Gha ta Wəshi 13
13
1Pa Abram same kwa Ɛzhipte le male ta ŋkɛ ba'a pɛtɛa wəshia ŋkɛ kadzembe Nɛgɛv. Nahe Lot kenza yite.
Nehe ta yɛ Abram le Lot
2Nahe Abram kenza kande mcɛlə fate fate. Kwele kwele wəshi keseɗa, mze kwa tɛawetɛa ba'a mze kwa tere tere ve. 3Hɛakɛ hɛ teke hɛakɛ hɛ teke same ŋkɛ kwa Nɛgɛv hwa'a mbe Bɛtɛl, te ŋkwa nya ghate ŋkɛ kanza kwelɛ yɛ Bɛtɛl le Ay. 4Te ŋkwa nya ghate ŋkɛ kapate reghwetɛ ne, pa Abram səkwəte Shala le heka sləa ŋkɛ kaMahwətə.
5Ma Lot nya nza ŋkɛ le ne, wəshi keseɗa nyi ɓɛhwɛ ɓɛhwɛ ba'a nyi jama jama ya ve perə, tsagha yɛ cɛ lekwesa. 6Tewəmbəreke mbeli ba'a wəshi keseɗa nyi kwele kwele va hɛ ne, dewə hɛɗia shɛ kezha nza hɛ zlaɓe te. 7Pa mɛ tsehate geva kwelɛ ka ya wəshia Abram le ŋa Lot. Mbe vəa shɛ ne, te hɛɗia shɛ ka Kanan ba'a ka Pɛrɛs le nza perə. 8Ma ke Abram sha Lot: «Mba mɛ kenza kwelɛ gheɓə, kwelɛ ka ya wəshia ɗa le ŋa ŋa, va nya nza ŋkɛ hwelefe nya kwetɛŋe gheɓə. 9Mbe kema ta ŋa hɛɗi nya pɛtɛ wəka? Hendemte geva vare 'ya. Ma kenza nde dzeyi te kwa gwela na, dzeyi te kwa zeme 'ya. Kenza nde dzeyi te kwa zeme na, dzeyi te kwa gwela 'ya.» 10Kafe Lot sha ghə, pa ŋkɛ nakɛ hɛɗia Zhəwrdɛŋe: nda yɛmə nde hwɛ te. Kala ntsa ta Mahwətə se ŋkɛ hwa'a mbe Sowar, kala hɛɗia Ɛzhipte tewə Mahwətə kezamte yɛ Sodome le Gomore. 11Pa Lot ntave hɛɗia Zhəwrdɛŋe, cape ŋkɛ kadzawa laka ŋkwa nya same veci. Tsagha ne, nahe hɛ kenehemte geva. 12Pa Abram nzanyɛ te hɛɗia Kanan. Pa Lot nzanyɛ dekwede yitea meleme nyi te hɛɗia Zhəwrdɛŋe, pa ŋkɛ mɓeyi yɛ cɛ lekwesa ta ŋkɛ vaŋe mbe Sodome. 13Ma Mbeli nyi mbe Sodome ne, ka mefətekwə nyi kebeze nda ghena ke Mahwətə hɛ.
14Ma kwa nehemte geva yɛ Lot le Abram ne, ma ke Mahwətə sha Abram: «Kafete ghə te ŋkwa nya nza nya na, newe ŋkwa nya laka bela kwa gwela, laka ŋkwa kesame veci, laka ŋkwa kepəkwə ta veci ba'a laka bela kwa zeme. 15Ma hɛɗi nya newe nya na pɛtɛ ne, kateve ŋa ŋkɛ 'ya kaŋa ŋa ba'a ke hwelefefia ŋa kaghala ghala. 16Katezhɛre hwelefefia ŋa 'ya kala ndaleghe, ma nda kaɓelate ndaleghe mbeli ne, wərə mbeli kaɓelate hwelefefia ŋa perə. 17Kwiɗi dzaslemte hɛɗi nya kala biya ta ŋkɛ ba'a bezlea ŋkɛ, va nya nza ŋkɛ kateve ŋa ŋkɛ 'ya.» 18Ntəŋə Abram le yɛ cɛ lekwesa ta ŋkɛ se kanzanyɛ yitea cɛana nyi mbe Mamrɛ, dekwede yitea Hɛbron. Pa ŋkɛ pate nda reghwetɛ tagha ke Mahwətə.
Արդեն Ընտրված.
Gha ta Wəshi 13: BEK12
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
La Bible en langue Kapsiki avec les livres deutérocanoniques © Alliance Biblique du Cameroun 2012.