Luka 22

Elwango lwe'kwîta Yesu

(Mat 26:1-5; Mar 14:1-2; Yow 11:45-53)

1Elusuku lukulu lwe'mikati era itáli mu chachu*, lwa bénde bérika mbu Pasaka*, lwábaa lùli ofu kuika. 2Ebakulu-kulu be'bakuhanyi* ala'uma ne'bakangirisi be'Mwaso,* bábaa báhonda enjira ye'kwêchisa Yesu. Si bera kwôbaa ebandu.

Yuta êmerera kwâna Yesu

(Mat 26:14-16; Mar 14:10-11)

3Wamusimu era kwêngira mu Yuta, ola bénde bérika kanji mbu Isikariyota. Oyu Yuta, ábaa muuma mwa ndumwa* ekumi ne'biri sa Yesu. 4Era kuya kuhambala ne'bakulu-kulu be'bakuhanyi*, ala'uma ne'bakuluku-kulu be'balanzi be'Luhu lwa Ongo*, chasiya aláane nabo era luulu se'njira era àngaberesa mu Yesu. 5Bera kusima busese, na bamuláanya mbu bangámweresa buteya. 6Yuta era kwêmerera na átangirisa áhonda echihangi cha chikomire cha àngaberesa mu Yesu busira ebandu kumenya.

Yesu átekesa ebiryo bye'Pasaka

(Mat 26:17-30; Mar 14:12-26; Yow 13:21-30)

7Elusuku lukulu lwe'mikati era itáli mu chachu* lwera kuika. Olu lusuku, lu bábaa bémire kukera ebyana bye'mbuli kwa linye lye'Pasaka*. 8Yesu era kutuma Petero na Yowani mbu: «Muyáa kututekera ebiryo bye'Pasaka*, chasiya túlye'bi.» 9Bera kumubusa mbu: «Ngae u'wáhonda tutékere'bi?»

10Nai mbu: «Mango mungêngira mwa musi, mungábuana mundu muuma ola wète ereya lya meshi. Oyu mundu, mumúkulikiraa mwa nyumba era angêngira'mo. 11Mwánabura ena'mo mbu: ‹eMukangirisi àkubusise mbu ngai we'chumba chìri, cha angálira mwe'biryo bye'Pasaka* ala'uma ne'banafunzi* bai.› 12Chasinda, àngábalosa chumba chinene cho'kwa ngangamo, cha chàkunganyisibwe mira. Rero omola, mu mutékeraa ebiryo bye'Pasaka*.» 13Abu banafunzi*, bera kuenda na bábuana ebindu byoshi ngo'kwa Yesu ánababuraa. Bera kuteka ebiryo bye'Pasaka*.

Ebiryo bye'kukengera Enawetu

(Mat 26:26-30; Mar 14:22-26; 1 Bakor 11:23-25)

14Mango ebihangi byáikaa, Yesu era kwekala álye ebiryo ala'uma ne'ndumwa* sai. 15Era kubura'si mbu: «Nàsimaa busese kulya bine biryo bye'Pasaka* ala'uma nenyu, era muhondo nyiríbusibwe. 16Kubinali, nábabura kwa ndákachirye Pasaka* chiro na hicha, kuikira elusuku lwa nyingálya era ìlumirire mwa Bwami bwa Ongo*.»

17Chasinda, Yesu era kutola engumbu, era kuteta mbu akoko era mwa Ongo na áteta mbu: «Mutólaa ene ngumbu, muhángire'i. 18Kubinali, nábabura kwa kutengera mwe'chine chihangi ndáchimwe tifai chiro na hicha, kuikira mango eBwami bwa Ongo* bungáika.»

19Era nyuma se'bi, Yesu era kutola emukati, era kuteta mbu akoko era mwa Ongo, era kuisha muo na êresa'o ebanafunzi* bai. Era kuteta mbu: «Onola i'mubiri wanyi ola wànyirwe bushi nenyu. Ku mundaa mwáira bacha kwa kunyikéngera.»

20Ábere bera bamálaa kulya, kanji Yesu era kutola engumbu, era kuberesa'i na áteta mbu: «Ene ngumbu chìri chilaano chiyayaya* kurengera emikira yanyi, era ingásheshekala bushi nenyu.

21«Si mulólaa! Emundu ola ungányirenganya álira ala'uma nanyi. 22Nyi'Mwana we'Mundu, nyingáfa kukulikana no'kwa Ongo átetaa. Si buanya kwa mundu ola ungányana.» 23Ebanafunzi* bai bera kutangirisa bábusanya mbu nde mwa kachi-kachi kabo ola ungáira oyu mwasi.

Nde i'mukulu-kulu mwa banafunzi ba Yesu?

24Chasinda, mwa kachi-kachi ke'banafunzi* mwera kuulukira bwaka bunene mbu nde i'mukulu-kulu kurenza balikabo. 25Yesu era kubabura mbu: «Mwa bandu ba bàteshi Ongo, ebami babo bénde bêmangira'bo kwa misi. Na ba bète ebuashi era luulu sabo, bénde báchěrika mbu bu "bakosi be'mabuya." 26Si mwabo, muténdaa mwáira bacha. Emundu ola ulí mukulu-kulu kurenza balikabo, ěmire kuba nga i'mueke. No'la wèmangirire ebanji, ěmire kuba nga i'muanda. 27Rero, nde i'mukulu-kulu kurenza mulikabo? Eri ola wěkese álya, nesi ola wámwakira? Si ola wěkese álya! Si chiro bacha, nyono nyìri mwa kachi-kachi kenyu nga muanda.

28«Mwabo mu mwàataa ebushibirisi bwe'kwíkala nanyi mwa miereko yanyi. 29Bushi no'ku, nàbêresise eBwami ngo'kwa nanyi Tata ányeresaa'bo. 30Mwa bacha, mungálya na kumwa ala'uma nanyi mwa Bwami bwanyi. Kanji mwabo mu mungékala kwa ndebe se'bwami, kwa kuchinjibusa embaa ekumi ne'biri se'Baisiraeli.»

Yesu ábala emwasi mbu Petero angámunana

(Mat 26:31-35; Mar 14:27-31; Yow 13:36-38)

31Yesu era kubura Simoni Petero mbu: «Simoni, Simoni, ǔmvaa! Wamusimu erésibwe eloso lwe'kubělula ngo'kwa bénde bélula ebulo, chasiya àbaereke. 32Si nàkwěmeraa, chasiya ùtarekaa ebwemeresi bwao ku nyono. Nao mango ungáhuba kunyáalukira, usésaa banyakenyu emichima.»

33Petero era kumwǎkula mbu: «Enawetu, nyono nàchikunganyise mira kwa kuminwa, anabe kwa kwîchibwa ala'uma nao.»

34Yesu nai mbu: «Petero, nákubura kwa lwarero era muhondo eluasi lùtasa kubika, ungába wànyinana kahatu mbu ùtanyîshi.»

Eluteya, embweka ne'bômbo

35Chasinda, Yesu era kubusa ebanafunzi* bai mbu: «Mango nabátumaa busira luteya, nesi mbweka, nesi birato, kuli cha mwaínaa?» Nabo mbu: «Kutali.»

36Yesu era kubabura mbu: «Si rero, ola wète luteya atólaa'lo, no'la wète mbweka atólaa'i. No'la utéte bômbo, aúsaa ekochi lyai, aúle'bo. 37Nábabura kwa byěmire ene myasi i'nyiíkire, era itúla yǎnjikirwe mwa Maanjiko Mabuya-buya mbu: ‹Áanjibwaa ala'uma ne'bakosi be'mabi.›#22:37 Somaa Isaya 53:12. Bushi emyasi era inyêrekere, iri ofu kuikirira kwa businda bwai.»

38Ebanafunzi bera kumubura mbu: «Enawetu, anola twéte mômbo mabiri.» Nai mbu: «Murékeraa aola!»

Yesu éma Ongo kwa ndulungu ye'Miseituni

(Mat 26:36-46; Mar 14:32-42)

39Yesu era kutenga aola, era kwérukira kwa ndulungu ye'Miseituni, ngo'kwa ábaa anátula àkomere. Ebanafunzi* bai bera kumukulikira. 40Aíkire mwe'chi chisiki, era kubura ebanafunzi* bai mbu: «Mwémaa Ongo, mubóne emisi ye'kuima emuereko.»

41Chasinda, era kuchifunda bure hicha nabo, areya nga'la mundu àngauma ekoi. Era kukoma emafi, era kutangirisa éma Ongo mbu: 42«Tata, akaba wáhonda, ene ngumbu ya mano malibuko, uyêkaa bure nanyi! Si chiro bacha, bìtabaa ngo'kwa náhonda, si ekuhonda kwao ku kubaa.»

43[Chasinda, malaika* muuma ola wábaa wátenga kwa nguba, era kumupamukira'ko chasiya àmwêrese emisi. 44Yesu ábaa àli mu businane bunene busese, era kunaendekera éma Ongo na bushiru bunene. Echuka cha chábaa chámutenga'ko, chera kuba nga mimata ya mikira, era yábaa yátowangira kwa chitaka.]

45Ábere era amálaa kwéma, era kubatuka na áhuba ala árekaa ebanafunzi* bai. Era kubabuana bàonjire bushi bábaa batámire ne'businane. 46Era kubura'bo mbu: «Chi chatúmire mwáonjira? Mubátukaa mwéme Ongo, mubóne emisi ye'kuima emuereko.»

Yesu ásimbwa

(Mat 26:47-56; Mar 14:43-50; Yow 18:3-11)

47Ábere Yesu anáchiri áteta, kwera kuika luamba lwa bandu banene. Yuta, muuma mwa ndumwa* ekumi ne'biri sa Yesu, iwábaa uhóndorere'bo. Era kuchifunda ofu na Yesu chasiya àmuobere. 48Yesu era kumubusa mbu: «Yuta, mwakunyiobera mu'wányana nyi Mwana we'Mundu?»

49Ebanafunzi* ba Yesu bálolire kwa myasi era yáhonda kuba, bera kumubusa mbu: «Enawetu, tukomangaa'bo mwa bômbo?»

50Muuma mubo kuna kukoma emuanda we'mukulu-kulu we'bakuhanyi* na ámuisha ekutu lye'malyo. 51Si Yesu era kuteta mbu: «Murékeraa aola!» Era kuuma kwa kutu lyo'yu mundu, na ámulamya.

52Chasinda, Yesu era kubura ebakulu-kulu be'bakuhanyi*, ne'bakulu-kulu be'balanzi be'Luhu lwa Ongo*, ne'bashamuka be'Bayuta, ba bábahaa kumusímba mbu: «Chi chatumire mwányibahira ne'mômbo ala'uma ne'manjinga, nga nyìri chihumusi? 53Esuku soshi nabáa nénjire nába nenyu mwa Luhu lwa Ongo*, mutánanyisimbaa. Si chinera chìri chihangi chenyu, kanji chihangi cha ebuashi bwe'mabi bwákola mwa musimya.»

Petero ánana mbu àteshi Yesu

(Mat 26:57-58, 69-75; Mar 14:53-54, 66-72; Yow 18:12-18, 25-27)

54Chasinda, abu bandu bera kusimba Yesu. Bera kumweka mwa nyumba ye'mukulu-kulu we'bakuhanyi*. Petero ábaa àmukulikire marerere.

55Bera kuuha muliro mwa kachi-kachi ke'chibuwa che'mukulu-kulu we'bakuhanyi*. Petero era kwekala ákalukala kwa muliro ala'uma nabo. 56Muanda-kasi muuma álolire kwa Petero ékese ofu ne'muliro, era kumusindera busese, na áteta mbu: «Ono mundu nai abáa àli ala'uma na Yesu.» 57Si Petero era kunana na áteta mbu: «Eu mukasi! Ndèshi oyu mundu!»

58Era nyuma sa bihangi bieke, unji mundu era kulola ku Petero, era kumubura mbu: «Nao unáli muuma mubo!» Si Petero era kumwǎkula mbu: «Nyono nda muuma nabo!»

59Ábere kwàrenga chihangi chingaika ku saa nguma, unji mundu era kusera ku Petero, era kuteta mbu: «Kubinali, ono mundu abáa análi na Yesu, bushi nai àli mwesha Kalilaya.»

60Si Petero era kumwǎkula mbu: «Eu mulume, ndèshi chiro emyasi era wáteta.» Ábere Petero anáchiri áteta, eluasi kuna kubika. 61Enawetu era kubinduka na átumbikisa Petero. Petero kukwera kukengera emyasi era Enawetu àmuburaa mbu: «Lwarero, era muhondo eluasi lùtasa kubika, ungába wànyinana kahatu mbu ùtanyîshi.» 62Petero kuna kuuluka era mbuwa, na átangirisa álira na businane bunene.

Ebandu báshekera Yesu

(Mat 26:67-68; Mar 14:65)

63Ebandu ba bábaa bálanga Yesu, bábaa bámushekera na kumupúnda. 64Bera kumuhukira emeho, na bámubusa mbu: «Rèbaa, nde iwákupunda!» 65Bera kumuúmanga na inji myasi inene ya kumukamba.

Yesu átongana era muhondo se'Karubanda ke'Bayuta

(Mat 26:59-66; Mar 14:55-64; Yow 18:19-24)

66Ábere mwe'i mishangya, ebashamuka be'Bayuta, ne'bakulu-kulu be'bakuhanyi*, ala'uma ne'bakangirisi be'Mwaso*, bera kubuanana. Bera kureta Yesu era muhondo se'Karubanda* kabo. 67Bera kumubusa mbu: «Woyo u'Kirisito*? Túburaa!» Nai mbu: «Nyíkababura, mutányemerere. 68Na nyikábabusa mwasi, mutányǎkule. 69Si kutengera mwe'chine chihangi, nyi Mwana we'Mundu, náya kwíkala kwa lunda lwe'malyo ma Ongo we'buashi.»

70Boshi bera kwire bámubusa mbu: «Ku'kuteta mbu woyo u'Mwana wa Ongo?» Yesu nai mbu: «Mubeine mwàtechire mira kwa nyono nyi Mwana wa Ongo.»

71Chasinjire, bera kuteta mbu: «Tùtachilaire ku unji mundu ola wáteta byêshi era luulu so'no mundu! Bushi tubeine twàchûmvirire bya yeine àtechire!»

Jelenleg kiválasztva:

Luka 22: tbt

Kiemelés

Megosztás

Másolás