Luka 6
6
Cihula ca a Litangwa Lyakuhwima
(Mateo 12:1-8; Mako 2:23-28)
1 #
Kwi 23:25
Yesu wakele nakwita mu mahya a tiliku a Litangwa Lyakuhwima. Vandongisi vendi vashangumukile kushutozola mitwe ya tiliku, vaitsenene mu mavoko avo, co valile vinona. 2Co vaFaliseo vamo vehwile ngwavo, “Omwo vika mulinakulinga evi kuvesi kulinga a Litangwa Lyakuhwima?”
3 #
1 Sam 21:1-6
Yesu wavakumbulwile ngwendi, “Kuma kanda mulave vije vyalingile Ndaviti na vaje vakele amo nendi omo vazivile njala ndi? 4#VaLe 24:9 Wakovelele mu Njuvo ya Shukulu Kalunga, wanonele aje makende avakombelelele kuli Njambi, waalile, co waaneneko lalo vanu vendi. Makende aje kuwapandele kuwalya kuli munu woshe-iwoshe kuvanga vaka-kukombelela lika.”
5Co Yesu wamanesele ngwendi, “Omwo Muna Munu ikeye Mwene wa Litangwa Lyakuhwima.”
Munalume wakusekwa livoko
(Mateo 12:9-14; Mako 3:1-6)
6A litangwa Lyakuhwima likwavo Yesu wakovelele mu sinangonge, co walongesele. Mwakele munalume umo wakusekwa livoko lya cilyo. 7Co valongisi va majwi a Lishiko na vaFaliseo vamo vashakele kashwilo ali Yesu ngeci vamuwaneneo mulonga, ngecivene, vamukengele shwii muyehi-yehi ngeci vamone nga ikeye akangwisa uje munu a Litangwa Lyakuhwima. 8Oloni Yesu wazivukile viyongola vyavo, co wendekele kuli uje munalume wakusekwa livoko ngwendi, “Katuka wije kuno kulutwe.” Co uje munalume wakatukile wemanene kuje. 9Asinoni Yesu wendekele kuli vakevo ngwendi, “Njimihula ngwange, cuma muka vanatutavesa ku Lishiko lyetu kucilinga a Litangwa Lyakuhwima? Kukwasa indi kuvulumuna? Kwamena mwonyo wa munu indi kuunyongesa?” 10Wakengele kuli vakevo voshe, asinoni wendekele#6:10 WENDEKELE: Kunungulula kumo ngwavo, wendekele nakuluvala. kuli uje munalume ngwendi, “Olola livoko lyove.” Wolwele livoko lyendi, co lyakangukile nakupwa amo na likwavo.
11Oloni vakele na matoto, co valyendekesele akati kavo vije vivapandele kulinga kuli Yesu.
Yesu aangula miluwa likumi na vavali
(Mateo 10:1-4; Mako 3:13-19)
12A simbu ije Yesu walamatele ku munkinda nakulombela, co wakele nakulombela vutsiki vwoshe kuli Njambi. 13Omo litangwa lyatuukile, co wasanene vandongisi vendi ngeci vaije kuli ikeye, co waangwileo likumi na vavali, vaje vaatumbwile miluwa, 14Simoni (uje yalukile Petulu) na ndolome yendi Anduleo, Yakomba na Yowano, Filipu na Mbatolomeo, 15Mateo na Tomasi, Yakomba muna Alufeya, na Simoni (uje ivatumbwile “Zelote” ) 16Yundasa muna Yakomba, na Yundasa Isikalyote, uje wamwendele vungungu.
Yesu alongesa nakukangwisa
(Mateo 4:23-25)
17Omo Yesu washelumukile amo na miluwa vendi ku munkinda, co wemanene ku mutambela wakukunama na mbunga yakama ya vandongisi vendi. Co mbunga yakama ya vanu vatundile ku Yundeya na ku Yelusalema, na vaje vatundile ku vinganda vyakele ku cikuma ca ku Tile na ku Sindone, 18vezile nakumutolilila nakuvakangwisa ku mishongo yavo. Voshe vaje vakele nakuyanda na minzinzime yakujwala vezile, co wavakangwisile. 19Co mbunga yoshe vesekele kumukambeka mavoko, omwo nzili yafumine kuli ikeye nakuvakangwisa voshe.
Kuvezika nakuviilila
(Mateo 5:1-12)
20Yesu wakengele vandongesi vendi, co wendekele ngwendi,
“Mwavezika yeni vaka-kuutwa,
omwo Vumwene vwa Njambi vunapu vweni!
21“Mwavezika yeni muli na njala ololo,
omwo mukakuta!
“Mwavezika yeni mulinakulila ololo,
omwo mukajolela!
22 #
1 Pet 4:14
“Mwavezika omwo vanu vamizinda nakumivyana nakumishaula nakumitumbula ngwavo muvavavi, omwo lizina lya Muna Munu! 23#2 Miz 36:16; Vil 7:52 Joleleni omo eci cilingiwa, co kineni nakujolela, omwo vanamitulikila cikandelela ceni cakama mwilu. Omwo vakukulwila vavo valingile ngacije kuli vaka-kwimanena.
24“Oloni tuyando tweni yeni munafuku ololo,
omwo mwatambula laja kuyoya kwakuvwa!
25“Tuyando tweni yeni munakuta ololo,
omwo mukaziva njala!
“Tuyando tweni yeni mulinakujolela ololo,
omwo mukalinyenga nakulila!
26“Tuyando tweni omo vanu voshe valinakumishangazala, omwo vakukulwila vavo valingile ngacije kuli vaka-kwimanena va makuli.
Kuzema vitozi
(Mateo 5:38-48; 7:12a)
27“Oloni njimileka yeni vaka-kunjitolilila ngwange, zemeni vitozi veni, lingeni mwamuvwa kuli vaje vamizinda, 28vezikiseni vaje vamisinga, co lombeleleni vaje valinakumiyandesa. 29Nga munu akupupa ku nana imo, co mutengulwile akupupe ku nana ikwavo lalo, nga munu akunyeka kazaku kove, mwane lalo na cikoveyo cove. 30Munu uje amilomba mwaneni cuma canamilombo, omo munu ambata cuma cove, co kesi akwilwisileco lalo. 31#Mat 7:12 Ngecivene, vyuma vyoshe vimushaka ngeci vakweni vamilingilevyo, mukemwo vene, neni lalo valingilenivyo.
32“Nga muzema lika vaje vamizema, omwo vikajo mutambwila cikandelela? Nameme vaka-vuvi vakazeme vaka-kuvazema! 33Nga mulinga likamwamuvwa kuli vaje vakamilingi mwamuvwa, omwo vikajo mutambwila cikandelela? Nameme vaka-vuvi mukemwo muvakalingi! 34Nga mukumwisa lika vaje mwakulaela ngweni vamiilwisila, omwo vikajo mutambwila cikandelela? Nameme vaka-vuvi lalo vakalikumwisa, ngeci vatambule ngwe muje muvanaana. 35Embwe! Zemeni vitozi veni, co lingeni mwamuvwa kuli vakevo, vakumwiseni oloni kesi mukulaele ngweni mukavitambula lalo. Co cikandelela ceni cikapwa cakama, mukapwa vana va Njambi wa Akamwa ya Akamwa. Omwo ikeye akatetela vaje kuvesi kumukandelela na vaje vaka-vuvi. 36Pweni vaka-kutetela ngwe Ishweni wapwa muka-kutetela.
Kuhisa vakweni
(Mateo 7:1-5)
37“Kesi muhise vakweni, kutewa neni Njambi akamihisa, kesi mupaye vakweni, kutewa neni Njambi akamipaya, sambeseni vakweni, co Njambi akamisambesa. 38Aneni vakweni, co Njambu akamyana. Mwa vushunga vene, mukatambula vyavingi, vukwasi vwakushemutukwa, vakavwaka mu mavoko eni, vukwasi vuje vwoshe mwasa kukwata. Seteko ije musetaka nayo vakweni, ikeyo lalo yakamiseteka nayo Njambi.”
39 #
Mat 15:14
Co Yesu wavatelelele cisimo eci ngwendi, “Kapuputwa umo kasa kutwamenena kapuputwa mukwavo, nga alingamo voshe vavali vakawila mu mbulu. 40#Mat 10:24-25; Yow 13:16; 15:20 Kukwesi ndongisi atuvakana mulongisi wendi oloni ndongisi woshe, omo namanesa kulilongesa kwendi, na ikeye lalo akapwa amo na mulongisi wendi.
41“Omwo vikajo umona kacishoni kali a lisho lya mukweni, oloni kuuyongola mukambo uli mu lisho lyove? 42Nambe vatijo wendeka na mukweni ngwove, ‘Mukwetu, tewa njikutundise kacishoni kali a lisho lyove,’ omo yove uli na mukambo mu lisho lyove? Ove muka-civembulu! Akulivanga tundisa mukambo uli mu lisho lyove, asinoni umone mwamuvwa akutundisa kacishoni kali a lisho lya mukweni.
Muti na vushuka vwawo
(Mateo 7:16-20; 12:33-35)
43“Muti wauvwa kuwasa kwima vushuka vwavuvi, nambe muti wauvi kuwasa kwima vushuka vwavuvwa. 44#Mat 12:33 Muti woshe vauzivukila ku vushuka vwawo, omwo kuwasa kuvuya vushuka vwa mukuyu ku muti wa mambimbo, nameme ku muti wa mambimbo kuwasa kuvuyako mikolovozi ya vushuka vwa vinyu. 45#Mat 12:34 Munu wamuvwa ikeye muka-kusholola vyuma vyavivwa ku vufuko vwendi vwavuvwa vwa mu mbunge, munu wamuvi akasholola vyuma vyavivi ku vufuko vwendi vwavuvi vwa mu mbunge. Omwo kanwa kakendeka vije vyashula mu mbunge.
Vaka-kutunga vinjuvo vavali
(Mateo 7:24-27)
46“Omwo vika munjitumbula ngweni, ‘Mwene, Mwene,’ oloni kumulingi vinjimileka? 47Woshe uje aija kuli yange nakuzivilila majwi ange nakuwononoka, njimileka cifwa cendi. 48Nalifu ngwe munalume watungile njuvo yendi, wendile nakulovesa luvula a limanya. Livazi lyezile lyapupile kuje ku njuvo, oloni kuyaningangele, omwo luvula lwaije njuvo lwakele a limanya. 49Oloni woshe aziva majwi ange kujeneka kuwononoka napu ngwe munalume watungile njuvo yendi kujeneka kwinda luvula, omwo livazi lyapupile kuje ku njuvo, co yasiwukile, kuwa kwayo kwapwile kwakuvi manene!”
Chwazi Kounye ya:
Luka 6: MBB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
The Bible in Mbunda ©The Bible Society of Zambia, 2006