Luki 3
3
Zyan Batisiti syɛɛnjóori kéele
(Mat 3:1-12; Mar 1:1-8; Zyan 1:19-28)
1Lǎli ni Tibɛri Sezari yɛ̀ʔɛlɛ kɛɛ ní kagunɔ taa lè fǎngi na, n Pɔnsi Pilati yaʔa fǎngi na Zyude tári ni, Herodi si i nyɛ fǎngi na Galile tári ni, Herodi cɔnɔw Filipi si i nyɛ Iture ní Tirakɔniti tári nyúngo na, Lizanyasi si wɔ́ɔ i nyɛ fǎngi na Abilɛni tári ni, 2á Ana ní Kayifu si i nyɛ sáriga-wòlobèle kàfɔgbolobéle, lǎli bee ni a Kolocɔlɔɔ syɛ́ɛnri nan Zyan na, wi lè Zakarii jáaw, n wi yaʔa fìími tára ni. 3A wi i syée Zyuridɛnw taana tɛ́ɛyɛ myɛ ni n sa ni nyuu syɛ́ɛnbèle ma batɛmiw kéele na, àmɛɛ gi yɛlɛ be kàdoʔo wáa be kapeegèle ma lè, koro ga pye Kolocɔlɔɔ si be kùsulugi syɔɔ.
4 #
Eza 40:3-5
Amɛɛ kanyaajoow Ezayi da gi sɛ́bɛ lè wi sɛ́bɛw ni níì jo:
«Wàa i yákpolo wáa fìími tára ni níì jo:
‹Yaa Kàfɔw kólogo sámagi,
yáā wi kozɔ̀lɔyi síngi.
5Jǐnlɔyi myɛ a ba nyìn,
nyanbeleyi ní dǎndamayi myɛ si ba tìgí pye falafala.
Tɛɛsɔ̀lɔyi yi kolo lè, yoro si ba kàri tɛɛ̀sinye,
kóloyi tɛɛpeeye si ba pye tɛɛcànya.
6Dulunyanw syɛ̀ɛnnɛ myɛ a ba Kolocɔlɔɔ syɔɔli nyaa.› »
7 #
Mat 12:34; 23:33 Syɛ́ɛnmi pi da kári Zyan ma wi sa poro batize lè, a wi be pye: «Yele màátɔnw jàala, wìí wi yele sàmi níì jo yele í da fé Kolocɔlɔɔ fundanʔari na di maa lè? 8#Zyan 8:33 Koro na kapyegèle ke a gi tɛ̀ɛn yele n kàdoʔo wáa yele kapeegèle ma lè, yaa gele bee kpéʔele. Yele a kɔ ra gi sɔ̀ngí yeyɛɛ fúnyi ni si jo Abirahami wi nyɛ yele tóow í! Níì cán mii a gi joo yele ma, Kolocɔlɔɔ fánʔa i nyɛ bi gbǎn kàdɛnɛri naa kàriga taa pìibēle sii be pye Abirahami wòolo. 9#Mat 7:19 Ye wéle, pe n kpánagi tɛ́ʔɛ n kwɔ́ɔ tíiyi taana. Koro na tiige o tiige gi lè ki o yasanjanra sangi í, pe a gi kpúmɔn wáa náagi ni.»
10A syɛ́ɛnmi wi yíbe níì jo: «Nyàʔá si gi yɛlɛ wolo í kpéʔele?» 11A wi be yari: «Buroyo siin ga pye syɔ́ɔnwee ma lè, wi kàa nibin kaan burogo-fùnvɔlɔ ma. Yaliire si ga pye wee ma lè, wee bee n wɔ́ɔ̀ yɛlɛ wi gi kpéʔele kánmi bee na.»
12 #
Luk 7:29
A wálisyɔɔbèle wɔ́ɔ̀ pan wi ma wi ba poro batize, ní baa wi yíbe níì jo: «Tamafɔw, nyàʔá wolo yɛlɛ wolo í kpéʔele?» 13A wi be pye: «Gee be jo yele í da syoo syɛ́ɛnbèle ma lè, yele a kɔ́ yarigaa syɔɔ wàa ma bi sɔ̀lɔ gee bee na í.»
14A sùlasiibèle wɔ́ɔ̀ wi yíbe níì jo: «A wolo doò? Nyàʔá wolo yɛlɛ wolo í kpéʔele?» A wi be pye: «Yele a kɔ́ yarigaa syɔɔ syɔɔnwaa faala ma fànʔa na í, wàlá jànvaa ni í. Ye gi yaʔa yele sàraw í yɛlɛ ní yele ní.»
15Amɛɛ syɛ́ɛnbèle myɛ pye lè Kirisi sigeli na ní i peyɛɛ yíbe be fúnyi ni Zyan kéeli na níì jo: Wee naa si tɔ̀ʔɔ́ i nyɛ lé Kirisi láà ba mɛ̀ɛ́? 16A Zyan pe myɛ pye: «Mii tɔ̀nɔ́ i yele batize lǒgi ni, kàjáa wee sée wi kpɔ́ʔɔ n sɔ̀lɔ mii wów na lè, wee bee i yaà ni maa. Mii ga caa wɔ́ɔ̀ nyɔɔ n yɛlɛ bi wi taʔalayi mɛ́ɛngéle sánʔana í. Woro wi a ba ra yele batize ní Pìicǎnni, ní náagi ní. 17Wi ségbanni i yaà wi kɔ́gi ni, wi a wi yaliiri sámaga pɛ́ɛ wi kàsyɔɔgi na si di fɛɛ bi sa kɔn wi gbòdunni ni, si yaliisigiri le bànvigi náagi ni bi di sórigo.»
18Zyan maa ni syɛ́ɛnbèle kɛɛlɛ ní kérigèle kèle saʔa ní, ní i Syɛɛnjóocǎnri nyuu be ma. 19#Mat 14:3-4; Mar 6:17-18 Kàjáa wi maa fúlo fànʔafɔw Herodi na wi cɔnɔw cɔ́ɔ kéele na be yiri lè Herojadi#3:19 Herojadi: Mɔ a gbǎn Herojadi kéeli nyaa Mar 6:17 ni. n náà fàra kapeegèle kèle na, gele myɛ Herodi kpéʔele lè. 20A Herodi níì kapeeli naa fàra wi kapeebyeri myɛ na, loro li nyɛ wi n Zyan le kàsow ni.
Zyezu batɛmiw kpéʔelele kéele
(Mat 3:13-17; Mar 1:9-11)
21A syɛ́ɛnbèle myɛ ga batize n kwɔ́ɔ, a Zyezu wɔ́ɔ baa batize. Lǎli ni wi nyɛ́ɛri Kolocɔlɔɔ ma lè, a nyɛ̀ʔɛni múgu. 22#Sél 22:2; Ŋún 2:7; Eza 42:1; Mat 3:17; Mar 1:11; Luk 9:35 A Zyan Pìicǎnni nyaa àmɛɛ kàtolo nyɛ lè, a li tìgi n baa tɛ́ɛn wi na. A be yákpolo lóʔo nyɛ̀ʔɛni na a li jo: «Mɔ wi nyɛ mii Pìinidaanmaw, mɔ kéeli n mii dɛ́nɛ gbanʔama.»
Zyezu tóolɛɛbèle mɛ́ɛyɛ kéele
(Mat 1:1-17)
23Lǎli ni Zyezu wi fáliw séli lè, wi maa yɛ̀ʔɛlɛ toko ní kpɔrigɔ félege taa. Syɛ́ɛnbèle maa ni gi sɔ̀ngí wi i nyɛ Zyozɛfu jáa. Zyozɛfu wi lè Helii jáaw, 24Helii si i nyɛ Matati jáa, Matati si i nyɛ Levii jáa, Levii si i nyɛ Mɛlikii jáa, Mɛlikii si i nyɛ Yanayi jáa, Yanayi si i nyɛ Zyozɛfu jáa, 25Zyozɛfu si i nyɛ Matatyasi jáa, Matatyasi si i nyɛ Amɔsi jáa, Amɔsi si i nyɛ Nahumi jáa, Nahumi si i nyɛ Esilii jáa, Esilii si i nyɛ Nagayi jáa, 26Nagayi si i nyɛ Mati jáa, Mati si i nyɛ Matatyasi jáa, Matatyasi si i nyɛ Semɛyi jáa, Semɛyi si i nyɛ Yozɛki jáa, Yozɛki si i nyɛ Yoda jáa, 27Yoda si i nyɛ Yowana jáa, Yowana si i nyɛ Ereza jáa, Ereza si i nyɛ Zorobabɛli jáa, Zorobabɛli si i nyɛ Salatyɛli jáa, Salatyɛli si i nyɛ Nerii jáa, 28Nerii si i nyɛ Mɛlikii jáa Mɛlikii si i nyɛ Adii jáa, Adii si i nyɛ Kozami jáa, Kozami si i nyɛ Elimadami jáa, Elimadami si i nyɛ Ɛri jáa, 29Ɛri si i nyɛ Zyozuwe jáa, Zyozuwe si i nyɛ Eliyezɛɛri jáa, Eliyezɛɛri si i nyɛ Yorimi jáa, Yorimi si i nyɛ Matati jáa, Matati si i nyɛ Levii jáa, 30Levii si i nyɛ Simeyɔn jáa, Simeyɔn si i nyɛ Zyuda jáa, Zyuda si i nyɛ Zyozɛfu jáa, Zyozɛfu si i nyɛ Yonami jáa, Yonami si i nyɛ Eliyakimi jáa, 31Eliyakimi si i nyɛ Meleya jáa, Meleya si i nyɛ Mɛna jáa, Mɛna si i nyɛ Matata jáa, Matata si i nyɛ Natan jáa, Natan si i nyɛ Davidi jáa, 32Davidi si i nyɛ Izayi jáa, Izayi si i nyɛ Obɛdi jáa, Obɛdi si i nyɛ Bowɔzi jáa, Bowɔzi si i nyɛ Sala jáa, Sala si i nyɛ Naasɔn jáa, 33Naasɔn si i nyɛ Aminadabi jáa, Aminadabi si i nyɛ Adimɛn jáa, Adimɛn si i nyɛ Arinii jáa, Arinii si i nyɛ Hesurɔn jáa, Hesurɔn si i nyɛ Farɛsi jáa, Farɛsi si i nyɛ Zyuda jáa, 34Zyuda si i nyɛ Zyakɔbi jáa, Zyakɔbi si i nyɛ Izaaki jáa, Izaaki si i nyɛ Abirahami jáa, Abirahami si i nyɛ Tara jáa, Tara si i nyɛ Nahɔri jáa, 35Nahɔri si i nyɛ Serugi jáa, Serugi si i nyɛ Arago jáa, Arago si i nyɛ Falɛki jáa, Falɛki si i nyɛ Hebɛɛri jáa, Hebɛɛri si i nyɛ Sala jáa, 36Sala si i nyɛ Kayinami jáa, Kayinami si i nyɛ Arifakisadi jáa, Arifakisadi si i nyɛ Sɛmi jáa, Sɛmi si i nyɛ Nowe jáa, Nowe si i nyɛ Lamɛki jáa, 37Lamɛki si i nyɛ Matusalɛmi jáa, Matusalɛmi si i nyɛ Henɔki jáa, Henɔki si i nyɛ Yeredi jáa,Yeredi si i nyɛ Malaleyɛli jáa, Malaleyɛli si i nyɛ Kayinan jáa, 38Kayinan si i nyɛ Enɔsyi jáa, Enɔsyi si i nyɛ Sɛti jáa, Sɛti si i nyɛ Adami jáa, á Adami si i nyɛ Kolocɔlɔɔ jáa.
Jelenleg kiválasztva:
Luki 3: CB10
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Kolocɔlɔɔ Syɛ́ɛnri © Bible Society of Côte d'Ivoire, 2008.
