LUQAASI 4

YESUUSI JIFAMA

(Mat 4:1-11; Maq 1:12-13)

1Yesuusi Qullaawu Ayyaani wo'meennasi Yordaanoosi wayi eelinni higi. Hakkunni gedensaanni Qullaawu Ayyaani halalla qole haa're ha'risi. 2Hakkiicho shoyilloo barra Sheexaanu jifisi. Kunni shoyillawu barri giddo mittoreno itinokki daafira goofimarchoho hudi'ri. 3Hatte yannara Sheexaanu Yesuusiwa daye, «Hanni ati Maganu Beettootiro, kuni kinchi tima ikkanno gede hajaji!» yiisi.

4Yesuusi daware, «‹Mannu sagale callatenni dihee'ranno› yine borreessinoonni» yiisi.#Mat 4:4; Mar 8:3 lai.

5Hakkunni gedensaanni, Sheexaanu Yesuusa gotti yiino darga masse gobbate gashshoote baala shiima yanna giddo leellishisi. 6Qoleno, «Konne gashshootenna ayirrinye baala atera eemmohe. Kuni baalu anera uyinoonnieha ikkino daafira, ani hasi'roommohura aa dandeemmo. 7Anera kumbuulittoero konne baala eemmohe» yiisi.

8Yesuusino, «‹Mootichu Maganikkira calla kumbuuli! Iso calla magansi'ri› yine borreessinoonni» yiisi.#Maq 6:13 lai.

9Hakkunni gedensaanni, Sheexaanu Yesuusa Yerusaalame masse, Qullaawu Mini guuto iimira fushshe, «Hanni ati Maganu Beetto ikkoottoro kawiichinni umokki eela qolte tugi; 10‹Agartannohe gede Maganu sokkaasinesi hajajanno.#Far 91:12 lai. 11Lekkakki kinchu gane gawajjannohekki gede angansa woroonni worte kayissannohe› yine borreessinoonni» yiisi. 12Yesuusi, «‹Mooticha Maganokki jiffooti!› yine borreessinoonni» yee qolisi.#Mar 6:16 lai. 13Sheexaanu Yesuusa jifannore gudihu gedensaanni yannate geeshsha agure ha'ri.

YESUUSI SOQQANSHOSI GALIILAHO HANAFI

(Mat 4:12-17; Maq 1:14-15)

14Yesuusi Qullaawu Ayyaani wolqa wo'miteennasi Galiila higi. Isi duduwo qooxeessaho noo gobba baala macciishshitu. 15Xaadu minnara rosiisanna mannu baalu galatisi.

NAAZIRETETE KATAMI MANNI YESUUSA GIWI

(Mat 13:53-58; Maq 6:1-6)

16Hakkunni gedensaanni Yesuusi lophino gobba Naazirete ha'ri. Hakkiichono albinte gede Ayihudete Fooliishsho Barra xaadu minira e"e, nabbawara kai. 17Himanaanchu Isayaasi Maxaafa uyinisi. Maxaafa fanita,

18«Mootichu Ayyaani ane aana no;

buxanete Dancha Duduwo duduwate shoominoe;

usurantinori tidhantannota kulate,

illiweelootu la'annota lallawatenna,

kadantinore kadotenni fushshate soyinoe.

19Qoleno Mootichu mannasi gatisannoha eltote diro egensiiseemmo gede soyinoe» yine borreessinoonni dargi leellisi.#Isa 61:1-2 lai.

20Yesuusi maxaafa xaaxe soqqamaanchoho ee ofolli. Xaadu mine noo manni baalu iso la"anni no. 21Isino, «Kuneeti, xa nabbawanna macciishshitinihu Qullaawu Maxaafi qaali techo wo'mino» yiinsa.

22Baalunku Isire dhaggeeffattanninna ashilaamu hasaawisire dudubbanni, «Isi Yooseefi beetto di"ikkino?» yitu.

23Yesuusino, «‹Ati Xagisaanchu, hanni umokki hursi!› yitine maammaakkinannieta afoommo. Qoltineno, ‹Qifirinahoomi assoottore baala macciishshinoommo; kawiicho gobbakkirano hatto assi› yitinannie. 24Halaale kuleemmo'nena, himanaanchu umisi gobbara diayirranno. 25Kuleemmo'nena macciishshe; himanaanchu Eeliyaasi yannara, sase dironna lee agana xeena gana hooginohura Israeelete gobbara lowo hude ubbino. Hatte yannara hakkiicho lowo gunnooti no.#1Mot 17:8-16 lai. 26Ikkollana, Eeliyaasi Sidoonu gobbara Seraphitu qachira noo gunnitewa ikkinnina wolootunniwa disonkoonnisi. 27Himanaanchu Eelsai yannarano, Israeelete gobbara lowo dhiigaammi no; ikkollana Sooriyu mancho Ni"imaani agurranna keeraa'minohu wolu dino» yiinsa.#2Mot 5:1-14 lai. 28Xaadu mine noori baalu konne coye macciishshite lowo geeshsha hanqitu. 29Yesuusa kataminsa minamino gaari aanira fushshite xiibbe boonoho tuggara hedde katamu gobbaanni fushshitusi. 30Isi kayinni mereeronsaanni hige fule ha'ri.

YESUUSI DURRIISU EINO MANCHO HURSI

(Maq 1:21-28)

31Hakkunni gedensaanni Yesuusi kae Galiilu gobba, Qifirinahoomi Katama ha'ri. Hakkiichono manna rosiisa hanafi. 32Gashshaanchu gede ikke rosiisanni noo daafira, baalunku rosiisino gara dhaggeeffattu. 33Xaadu mine bushu ayyaani amadino manchi no; isino qoonqosi naggi asse, 34«Naaziretete Yesuusa! Ninke ledo atera mayi noohe? Hunattonkera dayitto? Ati ayetiro egennoommohe. Ati Maganu Qullaawaati» yee raari.

35Yesuusi, «Busha ayyaana, sammi yite manchuwiinni fuli» yee rufi. Bushu ayyaanino mancho mannu albaanni tuge, gawajjisikkinni fule ha'ri.

36Hakko noo manni baalu dhagge assi're, «Kuni hiittoo rosooti? Busha ayyaanna roorretenninna wolqatenni hajajanno; insano hajajante fultanni no» yitanni insa insanaawa hasaabbu. 37Yesuusi duduwi qamatte baala tuqi.

YESUUSI LOWO DHIWAMAANO HURSI

(Mat 8:14-17; Maq 1:29-34)

38Yesuusi xaadu mininni fulanni hee'renni, Simiooni minira ha'ri. Maranno woyite, Simiooni ballo iibbabbite goxxe no. Hursannose gedeno Yesuusira kultu. 39Yesuusi isewa shiqqi yee mulese uurre, iibbabbo agurtannose gede hajaji. Iibbabbo agurteennase ka'e soqqantunsa.

40Arrishsho e'uta, mannu addi addi dhibbi amadinore baala haa're Yesuusiwa abbi. Isino mitto mittonka angasi aanaho wore hursinsa. 41Durriissano, «Ati Maganu Beettooti» yite raartanni lowo manni giddonni agurte fultu. Durriissa Yesuusi Kiristoosa ikkinota egentino daafira coyidhannokki gede hajajinsa.

YESUUSI GALIILAHO ROSIISA HANAFI

(Maq 1:35-39; Mat 4:23)

42Soodita Yesuusi hakkiinni fule, kashshi yaannori nookkiwa ha'ri. Mannuno iso hasara fuli. Affusihu gedensaanni, insawiinni baxxannokki gede huuccidhu. 43Isi kayinni, «Ani Dancha Duduwo kulate soqqame dayommo daafira, wole katammano ha're Maganu gashshootire kula hasiissannoe» yiinsa.

44Kunnira, Yihudu gobbara noota xaadu minna ha're kuli.

Jelenleg kiválasztva:

LUQAASI 4: QulMax

Kiemelés

Megosztás

Másolás