Luka 16

Cikozhano ca Mubanzhi Shilucengo

1Jeso wakabaambila ba shiciiya bakwe ati, “Kakuli muntu muhubi wakaakukwete mubanzhi walubono lwakwe. Muntu umwi wakamwaambila ati, wezo mubanzhi ulasangaula mali akwe, 2ubobo wakamwita mubanzhi ukumubuzha ati, ‘No makaniinzhi aza ngundateelela? Pandulula kabotu kabotu lubono mbuwakalusebezha, kaambo ndazanda ukutanda amulimo.’ 3Inzho mubanzhi wakazeeza mu monzo wakwe ati, no ndacita buti? Shimatwangaangu ukalantanda mulimo. Ndiina insana shakulima, ulimwi ndikwete insoni kuya bulomba. 4Ehe! Mbubolya mbwinkacita kwaamba ndatandwa amulimo bantu bakankwate kabotu mu maanda abo. 5Ubobo wakakanka kwita bantu boonse bakaakukwete shikwelete kwa shimatwangaakwe. Kumutaanzhi wakamubuzha ati, ‘No uwe wakakweletaanzhi kwa shimatwangaangu?’ 6Wakaingula ati, ‘Ndakakweleta myaanda ili lusele yatungomo twamafwuta a oliva.’ Ngoonaawo wamwaambila ati, ‘Kwata ndileli ipepa lya shikwelete, lemba myaanda yone bulyo.’ 7Inzho wakabuzha uwabili ati, ‘No uwe wakakweletaanzhi?’ Aze wakamwiingula ati, ‘Ndakakweleta masaka ali mwaanda amaila.’ Wakamwaambila ati, ‘Ndileli ipepa lya shikwelete, kala anshi ulembe bulyo masaka ali makumi lusele amaila.’ 8Shimatwangaakwe abone bobo wakamweensheensha mubanzhi wezo utashomeki, kaambo wakacita ca busongo. Bantu baanshi ano balikwete busongo kucita shintu shitaluleme kubaala bantu ba mumuni.

9“Ndamushimwina ati, amulicitile milongo yalubono lwaano anshi kwiita mukucita shitaluleme, kwaamba lubono lwakamana mukatambulwe mu muŋanda iteeli. 10Kufwumbwa muntu uushomeka ku shintu shishoonto, ulashomeka u kushintu shikando, wezo uutashomeki mu shintu shishoonto, tashomeki u kushintu shikando. 11Ubobo kuti tamushomeki kulubono lwaano anshi, no nguni ukaamushoma u kumupa lubono lwini lwini? 12Ulimwi kuti kamutashomeki mukweendelezha lubono lwabeni, no nguni ukaamupa lwenu?

13 # Mat 6:24 “Kwiina musebezhi ukonzha kusebezela bami bobile. Nkaambo ukalasula umwi afwune umwi, na ukalalyoosha kuli umwi, asampaule umwi. Tukonzha kusebezela Leza u lubono pe.”

Makani a Mulawo u Bwami bwa Leza

14Ba Falisi nibaakateelela aza makani, bakakanka kumuwelela Jeso kaambo kabaafwini mali. 15Jeso wakabaambila ati, “Umwe mulazanda kulilulamika kumenso abantu, pele Leza uliizhi myonzo yenu. Nkaambo shesho nshimweensheensha shikwete impuwo akati ka bantu, ukwa Leza nshisesemyo.

16 # Mat 11:12, 13 “Mulawo waka Mozesi umalembe a bashinshimi kaaliko kushika ku ciindi caka Johani Mupapatizhi, kuhwa lelyo Makani Mabotu a bwami bwa Leza alakambaukwa, boonse bantu balalyaaticizha. 17#Mat 5:18Pele ncuubauba kwaamba izeulu iinshi shimane kubaala kwaamba kabala komwi ka mulawo kakushiwe.”

18 # Mat 5:32; 1 Bako 7:10, 11 “Kufwumbwa mulombwana uleka mwinakwe ukutwala unji mukaintu ngushimamambe. U wezo woonse muntu utwala mukaintu wakalekwa, aze ngushimamambe.”

Muntu Muhubi u Lazalo

19“Kakuli muntu muhubi wakaakusama shisani shibotu shidula, ulimwi kalya kabotu mazuba oonse kakwiina cimupenzha. 20Ulimwi kakuli mulombwana mupushi, izhina lyakwe kali Lazalo, kakwete shilonda mubili oonse, wakaakuletwa lyoonse ku mulyango wa muntu muhubi, 21wakaakulanjila kulya bufwefwelenga bwakaakuwila etebulu lya muhubi wezo, abo babwa kabeza kumaansha shilonda shakwe.

22“Inzho wezu mulombwana mupushi wakafwa, baanjelo bakamubweza bamubika u matashi aka Abulahamu. Munshi aze muhubi wakafwa, wakazhikwa. 23Inzho wakaliyana ati uli mu mulilo uteeli, wakaba mu mapenzhi makando. Nakasansula menso, wakabona Abulahamu alaale, u Lazalo bali aze afwaafwi. 24Ngoonaawo wakoompolola ati, ‘Taata Abulahamu, mfwila luse, tuma Lazalo kwaamba acompe munwe wakwe mu meenzhi kwaamba antontozhe amulaka, kaambo ndapiya mono mwibangabanga lya mulilo.’ 25Pele Abulahamu wakamwiingula ati, ‘Mwanangu zhibaluka kwaamba niwakaakucili mumi, wakatambula shibotu shako shoonse, aze Lazalo wakatambula shibiyabi, pele ninzho walikalila kwiina cimupenzha, uwe wenjila mwipenzhi ikando. 26Ulimwi akati kesu, kulibicilwe ilambwe ilamfwu kwaamba kutabi muntu uulanduka kuhwa kono kwiza koko, naaba muntu uhwa koko kwiza kono nkutubele.’ 27Muntu muhubi wakaamba ati, ‘Taata ndakulomba kwaamba umutume Lazalo kuŋanda ya taata, 28kaambo ndikwete bakwesu bosanwe akabacenjezhe kwaamba balo batakezi kono kubusena bwa mapenzhi.’ 29Abulahamu wakamwiingula ati, ‘banyoko balikwete Malembe aka Mozesi, umalembe a bashinshimi, nabaateelele nshaamba.’ 30Muntu muhubi wakaamba ati, ‘Pe pe taata Abulahamu! Kuti kwatumwa umwi kuhwa ku bafwu balakabeba.’ 31Pele Abulahamu wakamwiingula ati, ‘Na kuti tabateeleli nshaamba maŋwalu aka Mozesi u bashinshimi, tabakahumina nikuba kuti umwi wabuka ku bafwu.’”

Jelenleg kiválasztva:

Luka 16: ILL

Kiemelés

Megosztás

Másolás