Gwo Pwoblèm Ki Sou Wout Nou yoEgzanp

Moun ki se Alye Bondye

Fè fas ak gwo pwoblèm nan lavi nou kòmanse depi jou nou mete pye nou sou tè a, men pou nou menm ki asepte Kris, nou tounen veritab lènmi satan ki li menm pap janm sispann pèsekite nou. Sa vle di nou dwe rete konekte nan Bondye, menm lè sikonstans yo difisil. Nan yon mond kote anpil mou nap pale, y ap pwopoze solisyon tribò pa bò, chwazi rete sou bò Bondye a mande kouraj ak konviksyon. Sòm 95:3 deklare ke Senyè a se yon gran Bondye, yon Wa ki pi wo pase tout lòt bondye. Sa a se yon rapèl pwisan ke kèlkeswa jan pwoblèm nan parèt gwo e li ta sanble terib, Bondye pi gran pase sa epi li gen pisans pou Li di pwoblèm nan : ‘’ Kanpe la, konnen se mwen menm ki Bondye, mwen domine nan syèl, mwen domine sou tè a’’.

Lè nou mete tèt nou kite Bondye rantre nan lavi nou, nou mete tèt nou anba pwoteksyon ak gidans Li. Defi nou rankontre yo se pa pou nou fè fas ak yo pou kont nou; olye de sa, yo se opòtinite pou nou pwoche pi pre Bondye epi fè eksperyans ak Li. Menm jan yon sòlda kanpe obeyi anba kòmandman eta majò lame a, nou menm tou, nou dwe obeyi epi rete anba lidèchip Bondye, Nou dwe fè L konfyans paske Li konnen chemen an, se li menm ki gen plan chak batay nan lavi nou.

Rete pre Bondye vle di tou adopte volonte Li nan lavi nou, menm lè li difisil. Pafwa, mete tèt nou an règ avèk Bondye mande kèk fwa pou nou opoze ak lòt moun, pran desizyon ki pa popilè oswa moun pa p konprann. Men lè nou fè sa, nou montre kijan chemen Bondye yo pi bon pase pwòp chemen pa nou yo, epi sajès Li depase tout konprann nou. Lè nou rete an règ avèk Bondye, nou asire nou se sou chemen ki dwat la n ap bouske lavi a, kèlkeswa jan wout la ta parèt difisil.