Gha ta Wəshi 14
14
Abram kahərə kweci ka meghe
1Ma mbe vəa shɛ ne, ntake Amrafɛl, meghea ka Mɛzopotami, Ariyok, meghea ka Ɛlasar, Kɛdorlawomɛr, meghea ka Ɛlam ba'a Tidal, meghea ka Goyim 2kampa le Bɛra, meghea ka Sodome, Birsha, meghea ka Gomore, Shinab, meghea ka Adma, Shɛmɛbɛr, meghea ka Seboyim ba'a le meghea ka Bɛla, geze ta ŋkɛ, Sowar. 3Pa ka meghe nyi mcɛfe nyi tsenete geva kwa zlərəa Sidim, geze ta ŋkɛ, ndərə kwa Ghwənəghwə. 4Va meŋe bakeghəmbe menete hɛ mbe dzeve ta Kɛdorlawomɛr, ama te kwa meŋe mahekeneghəmbe ta va ne, pa hɛ zhɛnete nda ghə. 5Ma te kwa meŋe wəfaɗeghəmbe ta va ne, pa Kɛdorlawomɛr ba'a ka meghe nyi kejikəte geva nyi ŋkɛ le hɛ kadzemte mpa. Pa hɛ ɗate ka Refay mbe Ashetarot-Karnayim, ka Zəwz mbe Ham ba'a ka Ɛmim te ŋwela ta Kiriyatayim. 6Ma ka Hor le ŋa nci ne, mbe meleme ta nci ɗate hɛ hɛ hwa ghweme ta Sɛyir. Vaŋe va Ɛl-Paran nya terasle yitea ɓerama kekate hɛ hɛ. 7Kwetere wəmbəa ŋkɛ ne, pa hɛ zhɛneke geva laka Ɛn-Mishepat, geze ta ŋkɛ, Kadɛs. Pa hɛ ɗate pɛtɛa hɛɗia Amalɛk ba'a ka Amor nyi mbe Hasason-Tamar. 8Pa ka meghe nyi mbe Sodome, Gomore, Adma, Seboyim ba'a Bɛla, geze ta ŋkɛ Sowar, hite geva yitea mpa kwa zlərəa Sidim 9le Kɛdorlawomɛr, meghea ka Ɛlam, Tidal, meghea ka Goyim, Amrafɛl, meghea ka Mɛzopotami ba'a Ariyok, meghea ka Ɛlasar: ka meghe wəfaɗe kampa le kweci mcɛfe. 10Kwele kwele ki nyi mene gwədereŋə mbeli same kwa hɛ kwa zlərəa Sidim. Ma kwa hwɛ yɛ meghea ka Sodome ba'a ŋa ka Gomore ne, pa hɛ teɗenji kwa hɛ. Ma nyi ketene ne, pa hɛ hwɛnji dzeme hwa ghweme. 11Ma mbeli nyi kehərəte ŋkwa ne, pa hɛ fəhwe wəshi nyi mbe yɛ Sodome le Gomore ba'a pɛtɛa wəshi kezeme ta nci, pa hɛ dzeghwanji. 12Ma Lot, wəzege ta wəza meghekɛa Abram ne, mbe Sodome se ŋkɛ kanza. Pa hɛ keseghe ŋkɛ ba'a fəhwe pɛtɛa wəshia ŋkɛ.
13Pa kwete wəndə nya kembelenyɛ lə kagezete nda ghena shɛ ke Abram, nde Ɛbrə nya kese kanza yitea cɛana nyi mbe Mamrɛ, nde Amor. Ma Mamrɛ ne, wəza meghekɛa yɛ Ɛshekol le Anɛr ŋkɛ. Pɛtɛa nci mahekene kambeli nyi kejikəte geva le Abram. 14Fatema ta Abram ke kese ta wəzege ta wəza meghekɛ ne, pa ŋkɛ tsenete mbelia ŋkɛ nyi gwəmsə mahekene ba'a meŋe degheseghəmbe kwa peləa ŋkɛ. Pa hɛ təkwə təkwəte ka jaga ta nci hwa'a mbe Dan. 15Pa Abram nehemte mbelia ŋkɛ mbe kawəvəsə kwele kwele kezha ha nda mpa ke ka jaga heviɗi. Pa ŋkɛ ɗate ka meghea kɛfi ba'a kekaghe hɛ hwa'a mbe Hoba, laka bela kwa gwela yitea Damas. 16Pa ŋkɛ zhɛneke pɛtɛa mcɛlə, tsagha Lot, wəzege ta wəza meghekɛ ba'a wəshia ŋkɛ, mi ba'a kweci mbeli nyi kesehwe mbeli.
17Ma kwa zhɛneke geva Abram kwetere wəmbəa nya hərəte yɛ Kɛdorlawomɛr le kweci kameghe nyi kejikəte geva le ŋkɛ ne, cape meghea ka Sodome kadzawa shɛ kwa zlərəa Shavɛ, geze ta ŋkɛ, zlərəa meghe.
Yɛ Abram le Mɛlkisɛdɛk
18Mɛlkisɛdɛk, meghea ka Salɛm nde keleke ɗafa ba'a tɛ. Nahe ŋkɛ kenza kande dzeghe nda melɛ ke Shala tehwə ghweme. 19Ntake ŋkɛ kawəpi Abram, ma ke: «Wəpikɛ Abram Shala tehwə ghweme nya kepate yɛ ghweme le hɛɗi! 20Nza zləvə te sləa Shala tehwə ghweme nya kevame ŋa ka jaga ta ŋa mbe dzeve!» Pa Abram ndeke nda kwa meŋe ta bela ta pɛtɛa wəshi nyi fəke ŋkɛ hwa mpa.
21Ma ke meghea ka Sodome sha Abram: «Fəave ɗa mbeli shɛ na fəhwe wəshi.» 22Ma ke Abram shɛ: «'Ya kakafe dzeve ta ɗa kwa kema ta Mahwətə, Shala tehwə ghweme nya kepate yɛ ghweme le hɛɗi: 23Kazeme 'ya kafela kaɗema kakele wəsəa ŋa, ya shintia wəsə keseɗa keɗema zewe ta tsahwa ŋkɛ. Tsagha ne, kategeze na: ‹'Ya nde ŋkeɗekɛ Abram›, pa we. 24Ketsakɛ ɗa wəsə we, deke wəsə kezeme nya zehwe megelɛgeshia ɗa ba'a bela nya kaŋa mbeli nyi kebeghakɛ ɗa yitea mpa yakele 'ya: Anɛr, Ɛshekol ba'a Mamrɛ. Ghenci ka tekele ŋa nci bela.»
Արդեն Ընտրված.
Gha ta Wəshi 14: BEK12
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
La Bible en langue Kapsiki avec les livres deutérocanoniques © Alliance Biblique du Cameroun 2012.