Luka 21

Emitulo ye'muhumba-kasi mukene

(Mar 12:41-44)

1Yesu ábaa àli mwa Luhu lwa Ongo*, era kusungusa emeho mwa bandu na álola kwa baare bábika emitulo* mwa sanduku ye'mitulo*. 2Kanji era kulola ku muhumba-kasi muuma mukene nai átosesa twabichere tubiri mwe'i sanduku. 3Yesu kukwera kuteta mbu: «Kubinali, nábabura kwa ono muhumba-kasi mukene, iwànyire mitulo* inene kurenza ebanji bandu boshi. 4Bushi bano banji boshi, emitulo* era bànyire, iri ye'mwango ola wàtalaa kwa bikulo byabo. Si ono muhumba-kasi yeke, mwa bukene bwai, ànyire ebikulo byai byoshi bya abáa éte kwa kuba'o.»

Yesu ábala emwasi we'kuhandulibwa kwe'Luhu lwa Ongo lwe'Yerusalemu

(Mat 24:1-2; Mar 13:1-2)

5Bandu bauma bábaa báhambala era luulu se'Luhu lwa Ongo*. Bábaa báteta mbu luímbirwe kubuya mu makoi makomire, ala'uma na binji bindu bya bìkomire, bya bandu bátulaa Ongo. Si Yesu era kuteta mbu: 6«Bine bindu muséne'ko, esuku singáika sa kutashibe koi era luulu sa linji, byoshi bingáhandulibwa.»

Emyasi era ikáika era muhondo se'suku se'businda

(Mat 24:3-14; Mar 13:3-13)

7Chasinda, ebandu bera kwire bamubusa mbu: «Mukangirisi, mangochi ei myasi ingáika? Na kute tungámenyerera kwa yera iri ofu kuberera?»

8Yesu era kubǎkula mbu: «Muményaa, mungesha kwêngeerwa! Bushi bandu banene bangábaha kwe'sina lyanyi. Bangénde báteta mbu bu bera Kirisito* ne'bihangi byàikire mira. Si mùtakulikiraa'bo. 9Mango mungénde mwômva ebandu báteta era luulu se'bita ne'ra luulu se'kafango, muténdaa mwôbaa. Bushi kwěmire ebyera biíke tanga, si mwe'chi chihangi, ebusinda bwe'butala bungába bùtasa kuika.»

10Chasinda, Yesu era kubabura mbu: «Elubaa lungálwa na lunji lubaa. Ne'bwami bungálwa ne'bunji bwami. 11Emisisi isibu ingárenga. Na mu bisiki binene, mungáika bulio bunene na malwala ma makáramire. No'kwa nguba kungába bimenyeso bya kushishasa, bya bingôbairisa ebandu busese.

12«Si era muhondo ebi byoshi bibérere, mungásimbwa na kulibusibwa. Bangábeka kuya kutongana mwa mashenge me'Bayuta* na kubauma mwa buroko. Kanji mungénde mwêkibwa era muhondo se'bami ne'bakulu-kulu be'chio bushi nanyi. 13Mwe'i njira, mu mungénde mwáteta bya mwìshi era luulu sanyi. 14Rero, cha mwěmire kumenya chi chechine: Muténdaa mwáchiribusa era muhondo mbu kute mungáchitetera. 15Bushi nyeine nyi nyingáberesa ebinwa bye'bwenge bya mungáteta, kuikira echihangi ebarenda benyu batáale kubalwisa nesi kunana bya mwàtechire. 16Anabe ne'basere benyu, na banyakenyu, na besha mwa ngumo senyu, na bera benyu nabo bangábana era muhondo se'bakulu-kulu. Na bauma mu mwabo bangáchinjibusibwa kufa. 17Ebandu boshi bangábahomba bushi nanyi. 18Si chiro bacha, kutabe chiro na lufiri luuma lo'kwa mitwe yenyu lwa lungáera. 19Mundaa mwáata ebushibirisi, bushi mwe'i njira mu mungánunula ekalamo kenyu.»

Yesu ábala emwasi we'kuhandulibwa kwe'musi we'Yerusalemu

(Mat 24:15-21; Mar 13:14-19)

20Yesu era kuhuba kuteta mbu: «Mango mungálola kwa musi we'Yerusalemu àsungwirwe ne'basula, mwánamenya kwe'kuhandulibwa kwao kuli ofu. 21Rero, ebandu ba bangába bàli eYuteya, baháiraa mwa miruko. Na ba bangába bàli mwa musi we'Yerusalemu baténgaa'mo. Na ba bangába bàli mwa tumbara, bàtachifulukaa mwa musi.

22«Bushi esi suku, singába suku sa Ongo angáchinjibusa ebandu, chasiya byoshi bya byǎnjikirwe mwa Maanjiko Mabuya-buya bibérere.#21:22 Somaa Oseya 9:7. 23Mwe'si suku, bungába buanya bunene kwa bakasi ba bangába bàli bakure, na ba bangába bônza! Bushi mwa chio mungába malibuko masibu, na Ongo angálosa ebusinane bwai kwa bandu ba mwo'lu lubaa. 24Bandu bauma bàngêchibwa mwa bômbo, ne'banji bangáperekibwa mwa binji bio byoshi. Ebandu be'sinji mbaa, bangákandanga emusi we'Yerusalemu kuira mango ebihangi byabo bingába byawére.»

Ekubaha kwe'Mwana we'Mundu

(Mat 24:29-31; Mar 13:24-27)

25«Ebimenyeso bingálorekana'ko mwe'suba, no'mwa mwesi, no'mwa ngununu. No'muno butala, ebandu bangába mu bisibu na kusimbibwa na buba, bushi ne'mururumo ne'lwayo lwe'mulaba kwa nyanja. 26Ebandu bangénde bárengukala bushi ne'buba, mwa kulinjira emyasi era ingáika mwa butala. Bushi byoshi bya byète ebuashi kwa nguba, bingálingitanyisibwa. 27Chasinda, bangálola kwa nyi Mwana we'Mundu nábaha mwa lumbumbu na buashi na bulangare bunene. 28Mango ei myasi ingátangirisa yába, mubatukaa na kusimika busese, bushi ebihangi bye'kununulibwa kwenyu byàikire.»

eBwami bwa Ongo bùli ofu

(Mat 24:32-35; Mar 13:28-31)

29Era nyuma se'bi, Yesu era kuishira ebandu ono muanyi mbu: «Mulóreraa kwa muchi we'tini no'kwa inji michi yoshi. 30Mango mwénde mwálola kwa yáhowa, mwánamenyerera kwe'chianyiro chibuya chìri ofu. 31Kuno'ku, mango mungálola ei myasi yáika, mwánamenyerera kwe'Bwami bwa Ongo* bùli ofu. 32Kubinali, nábabura kwe'i myasi ingáberera ne'bandu boshi be'sine suku bangába bàtasa kufa. 33Enguba ne'butala bikárenga, si ebinwa byanyi byeke bitákárenge chiro na hicha.»

Ekulinjira ekuika kwa Yesu

34Yesu era kuteta kanji mbu: «Muményaa, emichima yenyu ingesha kusitowerwa ne'myasi ye'kuhonda kulya kwa kurengerese, ne'kutamira, ne'kuchiribusa bushi ne'kalamo kenyu. Mútairire bacha, olu lusuku lwe'kubaha kwa Kirisito* lungábaikira chimbate, 35ngo'kwa emuteo énde áhuta. Bushi olu lusuku, lungáikira ebandu boshi bo'mwa butala chimbate. 36Mundaa mwáchilanga-langa, na kunde mwéma Ongo chira chihangi. Mwa bacha, mungábona emisi ye'kufufumuka ei myasi yoshi era ingáika, na kwîmanga era muhondo sanyi nyi Mwana we'Mundu.»

37Yesu éndee áreerera mwa Luhu lwa Ongo* ákangirisa ebandu. Ne'butufu, era kunde áya kuonjira kwa ndulungu ye'Miseituni. 38Ebandu boshi bera kunde bámuikira elumbuli-mbuli mwa Luhu lwa Ongo*, chasiya bàmômvirise.

Jelenleg kiválasztva:

Luka 21: tbt

Kiemelés

Megosztás

Másolás