Luka 5
5
Yesu asana vandongisi vakulivanga
(Mateo 4:18-22; Mako 1:16-20)
1 #
Mat 13:1-2; Mak 3:9-10; 4:1 Litangwa limo Yesu wemanene ku cikuma ca Lishali lya Ngenesaleta omo vanu vakele nakulisindika kuya kuli ikeye ngeci vazive lijwi lya Njambi. 2Co wamwene mato avali vanaatutika ku kenge ya lishali, omwo vaka-kujevela visi vawasezele vaile nakukusha manimbwa avo. 3Yesu wakovelele mu vwato vumo, vwapwile vwa Simoni, co wamulombele ngeci avusindikile alyala kamandondo na cikuma. Yesu watumbamene mu vwato, co walongesele ije mbunga.
4Omo Yesu wamanesele kwendeka, co wendekele kuli Simoni ngwendi, “Sindikila vwato aje a mema akulova, co yove na vakweni teni manimbwa eni ngeci mujevele visi.”
5 #
Yow 21:3
Simoni wamukumbulwile ngwendi, “Shukulu tunaundangana vutsiki vwoshe oloni nakamo tunakwata kai. Oloni omo unendekamo, co tuta manimbwa.” 6#Yow 21:6 Co omo vatele manimbwa vakwatele visi vavangi manene, co manimbwa ashakele kutavuka. 7Ngecivene, vanyateyeye vasamba vavo vakele mu vwato vukwavo vaije vakuvakwase. Vezile vashulisile mato oshe na visi, co mato ashakele kuvombela. 8Omo Simoni Petulu wamwene vije vyalingiwile, watsikamene a mavuli ku mesho a Yesu wendekele ngwendi, “Mwene tunda kuli yange, omwo yange nji muka-vuvi!”
9Simoni na vakwavo valikomokelele akumona visi vavangi vavakwatele. 10Yakomba na Yowano vana va Zembendeo, vasamba va Simoni, navo lalo valikomokelele. Yesu wendekele kuli Simoni ngwendi, “Kesi uzive lyova, tunde ano ukajevela vanu.”
11Vatutikile mato avo ku nunda, vasezele vyoshe, co vakavele Yesu.
Yesu akangwisa muka-mbumba
(Mateo 8:1-4; Mako 1:40-45)
12Yesu wakele mu nganda muje mwakele munalume umo wakele nakuyanda na mushongo wa mbumba. Omo wamwene Yesu, watsikamene ku mesho endi wamulambelelele ngwendi, “Shukulu, nga mushaka, mwasa kunjijelesa!”#5:12 MWASA KUNJIJELESA: Mushongo wa mbumba walingisile munu ngeci kesi ajele, ngwe ku mashiko.
13Yesu wolwele livoko lyendi wamukwatele wendekele ngwendi, “Njishaka, jela!” Aje vene mbumba yamutundile. 14Yesu wamusin̄ikile ngwendi, “Kesi ulekeko munu umo cuma eci embwe, oloni ya ukalisholole kuli muka-kukombelela ngeci akakwilule, asinoni ukakombelele n̄ombelo ije yashikile Mosesa, ngeci voshe vakazivuke ngwavo vanakukangwisa.”
15Oloni muzimbu ou wa ali Yesu washandokelele kwoshe-ikwoshe, co vimbunga vya vanu vezile nakumutolilila, co wavakangwisile ku mishongo yavo. 16Oloni ikeye waile kwendi lika nakulombela.
Yesu akangwisa muka-kayekele
(Mateo 9:1-8; Mako 2:1-12)
17Litangwa limo omo Yesu wakele nakulongesa, vaFaliseo vamo na valongisi va majwi a Lishiko vatumbamene kuje vatundile mu vinganda vya ku Ngalileya na ku Yundeya na ku Yelusalema. Co nzili ya Shukulu Kalunga yakele ali Yesu mukuvakangwisa. 18Co vanalume vamo vanenele munalume muka-kayekele walalele a linala, vesekele kumukovelesa mu njuvo ngeci vamulangeke kulutwe lwa Yesu. 19Omwo mbunga ya vanu, kuvawanene ngila yakumukovelesa mukati. Ngecivene, vamutwalele akamwa ya njuvo,#5:19 AKAMWA YA NJUVO: Kenga Mateo 27:17. vatuvile mbengwa mu mateya, co vamusoselele na linala lyendi asi mukati ka mbunga kulutwe lwa Yesu. 20Omo Yesu wamwene kukulaela kwavo, wendekele kuli uje munalume ngwendi, “Musamba wange, vivi vyove vanavisambesa.”
21Valongisi va majwi a Lishiko na vaFaliseo vashangumukile kwendeka akati kavo ngwavo, “Iya ou munalume alinakushaula Njambi? Njambi lika ikeye muka-kusambesa vuvi!”
22Yesu wazivukile viyongola vyavo, co wendekele kuli vakevo ngwendi, “Vikajo mulinakuyongwela vyuma vyangacije? 23Cacasi cika, kwendeka ngwange, ‘Vivi vyove vanavisambesa,’ indi kwendeka ngwange, ‘Katuka wende’? 24Njimimwesa ngeci muzivuke ngweni Muna Munu ali na nzili ano asi yakusambesa vivi.” Co wendekele kuli uje muka-kayekele ngwendi, “Njikuleka ngwange, katuka, ambata linala lyove uye kwimbo lyove!”
25Co aje vene wakatukile akati kavo, wambatele linala lyendi, waile kwimbo, nakushangazala Njambi. 26Co voshe valikomokelele manene! Vazivile lyova, vashangazalele Njambi vendekele ngwavo, “Lelo tunamono vyuma vyakukomokesa!”
Yesu asama Levi
(Mateo 9:9-13; Mako 2:13-17)
27Munima yevi, Yesu watuukile, co wamwene muka-kutambula lisimu, lizina lyendi Levi, natumbama mu njuvo yendi yakutambwila lisimu. Co Yesu wendekele kuli ikeye ngwendi, “Njikave.” 28Co Levi wakatukile, wasezele vyoshe, wamukavele.
29Co Levi walingilile Yesu ciwano cakama mu njuvo yendi, co akati ka vaje vavalanyele akele vaka-kutambula lisimu na vanu veka vavangi. 30#Luk 15:1-2 VaFaliseo vamo na valongisi va majwi a Lishiko vaje vakundamene ku munga yavo valinyengelele kuli vandongisi va Yesu. Vehwile ngwavo, “Omwo vikajo mulya nakunwa amo na vaka-kutambula lisimu na vaka-vuvi?”
31Yesu wavakumbulwile ngwendi, “Vakangule kuvesi kusetela cimbanda embwe, kuvanga vaka-kuvinja lika. 32Omwo yange kunjezile mukusana vanu vaje vanalimono vakevo vavenya ngwavo vaka-vushunga ngeci vatenguluke, oloni vanu vaje vaka-vuvi.”
Cihula ca a kulikela kulya
(Mateo 9:14-17; Mako 2:18-22)
33Vanu vamo vendekele kuli Yesu ngwavo, “Vandongisi va Yowano vakalikela kulya visimbu vyavingi nakulombela, na vandongisi va vaFaliseo lalo vakalingi cuma cimo, oloni vandongisi vove vakali nakunwa.”
34Co Yesu wavakumbulwile ngwendi, “Kuma yeni mukengelela vangenzi ku ciwano ca vulo ngeci vaye na njala ndi? Mwa vushunga vene embwe! Omo vavenya vulo acili navo kuvapandele kulinga ngacije. 35Oloni litangwa likaija omo vakatundisa vavenya vulo akati kavo, asinoni vakalikela kulya.”
36Yesu wavatelelele lalo cisimo eci ngwendi, “Munu naumo wai atavula citopeko ku kazaku kakaha nakucitongela a kazaku kalaja. Nga alingamo, co atavula kazaku kakaha, citopeko caciha kucilitombola na nanga yalaja. 37Nameme ngoco kuvesi kulongela vinyu vyaviha mu vinjeke vya vilambu vyalaja, nga valingamo, vije vinjeke vya vilambu vitavuka, co vinyu viitikila mwangoco. 38Oloni vinyu vyaviha vavilongela mu vinjeke vya vilambu vyaviha. 39Kukwesi munu umo anwa vinyu vyaviha omo nanu laja vinyu vyalaja. Endeka ngwendi, ‘Vinyu vyalaja vyavivwa.’ ”
Chwazi Kounye ya:
Luka 5: MBB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
The Bible in Mbunda ©The Bible Society of Zambia, 2006