LUQAASI 5

YESUUSI UMI ROSAANO DOORI

(Mat 4:18-22; Maq 1:16-20)

1Mitto barra Yesuusi Gensareexi Baari gama uurre hee'reenna, lowo manni Maganu qaale macciishshara isiwa daye mimmito cife no. 2Isino baaru gama noota lame yowolo afi. Qulxu'me amaddannori yowollansanni dirrite woshshaaddansa hayishshidhanni no. 3Yesuusi Simiooni yowolo afe giddora e"e Simiooni, «Hanni yowolo baaru giddora shiqqi assie» yiisi. Hakkunni gedensaanni yowolote aana ofolle manna rosiisa hanafi.

4Rosiise kaihu gedensaanni Simiooni, «Jaallakki ledo yowolo giddora shiqqi assitine qulxu'me amadate woshshaado'ne baaru giddora tugge» yiinsa.

5Simiooni, «Rosiisaancho, hashsha wo'ma daafurre mitto qulxu'michono diamandoommo; ati yiittoro kayinni woshshaado tugeemmo» yii. 6Isi yiino garinni woshshaadonsa tugguta, lowo qulxu'me amaddeenna woshshaado ta'ara rakku. 7Kunnira wole yowolo aana noota jaallansa dagge kaa'litannonsa gede qiphi assidhu. Insano dagge, qulxu'me wonshiteenna lamenti yowolo itamate rakku. 8Simiooni Pheexiroosi tenne ikkito lae Yesuusi albaanni guluphe, «Mooticha, ani cubbaataamohona anewiinni ho'li» yiisi.

9Togo yiinohu, isinna ledosi noori baalu amaddino qulxu'mi lowo geeshsha bati'reenna dhaggeeffattino daafiraati. 10Simiooni jaalla, Zebidewoosi ooso Yaiqoobinna Yohaannisino dhagge assidhu. Yesuusi Simiooni, «Waajjitooti; kunni ka'a manna woshshaadattoha ikkatto» yiisi.

11Insa yowolonsa baaru qacce fushshituhu gedensaanni, wo'manka coye agurte Yesuusi hoode hadhu.

YESUUSI TARAAWANNOHU GOGU DHIBBI AMADINO MANCHO HURSI

(Mat 8:1-4; Maq 1:40-45)

12Mitto barra Yesuusi mittu katami giddo hee'reenna, taraawannohu gogu dhibbi amadinohu mittu manchi Yesuusiwa daye albasiinni gombisame, «Mooticha'ya, baxittoero hursattoera dandaatto» yee huucci'ri.

13Yesuusino angasinni amammade, «Baxoommohena huri!» yiisi. Manchuno hakkawoyintenni taraawannohu gogu dhibbinni huri. 14Yesuusi qole, «Konne coye hattono ikkite mannaho kultooti; huroottota kayinni marte qeesichaho leellishi'ri. Huroottota anfanni gede, Muse hajajinota keeraa'mate kakkalo Maganoho shiqishi» yee hajajisi.#Lew 14:1-32 lai.

15Yesuusi duduwi kayinni albinni roore gobba baala tuqi. Lowo mannino Yesuusi yaannore macciishshatenna dhibbunni hurate isiwa dayi. 16Isi kayinni yanna yannantenni mannu nookkiwa mare huuccatto assi'ranno.

YESUUSI LAANSHAAWA MANCHO HURSI

(Mat 9:1-8; Maq 2:1-12)

17Mitto barra Yesuusi rosiisanni hee'reenna, Farisootunna Muse Seeri rosiisaano mulesi ofolte no. Insa Galiilunna Yihudu qachi baalunninna Yerusaalametenni dagginoreeti. Yesuusi dhiwantinore hursannoti Mootichu wolqa ledosi no. 18Shiimu manni, mitto laanshaawa mancho reretenni duhe Yesuusiwa dayi. Yesuusi noo minira eessite albasiinni wortara hasidhu. 19Ikkollana, mannu bati'rino daafira minira e'anno gara hooggu. Kunnira, minu iimira haadhe fushshite Yesuusi noo taalo la'e minu qalcho murte, mancho rerentenni dirrisse albasiinni wortu. 20Yesuusi amma'nansa afe laanshaawa mancho, «Koo mancho, cubbikki aguraminohe» yiisi.

21Seeru rosiisaanonna Farisootu, «Kuni Magano xonannohu isi ayiti? Magano agurranna mannu cubbo agura dandaannohu wolu nooni?» yite heddu.

22Yesuusi hedonsa afe, «Wodani'nenni konne coye mayira heddinanni? 23Anfina, ‹Cubbikki aguraminohe› yaatenna, ‹Ka'e rerekki duqqite hari!› yaate woyite shonte hiitti roortanno? 24Ikkollana Manchi Beettira uullate aana cubbo agursiisate roorre noosita affinaraati» yee, laanshaawa mancho, «Ka'e rerekki duqqite minikkira ha'ri yoommohe» yii.

25Laanshaawu manchino hakkawoyintenni kae, reresi duqqe Magano galaxxanni minisira ha'ri. 26Hakkiicho noo manni baalu lowo geeshsha dhaggeeffate, waajjillunni, «Techo dhagge la'nummo» yaanni Magano galati.

YESUUSI MAATEWOOSI WOSHSHI

(Mat 9:9-13; Maq 2:13-17)

27Hakkunni gedensaanni Yesuusi hakkiinni kae ha'ranni hee're Leewi yinanni qaraxaasincho qaranxanni daasira ofolle nooha afe, «Hoode'ya amo» yiisi. 28Leewino hakkawoyintenni baalankare agure hoodesi ha'ri.

29Hakkunni gedensaanni Leewi Yesuusira minesi lowo jila jili. Jilunniwa lowo qaraxaasinenna wolu lowo manni gamba yii. 30Farisootunna insa widiri Seeru rosiisaano, Yesuusi rosaanora, «Qaraxaasinetenna cubbaataammu ledo ittinannihunna agginannihu mayiraati?» yite gunguntu.

31Yesuusi qole, «Dhiwantinorira ikkinnina fayyaaleeyyete xagisannohu dihasiisannonsa. 32Ani cubbaataammu aagintaabbe higganno gede woshshammora ikkinnina, keeraano woshshate didayommo» yiinsa.

QATUME HUUCCI'RATE DAAFIRA XA'MINOONNI XA'MO

(Mat 9:14-17; Maq 2:18-22)

33Mitu mitu Yesuusa, «Yohaannisinna Farisootu rosaano batinye higge qatunte huuccidhanno; ate rosaano kayinni wo'manka woyite ittannohunna aggannohu mayiraati» yite xa'mitusi. 34Yesuusino, «Seenne adhannohu ledonsa hee'reenna albisootu qatuma hasiissannonsani? 35Ikkollana seenne adhannoha insawiinni haa'ne hoollanni yanna dagganno. Hatte yannara qatuntanno» yee dawarinsa.

36Qoleno Yesuusi masalsanni, «Akkala uddanora haaro qaafficho digannanni. Hatto assiniro, haaru dadhamanno. Haaru qaaffichi akkalu ledo dixaadanno. 37Hattono akkalu ogorira haaro woyinete xajje worannohu dino; worriha ikkiro kayinni, ogoro dhoossanno; woyinete xajjeno du'nantanno; ogoruno kaa'lannori nookkiha ikkanno. 38Kunnira, haaro woyinete xajje haaru ogorira worranni. 39Fultinota woyinete xajje aginohu, haaro aga dihasi'ranno. ‹Keeshshitino woyinete xajje woyyitanno› yaanno» yiinsa.

Jelenleg kiválasztva:

LUQAASI 5: QulMax

Kiemelés

Megosztás

Másolás