Pouki Fèt Pak la?Egzanp

Poukisa nou bezwen Jezi?

Oumenm ak mwen, nou te kreye pou n viv nan yon relasyon ak Bondye. Jiskaske nou jwenn relasyon sa a, ap toujou gen yon bagay ki manke nan lavi nou. Kòm rezilta, nou souvan santi yon tou vid nan nou. Yon chantè mizik wòkennwòl te dekri bagay sa a lè li di: 'Mwen gen yon vid byen fon anndan m.'

Gen yon fanm, nan yon lèt li te ekri m, ki te pale de yon 'gwo tou vid san fon.' Yon lòt jèn fi te pale de 'yon moso ki manke nan nanm li.'

Moun yo eseye ranpli vid sa a plizyè fason. Gen kèk ki eseye ranpli l ak lajan, men yo pa satisfè. Aristòt Onasis, ki te youn nan moun ki pi rich nan mond lan, te di nan fen lavi l: ‘Plizyè milyon pa toujou ase pou satisfè bezwen yon nonm nan lavi.’

Lòt moun eseye pran dwòg oswa bwè anpil tafya oswa fè sèks agoch adwat. Gen yon ti dam ki te di m: ‘Bagay sa yo bay satisfaksyon pou yon ti moman men w toujou santi vid la apre sa.’ Gen lòt ankò ki eseye travay di, fè mizik, fè spò oswa chèche siksè. Se vre pa gen anyen ki mal nan bagay sa yo, men yo yo pa pase swaf sa a ki anndan fon kè chak grenn moun.

Menm relasyon nou gen ak fanmi oubyen zanmi, ak tout bèl bagay yo ta ka bèl, pa rive konble 'vid sa a ki anndan fon kè nou.' Pa gen anyen ki ka ranpli tou vid sa a eksepte yon relasyon ak Bondye ki te kreye nou an.

Dapre Nouvo Testaman an, rezon ki fè n santi vid sa a se paske fanm ak gason vire do bay Bondye.

Jezi te di, ‘Mwen se pen ki bay lavi a’ (Jan 6:35). Se li menm sèl ki ka pase swaf ki anndan fon kè nou paske se li menm ki fè sa posib pou n retabli bonjan relasyon ak Bondye.

a) Li pase swaf nou genyen pou n jwenn sans ak objektif nan lavi

Se sèlman nan yon relasyon ak Kreyatè nou an nou jwenn bon siyifikasyon ak objektif lavi nou.

b) Li satisfè swaf nou pou n viv yon lavi apre lanmò

Pifò moun pa vle mouri. Nou anvi viv menm apre lanmò. Se sèlman nan Jezikri nou jwenn lavi etènèl.

c) Li pase swaf nou pou n jwenn padon

Si nou onèt, nou ta dwe admèt nou tout fè bagay nou konnen ki mal. Grasa lanmò li sou kwa a, Jezi te rann li posib pou nou jwenn padon e li te fè nou rebyen ak Bondye.