Gwo Pwoblèm Ki Sou Wout Nou yoEgzanp

Depann de Bondye

Defi nou rankontre nan lavi ka souvan sanble akablan, men kòm kwayan, se pa avèk pwòp fòs nou genyen nou rive fè fas ak yo. Lè yon moun Depann de Bondye sa esansyèl pou moun sila pou li kapab ranpòte viktwa sou gwo difikilte ki va kanpe sou wout Li. Nan Lik 1:37 Bondye fè nou konnen, nanpwen anyen ki enposib pou Li. Gwo verite sa a raple nou se vre kapasite imen nou limite, men pouvwa Bondye pa gen limit.

Lè nou depann de Bondye, nou rekonèt Li se sous tout fòs ak viktwa nou. Se yon fòs imilite, nou rekonèt tou, nou pa ka fè anyen pou kont nou e nan tout sitiyasyon nou bezwen èd Bondye. Depandans sa pa yon siy feblès oubyen parès men se yon siy sajès. Sa pa vle di nou pap fè efò nan lavi nou, sa pa vle di nou pap travay, nou pa chache, nou pap frape. Men nan tout sa n ap fè n ap bay Bondye premye pozisyon an, n ap kite se Li menm ki mennen nou. Sa montre tou vrè pouvwa a soti sèlman nan Bondye, epi se sèlman avèk Li, nou ka ranpòte viktwa sou nenpòt obstak, kèlkeswa jan bagay la ka sanble difisil.

Anplis, depann de Bondye vle di rete konekte ak Li atravè lapriyè, adorasyon, ak etid Pawòl Li. Se sa w ap fè la a menm atravè devosyon sa a. Pandan nou ap pwoche pre Bondye, pouvwa Li ap manifeste nan lavi nou. Nou ka toujou rankontre difikilte se vre, men ak pouvwa Bondye nou an, nou ap kanpe djanm. Se pou nou sonje sa, Bondye nou an se Li menm ki gen tout pouvwa a, epi lè nou konte sou Li, se yon fòs ki san limit Li mete disponib pou nou.