Seemthawhnak 41
41
Josef ni Faraoh ih Mang a Let
1Kum hnih kheng hnukah Faraoh ni a mangla ah Nail tipi kap ah diingin a man tia. 2Acunang ahcun Nail tipi sungin cawpe pinu hmulpaal dawtkop leh thau pasarih an hang suakih pheetta an aw hmuathmo. 3Cuhnukah cawpe pinu pace pasarih, ruangrai sia leh raw, cu an dung cun Nail tipi sungin an hang suakih Nail tipi kap ih cawpe pinu pace hrialah an diing. 4Ruangrai sia leh a rawmi cawpepinule ni a mawi ih dawtkop leh a thaumi cawpepinule pasarih cu an aw remro. Culeh Faraoh cu a ṭhangtia. 5Cuhnukah a me ṭhan ih a voi hnihnak mang a man: a ta pawrmi leh ṭhami tiangcang vui pasarih cu tiangcang kung pakhat parah an hang keeu. 6Cuhnukah, tiangcang kung pasarih, vapinla huih ni a hnurmi a thep leh a vuai cu an dung in an hang cerh. 7A thepmi tiangcangvuile ni a ta pawr leh ṭhami tiangcangvuile pasarih cu an dolh remro. Faraoh cu a ṭhangtia, mangla tu a ii. 8A zingla maw cu a thin a nuam lo; curuangah mi thlah in Izipt ram ih polpawl leh mitingpawl an zate a kawhsak hngai. Faraoh ni a mang cu a sim hngai; ihmansela Faraoh a leh piak kho tu ahuhman an om lo.
9Cutikah haiputu bawitleng ni Faraoh hemah, “Nihinni ah ka palhnak mangṭhan ing ee. 10Voi khat lioah na tungsaule parah na thin a sia ih kei leh sangrawh uktutleng cu innkiltu bawi ih inn ah thawng a man thla. 11Zan khat ah ani leh kei cu anmahte sullam a ngeimi mang kan man veve. 12Hebru tlangval pakhat, innkiltu bawi ih tungsau cu kanmah rum a om ve. Amah kan sim tikah, kan mang acu a man tu ih manmi mangin a man leh piak veve. 13A man leh piak mangcun an zongcang leh; kei cu ka rian ah ṭuansakṭhan ka ii ih sangrawh uktutleng cu thlai ih thah a ii,” tiah a ti.
14Cutikah Faraoh ni Josef a kawhsak hngai, cun thawng sung cun khuirangin an suahsak. A khahmul a mehtiak leh a partlai a thlengtiak hnukah Faraoh hmaiahcun a suak. 15Culeh Faraoh ni Josef cu, “Mang pakhat ka man ih a let kho tu ahuhman an om lo. Mang na zak tikah na let kho dok an tan ti ka za,” tiah a ti. 16Josef ni Faraoh cu, “Kei ka i lo; Pathian tu ni Faraoh cu a ṭhami a lehnak a pia kau lei a ii,” tiah a ti. 17Cutikah Faraoh ni Josef cu, “Ka mangla ah Nail tipi kap ah ka diing; 18culeh cawpe pinu, hmulnaal dawtkop leh thau pasarih Nail tipi cun an hang suakih pheetta an aw hmuathmo. 19Cuhnukah an hnuk in cawpe numi pace pasarih, tiṭimṭiam, zohsia ngaimi leh a rawṭiingṭeeng an hang suak. Izipt ram sung hmawh ah acumangih a rawmi cu ka hmu thah lo. 20A raw#41:20 Raw ti hi Re ti tu kan om. leh zohsiami cawpepinule ni a peita ih a thaumi cawpepinule pasarih cu an aw remro, 21ihmansela, an awk remro hnuka’ khaw acuti’h an awk cu ahuhman ni an tiah thok lo, icatile a hlan mangin zoh an sia rih siksik. Cuhnukah ka ṭhangtia. 22Ka me ṭhan ih ka mang ah tiangcang kung pakhat parah a ta pawr leh ṭhami tiangcang vui pasarih, 23cun an hnuk in, tiangcang vui pasarih, a vuai, a thep ih vapinla huih ni a hnurmi, an hang cerh ka hmu; 24culeh a thepmi tiangcang vuipawl ni a ta pawr leh ṭhami tiangcang vuipawl an dolh hngai remro. Ihmansela polle ka sim hngai tikah acu cu a ma simfiang kho tu ahuhman an om lo,” tiah a ti.
25Cutikah Josef ni Faraoh cu, “Na mangle cu pakhat an ii, an sakhatkau; Pathian ni thil a ti vel thokmi na hemah a phuanglang rom. 26Cawpe pinu a ṭha pasarih cu kum sarih an ii, cun tiangcang vui ṭha pasarih cu kum sarih an ii; na mang cu pakhat an ikau. 27A raw ih zohsiami cawpepinule pasarih, an hnukih hang suakmi cawpepinule cu kum sarih an ii, vapinla huih ih hnurmi tiangcang vui thep pasarih mang an ikau. Anmah cu mangṭaam kum sarih an ii. 28Siangphahrang bawipa, ka tan sim mangin Pathian ni na hemah a thilti vel thokmi a tan hmuh rom. 29Izipt ram sung zate hlawhin paṭhatnak ngaite kum sarih a tlung thok. 30Acuhnukah mangṭaam kum sarih a tlung thok ih Izipt ram sungah an paṭhatnak zate palhtiak an i thok; mangṭaam ni ram cu a siatsuah thok. 31Paṭhatnak cu ram sungah tiah a i ti thok lo, icatile a zul tu mangṭaam a rauh vuai thok. 32Culeh Siangphahrang na mang thuah ih tican cu, Pathian ni hi thil hi a teek rom ih, ii hlet hlanah a phatsak thok tinak a ii. 33Curuangah Siangphahrang bawipa, thil tiahthiam leh miting pakhat rilin Izipt ram sung ṭuanvo la tu dingah sia la. 34Ram sungah zokhentule thiah hngai la, paṭhat kum sarih sungah Izipt ram ih cawsuakmi ih hmun nga ṭhen hmun khat khawl u seh. 35Acui a pha leimi paṭhat kumpawl sungih caw a zate khawm u seh, cun siangphahrang na thungeihnak in khuapipawl ah caw cu khuan u sela khawl u seh. 36Acui caw cu Izipt ram a tlunhnawh tu ding mangṭaam kum sarih ca-ih khuanlimi a i thok, cuticun mangṭaam sungah ram cu a rawkral hlah taw,” tiah a ti.
Josef Uktu Cannak
37A thubur ni Faraoh leh a tungsau zate an lung a awisak hngai. 38Faraoh ni a tungsaule cu, “Pathian thlarau ni a ompi mi, ahimang mi pace ahu hlei hmu kho lei ung im?” tiah a ti hngai. 39Curuangah Faraoh ni Josef cu, “Pathian ni ahi hmawh hi a tan hmuh rom ruangah, namah mangih thil tiahthiam vuai leh miting ahuhman an om lo. 40Nang hi ka innsang cungah uktu na i thok ih na thupiak mangin ka mipawl an zate ni an cangngai thok; toṭhiang parih tonak thu ceu ah nang vanin ka hnemsawn thok. 41Cun, “Zoh hman Izipt ram zate cungih ṭuanvongeitu ah ka tan sia rom hi,” tiah a ti. 42Faraoh ni a kutzung parih a minkhennak zunghruk cu a phoih ih Josef ih kut parah a hruksak; siangphahrang partlai in a thuam ih a hngawng ah sui ṭhi a orhsak. 43Siangphahrang sontu saileeng a tosak ih a hmai in, “Nan khuk bil u law,” tiah an au. Cuticun siangphahrang ni Izipt ram sung zate cungih ṭuanvongeitu ah a sia. 44Cuhleiah Faraoh ni Josef cu, “Kei hi Faraoh ka ii ih Izipt ram sung hmawh ah na thu loin an kut iseh, an ke iseh, an hlir thok lo,” tiah a ti. 45Faraoh ni Josef cu Zafenath-paneah timi min a pia; cun a nupi ah On khua biakinn tlangbawi Potifera ih tianu Asenath a pia. Cuticun Josef cu Izipt ram cungih thungeihnak a ngah.
46Josef cu Izipt siangphahrang Faraoh ih rian ah a luh a’khin a kum sawmthum a ii. Culeh Josef cu Faraoh ih hmaika in a suakih Izipt ram sung hlawhin a tlawn. 47Paṭhat kum sarih sung cu khur ni caw tampi a suahsak. 48Izipt ram an paṭhat kum sarih sungih caw a zate a khawm hngai, cun khuapi sungah a khawl hngai; khuapi cang ah a velkim ih caw a khawl hngai. 49Curuangah Josef ni rili siatnel mangin caw tampi a khawl hngai—a tah khaw a awl; tah hang a i lo.
50Mangṭaam kumpawl phat hlanah Josef cu On khua tlangbawi Potifera ih tianu Asenath ni a hrinmi tiapa pahnih a ngei hngai. 51Josef ni a suak peita pa cu Manasseh a vawh, “Icatile Pathian ni ka harsatnak hmawhhmawh leh ka pa ih innsang an zate palhtia hngai in a ma vua rom,” tiah a ti. 52A sontu cu Efraim a vawh, “Icatile ka vansiatnak ram ah Pathian ni pungzai in a ma vua rom,” tiah a ti.
53Izipt ram sung a hlawh ta tu paṭhat kumpawl kum sarih cu a deng rianro; 54culeh mangṭaam kum sarih cu Josef ih sim rom mangtein phat hram a thawh. Ram cang ah mangṭaam a tlung, Izipt ram sung hmawh ah zong cu caw awkṭha a omkau. 55Izipt ram sung hmawh an ṭaam tikah mipi ni Faraoh cu caw an dil. Faraoh ni Izipt mi zate hemah “Josef hemah tat uh; a tan sim hngaimi cu ti uh,” tiah a ti hngai. 56Mangṭaam cu ram sung hmawh a karh rom ruangah, Josef ni caw khawlnak inn hmawhhmawh hongin Izipt mipawl cu caw a zorh hngai; icatile Izipt ram sungah mangṭaam cu a rauh. 57Cuhleiah, mangṭaam cu vuleipi hlawhin a rauh rom ruangah, vulei cung zate in Izipt ram ih Josef hemah pursum dingin an pha.
Jelenleg kiválasztva:
Seemthawhnak 41: KHBF
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Khualsim Holy Bible © Bible Society of Myanmar, 2021.
