Luki 4
4
Zyezu kárimani kéele
(Mat 4:1-11; Mar 1:12-13)
1Zyezu fúngi maa nyìn Pìicǎnni na, a wi yìri Zyuridɛnw ma n lúru n kári. A Pìicǎnni wi tórigo fìími tára ni ní sa ni wi kàragí. 2A wi canya togoye siin kwɔ́ɔ, a Dàzɔɔnw i wi kárima bi lége kapeele ni. Wi da yarigaa faala lìi cányi bee ni í, cányi bee kwɔ́ɔlɔ kadoʔo ma a kateegi náà wi jáa. 3A Dàzɔɔnw wi pye: «Kapye mɔ wi nyɛ Kolocɔlɔɔ Jáaw, mi kàdɛnɛgi naa pye gi kàri búru.» 4#Làlw 8:3 A Zyezu wi yari: «Ki n sɛ́bɛ níì jo: ‹Syɔɔn a gbǎn sìíw taa búru lìile yagana báriga ni í.› »
5Koro kàdoʔo ma a Dàzɔɔnw wi kɔ́ri n kári nyanbelege ǹjoʔo ni n sáà dulunyanw fànʔa tɛ́ɛyɛ myɛ tɛ̀ɛn wi na làrinijanna ni 6níì wi pye: «Mii a fǎngi naa myɛ kaan mɔ ma ní gi nìjangbɔɔri myɛ ní. Níì cán pe n gi le mii kɔ́yi ni, syɔ́ɔnwee faala má mii ga ni caa bi gi kaan lè, mii a gbǎn gi kaan wee bee ma. 7Mɔ ga fɔ̀lɔ n kpùmɔnɔ mii taana, ki myɛ a pye mɔ wóʔo.» 8#Làlw 6:13 A Zyezu wi pye: «Ki n sɛ́bɛ níì jo: ‹Maa mɔ Kafɔw Kolocɔlɔɔ kpɔ̀ʔɔrɔ́ máā woro nibin fáliw kpéʔele.› »
9A Dàzɔɔnw níì wi kɔ́ri n kári Zyerusalɛmi ma n sáà wi lúrugo kpɔ̀ʔɔrɔli kpaʔa tɛ́ɛtɔnɔgɔ njoʔo ni níì wi pye: «Kapye mɔ wi nyɛ Kolocɔlɔɔ Jáaw, mi kòro nɛɛ, mí ye mi too tári na. 10#Ŋún 91:11 Níì cán ki n sɛ́bɛ níì jo:
‹Wi a mɔ kéeli joo bi gbàn wi tundunbèle ma
si jo paa mɔ kpáaw wéle.›
11 #
Ŋún 91:12
Ní níì jo:
‹Pe a mɔ tɔʔɔ cò be kɔ́yi ni,
jàngó mɔ tɔ́lɔgaa a kɔ́ círi kàdɛnɛgaa na í.› »
12 #
Làlw 6:16
A Zyezu wi yari: «Ki n wɔ́ɔ̀ sɛ́bɛ níì jo:
‹Ki ga yɛlɛ mɔ í kɔ́ mɔ Kafɔw Kolocɔlɔɔ pye wéle í.› »
13Amɛɛ Dàzɔɔnw wi kárima n fɔ̀rɔ lè kánmi bee myɛ na, a wi núngo wi taana bi sa ra làlaa nikwɔɔ sige.
Zyezu n wi fáliw séli Galile tári ni
(Mat 4:12-17; Mar 1:14-15)
14A Zyezu níì lúru n kári Galile ma Pìicǎnni fànʔa báriga ni, a wi mɛ́ɛgi tɔ̀nɔ n yiri tɛ́nɛmi myɛ ni. 15Wi maa ni syɛ́ɛnbèle tama pe sérikpaayi ni, a pe myɛ i wi kpɔ̀ʔɔrɔ́.
Nazarɛti ye n Zyezu cée
(Mat 13:53-58; Mar 6:1-6)
16A wi kári Nazarɛti ma, kěgee ni pe da wi gbóo lè, n sáà jée sérikpaagi ni cândɛnɛgi canʔa ni, àmɛɛ wi da tàli ni gi kpéʔele lè, níì yìri n yére bi sɛ́bɛw wéle. 17A be kanyaajoow Ezayi sɛ́bɛw kaan wi ma. A wi wi múgu níì tɛ́ɛgi caa n nyaa beè gi sɛ́bɛ lè n jo:
18 #
Eza 61:1-2
«Kàfɔw Pìle i nyɛ mii ni,
níì cán wi n mii télege níì fǎngi kaan mii ma
mii í da Syɛɛnjóocǎnri nyuu foomɔfɔbèle ma.
Wi n mii tun níì jo mii í sa ra wɔ́rɔdi kéele nyuu
púlobèle ma,
si wɔ́ɔ ra fúunbèle paʔala kéele nyuu fúunbèle ma,
sáā fɔ̀rɔyi fɔ̀ɔlɔ yirigi fɔ̀rɔyi ni,
19sáā yɛ́ɛli kéele nyuu syɛ́ɛnbèle ma lee ni Kàfɔw a be kpɔ́ʔɔ lè.»
20Koro kàdoʔo ma a wi sɛ́bɛw tɔ́n níì wi lúrugo n kaan sérikpaagi falipyeo ma, níì tɛ́ɛn. Syɛ́ɛnbèle myɛ be pye yaà lè sérikpaagi ni, a be nyapiigèle le wi ni ni wéle. 21A wi gi séli ni nyuu be ma níì jo: «Syɛɛnsɛbɛri naa yele lóʔo lè dee, ti n foro níjanʔa.»
22A pe myɛ i wi séeraw kpéʔele ní i káama syɛɛntaanri na di yiri lè wi nyɔ́ɔgi ni. A be i gi nyuu níì jo: «Wee naa ban wi nyɛ Zyozɛfu jáaw ì?» 23A Zyezu be pye: «Kányɛʔɛ na yele a ba kàseeli naa wáa mii ma si jo: ‹Nìgbumɔɔn, mi miyɛɛ bɔʔɔ,› si wɔ́ɔ jo: ‹Kérigèle gele mɔ kpéʔele lè Kapɛrinayumi ni á wolo ge kéeli lóʔo, mi wɔ́ɔ mi gele bee félege kpéʔele nɛɛ naa mɔ tiimaa kěgi ni.› » 24#Zyan 4:44 A wi níì gi joo be ma níì jo: «Mii a gi joo yele ma kányɛʔɛ ni, pe o kanyaajoowaa faala córo wi tiimaa kěgi ni í. 25#1Fàn 17:1 Mii si a ní gi joo yele ma kányɛʔɛ ni, lɔgucaala saʔa maa pye Isirayɛli ni Elii lǎli ni, àmɛɛ wáami da yére lè yɛ̀ʔɛlɛ taanri ní yeye kɔrɔni, á kateekpɔɔgi baa too tári tɛ́ɛyɛ myɛ ni. 26#1Fàn 17:8-16 Pe si da Elii tun lɔgucew bee wàa faala ma í, kapye Sarɛpita ye lɔgucewaa nibin má ban í, wi pye lè Siidɔn tári ni. 27#2Fàn 5:1-14 Yaanyɛɛnmɛfɔɔlɔ saʔa maa wɔ́ɔ̀ pye Isirayɛli ni kanyaajoow Elize lǎli ni. Kàjáa pe wàa faala da pɔʔɔ í, kapye Naama nibin ban í, wi pye lè Sirii tári wóo.»
28Bele myɛ be pye lè sérikpaagi ni, lǎli ni be syɛ́ɛnri bee lóʔo lè, a be fúnyi tɔ̀nɔ n tanʔa be na n sɔ̀lɔ. 29A be yìri n Zyezu ŋɔrigɔ n yirige kěgi kàdoʔo ma, pe kěgi si maa pye nyanbelege na, a be wi kɔ́ri n kári gee bee tɛɛtigibɛnʔɛ nyɔ́ɔ ma bi sa wi ŋɔrigɔ cáan yaà táàma. 30Kàjáa wi maa sɔ̀lɔ be níngi ni n kári.
Nǎnwee màdeo da ni wɔʔɔ lè
(Mar 1:21-28)
31A wi kári Kapɛrinayumi ma, gi nyɛ lè Galile tári kègaa, n sa ni syɛ́ɛnbèle tama cândɛnɛgi canʔa ni. 32#Mat 7:28-29 A be i káama wi tamani na, níì cán wi syɛ́ɛnri maa pye ní fànʔa ní. 33Nànwaa si maa pye yaà sérikpaagi ni, màdeo maa pye wi ni. Wi maa tɔ̀nɔ n pee. A wi yákpogbɔɔlɔ wáa gbanʔama níì jo: 34«Ee, ba nyàʔá gi nyɛ wolo ní mɔ níngi ni, mɔ Zyezu, Nazarɛti ye wów? A mɔ pan lé ba wolo kálagi wii? Mii n mɔ cán mɔ wi nyɛ Kolocɔlɔɔ syɛɛncanw.» 35A Zyezu fúlo wi na níì wi pye: «Nyɔ́ɔgi tɔ́n mí yiri nǎnw bee ni.»
A màdew nǎnw cáan be níngi ni níì yiri wi ni. Wi ga wi kpàli í. 36A pe myɛ i káama gi na ní i gi nyuu peyɛɛ ma níì jo: «Nyàʔá syɛɛnfelere di dee naa? Wi i gi nyuu ni gbàngí màdebèle ma ní fǎngi, ní séew ní, a be i yirigi syɛ́ɛnbèle ni.» 37A Zyezu mɛ́ɛgi fala n yiri tɛ́nɛmi myɛ ni.
Zyezu n yaabèlē saʔa pɔʔɔ
(Mat 8:14-17; Mar 1:29-34)
38A Zyezu ga yiri sérikpaagi ni, a wi sáà jée Siimɔn kpáagi ni. Cefuuro si maa pye Siimɔn céw nɔ́ɔ na, ti maa tɔ̀nɔ n gbàn, a be Zyezu nyɛ́ɛri jàngó wi wi pɔʔɔ. 39A wi lɛ̀ɛlɛ wi nyǔngi ni níì fúlo cefuuri na, a di fala n láʔa wi na. A wi yìri terire ni kpéʔele be ma.
40Lǎli ni cángi jée lè, yaama o yaama félege fɔ́lɔ wi nyɛ syɔɔn o syɔɔn ma lè, a pe myɛ i syée ní be ní Zyezu ma. A wi sa ni wi kɔ́yi taʔala pe myɛ na nibin nibin ni sɔ̀lɔ́, a be i poori. 41A màdebèle wɔ́ɔ i yirigi syɛ̀ɛnnɛ saʔa ni ní i yákpogèle wáa ni gi nyuu níì jo: «Mɔ wi nyɛ Kolocɔlɔɔ Jáaw.» A wi i fúlo be na. Wi si da fɔ̀lɔ paa nyuu í, níì cán pe maa gi cán woro wi nyɛ Kirisi.
Zyezu i Kolocɔlɔɔ syɛ́ɛnri nyuu Zyude ni
(Mar 1:35-39)
42Lǎli ni nyǐngi tali lè, a wi yiri n kári fìími tára tɛ́ɛgaa ni. A syɛ́ɛnmi i wi caa ni máari fwɔɔ n sáà wi nyaa, a be i caa bi wi yérige koro ga pye wi a kɔ́ kári si poro yaʔa í. 43A wi be pye: «Ŋàʔanaga gii fwɔɔ mii í wɔ́ɔ kári kěyi wozanya ma bi sa ra Kolocɔlɔɔ fǎngi syɛɛnjóocànra nyuu nɛɛ bee. Níì cán gee bee kéele na Kolocɔlɔɔ mii tun naa.»
44A wi sa ni Kolocɔlɔɔ syɛ́ɛnri nyuu Zyude tári sérikpaaya ni.
Jelenleg kiválasztva:
Luki 4: CB10
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Kolocɔlɔɔ Syɛ́ɛnri © Bible Society of Côte d'Ivoire, 2008.
