Luka 3
3
Kwambulula kwa Yowano Muka-kumbwitika
(Mateo 3:1-12; Mako 1:1-8; Yowano 1:19-28)
1Mu mwaka wamulikumi na itanu omo Sezale Timbelyase washwanene, Pontiyu Pilato wapwile nguvulu wa mu Yundeya, co Helonde washwanene mu Ngalileya, ndolome yendi Filipu washwanene mu lifuti lya Ituleya na lifuti lya Talakoniti, Lisaniya washwanene mu Ambilene, 2co Anase na Kayafase vapwile Vaka-kukombelela Vakama. A simbu ije lijwi lya Njambi lyezile kuli Yowano muna Zakaliya omo wakele mu mambo. 3Ngecivene, Yowano waile mu lifuti lyoshe lya Ndonga ya Yondau nakwambulula ngwendi, “Tengulukeni ku vivi vyeni ngeci vamimbwitike, co Njambi akamisambesa ku vivi vyeni.” 4#Isa 40:3-5 Ngwe muvanasoneka mu livulu lya Isaya muka-kwimanena ngwavo,
“Lijwi lya umo atambeka mu mambo ngwendi,
‘Vwaeseni tapalo ya Shukulu Kalunga,
sheveni mu ngila yendi ngeci akwitilemo!
5Vimbongo vyoshe vanapande kuvyofwela,
malundu oshe na minkinda vanapande kuvinyekumwisa,
na vingila vya kupenga-penga
vanapande kuvyolola vishungame,
na vingila vyakuzika vanapande kuvilambesa.
6Vanu voshe vakamona kwamena kwa Njambi.’ ”
7 #
Mat 12:34; 23:33 Co Yowano walekele vije vimbunga vezile kuli ikeye nakuvambwitika ngwendi, “Eni manyoka! Iyajo naminangula ngeci mutewe vukalu vwa Njambi vuje vulinakwija? 8#Yow 8:33 Lingeni vyuma vije vimwesa ngeci munatenguluka ku vivi vyeni. Kesi mulyendekese mu vimbunge vyeni ngweni ‘Tuli na kukulwila yetu Avilahama’. Mwa vushunga njimileka ngwange Njambi asa kutengulula mamanya awa nakuwapwisa vatekulwila va Avilahama! 9#Mat 7:19 Njaviti vanayaka laja ku mizi ya muti, muti woshe kuwimi vushuka vwavuvwa vakaushinja nakuumbila mu tuhya.”
10Vanu vamwihwile ngwavo, “Cooni tulinga vati?”
11Wavakumbulwile ngwendi, “Ou ali na vikoveyo vivali aaneko cimo uje kesi naco, co ou ali na vyakulya aaneko vakwavo.”
12 #
Luk 7:29
Vaka-kutambula lisimu vezile ngeci avambwitike, co vamwihwile ngwavo, “Mulongisi, yetu tunapande kulinga vika?”
13Co wavalekele ngwendi, “Kesi mukatambule kutuvakana omo muvemika.”
14Mashwalale vamo lalo vamwihwile ngwavo, “Netu lalo tunapande kulinga vika?”
Co wavalekele ngwendi, “Kesi mukapukule vyuma vya vakweni, nameme kuvangela munu, simpeni na fweto yeni.”
15Vanu vakele na cinyangavili, voshe vakele nakulihozola mu vimbunge vyavo ali Yowano ngwavo amo ikeye Wakuvwavesa. 16Co Yowano wendekele kuli voshe ngwendi, “Njimimbwitika mu mema, oloni owo akaija napu wakama. Kunjapandele nameme kuzitula mikole ya a vin̄aku vyendi. Ikeye akamimbwitika na Munzinzime Wakujela na mu tuhya. 17Shewa ili mu livoko lyendi, ikeye akapepa nakujelesa mwamuvwa vinona vyoshe kulijungwilo lyendi, co tiliku akaitulika mu cishete cendi, oloni lijungu lyoshe akalyenyeka na tuhya kutwesi kuzima!”
18Ngecivene, Yowano wakele nakwambulula Vin̄anda Vyavivwa kuli vanu nakuvalambelela ngeci vatenguluke ku vingila vyavo. 19#Mat 14:3-4; Mak 6:17-18 Oloni Yowano waluvalesele Mwene Helonde, omwo Helonde wambatele Helondiya munakazi wa shongo yendi Filipu, co Helonde walingile lalo vyuma vyeka vyavivi. 20Helonde walingile cuma cacivi manene cakwaka Yowano mu kamenga.
Yesu vamumbwitika
(Mateo 3:13-17; Mako 1:9-11)
21Omo nambwitika laja vanu voshe, co na Yesu lalo vamumbwitikile. Omo Yesu wakele nakulombela, mwilu mwashokolokele, 22#Kus 22:2; Mya 2:7; Isa 42:1; Mat 3:17; Mak 1:11; Luk 9:35 co Munzinzime Wakujela washulukile ali ikeye mu cifwa ngwe katela. Co mwilu mwatundile lijwi ngwalyo, “Yove u Munange injazema, njilinakuvwaelela ali yove.”
Vakukulwila va Yesu
(Mateo 1:1-17)
23Yesu wakele na myaka makumi atatu omo washangumukile vipangi vyendi. Co vanu vamuyongwele ngwavo ikeye muna Yosefa, Yosefa wapwile muna Heli, 24Heli wapwile muna Matati, Matati wapwile muna Levi, Levi wapwile muna Meleki, Meleki wapwile muna Njanai, Njanai wapwile muna Yosefa, 25Yosefa wapwile muna Matatiyasi, Matatiyasi wapwile muna Amose, Amose wapwile muna Nahumi, Nahumi wapwile muna Eseli, Eseli wapwile muna Nangai, 26Nangai wapwile muna Maate, Maate wapwile muna Matatiya, Matatiya wapwile muna Semeine, Semeine wapwile muna Yoseke, Yoseke wapwile muna Yonda, 27Yonda wapwile muna Yowanane, Yowanane wapwile muna Lehesa, Lehesa wapwile muna Zelumbambele, Zelumbambele wapwile muna Sheyaletiyele, Sheyaletiyele wapwile muna Neli, 28Neli wapwile muna Meleki, Meleki wapwile muna Andi, Andi wapwile muna Kosame, Kosame wapwile muna Elemandame, Elemandame wapwile muna Ele, 29Ele wapwile muna Yoshwa, Yoshwa wapwile muna Elyazale, Elyazale wapwile muna Yolime, Yolime wapwile muna Matata, Matata wapwile muna Levi, 30Levi wapwile muna Simyoni, Simyoni wapwile muna Yunda, Yunda wapwile muna Yosefa, Yosefa wapwile muna Njoname, Njoname wapwile muna Elyakime, 31Elyakime wapwile muna Meleya, Meleya wapwile muna Mena, Mena wapwile muna Matata, Matata wapwile muna Natane, Natane wapwile muna Ndaviti, 32Ndaviti wapwile muna Njesi, Njesi wapwile muna Ovende, Ovende wapwile muna Mbowasi, Mbowasi wapwile muna Salemone, Salemone wapwile muna Naheshoni, 33Naheshoni wapwile muna Aminandave, Aminandave wapwile muna Andemine, Andemine wapwile muna Aleni, Aleni wapwile muna Hezelone, Hezelone wapwile muna Peleze, Peleze wapwile muna Yunda, 34Yunda wapwile muna Yakomba, Yakomba wapwile muna Isake, Isake wapwile muna Avilahama, Avilahama wapwile muna Tela, Tela wapwile muna Nahole, 35Nahole wapwile muna Selunge, Selunge wapwile muna Leu, Leu wapwile muna Pelenge, Pelenge wapwile muna Evele, Evele wapwile muna Shela, 36Shela wapwile muna Kainane, Kainane wapwile muna Alepakeshande, Alepakeshande wapwile muna Shemi, Shemi wapwile muna Nowa, Nowa wapwile muna Lameki, 37Lameki wapwile muna Matusela, Matusela wapwile muna Enoke, Enoke wapwile muna Njalende, Njalende wapwile muna Mahalalele, Mahalalele wapwile muna Kenane, 38Kenane wapwile muna Enoshe, Enoshe wapwile muna Sete, Sete wapwile muna Andama, Andama wapwile muna Njambi.
Chwazi Kounye ya:
Luka 3: MBB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
The Bible in Mbunda ©The Bible Society of Zambia, 2006