Seemthawhnak 42
42
Josef ih Ule Izipt ah an Tat
1Izipt ram ah caw a om ti Jakob ni a tiahngah tikah a tiapale hemah, “Ituruangah nanmah khat le khat cu nan zohtiak ciahco? 2Izipt ah caw a om ti ka za rom; zong tat u la acunangah kan ca’h caw lei ta uh, thi lo’n a nung taw ung,” tiah a ti hngai. 3Curuangah Josef ih ule pahra cu Izipt ah caw lei ding cun an zong tat. 4Ihmansela Jakob ni Josef ih upa Benjamin cu a ule hemahcun a thlah lo, icatile a parah harnak tlun pang ding a phang. 5Cuticun Israel ih tiapale cu caw lei thokmi pace lakah an telve, icatile mangṭaam ni Kanaan ram a baan.
6Josef cu ram parih mangkibawi a i vel ih rammi hmawhhmawh hemah caw a zorh hngai tu cu amah a ii. Culeh Josef ih ule cu an pha ih a hmaiahcun an hmai khur san ah an kuum. 7Josef ni a ule a hmuh hngai tikah a tiahthiam hngai, ihmansela khual mangin a zoh hngai ih aw hraang in a bia hngai. “Khawnang in nan pha?” tiah a ti hngai. Anmimi ni, “Kanaan ram in, caw lei dingah kan pha,” tiah an ti. 8Josef ni cu a ule a tiahthiam hngai nain anmimi ni cu amah an tiahthiam lo. 9Josef ni cu a mang ah anmah a man hngai khaw a cingkeng. An hemah, “Nangmi hi thlingthlatule nan ii; hi ram ih ṭonṭaihnak hmu dingah nan pha kau cuh!” tiah a ti hngai. 10Anmimi ni, “A i lo ka bawipa; na salle hi caw lei dingah kan pha. 11Kan zate hi mi pakhat ih tiale kan ii; mitluangtlam kan ii; na salle hi thlingthlatu kan i thah lo hena maw,” tiah an ti. 12Ihmansela ani ni, “A i lo, hi ram ih ṭonṭaihnak hmu dingah nan pha kau!” tiah a ti hngai. 13Anmimi ni, “Keimi na salle hi unauza hleihnih, Kanaan ram ih om mi pakhat ih tiapale kan ii; kan nautatleng pa cu kan pa hemah a ii, pakhat tu cu a om ti lo,” tiah an ti. 14Ihmansela Josef ni an hemah, “Ka tan ti hngai rom mang a ikau; thlingthlatule nan ii! 15Ahihi hniksak nan ik ding ning cu a ii: Faraoh a nun mangin, nan hniangtleng hinang a phat hlansung cu hi hmun hi nan mata thok lo! 16A taangmi thawng sungih nan om lioah nan lakih pakhat ni tatin nan naupa cu hruai seh, nan sungah thuhmaan a om maw ti nan aanmipawl hniksak a i taw; culocu Faraoh a nun mangin, mi thlingthlatule nan i taktak a ikau,” tiah a ti hngai. 17Culeh an zate ni thum sung thawng ah a thla khat hngai.
18A ni thumnak ah Josef ni, “Hihi ti man u la nan nung thok, icatile Pathian ka ṭihzah: 19mitluangtlam nan ik a’cun thawngthlak nan iknak ah nan nau pakhat cu om seh. A taangmi cu a ṭaammi nan innsangle ca’h caw phur in nan tat lei 20cun nan nauhniang ka hemah nan hruai man thok. Cuticun nan aanmi a hmaan ti lansak a i thok ih nan thi lei lo,” tiah a ti hngai. Culeh acuti ti dingah an naa a tla. 21Pakhat leh pakhat, “Zetzo-ah, kan naupa parih kan titaakmi man khi kan tuar a ik hi; a harnak kan hmu na’n naktiah a man dil tikah kan ngaih taak duh lo. Curuangah a ii ahi harsatnak kan parih a tlun hi,” tiah an ti tia. 22Cutikah Reuben ni, “Tepangpa harnak pia lo dingah ka tan sim ta hngai lo maw? A i na’n nan ngaih duh lo cutang. Curuangah atu hi a thisan man ngen caan a pha vel a ik hi,” tiah a ti hngai. 23Aanlettu hmangin a biak hngai ruangah, Josef ni anmah a tiah hngai ti anmimi ni cu an tiah lo. 24An hemin a vak mianmiih a ṭap; cuhnukah a kirṭhan a bia hngai. Culeh Simeon a ril ih an mithmuh ahcun a ṭawn. 25Josef ni an dippawl a khat in caw sangin an tangka vek an songkhoi ah san ding, cun an khuallam ca’h lamcaw ken dingin thu a pia hngai. Acuticun an caah vuak a ii.
Josef ih Ule Kanaan ah an Kir
26An caw cu an laakpawl parah an suan ih an pok. 27An caamnak hmun ah pakhat ni a laak caw bar dingin a dip kaau na ah a dip cungtatleng ah a tangka cu a hmu. 28A ule cu, “Ka tangka cu san ṭhan a ii; ka dip sungah a om hi!” tiah a ti hngai. Acu cu an thin a deng ih dok-aw hngai in pakhat leh pakhat, “Pathian ni kan parih a vuakmi hi itu i zetzo maw?” tiah an ti tia.
29Kanaan ram ih a ommi an pa Jakob hem an phat tikah an parih thilcangmi hmawhhmawh amah simin, 30“An Ramuktu pa ni aw hraang in a man bia, cun an ram thlingthlak a man puh. 31Ihmansela keimi ni, ‘Mitluangtlam kan ii, thlingthlatule kan i lo. 32Kan pa ih tiapale unauza hleihnih kan ii; pakhat cu a om ti lo, cun a hniang pa cu Kanaan ram ih kan pa hemah a om’ tiah kan ti. 33Cutikah ram uktubawi—mipa—ni, “Hi thawnghin mitluangtlam nan ik ka tiah thok: nan nau pakhat ka hemah mata u la nan innsang ih ṭaamnak ca’h caw lain nan lam cu tat kau uh. 34Nan nauhniang cu ka hemah hruaita u la cuticun thlingthlatule nan i lo, mitluangtlam nan ii ti ka tiah thok. Cutikah nan naupa hi ka thlah lei ih ram sungahhin pur nan sum tia lei’ tiah a man ti,” tiah an ti.
35An dippawl an tlongsak a’khin pakhat vek ih dip sungah an tangkadip vek a om. Anmah leh an pa ni an tangka tompawl an hmuh tikah an thin a phang. 36Culeh an pa Jakob ni, “Nangmi hi ka tiapale thihma in a ma vua hngai hi tang: Josef a om ti lo, cun Simeon a om ti lo, atu hi Benjamin nan thiartaak khaai. Ahi hmawh hi ka parah a tlung hepa’n!” tiah a ti. 37Cutikah Reuben ni a pa cu, “Amah na hemih ka phatpi ṭhan lo a’cun ka tiapale pahnih na that hngai kho kau. Ka kut sungah sia la na hem ka phatpi ṭhan kau thok,” tiah a ti. 38Ihmansela a pa ni, “Ka tiapa cu nanmah rum a zong thok lo, icatile a u a thi ih amah ceu a taang. Na tah nakding khuallam ah a parih harnak a tlun a’cun, ka lu paar rum hi ngaihsia’n mithikhua a ma zon phat hngai thok kovawh,” tiah a ti.
Jelenleg kiválasztva:
Seemthawhnak 42: KHBF
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Khualsim Holy Bible © Bible Society of Myanmar, 2021.
