Seemthawhnak 40
40
Thawngtlale Pahnih ih Mangpawl
1Ahi hnuk caan ii hletmaw ah, Izipt siangphahrang haiputu leh sangrawh uktutleng ni an bawipa Izipt siangphahrang cu a thintiakin an vua. 2Faraoh cu a kut tang bawile pahnih: haiputu bawitleng leh sangrawh uktutleng parah a heh a har, 3culeh innkiltu bawi ih inn, Josef an kharkhum nak thawng ah a thla hngai. 4Innkiltu bawi ni Josef cu acule ih rian ṭuan piak hngai dingin a cah ih an rian cu a ṭuan piak hngai; culeh thawng sungahcun caan sau nawn an om pehzulh. 5Zan khat cu an pahnih—siangphahrang haiputu leh Izipt siangphahrang sangrawh uktutleng, thawng ih kharkhum mile—ni anmahte sullam ngeimi mang an man veve. 6A zingla maw an hemih Josef a phat tikah an thinhar in a hmu hngai. 7Curuangah a bawipa ih inn ah amah rum thawng a tla khat tu, Faraoh kut tangih bawile cu, “Ituruangah nihinni hi nan mithmai a nuam lo lawmlam?” tiah a dil hngai. 8Anmimi ni, “Mang kan man ih a man leh piak tu ding ahuhman an om lo,” tiah an ti. Culeh Josef ni, “Mang lehnak cu Pathian ih ta a i lo hmen maw? Nan mangpawl cu ma sim hnik uh,” tiah a ti hngai. 9Curuangah haiputu bawitleng ni a mang cu Josef a sim ih, “Ka mang ah ka hmalaah sabit ruang pakhat a om ih, 10a parah tleeng pathum an om. A muun caang in a paar an suakih a vuang sawrpawl cu an hmin liamlo. 11Faraoh ih sabit hai cu ka kut sungah a om; culeh sabit cu lo hngai in Faraoh ih hai sungahcun ka suur hngai, cun hai cu Faraoh ih kut ah ka sia,” tiah a ti. 12Cutikah Josef ni, “A lehnak cu hihi a ii: a tleengle pathum cu ni thum an ii; 13ni thum sungah Faraoh ni a tan thlah ṭhan thok ih na rian a tan ṭuansakṭhan thok; culeh a haiputu na ik taktak lio ih na titaak bil mangkhin Faraoh ih hai cu a kut ah na sia leh thok. 14Ihmansela na tluanṭhat leh tikah ma mang lei ci maw; Faraoh hemah ka thuhla simin ka parah ṭhatnak vua hram law, cun hi hmun hin ma suah hram. 15Icatile Hebru mipawl ih ram in ruk ka ita; cun hinangah khaw thawng sungih a ma siah hngai nakding mawi ituhman ka ti ta lo hepangkhaw,” tiah a ti.
16Sangrawh uktutleng ni a lehnak cu a ṭhala a ik a hmuh tikah Josef hemah, “Kei khaw mang ka ngei ve: ka lu parah sang kho pathum an om, 17culeh a cungtatleng kho sungahcun Faraoh ca’h sang phun kip rawhmi an om, a i na’n vale ni ka kut parih kho sung cun an aw remro,” tiah a ti. 18Culeh Josef ni, “Hihi a lehnak cu a ii: khole pathum cu ni thum an ii; 19ni thum sungah Faraoh ni a tan suah thok ih na lu cu a tan thok—cun na ruang cu thingkung parah a thlai thok; culeh na sa cu vale ni an awk tia thok,” tiah a ti.
20Ani thumnak, Faraoh ih suah ni ahcun a tungsaule zate caah puai a vua ih haiputu bawitleng leh sangrawh uktutleng cu thawngin a suah hngai ih a tungsaule lakah a lansak hngai. 21Haiputu bawitleng cu a hai put rian ah a ṭuansakṭhan ih Faraoh ih kut ah hai a pia ṭhan; 22sangrawh uktutleng zong cu Josef ni an mang a leh piak hngai mangin a thlai ih a that. 23Acuhmanah haiputu bawitleng ni Josef cu a mang lo, a palhtia.
Jelenleg kiválasztva:
Seemthawhnak 40: KHBF
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Khualsim Holy Bible © Bible Society of Myanmar, 2021.
