MARKUS 14

Mangatang mamatoi ri Jisus

(Mat. 26:1-5; Luk. 22:1-2; Jua. 11:45-53)

1Pangiantakan ra Ruti' Kalo Linatakan ra Ragi am Pangiantakan ra Paska, karuaan poyo am tumalimpuun. Tingganai imam Jaudi am mangingila' ra Ukum ri Musa maguyum ra ralan koson mamparakop am mamatoi ri Jisus, koson kalo mapandayan ru ulun ra bokon. 2Kaa' konilo, “Pai' takau sasati' ra paat ru pangiantakan, sabap ra mamagun no kumuliangi-angi lair.”

Inumau i Jisus ra umau maamis owou giu' ra Bitania

(Mat. 26:6-13; Jua. 12:1-8)

3 # Luk. 7:37-38 Paat ragili i Jisus soroi ra Bitania, giu' ra baloi ri Simon ondo' ra galing i makamaruol ra kungkung ondo' maaja'. Paat ra ilo nagagakan, ratong sangulun ruandu' nagibit ra butul pualam makasuang ra umau maamis owou narwastu#Ilai' ra Kamus. ondo' mologo kaga'. Kopongo namabak ra liog ru butul no, pabuuro' no umau i ra ulu ri Jisus. 4Ra giu' i, mokoondo' kukula' ngaulun siminangit am nagindagu ra rondo' am bokon, “Kua lubato' umau maamis owou no? 5Sabap ra umau raginio maalap katalan masailan poyo talu ngaatus ruit pirok,#ruit pirok: Ilai' ra 6:37. am tatayaron ra ulun musikin.” Sangiti' nilo boo ruandu' no.

6Kaa' indagu i Jisus, “Polosoo' min io no. Kua sangit kau riso? Nambaal io ra kandoi moonsoi Raki'. 7#Kai. 15:11Ulun musikin masalok soroi ramuyun am makapangindangan kau risilo ra sasanggilan ayuk, kaa' Aku kalo boo masalok mababaya' ramuyun. 8Ruandu' ti nambaal ra atan malulu' no kabaal. Nampabuur io ra umau no ra inan Kutu koson namintor ra pampalabangan Raki'. 9Balain takamin: Ati ayuk papatanawan ra Tanou Moonsoi ra tana' ti, ondo' binaal ru ruandu' ti patunungon niayuk koson mangkara' riso.”

Nangiou i Judas mampataak ri Jisus ra pantula' Nano

(Mat. 26:14-16; Luk. 22:3-6)

10Ugar boo i Judas Iskariot, sangulun intor ra mopor am ruo ngaulun maamaya' ri Jisus no, tumuum ra tingganai imam Jaudi sabap ra guang nano mampataak ri Jisus risilo. 11Naansukan kaga' tingganai imam Jaudi paat ra nangkirongog am bantu' nilo mangani' riso ra ruit. Kopongo ragili mampaguang io ra orou moonsoi pataakon no i Jisus risilo.

Nagagakan i Jisus am maamaya' Nali ra akanon ru Pangiantakan ra Paska

(Mat. 26:17-25; Luk. 22:7-14, 21-23; Jua. 13:21-30)

12Paat ra orou kasaa' ra Pangiantakan ra Ruti' Kalo Linatakan ra Ragi, paat ra ulun manimbalui ra anak domba ru Pangiantakan Paska, maamaya' ri Jisus no mindagu Riso, “Ati intok kasagaan Muno ra pagakanan ru Paska?”

13Panusub Io boo ra ruo ngaulun maamaya' Nano am bilini' No, “Ongoi kau ra bandar. Makatuum kau ra sangulun ungkuyon ondo' muli' nansagou am baya' kano riso. 14Paat io sumubol ra baloi kuati' min tatangan ra baloi no, kamin, ‘Bilin ru Mangingila', Ati kia lamin sinadia' Raki' koson pagakanan ru Paska mababaya' ra maamaya' Kuno?’ 15Tuluin kau boo ru ulun no rondo' lamin ra rasawat ondo' maayo, ondo' sinadiaan ra ngaangai' kuliamos. Ra giu' no sadiaa' min noyo ngaangai' ritakau!”

16Pintor noyo boo ruo ngaulun maamaya' no am pakasuku' ilo ra bandar. Kakito nilo ngaangai' koson ra rinagu ri Jisus risilo. Sadiaa' nilo boo pagakanan ru Paska no.

17Io rondom, ratong i Jisus nabaya' ra koopor am ruo ngaulun maamaya' Nali. 18#Mzm. 41:10Paat ra ilo nagagakan indagu i Jisus, “Balain takamin: pataakon Aku ru sangulun intor ramuyun ra pantula' – sangulun ondo' raino ti mangakan gumulung Raki'.”

19Maamaya' Nali mangiluk boo guang nilo. Rorondo' ilo nangkuot ri Jisus, “Sala' ka aku, kon Muno?”

20Taam i Jisus, “Akau mopor am ruo ngaulun, io no sangulun intor ramuyun. Gumulung io ra akanon am papatunjakan Kuno ra ruti' ti. 21Maaru' Anak ru Ulun matoi koson ra tinulisan ralalom ru Buuk Kitab; Kaa' mumpara' boo pagon ra maagu no ru ulun ondo' mampataak Riso ra pantula'! Moonsoi poyo amon ru kalo inanak ulun raginio!”

Pagakanan ru Tuhan

(Mat. 26:26-30; Luk. 22:14-20; 1 Kor. 11:23-25)

22Paat ri Jisus am maamaya' Nali magagakan, alapo' ri Jisus ruti' am indagu Io paringkuanangan ri Aki Kapuuno'. Pipilango' No boo am taaki' No risilo, indagu Io, “Alapo' noyo, gitio noyo inan Kutu.”

23Kopongo ragili, alapo' No sangkir am indagu Io ra paringkuanangan ri Aki Kapuuno'. Taaki' No boo risilo, am ngaangai' nilo nanginum intor ra sangkir no. 24#Kai. 24:8; Jir. 31:31-34Indagu i Jisus risilo, “Gitio noyo raraa' Kutu, raraa' nabantuan ri Aki Kapuuno' ondo' pasasaron ra masuang ulun. 25Balain takamin: Sotopot no kalo boo manginum Aku ra anggur saboi Aku manginum saguli' ra anggur baguon giu' ra Tana' Bagu ri Aki Kapuuno'.”#Tana' Bagu ri Aki Kapuuno'; Harfiah: Karajaan ri Aki Kapuuno'.

26Kopongo ilo narimbai ra rondo' rimbai mongompor ri Aki Kapuuno', ongoi ilo boo ra Bulur Jaitun.

Manala' i Jisus ra magali' i Pitrus Riso

(Mat. 26:31-35; Luk. 22:31-34; Jua. 13:36-38)

27 # Ja. 13:7 Indagu i Jisus risilo, “Akau ngaangai' magiru' manatang Raki'. Sabap ra tinulisan noyo ra Buuk Kitab, ‘Potoyon ri Aki Kapuuno' magagalung no, am ngaangai' domba nano mantutuliar.’ 28#Mat. 28:16Kaa' mopongo Aku bayagon saguli', sumigulu Aku ramuyun mongoi ra Galilia.”

29Indagu i Pitrus, “Polosoon noyo ngaangai' ilo manatang Rirun, kaa' aku ti kalo.”

30Kon ri Jisus, “Balain tokou: Rondom ra raiti' niayuk, ra kalo poyo minduo paningkuluuk manuk tandaa' no, intalu kou no pagali' ra okou kalo nakaulig Raki'.”

31Kaa' ansang i Pitrus, kono, “Ati kulaan mindagu aku ra kalo nakaulig Rirun? Matoi aku pana marumar ayuk Rirun!”

Ngaangai' maamaya' ra bokon no pana minindagu koson raginio.

Makiasi' i Jisus giu' ra Gitsimani

(Mat. 26:36-46; Luk. 22:39-46)

32Pakasuku' ilo ra rondo' intok ininggalanan ra Gitsimani, indagu i Jisus ra maamaya' Nali, “Panturung kau ragiti buoi Aku mongoi pakiasi'.” 33Kimaiti' boo ri Jisus i Pitrus, Jakubus am i Juanis mabaya' Riso. Magalabo am mangiluk toojo guang Nali. 34“Mangiluk kaga' guang Kutu, koson matoi pampalimanan Kuno. Paginaa kau ragiti am pai' kau pombolong,” ragu Nano ra katalu ngaulun pinaaya' Nali.

35Ongoi i Jisus ra maalur koborok i am kubu Io ra tana' am pakiasi'. Nakitaak Io amon ru maalap ayuk, pasailon Io ra orou kaimbalaan no. 36Indagu Io, “Ama', O Ama'! Kolondo' rondo' pana ondo' kalo mabaal Muno. Painggaluro' noyo sangkir kaimbalaan ti intor Raki', kaa' pai' noyo gagayaa' kasagaan Kutu, kaa' kasagaan Muno ayuk.”

37Saguli' boo i Jisus, ilai' No katalu ngaulun pinaaya' Nali nombobolong. Indagu Io ri Pitrus, “Simon, nombolong kou kia? Kalo kia makapaginaa kou saboi sanjam?” 38Indagu boo i Jisus risilo, “Ilalai' min am pakiasi' kau koson kalo maratu' kau ra pangkinaman. Sotopot no, ambiluo mino masaga' mambaal ra motopot kaa' kalo gumagaya' kau sabap ra paliso ru ulun malawo.”

39Igondo' poyo i Jisus minongoi pakiasi' am nogondo' ayuk ra pakiasian No ra raitii' ni. 40Saguli' Io poyo ra intok ru maamaya' Nali am ilai' No nombobolong ilo po saguli'. Matikoolong ilo kaga' am kalo nakapandai ilo ra atan boo paraguon nilo ri Jisus.

41Paat ra kaintalu Io siminaguli', indagu i Jisus, “Lakat ayuk poyo mombolong am tumangus kau kia? Sama' noyo! Nasuku' noyo ra Anak ru Ulun pataakin ra kuasa' ru ulun makatula. 42Tirong kano am ugar takau. Ilai', io ondo' mampataak Raki' nakaratong noyo!”

Rinakop i Jisus

(Mat. 26:47-56; Luk. 22:47-53; Jua. 18:3-12)

43Lakat ayuk poyo i Jisus mindagu, ratong i Judas. Io ti sangulun intor ra koopor am ruo ngaulun maamaya' ri Jisus. Minatong io nababaya' ra ulun masuang ondo' nagibit ra ilang am tataun lalamba'. Sinusub ilo ru tingganai imam Jaudi, mangingila' ra Ukum ri Musa am tingganai ru ulun ru Jaudi no. 44Ulun nampataak Riso nambaal kalalair ra rondo' tatandu' risilo: “Ulun ondo' umaan am alakin kuno, Io ginio. Rokopo' am ibito' min Io am alungi' toojo,” kono risilo.

45Ratong i Judas, parayus io ongoi ri Jisus am indagu, “Mangingila'!” Alaki' no boo i Jisus. 46Ulun-ulun ondo' minatong nababaya' ri Judas i namparakop ri Jisus am guuto' nilo toojo. 47Kaa' sangulun ondo' soroi ragili nampaakang ra ilang nali am piriso' no talingo ru ulipon ru Tingganai Maayo Imam Jaudi i. 48Indagu i Jisus risilo, “Ulun malaat Aku kia, saboi akau minatong nagibit ra ilang am tataun lalamba' koson mamparakop Raki'? 49#Luk. 19:47; 21:37Moonong orou nangila' Aku giu' ra Baloi Tuhan ra tatanga' min, am kalo rinakop min Aku. Kaa' inaru' noyo masauk atan ondo' tinulisan ra Buuk Kitab.”

50Ngaangai' maamaya' ri Jisus nangiruan Riso.

51Mokoondo' sangulun tuu'-bagu siminunu' ri Jisus, nansabuk ayuk ra sampila' konoon. Kinamin nilo rokopo' 52kaa' labaso' no konoon i am nagibabaang ayuk io nagiru'.

Inibit i Jisus ra Majlis Ugama ru Jaudi no

(Mat. 26:57-68; Luk. 22:54-55, 63-71; Jua. 18:13-14, 19-24)

53Inibit i Jisus giu' ra baloi ru Tingganai Maayo Imam Jaudi. Giu' i, ngaangai' tingganai imam Jaudi, tingganai ru ulun ru Jaudi am mangingila' ra Ukum ri Musa no timinimung. 54Siminunu' i Pitrus ri Jisus intor ra maalur polos nakasubol ra liliut baloi ru Tingganai Maayo Imam Jaudi i. Giu' i, nanturung io am riminarang nababaya' ra saujor-saujor. 55Tingganai imam Jaudi am ngaangai' Majlis Ugama mirot toojo maguyum ra kaintutunan ondo' mampasala ri Jisus maa' raginio maukuman nilo Io ra potoyon. Kaa' kolondo' rondo' naalap nilo. 56Masuang sasi' magabau piniau, kaa' ragu nilo kalo nogogondo' ra rondo' am bokon.

57Bigor kukula' ngaulun sasi' am nangani' ra kaintutunan magabau ri Jisus. 58#Jua. 2:19Konilo, “Nokorongog akai ra ulun ti minindagu, ‘Lunsayon Ku Baloi Tuhan ondo' binaal ru ulun, am mopongo talu ngoorou, baalon Ku sagulio' Baloi Tuhan ra bokon ondo' sala' ka baalon ru ulun.’ ” 59Kaa' kaintutunan ru ulun-ulun raginio niayuk nansasala' ra rondo' am bokon.

60Bigor Tingganai Maayo Imam Jaudi no ra tatanga' ru Majlis am pangkuot ri Jisus, “Kolondo' kia pataamon Muno ra ragu manguu' Rirun?”

61Nongkoror ayuk i Jisus am kalo tinaam No. Kuati' poyo ru Tingganai Maayo Imam Jaudi i, “Okou kia Mamamayag ondo' sinusub i,#Mamamayag ondo' sinusub ri Aki Kapuuno'; Harfiah: Kristus. Anak ri Aki Kapuuno' Ondo' Matulai Kaga' i?”

62 # Dan. 7:13 Taam i Jisus, “Iou, akau ngaangai' makakito ra Anak ru Ulun manturung ra pamiris ri Aki Kapuuno' ondo' Maayo Kaga' Kuasa'. Makito min niayuk Io matong ralalom ru gaun giu' ra limbowon.”

63Rilako' ru Tingganai Maayo Imam Jaudi i bayang nali galama', sabap ra nakatigog am siminangit io toojo nakaining ra ragu ri Jisus ni am indagu, “Kalo pana rongogon sasi' ra bokon! 64#Im. 24:16Nakaining kano galama' ra ragu magasab Nani. Raino atan boo ukum min?”

Ilo ngaangai' nangiou ra makasala i Jisus, am musiti' ukumin ra potoyon.

65Nantiwog boo kukula' ngaulun ri Jisus. Mokoondo' poyo nanili ra mato Nano am linamba' nilo. Konilo, “Kinami' sabito', osoi nampalamba' Rirun?” Saujor-saujor pana minaya' panampiling Riso.

Nagali' i Pitrus ri Jisus

(Mat. 26:69-75; Luk. 22:56-62; Jua. 18:15-18, 25-27)

66Lakat ayuk poyo i Pitrus soroi ra liliut ru baloi i, ratong sangulun ruandu' ulipon ru Tingganai Maayo Imam Jaudi. 67Kakito no i Pitrus riminarang ra giu' i, uligi' no toojo bulos ri Pitrus am indagu, “Okou niayuk masalok maya' ri Jisus, ulun ru Nasarit no.”

68Kaa' pagali' i Pitrus, kono, “Atan rinagu muni? Kalo nakarati' aku.” Ingkual boo i Pitrus minongoi ra susubalan ru baloi no. [Paat ragili naningkuluuk manuk tandaa' i.]#Kukula' naskhah nakalair kolondo' ragu ragitio.

69Ulipon ruandu' i nakakito poyo ri Pitrus. Balai' no ulun ra giu' i, “Ulun ragitio maaru' sangulun intor ra maamaya' ri Jisus no!” 70Kaa' alio' poyo ri Pitrus.

Kalo nabuoi ragili, ngaangai' ulun ra giu' no mindagu ri Pitrus, “Pai' pagali', maaru' okou sangulun intor risilo, sabap ra okou ulun ru Galilia!”

71Pagibot boo i Pitrus, kono, “Amon ru topot aku po nakaulig ra ulun ti, kaluus aku no!”

72Paat ragili niayuk kainduo ru manuk tandaa' i naningkuluuk. Kakara' boo ri Pitrus ragu ri Jisus riso, “Kalo poyo minduo paningkuluuk manuk tandaa' no, intalu kono indagu kalo makaulig Raki'.” Pantatangi' boo i Pitrus.

Jelenleg kiválasztva:

MARKUS 14: TMT

Kiemelés

Megosztás

Másolás