Pouki Fèt Pak la?Egzanp

Kisa nou dwe fè?

Nouvo Testaman an montre n klè nou dwe fè yon bagay pou aksepte kado Bondye ofri nou. Nou dwe fè yon aksyon ak lafwa. Jan ekri 'Paske Bondye sitèlman renmen lèzòm li bay sèl Pitit li a pou yo. Tout moun ki va mete konfyans yo nan li p ap pèdi lavi yo. Okontrè y a gen lavi ki p ap janm fini an.'(Jan 3:16).

Pou kwè, sa mande pou w aji ak yon lafwa ki chita sou tout bagay nou konnen sou Jezi. Se pa yon konfyans avèg. Se mete konfyans nou nan yon moun. Se tankou lafwa sa mande pou yon fi oswa ou gason k ap marye di 'Wi pastè' jou maryaj la.

Fason chak moun aji lafwa yo varye anpil, men mwen vle dekri yon fason ou ka aji lafwa w pou aksepte kado Bondye ofri w la kounye a. Nou ka rezime l ak twa mo byen senp:

'Padon'

Ou dwe mande Bondye padon pou tout bagay ou te fè ki mal epi vire do bay tout bagay ou konnen ki pa bon nan lavi w. Se sa Bib la rele 'repantans.'

'Mèsi'

Nou kwè Jezi te mouri pou nou sou lakwa. Ou bezwen di l mèsi paske l te mouri pou ou e paske l te ofri n padon Bondye kòm kado, paske l te fè n kado libète ak Sentespri li.

'Tanpri'

Bondye pa janm fòse n fè sa l vle. Ou bezwen aksepte kado l li fè w la epi envite l vin viv nan ou pamwayen Lespri li.

Si w ta renmen gen yon relasyon ak Bondye epi w pare pou di twa bagay sa yo, enben men yon priyè byen senp ou ka fè pou kòmanse yon relasyon ak li:

Seyè Jezi Kris,

Mwen mande w padon pou tout bagay mwen te fè ki mal nan lavi mwen (pran yon ti moman pou mande padon pou nenpòt bagay ou sonje pandan w ap priye a). tanpri padone m. Kounye a m ap vire do bay tout bagay mwen konnen ki mal.

Mèsi dèske w te mouri sou kwa a pou mwen pou mwen te kapab jwenn padon ak libète.

Mèsi paske w te fè m kado padon Bondye epi Lespri ou. Mwen resevwa kado sa a kounye a.

Tanpri antre nan lavi mwen ak Sentespri w epi rete ak mwen poutoutan.

Mèsi, Seyè Jezi. Amèn.