Luka 14

Jeso Kuŋanda yamu Falisi

1Mu buzuba bumwi bwa Sabata Jeso wakaya kulya kuŋanda ya mukando waba Falisi, bantu boonse bakamulanjisha. 2Inzho muntu umwi wakeza kwa Jeso, kazhimbile mubili. 3Inzho Jeso wakababuzha bashi Mulawo ati, “Sa Milawo yesu ilatuhuminya kushilika mu buzuba bwa Sabata na pe?” 4Pele kwiina wakaingula. Ngoonaawo Jeso wakamukwata muntu wezo wamuponya, amane wamuleka waya. 5#Mat 12:11Inzho wakabaambila ati, “Sa kuti umwi wenu kakwete mwana mulombwana, naa iŋombe yawila mumukalo mu buzuba bwa Sabata, sa teekusha umukalo mu buzuba bobo mbubona?” 6Pele bakakacilwa kumwiingula kukaambo kaka.

Kulibonzha Ukutambula Beenzu

7Inzho Jeso naakabona ati bamwi bantu bakaakutambilwe kwipobwe bakakanka kulisalila masena aakukala a bulemu, wakabaambila kaano kaka, 8#Tush 25:6, 7“Kuti na muntu wakutamba kwipobwe lya bwinga, utakakala acuuna cibotu ca bulemu. Kulaba nikwiza muntu uumwi ukubaala bulemu, 9amana shimeenzu ako wakakutamba akeze kukwaambila ati, ‘Mupe cuuna wezu muntu.’ Ukalakafwa insoni kuzhimuka u kuya kukala acuuna citali ca bulemu. 10Ubobo, kuti watambwa, ulyeelele kusala cuuna citali ca bulemu, kwaamba shimeenzu ako ashika akwaambile ati, ‘Mulongwaangu zhimuka, koya kumbele kushuuna shabulemu.’ Ubobo ulakakwata bulemu kumenso a beenzu noko. 11#Mat 23:12; Lk 18:14Nkaambo kufwumbwa muntu ulisumpula ulakafwiinshiwa, pele muntu ulifwiinsha ulakasumpulwa.”

12Inzho Jeso wakamwaambila shimeenzu akwe ati, “Ciindi niwabamba cakulya cakususula niciba cakulalila, utatambi balongwaako na banyoko, nibaba bahubi mbumubambene abo, nkaambo abo balakakutamba kwaamba bakuliye. 13Na wacita ipobwe, tamba bapushi, u balema, utambe basunkuta u boofwu. 14Wacita bobo, ulaakwata coolwe nkaambo balo bayina cakuya kuzhola. Leza nguukaakuliya mu buzuba bobo baluleme nibakaabuka ku bafwu.”

Cikozhano ce Pobwe Ikando

(Matayo 22:1-10)

15Inzho umwi wabalombwana bakaakushite kwitebulu naakaateelela aza makani, wakamwaambila Jeso ati, “Bali u coolwe babo bakaalya ipobwe mu Bwami bwa Leza.”

16Jeso wakamwaambila ati, “Kakuli muntu wakacita ipobwe ikando ukutamba bantu banji banji. 17Inzho nicakashika ciindi cakulya ipobwe, wakatuma musebezhi wakwe kwaamba akabete boonse mbakaakutambile ati, ‘Kamwiza shoonse shabambwa.’ 18Pele batambe bakakanka kutama. Mutaanzhi wakaamba ati, ‘Ndalomba kulekelelwa kaambo ndakaula muunda ndazanda nkoobone.’ 19Umwi wakaamba ati, ‘Ndakaula shipani shosanwe shabasune ndazanda kubasoleka mbone mbubakwela.’ 20Aze umwi ati, ‘Indacitwala, nshikonzha kumushiya nabwinga ice.’ 21Inzho musebezhi wakazhoka kwiza kwaambila shimatwangaakwe. Shimatwangaakwe wakalemana u kwaambila musebezhi ati, ‘Fwambaana koya mu mikwakwa umutuzhila twamuminzhi yoonse, ukatambe bapushi u balema u boofwu ubakonaushi.’ 22Naakapiluka musebezhi wakaamba ati, ‘Mwami ndacita mbubona mbuwandailila, pele kucili busena muŋanda.’ 23Shimatwangaakwe wakamwaambila ati, ‘Koya mu tuzhila twamumatungu utuzhila twamumabali ubaambile bantu bezhize kwaamba iŋanda izule.’ 24Ndamushimwina ati, kwiina naaba womwi wa babo bakaakutambilwe ukaalisola ipobwe lyangu!”

Muulo Wakuba Shiciiya

(Matayo 10:37-38)

25Inzho inkamu inkando ya bantu bakaakuya bumucilila Jeso, ngoonaawo wakacebuka wabaambila ati, 26#Mat 10:37“Kuti muntu kazanda kuba shiciiya wangu, ulyeelele kumfwuna kubaala mbwaafwini ushi u baina u mwinakwe ubanakwe, u banina balombwana u bakaintu, ulimwi u bumi bwakwe mwini. 27#Mat 10:38; 16:24; Mk 8:34; Lk 9:23Muntu woonse utabwezi ciciinkano cakwe ukuncilila takonzha kuba shiciiya wangu. 28No nguni akati kenu, aakuzanda kuzaka iŋanda inamfwu, utataanguni kukala anshi u kubona ati sa mali ngaakwete alakonzha kuumana mulimo? 29Nkaambo watacita bobo, cilakukakila kumaninzha. Ulakonzha bulyo kusha mwiimbi wamakancilo amulimo, pele bantu boonse bacibona cacitika balakamuseka. 30Balakaamba ati, ‘Amubone wezu muntu, wakakanka kuzaka pele wakakilwa kumaninzha!’

31“Kuti mwami kakwete bashikalumamba bali shuulu shili ikumi, ulazanda kulwa uumwi mwami uukwete bashikalumamba bali shuulu shili makumi obile, ulataanguna wakala anshi walibuzha kwaamba sa ulalozha kulwa, ukumuzunda mwaminina ukwete bashikalumamba banji banji. 32Pele kuti wayana kwaamba talozha kumuzunda, ulatuma bazhiminizhi bakwe ku mwaminina ca kufwambaana kumulomba ati batalwi kube luumuno akati kabo.” 33Jeso wakabaambila ati, “Amwe mbubona bobo, kwiina ukonzha kuba shiciiya wangu cita wezo ufwutamina shoonse nshaakwete.”

Kuti Mwino Wabula Mucanka

(Matayo 5:13; Maako 9:50)

34“Mwino mubotu, pele kuti wabula mucanka kwiina mbuucitwa kwaamba ubote ulimwi. 35Wiina mulimo kubulongo nikuba kumbolezhi, ulaba wakusowa bulyo. Muntu ukwete matwi ateelele!”

Jelenleg kiválasztva:

Luka 14: ILL

Kiemelés

Megosztás

Másolás