Padang © The Bible Society in South Sudan, 2011.