LATDIUTATMEI 24
24
Jihudimei rui Paul Khuay Phungcthaumei
1Zaeng panguh tangv Tingkuh Anania gaanvthaih gaanvsaekc khatni ukil Tertula ta nduanghna Kaisaria khou key the. Kaniw Pheliks hu khou guangna kaniw rui Paul khuay tei sa the. 2Khoutei Paul ta kaw gut pwkhou, Tertula rui Paul ruc khou mi kumna sa the:
“Tik-hym daihmei Pheliks, ningtyngmei nang rui zayloumei bangc khou aniw nchu nzaenghna lungc bam e khatni aniw kandic khang gay nimei kage naimei kalaihmei mpeyna ni nang rui phungc guanglou the. 3Mi ti hei aniw rui kabamv kathuicna khou khatni kaganv kathuicna khou kahaw the, kumna aniw nang ta daicna thuancku the. 4Ai nang tuang ganv laa geic nii mak ge; tiki zauc nzianlouna aniw rui duina sa nimei hei thu nkinglou o. 5Mi pu hei kandih sw kasic karouclou nimei mei akhat re. Kamei hei mbaanv kapwm khou Jihudimei pang khou tatna latlu tipat bammeipu e, khatni Nazarethmei kang tuang kapy daihmei akhat re. 6Kamei rui Ravkai ta ni sw mphuamlou khang sw the. Hei zaeng rui aniw rui kata nym tuang e. (Kata aniw tuang Riakdanv thei layna latzan sw khang aniw sw tuang e; 7tiki rihpy Lusia guangna, kata namna aniw baanc khou rui asut kan the. 8Kumna kata nang hu khou phungc guang nina de twna Lusia rui latdanv pat the.)#Baanhhy Baibal asaekc khou kathaek 6b-8a hei maek ge. Nang rui ni kakhou thanv ti thei aniw rui karuc khou sa bammei guay hei kiuc e twmei thay puni de.” 9Mi guay hei kaling de twmei Jihudimei guay tei rui ni sa haaplou the.
Paul rui Kalam khou Sa Nthanloumei
10Guanghkhyn tei rui Paul ta sa tho tw tina, kamei rui sa the:
“Nang mi kandic khou hei tingsaengcna latzanpouc sw guang the twmei ai thayna neihlana ai alam khou sa nthanlou ni the. 11Nang rui ni thay puni, twmei thu, ai Jerusalem khou kalum khang guangmei zaeng ruhna kanei na di he. 12Ai Ravkai khou meic gaanv khat na ta sini agi bammei ta kaniw how kan mak ge; sinagog khou pw ni, kaidai kabamv baih baih khou pw ni ai meic nunc ta si khang kathouh kalangh tat bammei ta kaniw how kan mak ge. 13Ntaw kaniw rui aruc khou sa bammei guay tei nsihsingmei kaniw sa ngam ni tu hamh e. 14Tiki ai rui nang khou sa ndauhmei kiu thu: Kaniw rui nkhuai e twna samei Chaeng twmei khou tatna ai apu apouc Racguangc ta kalum e. Tiki Mousi tuang Riakdanv khou khatni muhzwng nunc tuang latrik khou hyloumei guay tei ai lwm e. 15Kaniw rui lwmmei kumcna ai ni meicsimei ni meicgaymei ni theihmei khou rui ringcthau dat puni twmei Ravguangc khou lwm muay de. 16Kumna ai Ravguangc hu khou ni, maansei hu khou ni nkhuai mak khang karamc bam tuang de.
17“Ai tingkwm mpeyna Jerusalem khou bam makna kapaengc duh thangc tat lana, akandihmei nunc khang meic nunc tuang syandui kaipat phungcna thouhsw khang guang tuang e.#Lat 21.17-28 18Ai sw nimei thouc tei swna pumh nthanmei thouc sw luai tang pw khou, kaniw ata Ravkai khou ariw the. Adaeng khou meic kangdai ni bam mak ge; agay agi tuang ni maek ge. 19Tiki Asia thangc rui guangmei Jihudimei gaanvsaekc, mi khou tei bam khwan e. Kaniw aruc khou sa khang nai e thei, kaniw nang hu khou guang sa ni tuang de. 20Ai pei khou guang ding khou tei kaniw akhuay phu pat tuang nai e thei, mi khou bammei kaniw hei rui sa kan dio. 21‘Theihmei ringcthau dat puni twmei lwm e twpui zaeng rui aseic nangniw rui ata latzan sw bam tuang e,’ twna ai rui kaniw hu khou dingpui ganv khou kauclou kanmei tei kumcna, baihmei kaniw phu tow kan mak ge.”#Lat 23.6
22Pheliks tei Chaeng lam khou tei thay diangc lana, “Rihpy daihmei Lusia guang pwkhou rui nangniw tuang latzan hei swlou puni,” twna salouna, kaniw ta tipianglou the. 23Khoutei Paul ta rigaanvna lou o, tiki ramh guayna thingc tiat tiatlou nangh e; kamei nunc rui kasiamruai swlou niimei tuang nai e thei ni sw bam kan diu twna rihpypu khou tei latdanv tiilou the.
Paul Pheliks lev Drusilla khou Latrahmei
24Tingmik asaekc tangv Pheliks kanow Drusilla lev guang the. Kanow hei Jihudimei e. Kamei rui Paul ta kaw guangna Khrista Jisu khou lwmmei lam khou kamei rui rahmei tei nking the. 25Paul rui ravchaptatmei, meic pumc sinriapmei khatni guang nimei Latzan lam khou rac key pwkhou, Pheliks tei ping the. Kumna, “Nang ntaw thu tat dat tho; akhang kadouchamei nai pwkhou rui kaw dat puni,” twna sa the. 26Mi ganv khou tei Paul rui syan tii pungh e twna kamei ning khwan e. Kumna kamei kata katupc sihna kawna lat rac khwan e.
27Tingkwm kanei tangv, Porkia Phesta rui Pheliks phaan guanghkhyn sw dat the. Pheliks tei Jihudimei rui kata gay dyng e twloumei ta laa nii lapui zaeng rui Paul ta kangkai khou lou duc the.
Jelenleg kiválasztva:
LATDIUTATMEI 24: RONGBSI
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
