Seemthawhnak 39
39
Josef leh Potifar ih Nupi
1Josef cu Izipt ram ah zon hruai a ii ih Izipt siangphahrang Faraoh ih innkiltu bawi Izipt mi Potifar ni acunangah a zon hruaitu Ishmael mipawl hemin a lei. 2Bawipa cu Josef hemah a om ih mi hlawhtlingpa a cang; Izipt mi a bawipa inn ahcun a om. 3Bawipa ni Josef cu a ompi, cun a thiltimi hmawhhmawh cu lenṭhatnak ah a cansak ti a bawipa ni a hmu. 4Curuangah Josef cu Potifar hmaiah mithmaiṭha a ngah ih a tungsau a ii; Potifar ni Josef cu a innsang zokhentu leh a ngeihmi zate kilkhawitu ah a vua. 5Potifar ni a innsang leh a ngeihmi hmawhhmawh zokhentu ih a vuak caan in Josef ruangah Bawipa ni Izipt mi pa ih innsang cu a thluasuah; Bawipa ih thluasuah cu a ngeihmi zate—a inn leh a lo—parahcun a pha. 6Curuangah a ngeihmi hmawhhmawh cu Josef a kilkhawisak; Josef om nihmawh, a awkmi caw simlo ituhman siaherh awk a ngei lo.
Josef cu cuancai ṭha leh zohco a ii. 7Culeh caan tawilio hnukah a bawipa ih nupi ni a parah hiamnak mit in a zoh ih, “Ma metpi tu hmen,” tiah a ti. 8Ihmansela Josef ni a al ih a bawipa ih nupi cu, “Zoh hman, kei ka om hi ka bawipa cu a inn sungah itu thuhla hman siaherh awk a ngei lo, cun a ngeihmi izongza ka kut ah a sia. 9Ani hi hi inn sung a’cun kei vanin a pipadeuh cuang lo, cun namah rori simlo cu ma ap lo’n a supmi ituhman a om lo, icatile nang cu a nupi na ii hepa’n. Ituruangah hmen ahi hrokhrawlnak hnempi hi vua in Pathian parah cu ka sual thiam lei?” tiah a ti. 10Josef cu ni khat hnuk ni khat a bia ṭiuṭeu nain Josef ni metpi ding leh a hemih ik ding cu a eem duh lo. 11Ni khat belte cu, inn sungah a rian ṭuan dingin a tat ih hu pace hman inn sungih an om lo lioah 12Potifar ih nupi ni a angki pawnthuah in a tlaihtia ih, “Ma metpi tu hmen!” tiah a ti. Ihmansela a partlai cu a bawinu ih kut ah matain a leeu, cun pawnla ah a zuang. 13Josef ni a angki pawnthuah cu a kut ah matain pawnla ah a zuang ti a bawinu ni a hmuh tikah, 14a inn sung mipawl ko hngai in, “Zoh hnik uh, ka pumah ni hi Hebru mipa hi man hmuhsit dingin kan hemah a hruai hi! Ma metpi dingin a ma pha ih tiakpi’n ka hek; 15culeh tiakpi’n ka aw suah ih ka heh a ma zak tikah a partlai ka hrialah mata’n pawnla ah a zuang,” tiah a ti hngai. 16Cuhnukah Josef ih partlai cu a bawipa phat hlansung a kinkhawi; 17culeh acui thu siksik cu simin, “Kan lakih na phatpi mi Hebru tungsau pa ni ma hmuhsit dingin a ma pha; 18ihmansela ka aw suah ih ka kuiraak caang a partlai ka hrialah a mata, cun pawnla ah a leeu,” tiah a ti.
19A bawipa Potifer ni a nupi ih simmi, “Hihi na tungsau pa ih ma tidan cu a ii,” tiah a timi aanka a zak tikah a thin a tok lianglo. 20Culeh Josef cu a bawipa ni siangphahrang ih thawngthlak mipawl an kharkhum nak thawng ah a thla; Josef cu acui thawnginn ahcun a om. 21Ihmansela Bawipa cu Josef hemah a om ih a hmunmi dawtnak a hemah a lansak; thawngtla uktu ih mithmuh ah mithmaiṭha a ngahsak. 22Thawngtla uktu ni thawnginn ih thawngtla an zate Josef ih zokhen hngai dingin a siah, culeh acunangih thiltimi itupoh cu amah ih hruainak in ti a ii. 23Bawipa cu Josef hemih a om ruangah Josef zokhennak tangih a ommi itu thuhla khaw thawngtla uktu ni a siaherh hngai lo; culeh a timi itupoh Bawipa ni a hluhsuahsak.
Jelenleg kiválasztva:
Seemthawhnak 39: KHBF
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Khualsim Holy Bible © Bible Society of Myanmar, 2021.
