LATDIUTATMEI 22
22
1“Aputhiu, khatni achanathiu, ai alam khou sa nthanlou nii e; nkinglou o!” 2Kamei rui Ibri lat rui samei tei kaniw chu lana kaniw rimh rim key the. 3“Ai hei Kilikia tuang Tarsas khou rui puanhmei Jihudimei e. Kumna mi Jerusalem khou rui Gamaliel pamv khou rui daic thau tuang e. Ai hei aniu pupouc nunc tuang Riakdanv ntipna ngaek khang nchamlou pwna ngaek guangmeipu e. Ai ni nangniw aseic sw bammei kumcna, Ravguangc khang lungh sucna lunghpui mei e.#Lat 5.34-39 4Mi Chaeng hei tatmei guay ta swluai swtiatna, ai rui rai kan tuang e. Ai rui ntumei, nggaanvmei khak langh makna nymna kaniw ta kangkai khou lou kan tuang e.#Lat 8.3; 26.9-11 5Ai sa bammei hei kaling dyng e twmei Tingkuh khatni Pei tuang baanhza guay rui thay e. Mi kumhmei nunc ti hei, nymna kangriang ntana, Jerusalem khou zay keyna rai ni twna, Damaskas khou bammei Jihudimei nunc khang pei rui hyloumei tatdyn phungcna ai tat khwan e.
6“Ai tatna Damaskas ana guang pwkhou, neih ndyng zaengc khou, tingpuk thangc rui gaanc kangranmei riw aruc khou phian key the. 7Ai kandih khou kasym key the; khoutei, ‘Saul! Saul! Nang tabui swna ata rai bam tu cho?’ twna samei khwan ai chu the. 8‘Poubauhmei, nang thow cho?’ twna ai rui thanv ti khou, ‘Ai hei nang rui rai bammeipu, Nazarethmei Jisu tei the,’ twna kamei rui akhou sa the. 9Athei lay tatmei guay tei gaanhmei riw tei thu how e, tiki akhou sa bammei khwan tei thu kaniw chu mak ge. 10‘Poubauhmei, ai tabui tuang sw nina cho?’ twna ai rui thanv the. Khoutei Poubauhmei rui akhou, ‘Nang thauna Damaskas khou gut tho, kum e thei, nang ta Ravguangc rui sw o twna tiiloumei tei, mi khou tei dinclou puni the,’ twna sa the. 11Gaanc kangranmei riw tei rui amik how mak khe. Kum tina apammei guay rui abaanc zayna Damaskas khou nduangh gut the.
12“Mi kaidai khou tei, aniu tuang Riakdanv guay piumei khatni mi khou tei bammei Jihudimei guay rui chakhwang sw bammei, kazanc Anania twna kawmei, ravning nthukmeipu gaanv khat nai khwan e. 13Kamei guangna adaeng khou dingna, ‘Chana Saul, nang mik how dat tho!’ twna sa the. Mi dyng khou tei, amik how dat the, kumna kata how the. 14Kamei rui akhou sa the, ‘Aniu pupouc Racguangc rui nang ta kamei ningmei thay khang, katuang ravchaptatmei Bangcpu ta how khang khatni kakhwan kahak rui samei chu khang kapah patlou the. 15Kalam thu nang rui how kanmei khatni chu kanmei tei meic naina khou rac tat khang e. 16Kaganv sw maan ri tho, thauna duilup tho; kumna kakhou huayneyna nang paap guay khiu nthan tho,’ twna sa the.
17“Ai Jerusalem khou ngangh datna, Ravkai khou huayney bam khou, ai ndawman akhat how e. 18Mi khou tei, Poubauhmei ta ai how e, kumna, ‘Nang katumcna Jerusalem khou rui tat pat tho, kalam thu nang rui alam khou dinhmei lat tei, mi khou bammei nunc hei rui laalou ni tu hamh e,’ twna kamei rui sa the. 19Khoutei, ‘Poubauhmei, ai sinagog guay khou tatna nang khou lwmloumei nunc ta nymna rai kan e twmei kaniw thay e. 20Nang chamv dinhmei Stephen ta swluai khou tei, ai kadaeng khou dingna kata swluaimei nunc pheybaan nkhwanna, ai ni kazauh the twmei ni kaniw thay e,’ twna ai rui sa the.#Lat 7.58 21Khoutei, ‘Tat tho, ai rui nang ta duh thangc Zentelmei pang khou ndiulou puni the,’ twna Poubauhmei rui akhou sa the.”
22Kamei rui mi hei sa mak saanv thu, meic nunc tei kalat nking bam khwan e; mi tangv thu, “Kata swluai o! Kata swluai o! Kamei ringc bam khang biuh mak khe!” twna kaniw kauc ranvna kauc the. 23Kaniw phey kathanhna khatni kauh thangc mbut nrou thauna kauc bam the. 24Khoutei Jihudimei nunc rui karuc khou heidi kauc bammei hei tabui sw tina cho twmei thay khang, kata rihmei nunc bamv thangc zay gutna baina thanv o twna rihpy daihmei tei rui kamei nunc khou sa the. 25Kaniw rui kata bai khang karak ti khou, “Latzan sw makna Rommei dilungmei khat ta bai khang riakdanv rui nuh di nah cho?” twna Paul rui kadaeng khou ding bammei rihpypu khou sa the.
26Rihpypu tei hei tei chu la khou, rihpy daihmei daeng khou tei guangna, “Mi pu ti hei tabui sw nina cho? Kamei Rommei dilungmei de!” twna sa e.
27Kumna rihpy daihmei tei, Paul daeng khou guangna, “Nang Rommei dilungmei di nah cho?” twna thanv the.
“Ngguay,” twna kamei rui daw the.
28“Ai ni syan mpeyna tiina mi dilungmei hei laa tuang e,” twna rihpy daihmei tei rui sa ti khou, “Ai thu Rommei dilungmei swna puanh tuang de,” twna Paul rui sa daw the.
29Mi khou tei kata lat thanv khang sw bammei nunc tei tat kan the, khatni kamei Rommei dilungmei e twmei thay lana, rihpy daihmei tei kata kangriang rui bangclou kanmei khang tei rui ping the.
Paul Pei Mav khou
30Rihpy daihmei tei, Jihudimei rui sa bammei hei, Paul kiu tabui tuang nkhuailou tina cho twmei thay nii khwan the. Kumna nthuanh thauna, kamei rui Paul tuang kangriang tei ric ganclou the, kumna amuh daihmei nunc khatni baanhza guay ta pei kaw the. Khoutei kamei rui Paul ta nduangh guangna kaniw hu khou tidinglou the.
Jelenleg kiválasztva:
LATDIUTATMEI 22: RONGBSI
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
