MARKUS 15
15
Pinauma' i Jisus ri Pilatus
(Mat. 27:1-2, 11-14; Luk. 23:1-5; Jua. 18:28-38)
1Ra iosuabon, tingganai imam Jaudi, tingganai ru ulun ru Jaudi, mangingila' ra Ukum ri Musa am ulun Majlis Ugama ra bokon, nagindibok nansusunur. Rantayo' nilo i Jisus, paumaa' am pataaki' nilo Io ra gabenor Pilatus. 2Pangkuot i Pilatus ri Jisus, “Topot kia Okou no raja' ru ulun ru Jaudi?”
“Okou galama' minindagu,” kon ri Jisus.
3Tingganai imam Jaudi nambaal masuang ragu manguu' ri Jisus. 4Kuati' poyo ri Pilatus i Jisus, “Kalo kia masaga' Kou tumaam? Ilai', mumpara' boo suang ru ragu manguu' Rirun ti!”
5Kaa' kalo niayuk tinaam ri Jisus, saboi nakasioro' i Pilatus.
Ukum ra potoyon pinataak ri Jisus
(Mat. 27:15-26; Luk. 23:13-25; Jua. 18:39—19:16)
6Paat ra moonong Pangiantakan ra Paska, kaindalaman ri Pilatus mampalabus sangulun inaput maya' ra kasagaan ru ulun masuang. 7Ralalom ru pangaputan, mokoondo' sangulun ungkuyon makainggalan ri Barabas ondo' minaya' pampatoi ra ulun paat ra ulun masuang minanggal ra karajaan. 8Ratong ulun masuang ri Pilatus am makitaak ilo ra palabuson sangulun inaput koson ra kaindalaman. 9Pangkuot i Pilatus risilo, “Masaga' kau kia ra palabuson ku raja' ru ulun ru Jaudi ti ramuyun?” 10Napandayan ri Pilatus ra tingganai-tingganai imam Jaudi no nampataak ri Jisus riso sabap ra sumolon ilo.
11Kaa' tingganai-tingganai imam Jaudi no nanusuk ra ulun masuang koson manusub ri Pilatus mampalabus ri Barabas risilo. 12Indagu poyo i Pilatus ra ulun masuang no, “Amon ru koson raginio, atan baalon ku ra ulun sabiton min ra raja' ru ulun ru Jaudi no?”
13Golok ilo, “Salipo' Io!”
14Pangkuot poyo i Pilatus, “Kaa' atan kalaatan Nati?”
Kosongowo' nilo poyo golok nilai, “Salipo' Io!”
15Palabuso' boo ri Pilatus i Barabas risilo, sabap ra mampakaansuk ra guang nilo. Panusub io boo ra ulun mampalapos ri Jisus am pinoloso no salipon.
Nagasab saujor-saujor ri Jisus
(Mat. 27:27-31; Jua. 19:2-3)
16Inibit i Jisus ru saujor-saujor ra liliut ru Panalasayan giu' ra istana ru gabenor. Piawo' boo sampulalai saujor ra bokon tumimung. 17Pambayango' nilo i Jisus ra sukub matanggilung, am pambaal ra karaun intor ra bulisang ra makaruui am pasampako' ra ulu ri Jisus. 18Kopongo ragili, tumalimpuun ilo manabi' ri Jisus, konilo, “Tabi', raja' ru ulun ru Jaudi!” 19Lambaa' nilo ulu ri Jisus ra tataun, tiwagi' nilo Io, igulatur samba ilo Riso. 20Kaasabi' nilo i Jisus, iruo' nilo sukub matanggilung i am pambayango' nilo ra bayang Nali galama'. Ibito' nilo boo i Jisus miningkual ra ongoyon salipo'.
Sinalip i Jisus
(Mat. 27:32-44; Luk. 23:26-43; Jua. 19:17-27)
21 #
Rm. 16:13
Tatanga' ru ralan, jajali' nilo sangulun ungkuyon nansaan ra salip ri Jisus. Ulun i bagu ayuk poyo intor ra pamagunan am masaga' sumubol ra bandar Jirusalim. (Inggalan nano i Simon. Intor io ra bandar Kirini, ama' ri Aliksandir am i Rupus.) 22Inibit i Jisus ra rondo' intok ininggalanan ra Golgota, ondo' arati' nano, ‘Intok kuapak’. 23Giu' i, mangani' ilo Riso ra anggur naratok ra mur, kaa' kalo masaga' i Jisus manginum. 24#Mzm. 22:19Salipo' nilo boo i Jisus. Bayang Nano tinayar-tayar nilo, am nagugundi' ilo koson mangaru' ra alapon ru sasangulun. 25Nanalipan Riso no paat jam kasiam ra iosusuab. 26Rasawat ru salip i, pinolokot nilo ra ragu manguu' Riso. Gitio noyo ondo' tinulisan raginio, “Raja' ru Ulun Jaudi.” 27Nababaya' ri Jisus, sinalip nilo ruo ngaulun mantatakou; sangulun sinalip tampilon ra pamiris am sangulun sinalip tampilon ra kait. [28#Jis. 53:12Kon raginio nasauk noyo ondo' tinulisan ra Buuk Kitab, koson ragitio, “Kinara' Io ra ulun malaat.”]#Kukula' naskhah nakalair kolondo' ayat ragitio.
29 #
Mzm. 22:8; 109:25; Mrk. 14:58; Jua. 2:19 Ulun-ulun ondo' nansail ra giu' i pisik-pisik ilo nagasab ri Jisus, konilo, “Oi, napasat Kou raino! Masaga' Kou mampalunsai ra Baloi Tuhan am baalon Mu saguli' ralalom talu ngoorou! 30Kinam tuun intor ra salip no am ibayag galama'!”
31Koson niayuk ra tingganai imam Jaudi am mangingila' ra Ukum ri Musa no, magasab ilo ri Jisus. Mindagu ilo ra rondo' am bokon, “Ulun ra bokon bayagon No, kaa' Io galama' kalo! 32Amon ru raja' Io ru ulun ru Israil, Mamamayag ondo' sinusub ri Aki Kapuuno' i, moonsoi tumuun Io intor ra salip, maa' raginio makakito am mangintopot takau Riso!”
Ulun ondo' sinalip nababaya' ri Jisus i pana nangiis Riso.
Pinatayan ri Jisus
(Mat. 27:45-56; Luk. 23:44-49; Jua. 19:28-30)
33Paat ra tanga' ru orou, buoi talu nganjam ngaangai' pagun no molondom. 34#Mzm. 22:2Nakapaat ra jam katalu ra iomamai', i Jisus giminolok ra mosongou kaga', “Iloi, Iloi, lama sabaktani?” ondo' arati' no, “I Aki Kapuuno' Kuno, i Aki Kapuuno' Kuno, kua iruani' Mu Aku?”
35Kukula' ngaulun ondo' nokorongog ra golok i mindagu, “Rongogo' min, nampiau Io ri nabi Ilia!” 36#Mzm. 68:22Sangulun intor risilo pagindibok ongoi pangalap ra busak karang ondo' malami' am pososopo' no ra anggur mataris. Pasusuko' ra pompor ru rondo' tataun, am patunjako' ra bibil ri Jisus, liliwa' minindagu, “Inaani' takau! Ilai' takau ru matong i Ilia mampatuun Riso intor ra salip no.”
37Golok boo i Jisus am patoi.
38 #
Kai. 26:31-33
Tabir panili ondo' pinatair ra Baloi Tuhan narilak kapiruo intor ra rasawat suku' ra gana'. 39Tingganai ru saujor ondo' minigor ra tuma' ru salip i, nakakito ati kulaan i Jisus patoi.#patoi; Kukula' naskhah nakalair: giminolok am patoi. Tingganai ru saujor i mindagu, “Motopot toojo ulun ti Anak ri Aki Kapuuno'!”
40 #
Luk. 8:2-3
Giu' i mokoondo' niayuk kukula' ngaulun ruandu' ondo' nagilong ra ngaangai' baal ti intor ra maalur. Intor risilo am i Salomi, Maria Magdalina am i Maria, ina' ri Josis am i Jakubus Mamulok. 41Ilo no masalok maya' am mangindangan ri Jisus paat ra Io soroi ra Galilia. Mokoondo' masuang poyo ruandu' ra bokon ra giu' i minatong ra Jirusalim nababaya' ri Jisus.
Nampalabangan ri Jisus
(Mat. 27:57-61; Luk. 23:50-56; Jua. 19:38-42)
42-43Orou mamaar noyo lumondom paat ri Jusup, ulun ru Arimatia, minatong. Io sangulun suang ru Majlis Ugama ondo' urumaton ru ngaangai' ulun. Io galama' naginaa niayuk ri Aki Kapuuno' tumalimpuun mamarinta. Orou ragili orou Tampasan (ioti am songorou kalo poyo orou Sabat), sabap raginio, baani i Jusup minuma' ri Pilatus am kitaako' no baangkai ri Jisus. 44Nangimuag i Pilatus nangkirongog ra minatoi noyo i Jisus. I Pilatus nampiau ra tingganai ru saujor i koson mangkuot ra nabuoi noyo kia i Jisus minatoi. 45Pakaining ayuk ra ragu ru tingganai ru saujor i, polosoo' ri Pilatus i Jusup mangalap ra baangkai ri Jisus i. 46Pambali i Jusup ra konoon linon. Kopongo nampatuun ra baangkai ri Jisus i, kulumputo' no ra konoon i. Paulio' no boo baangkai i ralalom rondo' lobong ondo' bagu ayuk poyo kalio' ra bulur batu. Kopongo ragili, luiro' no rondo' batu maayo koson mangangob ra luang ru lobong no. 47Liliwa' ragili, i Maria Magdalina am Maria ina' ri Josis nakakito ati napabantaan ra baangkai ri Jisus i.
Jelenleg kiválasztva:
MARKUS 15: TMT
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Hakcipta © Bible Society of Malaysia, 2013.
