LATDIUTATMEI 23
23
1Paul rui peimei guay ta tei zaucna, “Achanathiu! Aseic nganv ai Ravguangc hu khou lungc bammei lwnlung hei nkhuai e twmei ai ning mak ge,” twna sa the. 2Tingkuh Annania rui Paul daeng khou ding bammei nunc ta tei, “Kamwang tei dap bo!” twna sa the. 3Khoutei, “Nraengv tey mphwanloumei ngaengsaengc! Kariak Latdanv thei layna latzan sw khang, nang mi khou tei dungc bam tu hamhna, Riakdanv twanna, ata bai khang latdanv pat khang di nah cho?” twna mundaw the.#Met 23.27-28
4“Nang Ravguangc tuang Tingkuc ta thouhsw makna sa tu cho?” twna kadaeng khou ding bammei guay tei rui sa the.
5“Chanathiu, kamei Tingkuh e twmei ai thay mak ge. ‘Nangniw tuang kapyswmei nunc ta sakasic lak nina e,’ twna Nthanmei Latrik khou hylouna nai e,” twna sa the.#Tat 22.28
6Mi khou tei bammei nunc tei. gaanvsaekc rui Saddukimei e, baihmei gaanvsaekc rui Pharisimei e twmei thay lana, Paul rui kaucna sa the, “Chanathiu, ai hei Pharisimei e, apu apouc Pharisimei e. Theihmei ringcthau datmei ta lwm e twpui zaeng rui, ata mi pei khou hei zay guang tuang e.”#Lat 26.5; Phil 3.5
7Hei tei salou pwkhou, Pharisimei lev Saddukimei tei agay thau the, kumna kaniw kalangv pat the. 8(Kalam thu Saddukimei nunc rui thu theihmei ringcthau dat mak ge khatni kauh baanchara ni, bumaengh ni maek ge twna sa e; tiki Pharisimei nunc rui thu mi guay hei nai e twna lwm e.)#Met 22.23; Mrk 12.18; Luk 20.27 9Khoutei kauc ranv hay hay thau the, kumna Pharisimei Kariak Latdanv dinhpouc nunc dingthauna akhangv ranvna, “Mi pu hei kakhuay maek ge! Bumaengh rui ny, kauh baanchara rui ny kakhou salou changc tina de!” twna sa the.
10Kaniw agaymei tei baanh patna ranv sih thau ti thena, Paul ta thaek puatlou pungh di the twna rihpy daihmei tei ping the. Kumna katuang rihmei nunc tei keyna, Paul ta laana rihmei nunc bamv thangc lou kan tho twna latdanv pat the.
11Mi nungc zingbangc tei Poubauhmei Paul daeng khou guang dingna, “Ping riu! Nang rui alam khou Jerusalem khou samei hei kumcna, Rom khou ni sa puni,” twna sa the.
Paul ta Swluai khang Swmei Raeng
12Nthuanh thauna laukhwan Jihudimei guay guang kariuna lat kaphianh the, kumna Paul ta swluai mak saanv tu zangv lak ge twna kaniw latryan sw the. 13Mi latryan hei swmei nunc kiu meic riakdei mbu e. 14Kaniw amuh daihmei nunc khatni gaanvthaih nunc daeng thangc tatna sa the, “Paul ta swluai mak saanv tu zangv lak ge twna aniw ntipmei latryan swlou kan the. 15Paul khou lat thanv nthan khang, kata nangniw daeng khou nduangh key o twna nangniw khatni pei rui Rommei tuang rihpy daihmei khou tei sa tho. Kamei mi khou hei guang tangh mak khou aniw kata swluai khang sw puni the.”
16Mi raeng hei Paul tanpui rui puanhmei katoupu thay the, kumna kamei Paul daeng thangc tatna poulou the. 17Khoutei Paul rui rihpy akhat ta kawna, “Mi nggaanvpu ti hei rihpy daihmei daeng khou nduanghlou tio, kamei kakhou lat salou khang nai e,” twna sa the. 18Mi pu tei rui mi nggaanvpu ta tei rihpy daihmei daeng khou tei nduangh guangna sa the, “Kangmei Paul tei rui ata kaw guangna mi nggaanvpu ti hei nang daeng khou nduanghlou o, kamei nang khou lat salou khang nai e twna sa pwna e.”
19Rihpy daihmei tei rui mi pu ta tei kabaanc zayna kabamv akhat khou kaney rana patna, “Nang akhou tabui lat salou niina cho?” twna thanv the. 20Kamei rui sa the, “Jihudimei pei rui Paul khou lat thanv nthan nii e twpui khe swna kata nthuanh kaniw pei khou zay key khang nang khou sa ni the twna kaniw kapy nunc lungh nchamc kan the. 21Hei tei nuhlou rio, meic riakdei mbu rui kata nchwan bam puni the. Kata swluai mak saanv tuzangv lak ge twna latryan sw kan the. Kaniw ntaw chamdaanv bam the, nang rui tabui sa puni cho twmei na nkhwan bam di the.”
22“Mi hei nang akhou poulou kan the twna meic gaanv khat na khou sini raclou nuh mak ge,” twna rihpy daihmei tei rui kakhou kadylouna, mi nggaanvpu ta tei titat dat kan the.
Paul ta Guanghkhyn Pheliks khou Ndiu Guangmei
23Rihpy daihmei tei rui katuang rihpy gaanv nei ta kawna sa the, “Aseic zingbangc ganvdak chakiu khou, Kaisaria tat khang rihmei phaynei chamdaanv o. Takuanh ricmei riakchanei khatni buy baeng sinmei ricmei phay nei tat khang sw o. 24Paul khang ni takuanh chamdaanv o, kumna kata gaekna guanghkhyn Pheliks daeng khou nduangh tangclou o.” 25Kamei rui Pheliks khang tatdyn akhat mi kumna hylou the:
26“Kalaudia Lusia rui kahymdaihmei guanghkhyn Pheliks khou: Kalum e. 27Mi pu ti hei Jihudimei nunc rui nym lana swluai nina bam khwan the. Kamei hei Rommei dilungmei e twmei thayna, ai rihmei nunc ta nduanghna tat lana kata kanlou the. 28Kaniw rui sw bammei kiu, kamei tabui tuang nkhuailou tina cho twmei thay khang kata kaniw tuang pei khou nduangh key the. 29Khoutei kakhou theic biuhmei hamh e thei kang lou biuhmei khuay maek ge twmei ai thay the. Kaniw rui kata nuh makmei kiu, kaniw tuang Riakdanv lam khou de. 30Kumna kaniw rui kata swluai khang sw bam the twmei akhou salou thena, kata nang daeng khou ndiu guang tu the. Kata nuh makna sa bammei nunc ta kiuc ni kaniw rui karuc khou sa nimei guay nang khou sa tho twna salou kan the.”
31Rihmei nunc tei rui kaniw khou saloumei thei layna, Paul ta mi nungc zingbangc tei Antipatri kaidai nduangh tangclou the. 32Nthuanh thauna phay ricmei nunc tei thu mi khou tei rui hanc dat kan the, tiki takuanh ricmei nunc rui kata nduangh tat kan the. 33Kaniw Kaisaria guang tangcna mi tatdyn khatni Paul ta guanghkhyn khou tei nsinlou the. 34Guanghkhyn tei mi tatdyn tei pac lana, kamei tabui kandic thangc rui cho twna Paul khou thanv the. Kamei Kilikia thangc rui e twmei thay la khou, 35“Nang ruc khou lat phungcloumei nunc kiu guang pwkhou rui nang lat nking kho,” twna sa the. Khoutei Paul ta “Herod tuang guanghkai” khou louna rigaanv o twna latdanv pat the.
Jelenleg kiválasztva:
LATDIUTATMEI 23: RONGBSI
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
