Luki 5
5
Zyezu n pìitamazelibèle yeri
(Mat 4:18-22; Mar 1:16-20)
1 #
Mat 13:1-2; Mar 3:9-10; 4:1 Cangaa syɛɛnnɛʔɛmɛ maa Zyezu màʔa fwɔɔ n wi cɔ̀ɔnri jàngó bi Kolocɔlɔɔ syɛ́ɛnri lóʔo wi ma, wi si maa pye woyéreo ní Zyenezarɛti lòkpɔɔgi nyɔ́ɔ na#5:1 Zyenezarɛti: Pe wɔ́ɔ i lòkpɔɔgi bee yiri Galile lòkpɔɔgi (Mar 1:16), ní wɔ́ɔ i gi yiri Tiberiyadi (Zyan 6:1)., 2a wi kɔ́rɔbéle siin nyaa lòkpɔɔgi kàgomɔ na, cɔ̀ɔwaabéle maa yiri be ni n sa ni be cɔ̀ɔ́bèle jé. 3A wi jée kɔ́rɔbèle bee wàa ni, wee wi pye lè Siimɔn wów, níì wi nyɛ́ɛri wi kɔ́rɔw léeli lógbew na cɛɛri. A wi tɛ́ɛn kɔ́rɔw ni n kòro yaà ni syɛ́ɛnmi tama.
4A wi ga kwɔ́ɔ wi syɛ́ɛnri joolo na, a wi Siimɔn pye: «Ye kɔ́rɔw lége lǒgi tɛɛcùrugo ni, yé yele cɔ̀ɔ́bèle wáa yaà, yele a fàala taa.» 5#Zyan 21:3 A Siimɔn wi pye: «Kàfɔw, wolo n syɔ́ɔn naa fáliw naa na, wolo ga yarigaa taa n cò í. Kàjáa mɔ syɛ́ɛnri báriga ni mii a ní cɔ̀ɔ́bèle wáa.»
6 #
Zyan 21:6
Amɛɛ pe be wáa lè, a be tɔ̀nɔ n fàala saʔa cò, fwɔɔ a cɔ̀ɔ́bèle i caa bàā cɛnɛ. 7A be kɔ́yi nyáʔana be pínɛnyɛnbèle ma kɔ́rɔwaa nikwɔɔ ni níì jo pe ba poro dɛ̀ɛmɛ. A be pan n baa kɔ́rɔbèle myɛ siin nyìn fábèle na, fwɔɔ a be i caa bi kéle. 8Amɛɛ Siimɔn Pyɛri gee bee nyaa lè, a wi kpùmɔnɔ Zyezu taana níì jo: «Ni Kàfɔlɔ, léeli mii na, àmɛɛ mii nyɛ lè kapeebyeo.»
9Níì cán fyáari maa wi cò woro ní wi pínɛnyɛnbèle myɛ ní fánɛʔɛri bee còlo kéele na. 10A Zyaki ní Zyan wɔ́ɔ̀ fyáa, Zebede jáabèle pe da wɔ́ɔ̀ pínɛ ni báara ní Siimɔn ní lè. A Zyezu Siimɔn pye: «Mɔ a kɔ́ fyáa í. Nlaʔa lǎli naa na mɔ a ra syɛ́ɛnbèle taagi.» 11A pe ga kɔ́rɔbèle kíle n yirige lǒgi ni, a be be yáriri myɛ yaʔa, níì taʔa wi na.
Zyezu n yaanyɛɛnmɛfɔlɔ pɔʔɔ
(Mat 8:1-4; Mar 1:40-45)
12Cangaa Zyezu maa pye kègaa ni, nànwaa si maa pye yaà ní yaanyɛɛnmɛ ní, a bi pee wi na gbanʔama. Lǎli ni wi Zyezu nyaa lè, a wi too n wi yɛ́ɛgi cíbele, níì wi nyɛ́ɛri níì jo: «Kàfɔw, mɔ ga fɔ̀lɔ mɔ a gbǎn mii kàriga wojaɔn ní.» 13A Zyezu wi kɔ́gi sánʔa n tánga wi na níì jo: «Mii n fɔ̀lɔ, pɔʔɔ mi nyɔɔ.» A yaanyɛɛnmi fala n láʔa wi na. 14#Lev 14:1-32 A Zyezu gi joo n gbàn wi ma níì jo wi a kɔ́ gi joo syɔɔn faala ma í, níì wi pye: «Kàjáa da syée mi sa miyɛɛ dɛ̀ɛn sáriga-wòlow na, mí sárigaw wòlo mɔ jéemununi kéele na, wee kéele Mowizi da joo lè, jàngó gee bee í pye be ma séera.»
15A Zyezu mɛ́ɛgi sèʔê yiri fwɔɔ n baa sɔ̀lɔ, a syɛɛnnɛʔɛmɛ i piyɛɛ gbóʔoro bàā wi syɛ́ɛnri lúro, wi wɔ́ɔ ra poro yáami poori. 16Kàjáa wi maa ni syée fìími tára ni wi nibin n sa ni Kolocɔlɔɔ nyɛ́ɛri yaà.
Zyezu n syɛɛnmɔngɔɔ pɔʔɔ
(Mat 9:1-8; Mar 2:1-12)
17Cangaa Zyezu maa ni syɛ́ɛnbèle tama. Farisibèle ní làlwaw sɛ́bɛwelebéle si maa wɔ́ɔ̀ pye yaà wodɛ́ɛnbéle ní. Pe maa yìri Galile tári, ní Zyude tári kèye myɛ ma n fàra Zyerusalɛmi na. Kàfɔw fànʔa si maa pye Zyezu ma bàā yáabèle poori. 18Wéle, a nǎnbèle pèle pan ní syɛɛnmɔngɔɔ ní yasinɛgɛ na ní ba ni ŋàʔaná bi jée bíngi ni bi sa wi sínɛgɛ Zyezu yɛ́ʔɛ ma. 19Pe si ga tɛɛsɔ̀lɔgɔ taa bi wi lége yaà í syɛ́ɛnmi nɛʔɛnɛ báriga ni. A be lúgu bíngi na n tɛɛgaa fùru, níì wi tìrige tɛ́ɛgi bee ni ní wi yasinɛgi myɛ ní syɛ́ɛnmi nínge ni n tɛ́ʔɛ Zyezu yɛ́ʔɛ ma. 20A Zyezu ga be tágali nyaa, a wi jo: «Nàɔn, mɔ kapeegèle kùsulugo n syɔɔ.»
21A làlwaw sɛ́bɛwelebéle ní Farisibèle fala ni gi sɔ̀ngí peyɛɛ fúnyi ni níì jo: «Wee naa wi Kolocɔlɔɔ mɛ́ɛgi kálagi lè nya, woro wi nyɛ wìí? Wìí wi a gbǎn syɔɔn kapeegèle kùsulugo syɔɔ kapye Kolocɔlɔɔ nibin ban í?» 22Amɛɛ si Zyezu be sɔ̀nguri cán lè, a wi be pye: «Nyàʔá na yele sɔ̀nguri bee félege sɔ̀ngí yele fúnyi ni? 23Bi jo: ‹Mɔ kapeegèle kùsulugo n syɔɔ,› koro ga jáa bi jo: ‹Yìri maa táanri,› gìí gi wɛ́ʔɛri? 24Koro ga pye yele í gi cán séew i nyɛ Syɔɔn-pya ma tári na bàā kapeegèle kùsulugo syoo.» A wi ga syɛ́ɛnri bee joo n kwɔ́ɔ, a wi fala n syɛɛnmɔngɔw pye: «Mii n jo mɔ í yìri bi mɔ yasinɛgi láa bàā syée mɔ kpaʔa ma.»
25A wi fala n yìri pe nyɛnɛ na, níì wi yasinɛgi láa ni syée wi kpaʔa ma, ní i Kolocɔlɔɔ kpɔ̀ʔɔrɔ́. 26A pe myɛ tɔ̀nɔ i káama gi na, ní i Kolocɔlɔɔ kpɔ̀ʔɔrɔ́. A be fyáa gbanʔama ní i gi nyuu peyɛɛ ma níì jo: «Wolo n tɔ̀nɔ n bìngaara kele nyaa níjanʔa.»
Zyezu n Levii yeri
(Mat 9:9-13; Mar 2:13-17)
27Koro kàdoʔo ma a Zyezu ga yiri ni syée, a wi sáà wálisyɔɔwaa nyaa pe i wi yiri Levii.#5:27 Levii: Pe wɔ́ɔ i Levii yiri Matye. Wi maa pye wodɛ́ɛɔn ní wálisyɔɔbèle kpaʔa ni. A wi wi pye: «Taʔa mii na wo kári.» 28A wi fala n yáriri myɛ yaʔa, níì yìri n taʔa wi na.
29A Levii fɛ́tiikpɔɔɔ kpéʔele wi kpáagi ni Zyezu kéeli na, wálisyɔɔbèle saʔa ní syɛ́ɛnbèle pèle nikwɔɔlɔ maa pye yaà wodɛ́ɛnbéle ní ni líi ní be ní. 30#Luk 15:1-2 A Farisibèle ní làlwaw sɛ́bɛwelebéle be báara lè ní poro ní, a bele bee ba ni nyuu ní Zyezu pìitamabèle ní fundanʔara na níì be pye: «Nyàʔá na yele pínɛ ni líi ní i gbo ní wálisyɔɔbèle, ní kapeebyebèle ní?» 31A Zyezu be yari: «Bele be cólogo lè, pe màko o nyɛ lɔ̀ʔɔtɔrɔ na í, fwɔɔ bele be yáa lè. 32Mii ga pan ba syɛɛnsinbèle yeri be kàdoʔo wáa be kapeegèle ma í, fwɔɔ kapeebyebèle.»
Zyezu ní súnw lele kéele
(Mat 9:14-17; Mar 2:18-22)
33A be wi pye: «Zyan pìitamabèle i súnw nii làrigèle saʔa ni ní i Kolocɔlɔɔ nyɛ́ɛri, Farisibèle wòolo wɔ́ɔ i gi kpéʔele ànbée, á mɔ wóbèle si i líi ní i gbo.» 34A Zyezu be yari: «Cefɔnw fɔ́lɔ ga pye ní wi cèpɔrigi syɛ̀ɛnnɛ ní lǎlee ni lè, a yele a gbǎn be pye lé pe súnw le lǎli bee ni? 35Làlaa si i maa, lee ni pe a cefɔnw fɔ́lɔ yirige be níngi ni lè, pe a náa súnw le lǎli bee ni.»
36A wi níì kàseelaa wáa be ma níì jo: «Syɔɔn faala a fànifɔɔn tɛ́ɛgaa sulu bi tɛ́ʔɛ fànilɛɛɔ wéʔe tɔ́n í. Ki ga pye ànbée, wi n fànifɔnw sulugu gbanzan, fànifɔnbili bee si a wɔ́ɔ yɛlɛ fànilɛɛw na í. 37Pe wɔ́ɔ o dùvɛɛnfɔɔn nii saliya kpàbilɛɛbéle ni í. Ki ga pye ànbée, dùvɛɛnw a kpàbibèle fologi cɛnɛ si wo, kpàbibèle si wɔ́ɔ kálagi. 38Kàjáa dùvɛɛnfɔnw n yɛlɛ pe wi le saliya kpàbifɔnbéle ni. 39Syɔ́ɔnwee wi dùvɛɛnlɛɛɔ gbaa n tàli lè, dùvɛɛnfɔɔn láa o wee bee taagi í, níì cán wi n ni gi nyuu níì jo: ‹Dùvɛɛnlɛɛw n pɔ́rɔ.› »
Jelenleg kiválasztva:
Luki 5: CB10
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Kolocɔlɔɔ Syɛ́ɛnri © Bible Society of Côte d'Ivoire, 2008.
