LUQAASI 6

FOOLIISHSHOTE BARRI DAAFIRA SHIQINSHOONNI XA'MO

(Mat 12:1-8; Maq 2:23-28)

1Ayihudete Fooliishsho Barra Yesuusi laalino gidi giddoonni hige sa"anna, rosaanosi shoye tattayisse ittu.#Mar 23:25 lai. 2Farisootu giddonni mitu mitu rosaano, «Fooliishshote Barra hoolloonnire mayira assitinanni?» yitunsa.

3Yesuusi qole, «Daawiti mannisi ledo hee're hudi'ri yannara, assinore dinabbabbinoonni?#1Sam 21:1-6 lai. 4Daawiti Maganu Minira e"e, qeesoota callaho fajjinoonniha qullaawa tima itino; ledosi noo mannirano uyino» yiinsa. 5Lede Yesuusi, «Manchi Beetti Fooliishshote Barrira Mootichaho» yiinsa.

YESUUSI ANGA LAANSHAAWINO MANCHO HURSI

(Mat 12:9-14; Maq 3:1-6)

6Wole Fooliishshote Barrano Yesuusi Ayihudootu xaadi minira e"e rosiisi. Hakkiicho mittu qiniiticho anga laanshaawino manchi no. 7Yesuusi aana yorto afidhinori seeru rosiisaanonna Farisootu, «Fooliishshote Barra hursannoro hanni anfeemmona» yite agartu. 8Yesuusi kayinni anga laanshaawa mancho, «Ka'e mannu mereero uurri!» yiisi. Isino hakkiicho kae uurri. 9Hatte yannara Yesuusi, «Seeru garinni Fooliishshote Barra danchanso busha loosate fajjinoonni? Lubbo gatisatenso hunate fajjinoonni?» yee xa'minsa. 10Yesuusi mulesi noo manna baala laihu gedensaanni mancho, «Angakki diriirsi!» yiisi.

Manchu anga diriirsi'rita, angasi hurte fayyaaleette ikkitu.

11Seeru rosiisaanonna Farisootu kayinni, lowo geeshsha hanqite Yesuusa hiitto assitannoro amaalantu.

YESUUSI TONAA LAME SOQQAMAANO DOORI

(Mat 10:1-4; Maq 3:13-19)

12Mitto barra Yesuusi huucci'rara ilaala fuli. Hakkiicho hashsha wo'ma Magano huucci'ranni gali. 13Soodita rosaanosi isiwa woshshe, insa giddonni tonaa lame doore, «Soqqamaasine» yee su'ma fushshinsa. 14Tonaa lamunku dooranturi: Pheexiroosi yee su'ma fushshihu Simiooniiti, rodiisi Indiriyaasi, Yaiqoobinna Yohaannisi, Filiphoosinna Bertelemewoosi, 15Maatewoosinna Toomaasi, Ilfiyoosi beetti Yaiqoobinna, Laalaataanchu Simiooni, 16Yaiqoobi beetti Yihudinna Yesuusa sayise hirihu Asiqorootichu Yihudaati.

YESUUSITA ROSIISASINNA HURSASI

(Mat 4:23-25)

17Yesuusi soqqamaasinesi ledo ilaalunni dirre xawoho uurri. Hakkiicho rosaanosi, Yihudunni, Yerusaalametenni, baaru gami katamma Xiroositenninna Sidoonunnitenni dayinohu lowo manni no. 18Insa Isi coyi'rannore macciishshitaranna dhibbinsanni hurtara hasidhe daggino. Durriisu amadeenna qarrantanni heedhannorino dagge hurtu. 19Hursitanno wolqa isiwiinni fulte wo'manka hursitanni noo daafira, gamba yiino manni baalu iso kisara hasi'ri.

HAGIIRRENNA DADILLE

(Mat 5:1-12)

20Yesuusi rosaanosi widira hige lae,

«Maganu Gashshooti ki'neha ikkino daafira,

ki'ne buxane ba'raadhinoonnireeti.

21Ki'ne xa hudidhinanniri,

gedensaanni duubbinanni daafira ba'raadhinoonnireeti.

Ki'ne xa wi'litinanniri,

gedensaanni oso'litinanni daafira ba'raadhinoonnireeti.

22«Ane Manchi Beettinni kainohunni mannu giwi'nero, giddonsanni fushshe huni'nero, mishi'neronna su'ma'ne bushatenni kayisiro ba'raadhinoonnireeti. 23Gordoho lowo ba'raa'ra afidhinanni daafira tashshi yoo'ne; hagiidhe. Ki'nera albiidi himanaanorano hattoo bunshe iillishshinonsa.#2Dud 36:16; Soq 7:52 lai.

24«Ki'ne dureeyye kayinni,

xa qawaaxxidhine heedhinoonni daafira,

ki'nera aanne'e.

25Xa duubbinoonniri,

gedensaanni hudidhinanni daafira,

ki'nera aanne'e.

Xa oso'litinanniri,

gedensaanni dadillitinanninna wi'litinanni daafira,

ki'nera aanne'e.

26«Mannu baalu jaji'nero, ki'nera aanne'e. Annuwansano kaphu himanaano hatto jajjino» yiinsa.

BAARIGAARA BAXA

(Mat 5:38-48; 7:12)

27«Macciishshitinannirira kuleemmo'nena, baarigaarra'ne baxxe! Gibbanno'nerira danchare asse. 28Runtanno'nere maassidhe; sao assitanno'nerira Magano huuccensa. 29Mitto baqqaallakki qawaadannohura layinkihano qolisi. Kootekki adhannohu, shamisekkino adhona agurisi. 30Xa'mi'rannohura uyisi. Atere adhinoha qolannohe gede xa'midhooti. 31Mannu ki'nera assa'nera hasidhinannire baala ki'neno insara assensa.

32«Baxxanno'nere calla baxxiniro ma galati noo'ne? Cubbaataammu nafa baxxannonsare baxxanno. 33Dancha assitanno'nerira calla dancha assitiniro ma galati noo'ne? Cubbaataammuno hatto assitanno. 34Qolte uyitanno'nerira calla liqiissitiniro ma galati noo'ne? Qolte adhate cubbaataammuno cubbaataammaho liqiissitanno. 35Ki'ne kayinni baarigaarra'ne baxxe; danchareno assensa; qollanninke yitine agadhitinikkinni liqiisse. Hatto assitiniro waagi'ne lowoho. Wo'munkura Aliidi Maganira oososi ikkitinanni. Isi galata afidhinokkiriranna bushuulleho nafa shaqqadoho. 36Gordu Anni'ne maarannoha ikkinonte gede, ki'neno maartinannire ikke» yiinsa.

WOLOOTU AANA YOO YAA DIHASIISSANNO

(Mat 7:1-5)

37Yesuusi qole, «Ki'nera yoo yinanni'nekki gede, ki'neno woleho yoo yitinoonte. Ki'ne minshanni'nekki gede, ki'neno wole mishshinoonte. Ki'ne cubbo agurranni'ne gede, wolu cubbono agurre. 38Maganu aanno'nena, ki'neno uuyye. Woleho safartine uyitinanni safaraanchinni safarranni'ne. Hakkiinni roorsine xiimbenna qanse, wo'me du'namanna safarre uyinanni'ne» yii.

39Yesuusi masalsanni lede, «Illiweelu illiweelo massaga dandaannoni? Massagannoha ikkiro lamunku mimmito haadhe balete ubbanno. 40Rosaanchu rosiisaancho dirooranno. Ikkollana rosannohu rososi seekke rosiro rosiisaanchu gedeeha ikkanno.

41«Ate illera noo heelliicho laittokkinni rodiikki illera noo ishincho mayira la"atto? 42Qolteno ate illera noo heelliicho afittokkinni rodookkira, ‹Rodoo'ya, illekkira noo ishincho fushshoheni› hiitto yaatto? Ati lawisiisaanchu, hanni balaxxe illekkira noo heelliicho fushshi'ri. Hakkunni gedensaanni rodiikki illera noo ishincho fushshate illekki xunsite la'anno.

HAQQICHO LAALOSENNI EGNNINANNI

(Mat 7:17-20; 12:34-35)

43«Dancha haqqicho busha laalo dilaaltanno; busha haqqichono dancha laalo dilaaltanno. 44Haqqa baala laalosinni egenninanni. Utu aaninni balasete laalo dixinqi'nanni. Utaamu citi giddonni woyinete laalo dixinqi'nanni. 45Danchu manchi danchu wodanisi giddonni dancha coye fushshanno; bushu manchi bushu wodanisi giddonni busha coye fushshanno. Mannu wodanisira wo'me gatinore coyi'ranno.

KINCHUNNA SHAAFU AANA MINNOONNI MINNA LAWISHSHA

(Mat 7:24-27)

46«Ani kuleemmo'nere wonshitinikkinni, ‹Mooticha, Mooticha›, yitine mayira woshshitinannie? 47Anewa daannohunna qaale'ya macciishshe guutannohu ma lawannoro kuleemmo'ne. 48Isi mine kinchu aana mi'ninoha busule mancho lawanno. Lolahu daye hakkonne mine xiiwi. Ikkollana kinchu aana minnoonni daafira diuwino. 49Qaale'ya macciishshe guutannokkihu kayinni, mine shaafu aana mi'ninoha gowwa mancho lawanno. Hakkonne mine lolahu daye xiiwi. Minuno hakkawoyintenni uwi; uwasino jaddonnite» yiinsa.

Jelenleg kiválasztva:

LUQAASI 6: QulMax

Kiemelés

Megosztás

Másolás