Luka 4
4
Yesu vamweseka
(Mateo 4:1-11; Mako 1:12-13)
1Yesu akushula na Munzinzime Wakujela, watundile ku Ndonga ya Yondau, co Munzinzime wamutwamenenene mu mambo, 2kuje Liyavola wakamweseke matangwa makumi awana. A simbu ije yoshe Yesu kalile cuma cimo cai, omo matangwa aje ahwile, co wazivile njala.
3Co Liyavola wendekele kuli ikeye ngwendi, “Nga u Muna Njambi, shika limanya eli ngeci lilimuke likende.”
4 #
Kwi 8:3
Oloni Yesu wamukumbulwile ngwendi, “Vanasoneka ngwavo, ‘Munu kasa kuyoya na makende lika embwe.’ ”
5Aje vene Liyavola wamulamatesele a munkinda, co wamumwesele mu kasimbu kakandondo vumwene vwoshe vwa ano a kaye. 6Co Liyavola wendekele kuli ikeye ngwendi, “Njikakwana nzili yoshe eyi na vufuko vwoshe ovu, omwo vanjanavyo, co njikavyana kuli woshe uje injishaka. 7Nga unjilemesa, co vyoshe evi vikapwa vyove.”
8 #
Kwi 6:13
Yesu wamukumbulwile ngwendi, “Vanasoneka ngwavo, ‘Ukalemesa Shukulu Kalunga Njambi yove, ikeye lika iwukapangela!’ ”
9Co Liyavola wamutwalele ku Yelusalema, wamwakele a kashongwa ka Njuvo ya Shukulu Kalunga, wendekele kuli ikeye ngwendi, “Nga u Muna Njambi, lyumbile asi kutunda kuno kwilu. 10#Mya 91:11 Omwo vanasoneka ngwavo ‘Njambi akashika tungelo twendi nakukunyunga.’ 11#Mya 91:12 Co vanasoneka lalo ngwavo, ‘Vakakukavwila na mavoko avo, ngeci myanja yove kesi ikatanuke ku limanya.’ ”
12 #
Kwi 6:16
Oloni Yesu wamukumbulwile ngwendi, “ Vanasoneka ngwavo, ‘Kesi weseke Shukulu Kalunga Njambi yove. ’ ”
13Omo Liyavola wamanesele kweseka Yesu mu vingila vyoshe, co wamusezele kasimbu lika.
Yesu ashangumuka vipangi vyendi mu Ngalileya
(Mateo 4:12-17; Mako 1:14-15)
14Yesu welukile ku Ngalileya, co nzili ya Munzinzime Wakujela yakele muli ikeye. Co muzimbu ou washandokelele mu lifuti mwoshe. 15Yesu wavalongesele mu masinangonge avo, co voshe vamushangazalele.
Yesu vamuvyana ku Nazaleta
(Mateo 13:53-58; Mako 6:1-6)
16Yesu waile ku Nazaleta, kuje kwakolelele, co wakovelele mu sinangonge a Litangwa Lyakuhwima ngwe ku cilika cendi. Co wemanene nakulava Visoneka, 17vamwanene livulu lya Isaya muka-kwimanena. Co wajangumwine lije livulu lyakuzenga, wawanene a mutambela uje vanasoneka ngwavo,
18 #
Isa 61:1-2
“Munzinzime wa Shukulu Kalunga ali muli yange,
omwo nanjangula kwambulula Vin̄anda Vyavivwa kuli tuutu.
Nanjitumu kwambulula kupatuka kuli vinzinda,
nakutonesa tupuputwa ngeci vamone,
nakupatula vaje vavalinakuyandesa,
19nakwambulula ngeci simbu inete
omo Shukulu Kalunga akapatula vanu vendi.”
20Yesu wafwikile lije livulu, walyanene lalo kuli muka-kunyunga, co watumbamene. Vanu voshe vakele muje mu sinangonge vamukengele shwii, 21omo wendekele kuli vakevo ngwendi, “Lyangununo lya visoneka evi lelo linapwisamo ku mesho eni, ngwe omo munazivi valinakulilava.”
22Co voshe vamushangalele, valikomokelele ku majwi endi endekele, vendekele ngwavo, “Ou kesi ikeye uje muna Yosefa ndi?”
23Co wendekele kuli vakevo ngwendi, “Mwa vushunga mukanjitela cisimo eci ngweni, ‘Ove cimbanda likangwise yove vavenya!’ Neni mukanjileka lalo ngweni vyuma vyoshe vimwazivile vije vinjalingile ku Kapenauma njivilinge lalo kuno ku lifuti lyange. 24#Yow 4:44 Mwa vushunga njimileka ngwange, muka-kwimanena naumo wai ivatambula mwamuvwa mu nganda yendi.
25 #
1 Vim 17:1
“Njitolilileni, mwa vushunga njimileka ngwange, mu Isalele mwakele vifwile vavangi a matangwa a Elinja, omo nyonzi kuyanyokele myaka itatu na vingonde vitanu na imo, co kwakele njala ya lyangengela mu lifuti lyoshe. 26#1 Vim 17:8-16 Oloni Elinja vamutumine lika kuli fwile umo wakele ku Zalefate mu lifuti lya Sindone. 27#2 Vim 5:1-14 Co vaka-mbumba vavangi vakele mu Isalele a simbu ya Elisha muka-kwimanena, oloni naumo wai wajelele kuvanga lika Namane wa ku Silya.”
28Omo vanu vaje vakele mu sinangonge vazivile evi, vakele na litoto. 29Vakatukile, co vakokelele Yesu anja ya nganda, vamutwalele akamwa ya munkinda aje avatungilile nganda yavo. Vashakele ngeci vakamumbile mu cimbongo, 30oloni ikeye wetile akati kavo waile.
Munalume muka-munzinzime wakujwala
(Mako 1:21-28)
31Co Yesu waile ku Kapenauma, nganda ya mu Ngalileya, kuje wakalongesele vanu a Litangwa Lyakuhwima. 32#Mat 7:28-29 Vanu voshe vakomokele manene kulongesa kwendi, omwo majwi endi akele na moko. 33Co mu sinangonge mwakele munalume umo wakele na munzinzime wakujwala wa ndemone wamuvi, watambekele na lijwi lyakama ngwendi, 34“Yove Yesu wa ku Nazaleta, ushaka kulinga vika netu? Kuma unaija kuno nakutunyongesa ndi? Njakuzivuka, yove wapwa u muluwa wakujela wa Njambi!”
35Asinoni Yesu washikile uje munzinzime ngwendi, “Oloka kuluu, tunda muli munu ou!” Co uje munzinzime wawisilile uje munalume asi ku mesho avo voshe, co watundile muli ikeye kujeneka kumuvulumuna.
36Vanu voshe valikomokelele manene vashangumukile kulyendekesa umo na mukwavo ngwavo, “Majwi muka awa? Munu ou ali na moko yakushika minzinzime yakujwala, co ilinakutunda!” 37Co lutsimo lwendi lwashandokelele ku mitambela yoshe ya lifuti lije.
Yesu akangwisa vanu vavangi
(Mateo 8:14-17; Mako 1:29-34)
38Yesu watundile mu sinangonge waile ku njuvo ya Simoni. Co vainamweno ya Simoni vavinjile lisika-sika lyakama manene, co valekele Yesu. 39Yesu waile wemanene kuyehi na vulili vwendi washikile lije lisika-sika ngeci limutunde. Co lisika-sika lyamutundile, washangumukile kuvapangela.
40Ku cingwezi akulauka kwa litangwa, vaje voshe vakele nakuvinja mishongo yakuliseza-seza vavanenele kuli Yesu, voshe wavakambekele mavoko nakuvakangwisa. 41Na minzinzime yakujwala lalo yatundile muli vanu vavangi, co yatambekele ngwayo, “Yove unapu u Muna Njambi!”
Yesu washikile minzinzime yakujwala ngeci kesi yendeke cuma cimo, omwo ikeyo yamuzivukile ngwayo ikeye Wakuvwavesa.
Yesu alongesa mu masinangonge
(Mako 1:35-39)
42Omo kwakile Yesu watundile mu nganda ije waile kwendi lika. Co vanu vashangumukile kumushakezeka, co omo vamuwanene vashakele kumuvindika ngeci kesi atunde kuli vakevo. 43Oloni wendekele kuli vakevo ngwendi, “Njinapande kwambulula Vin̄anda Vyavivwa vya Vumwene vwa Njambi mu vinganda vyeka lalo, omwo evi vikevyo vyaanjituminine Njambi kulinga.”
44Ngecivene, wambulwile mu masinangonge oshe a mu Yundeya.
Chwazi Kounye ya:
Luka 4: MBB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
The Bible in Mbunda ©The Bible Society of Zambia, 2006