Luka 15

Cikozhano ca Mbelele Inzhimini

(Matayo 18:12-14)

1 # Lk 5:29, 30 Inzho bashimitelo u bashishibi batakaakucilila mulawo bakeza kupupulala nshaakaakuyiisha Jeso, 2ba Falisi u ba maayi ba Mulawo bakakanka kutongauka ati, “Wezu muntu ulatambula ba shishibi ukulya abo.” 3Ubobo Jeso wakabaambila cikozhanyo ceci:

4“Kuti umwi wenu kakwete imbelele shili mwaanda, imwi yazhimina, sa takonzha kushishiya mwisokwe shili makumi ali ifwuka ushitwesha shili ifwuka kwaamba akapule yezho yomwi yazhimina mpaka eeyane? 5Amana kwiiyana ulabotelwa cini cini, uleebweza imbelele ukwiibika amafwunzhi, 6ukwiitola kuŋanda yakwe. Inzho ashika uloompolola balongwaakwe ubashimukobonina u kubaambila ati, ‘Atusekelele antoomwi kaambo ndeebona imbelele yangu yaakuzhiminine.’ 7Ndamushimwina ati, umbona bobo ako kwizeulu kulakaba kusekelela cini cini ukaambo kashishibi womwi usanduka, kubaala bali makumi ifwuka ubatwesha bali ifwuka babo batazeezhiwa kusanduka.

Cikozhano celi Lyakazhimina

8“Natwaambe ati, umwi mukaintu kakwete mali a siliva ali ikumi, no ulacita buti kuti wazhimininwa ili lyomwi amali azo? Sa tasonsa ilambe, ukupeela muŋanda, u kukapula koonse bulyo mpaka aliyane? 9Inzho aliyana uloompolola balongwaakwe boonse mbucibambene abo, ulabaambila ati, ‘Atusekelele antoomwi, kaambo ndalibona ili lyangu lyaakuzhiminine.’ 10Ndamushimwina ati, umbona bobo kulakaakuli kusekelela cini cini ku baanjelo baka Leza ukaambo kashishibi womwi wasanduka!”

Cikozhano ca Mwana Wakazhimina

11Ulimwi Jeso wakaamba ati, “Kakuli muntu umwi wakaakukwete bana balombwana bobile. 12Mucece wakamwaambila ushi ati, ‘Taata mpa lubono lweelele kuba lwangu.’ Ngoonaawo ushi wakalwaabanya lubono lwakwe ku banakwe bobile. 13Nikwakaita mazuba mashoonto bulyo, mucece wakabika antoomwi lubono lwakwe, amane wabweza mushinzo wakuya ku cishi ca kulaale, koko nkwakaya kulusangaula lubono lwakwe loonse mu shintu shabulimbushi. 14Inzho naakamana kulusangaula lubono lwakwe, kwakaba inzala inkando mucishi coonse ceco, ubobo wakakanka kupenga. 15Wakaya kunjila mulimo ku muntu umwi wamucishi ceco kwaamba asebezele cakulya. Inzho muntu wezo wakamupa mulimo wakweembela ingulube. 16Wezu mwana yakamuyaya inzala cakuti wakakanka kulikumbuzha masakalala amuunga akaakulya ingulube, kaambo kwiina muntu wakaakumupa cakulya. 17Ku mamanino wakalitwelusha ati, basebezhi baka taata boonse balalya balakuta balalilecela, pele ume kono ndafwa inzala! 18Inzho ndazhimuka ndukuya kwa taata, nkamwaambile ati, taata, ndabishizha Leza aze ndaakubishizha, 19ubobo nsheelele kutewa ati ndimwanako, undele ukoya uumwi wabasebezhi bako. 20Ngoonaawo wakazhimuka wabweela kwa ushi.

“Inzho naakaakwiza kacili alaale, ushi wakamubona, wakeetezhewa, wakamulukancila waya kumukumbata wamushonta ca kubotelwa. 21Ngoonaawo mwanakwe wakamwaambila ushi ati, ‘Taata ndakabishizha Leza, ulimwi ndakakubishizha aze, nsheelele kutewa ati ndimwanako.’ 22Pele ushi waketa basebezhi bakwe wabaambila ati, ‘Amufwambaane! Kamuya mulete icanshi ibotu mumusamike, iinweenwe mumusamike, ulimwi mumusamike iimpato. 23Inzho kamuya mukalete moombe mwiinu wamafwuta mumuyaye kwaamba tulye tusekelele. 24Nkaambo wezu mwanangu kafwile pele wabuka, kazhiminine pele wabonwa.’ Ngoonaawo bakakanka kulya ipobwe u kusecelela.

25“Ku ciindi ceco mwanakwe mukando kali ku muunda. Naakazhoka, ashike afwaafwi iiŋanda wakateelela bantu balaimba ukuzhana ukuulubwizha. 26Ubobo wakoompolola musebezhi umwi wakamubuzha cakaakucitika. 27Musebezhi wakamwiingula ati, ‘Munyoko wazhoka, uso wamuyayila moombe mwiinu wamafwuta, wabotelwa kaambo mwanakwe wazhoka mumi.’ 28Pele mukando wakabiilwa wakaka kunjila muŋanda. Ngoonaawo ushi wakahwa ansengwe kuya kumupembelezha kwaamba anjile. 29Walo wakamwaambila ushi ati, ‘Taata bona! Myaka yezhi yoonse minji minji njindakusebezela ukoya muzhice. Ndiina indaakaka malailile ako nibuba buzuba bomwi. No ncinzhi ncuumpele? Kwiina niwakampa nikaba kapongo bulyo kakwaamba tulye ubalongwaangu! 30Pele mbwaashicila bulyo wezu mwanako wakaya kuzonauna lubono lwako loonse ku bakaintu, wamuyayila moombe mwiinu wamafwuta.’ 31Ushi wakamwiingula ati, ‘Mwanangu tuli aze mazuba oonse, shoonse nshinkwete nshako. 32Pele ncibotu kwaamba tusekelele u kubotelwa bwasunu kaambo wezu munyoko kafwile inzho wabuka, kazhiminine inzho wabonwa.’”

Jelenleg kiválasztva:

Luka 15: ILL

Kiemelés

Megosztás

Másolás