Ou Pa KondaneEgzanp

Viktwa Sou Peche: Asirans Bondye Pa Gen Kondanasyon

Menm apre nou fin aksepte Kris, nou toujou fè fas ak peche. Antanke lòm nou frajil, e malgre nou ka gen pi bon entansyon an, pafwa nou tonbe kanmenm nan peche a. Men, sa a pa vle dinou kondane pou sa, kòmkwa nou paka jwenn padon pou sa. Tankou Pawòl la fè nou konnen an se vre, pa gen kondanasyon pou moun ki nan Kris. Sove nou se pa yon bagay ki baze sou kapasite nou pou viv yon lavi ki dwat, pafè oubyen san defo, men pito sou travay Kris la sou kwa a. Donk verite a, se pa nou menm ki sove tèt nou, paske nou p at ka fè anyen pou sove tèt nou, se Kris la atravè gras li.

Lè nou fè sa ki mal, se yon bagay ki fasil pou nou, pou n tonbe nan pyèj kilpabilite, sa vle nou tonbe blame tèt nou, nou tonbe nan kondane tèt nou. Nan moman sa yo nou dwe kwè lanmou Bondye pou nou pa diminye. E si nou mande padon, Bondye ap fidèl pou Li padone nou. Lanmou Bondye pou nou se yon bagay ki pap chanje. Li konnen feblès nou yo e Li te fè nou gras pou nou kapab grandi nan matirite ak nan mach nou ak Li. Olye pou nou kondane tèt nou, nou ta dwe vire tounen vin jwenn Bondye epi repanti.

Viv nan libète Kris la ofri vle di rekonèt anyen pa ka separe nou de lanmou Li. Nou etènèlman sekirize nan men Li, e pa gen okenn peche ki ka chavire sa Kris te fè pou nou. Pandan nou ap reflechi sou verite sa yo, lage tout santiman kilpabilite ou yo nan men Kris la, Li genyen pouvwa ak otorite pou Li ba ou repo. Toujou Sonje, nou pa anba kondanasyon ankò. Nou se pitit Bondye !