JOHAN 19
19
1Huchi in Pilat in Jesu api a, azep hi. 2Huan sepaihte'n linglukhu aphan ua, akhusak ua, puan sandup leng asilhsak uh. 3Akiang ah ahong pai ua, “Chibai, Judate' Kumpipa,” achi ua, abeng uhi.
4Huan Pilat apawt nawn a, akiang uah, “En un, bangmah agitlouhna ka mu kei chih na theihna ding un, na kiang uah ka hon pikhia hi,” achi hi. 5Jesu, linglukhu khu in leh puan sandup silh in ahong pawt hi. Pilat in akiang uah, “En un, Mihing!” achi hi.
6Huan siampu liante leh heutute'n amah amuhtak un akikou ua, “Kros ah kilhden in, kros ah kilhden in,” achi uhi. Pilat in akiang uah, “Noumau paipih unla, kros ah kilhden un; ke'n zaw bangmah agitlouhna ka mu ngal kei hi,” achi hi.
7Judate'n akiang ah, “Ka dan uh khat a-om, huai dan bang zel in Pathian Tapa a akibawl ziak in asi ding ahi,” achi ua, adawng uhi.
8Pilat in huai thu azak in alau nawn semsem hi. 9Ama inpi sung ah va lut nawn in Jesu kiang ah, “Koi a hong kipan na hia?” achi hi. Himahleh Jesu'n adawng kei. 10Pilat in akiang ah, “Nang kei hon houpih lou ding maw? Hon khah thei leh kros a hon kilhden thei ka hi chih na thei kei a hia?” achi hi.
11Jesu'n, “Tunglam a kipan piak hi kei lechin, ka tung ah hihtheih na nei kei ding. Huaiziak in na kiang a hon pekhepa'n khelhna lianzaw apua hi,” achi hi.
12Huai nungsiah Pilat in khah atum a; himahleh Judate akikou ua, “Hiai mi na khahleh Kaisar lawm na hi kei; kuapeuh kumpipa a kibawl Kaisar dou ahi,” achi uhi.
13Pilat in huai thu azak in Jesu apikhia a, amin Suanglep, Hebru pau a Gabbatha achih uh, huai mun ah thukhenna tutphah ah atu hi. 14Huan huai ni Paikan Ankuangluina kiginni ahi a, dak gukna vel ahi. Huan ama'n Judate kiang ah, “En un, na Kumpipa uh,” achi hi.
15Huan amau akikou ua, “Hihmangthang in, hihmangthang in, kros ah kilhden in,” achi uhi. Pilat in akiang uah, “Na kumpipa uh kros ah ka kilhden ding maw?” achi hi. Siampu liante'n, “Kaisar lou ngal kumpipa dang ka nei kei uh,” achi ua, adawng uhi.
Jesu Kilhdenna
(Mat 27.32-44; Mar 15.21-32; Luk 23.44-49)
16Huchi in Pilat in kilhden ding in akiang uah amah apeta hi. Huchi in Jesu api ua, apaikhiakpih uhi. 17Ama'n kros kipuak in Luguh Mun, achih uh, Hebru pau a Golgotha achih mun tan apai hi. 18Huai ah kros ah alai ah Jesu midang nih asik ah khat tuaktuak toh akilhden uhi. 19Pilat in lai agelh a, kros ah atak a, “NAZARET JESU, JUDATE' KUMPIPA,” chi in. 20Huai laigelh Judate tampi in asim ua; Jesu kros akilhdenna mun uh khopi kiang ahi a; huai Hebru pau, Grik pau leh Latin pau a gelh ahi. 21Huchi in Juda siampu liante'n Pilat kiang ah, “Judate' Kumpipa, chi in gelh ke'n; Judate' Kumpipa ka hi achi,” chi in gelh zaw in, achi uhi.
22Pilat in, “Ka gelh khit, gelh khit ahita,” chi in adawng hi.
23Huan sepaihte'n Jesu akilhden khit un apuansilh phel li asuah ua, phel khat chiat in atang ua; apuanak leng ala uh. Puanak khui louh puanak ahi a, angawng a kipan ataw tan a gatthoh ahi. 24Huaiziak in amau, “I botkek kei dia, kua tan ding ahi hiam, ai i san ding uh,” akichi uhi. Laisiangthou a, “Ka puansilhte akihawm ua, ka puanak ding in ai asan uh,” chih atangtunna ding in hiai thil sepaihte'n ahih uhi.
25Huan Jesu kros kiang ah anu leh anu sanggam, Kleopas zi Mari leh Mari Magdalin adingh uhi. 26Huan Jesu'n anu leh nungzui a-itpa akiang a dingh amu a, anu kiang ah, “Numei, en in, na tapa,” achi hi.
27Nungzuipa kiang ah, “En in, na nu,” achi hi. Huai dak a pan huai nungzui in a-inn ah amah pita hi.
Jesu Sihna
(Mat 27.45-56; Mar 15.33-41; Luk 23.44-49)
28Huai nung in, Jesu'n thil bangkim hihzoh ahita chih athei a, Laisiangthou atangtunna ding in, “Ka dang atak,” achi hi.
29Huai ah bel khat uain thuk a dim atung ua, huchi in spanji khat uain thuk a diahdim in, hissop chiangdawn a tak in, amuk ah atulhtou uhi. 30Huan Jesu'n uain thuk adawn khit in, “Zoh ahita,” achi a, huan alu akun a, akha akhahta hi.
Tei A Dawtna
31Huan kiginni ahih ziak in, Sabbath ni a kros a siluangte a-omlouhna ding in, (huai Sabbath ni lah ni thupi ahi ngal a), Judate'n Pilat kiang ah akhete uh hihtan a aluang uh paipih ding in angen uhi. 32Sepaihte ahong pai ua, akiang a kilhden a om, tuah masakpen leh akhat pen khe ahihtansak uhi. 33Himahleh Jesu kiang ahong tun un, ana sita chih athei ua, akhete ahihtan tuan kei uhi. 34Himahleh sepaihte lak a mi khat in anak ah tei in adawt a, huchi in sisan leh tui ahong luangkhia hi. 35Huaite mupa'n atheisakta, athu theihsak adik ahi; agen dik chih akithei a, nou leng na gintakna ding un. 36Laisiangthou in, “Aguh khat lel leng hihtan ahi kei ding,” achih tangtunna ding in huai thil ahong omta hi. 37Huan Laisiangthou dang in, “Asutpa uh lam a-en ding uh,” achi hi.
Jesu Vuina
(Mat 27.57-61; Mar 15.42-47; Luk 23.50-56)
38Huan huai thilte khit in, Joseph, Arimathai mi, Jesu nungzui, Judate kihtak ziak a sim-om in Jesu luang paipih ding in Pilat kiang ah angen hi. Pilat in aphal a, huchi in ahong pai a, aluang apaipihta hi. 39Huan Nikodem, atung a zan a akiang a hong in, murrah leh aloe kihelsa buk sawmnga vel tawi in ahong pai sam hi. 40Jesu luang ala ua, Judate kivuidan bang in gimlimte toh puanmalngat hoih in atuam uhi. 41Huan kros a akilhlupna mun uah huan khat a-om a; huan ah kuamah sial ngei nailouhna han thak khat a-om hi. 42Judate kiginni ahih ziak in, han omna akiangchin uh ahih toh, huai ah Jesu asialta uhi.
Արդեն Ընտրված.
JOHAN 19: PAITBSI
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.