Mǒhtûlû̌hǎhtûsa 10
10
Phanṳ̂̌a aphû̌pwa̤khû tokhlǒ akhlialè
1Hǒo mî̌ ta̤wě̤mǎnǎ Phanṳ̂̌a aphû̌pwa̤khû Khûshemǎ, Khûhamǎ kû̌ Khûyaphè̌ sî akhlialè gelò̤tutṳ̌ tokhlǒ awe̤akè. Aphû̌khû hǒtokhlǒnu aphû̌ ali̤ ô̌lò̤ lô̌khô bǎ shidû̌ hto hǎkhû̌ akha nutokhlǒ hǒ.
Phayaphè̌ akhlialè kû̌ akhlilèphû̌ sî tokhlǒ
2Kòyò khlilèphû̌ dǒ akhlialè lò̤tutṳ̌ kû̌ Phayaphè̌ tokhlǒ numî̌, Gò̌ma khlilèphû̌, Makò̌ khlilèphû̌, Madaya khlilèphû̌, Habǎ khlilèphû̌, Tǔbò̌ khlilèphû̌, Mè̌shè khlilèphû̌ kû̌ Tǐra khlilèphû̌ nutokhlǒ hǒ. 3Khlilèphû̌ dǒ akhlialè lò̤tutṳ̌ kû̌ Phagò̌ma tokhlǒ mî̌ Ashakenè khlilèphû̌, Ripha khlilèphû̌ kû̌ Tò̌gamǎ khlilèphû̌ nutokhlǒ hǒ. 4Kòyò khlilèphû̌ dǒ akhlialè lò̤tutṳ̌ kû̌ Phayabǎ tokhlǒ numî̌, Ělǐsha khlilèphû̌, Tashǐ khlilèphû̌, Khǐtǐ khlilèphû̌ kû̌ Dûdanǐ̤ khlilèphû̌ nutokhlǒ hǒ. 5Asî tokhlǒ numî̌ a ô̌peshecû̌bò gǎ bǎ Mèdihtûrèniya shidû̌shitewe̤htunu. Phayaphè̌ akhlialè tômṳ̌ kû̌ tômṳ̌ nî̌ a htûhtò̌ khô̌ bò khlilèphû̌ tôcǒ kû̌ tôcǒ, ô̌ khô̌tû̌ agǎ kû̌ agǎ, ayô̤̌ kû̌ ayô̤̌.
Phahamǎ akhlialè kû̌ akhlilèphû̌ tokhlǒ
6Khlilèphû̌ dǒ akhlialè lò̤tutṳ̌ kû̌ Phahamǎ tokhlǒ numî̌, Kǔshǎ khlilèphû̌, Mî̌sare khlilèphû̌, Phǔtǎ khlilèphû̌ kû̌ Phakhana khlilèphû̌ nutokhlǒ hǒ.
7Khlilèphû̌ dǒ akhlialè lò̤tutṳ̌ kû̌ Phakǔshǎ tokhlǒ numî̌, Sè̌ba khlilèphû̌, Hawî̌la khlilèphû̌, Sabǔta khlilèphû̌, Rahama khlilèphû̌ kû̌ Sabateka khlilèphû̌ nuhǒ. Khlilèphû̌ dǒ akhlialè lò̤tutṳ̌ kû̌ Pharahama tokhlǒ numî̌, Shebǎ khlilèphû̌ kû̌ Dedǎ khlilèphû̌ nuhǒ.
8Phakǔshǎ mî̌ Khûneròdǎ apha. Bǎ hǎkhû̌nu Khûneròdǎ mî̌ pwa̤ dǒ a ô̌ kû̌ ta̤suwi̤sòwò̤ dǒ ta̤shěta̤pě̤ tôkhô awǐlǒ tôpwa̤. 9Dǒ Cǒmara tûjû̌pwa̤ alô̤mô̤̌nu Khûneròdǎ mî̌ pwa̤lṳ̂ta̤mi̤ dǒ asî̌ajò̌ mî̌ca tôpwa̤, yô̤̌sǎ hî̌nǎ kû̌, “Asô̌sô̌ kû̌ Khûneròdǎ, pwa̤lṳ̂ sî̌jò̌wô̌ ta̤mi̤ dǒ Cǒmara tûjû̌pwa̤ alô̤mô̤̌ nutôpwa̤.” 10Wî̤̌dû̌ dǒ a bô̌htò̌ wǐlǒ dǒ Sǐnagǎkû tokhlǒ numî̌ Wî̤̌babǔlû, Wî̤̌ěrǎ, Wî̤̌akedǎ kû̌ Wî̤̌kò̌ne tokhlǒ hǒ. 11A ô̌ bǎ gǎ nutôgǎ akû dě a hǎhtò̌cû̌ dǒ Ashǔrǎgǎ dě a cû̌ bô̌htò̌ Wî̤̌ni̤nawě̤, Wî̤̌rahò̌bû, Wî̤̌khalǎ, 12kû̌ Wî̤̌rasi dě Wî̤̌rasi mî̌ wî̤̌dû̌ wî̤̌htû dě a ô̌ bǎ Wî̤̌ni̤nawě̤ kû̌ Wî̤̌khalǎ aplǎkû.
13Khlilèphû̌ dǒ akhlialè lò̤tutṳ̌ kû̌ Phamî̌sare nutokhlǒ mî̌, Lǔdǎ khlilèphû̌, Anamî̌ khlilèphû̌, Lehabǐ khlilèphû̌, Naphètǔhǐ khlilèphû̌, 14Pasarǔsǐ khlilèphû̌, Kasôlǔhǐ khlilèphû̌ kû̌ Kôphôtûrǐ khlilèphû̌ nutokhlǒhǒ. Phǐlǐsôtǐ khlilèphû̌ numî̌ a gelò̤ tutṳ̌ dǒ Kasôlǔ khlilèphû̌.
15Phakhana aphû̌ tokhlǒ numî̌ aphû̌wè̤̌pwǎ̤ Khûsǐdû htodě Hǐtǐ khlilèphû̌, 16Yebǔsǐ khlilèphû̌, Amò̤̌rǐ khlilèphû̌, Gǐrakashǐ khlilèphû̌, 17Hǐwǐ khlilèphû̌, Arakhǐ khlilèphû̌, Sǐnǐ khlilèphû̌, 18Arabadǐ khlilèphû̌, Semarǐ khlilèphû̌ kû̌ Hamatǐ khlilèphû̌ nutokhlǒ hǒ.
Dě dǒnô̌kònu Khana khlilèphû̌ tokhlǒ phǎhtò̌ peshe dû̌htò̌ pô̤̌ asî khli tokhlǒ. 19Khanagǎ gǎkû numî̌ a sahtò̌ bǎ Wî̤̌sǐdû dě alè̤̌cû̌ tǒ̤dǒ Wî̤̌kèra, Wî̤̌kashǎ kòshî̌ htodě alè̤̌ cû̌ tǒ̤pô̤̌ dǒ Wî̤̌sǐdû, Wî̤̌gamû̌ra, Wî̤̌aduma kû̌ Wî̤̌sebûi, dě a cû̌tǒ̤ pe dǒ Wî̤̌lasha.
20Lǒ̤bò hǒtokhlǒ mî̌ Phahamǎ aphû̌pwa̤khû sî akhlialè tokhlǒ dě asî ô̌ tûû̌ kû̌ akhliplô̤̌ kû̌ alě̤ayô̤̌ kû̌ ashiagǎ kû̌ akhlilèphû̌ tûû̌ hǒ.
Phashemǎ akhlialè kû̌ akhlilèphû̌ tokhlǒ
21Phashemǎ dǒ a dû̌khlo kû̌ Phayaphè̌ nutôpwa̤ numî̌ aphû̌ ô̌dû̌wî̤ shû̌lě, dě Phashemǎ mî̌ Phaěba aphû̌ tokhlǒ aphiaphu hǒ. 22Dě kòyò khlilèphû̌ dǒ akhlialè lò̤tutṳ̌ kû̌ Phashemǎ tokhlǒ numî̌ amè̤̌kû̌ Ěla khlilèphû̌, Ashǔra khlilèphû̌, Arǔbasa khlilèphû̌, Lǔdǎ khlilèphû̌ kû̌ Ara khlilèphû̌ nutokhlǒ hǒ. 23Khlilèphû̌ dǒ akhlialè lò̤tutṳ̌ kû̌ PhaAra tokhlǒ numî̌, ǔsǎ khlilèphû̌, Hǔlǎ khlilèphû̌, Keta khlilèphû̌ kû̌ Mashǎ khlilèphû̌ nutokhlǒ hǒ.
24PhaArǔbasa mî̌ Khûshelǎ apha, dě Phashelǎ mî̌ Khûěba apha. 25Phaěba numî̌ aphû̌pwa̤khû ô̌ sò̌ginǐ̤, aphû̌wè̤̌pwǎ̤ tôpwa̤mî̌ ami̤ kû̌ Khûphělè, ma̤titèhî̌dě bǎ a htukhanu kòyòhǎkhû̌phû̌ ô̌ peshecû̌ prṳ̂ bò dǒ hǎkhû̌nu. Dǒ apṳ̌pwa̤khû hî̌ dě ami̤ kû̌ Khûjûkhǔta. Phelè̌ yô̤̌sǎyô̤̌mû mî̌ ta̤peshe.
26Khlilèphû̌ dǒ akhlialè lò̤tutṳ̌ kû̌ Phajûkhǔta tokhlǒ numî̌, Ò̌lamò̌dǎ khlilèphû̌, Shelephǎ khlilèphû̌, Hasamawǐ khlilèphû̌, Jera khlilèphû̌, 27Hadûra khlilèphû̌, ǔsò̌ khlilèphû̌, Dǐkhǔla khlilèphû̌, 28Ò̌ba khlilèphû̌, Abǐme̤la khlilèphû̌, Shebǎ khlilèphû̌, 29Ò̌phǐra khlilèphû̌, Hawî̌la khlilèphû̌ kû̌ Yṳ̂bǎ khlilèphû̌ sî nutokhlǒ hǒ. Lǒ̤bò kòyò tokhlǒ numî̌ Phajûkhǔta akhliaplô̤̌ kû̌ akhlilèphû̌ tokhlǒ hǒ.
30Asî gǎkû lǎ̤ô̌ nu a sahtò̌ bǎ Meshagǎ tǒ̤dǒ Phara khôlô dǒ a ô̌ bǎ gǎlṳmṳ̌htò̌ nutôkhô.
31Hǒomî̌ Phashemǎ aphû̌pwa̤khû sî akhliaplô̤̌ kû̌ akhlilèphû̌ tokhlǒ dě asî ô̌ kû̌ akhlialè kû̌ alě̤ayô̤̌ kû̌ ashiagǎ kû̌ akhlilèphû̌ hǒ. 32Lǒ̤bò khlilèphû̌ hǒtokhlǒmî̌ alò̤khlilò̤lè bòkè dǒ Phanṳ̂̌a aphû̌pwa̤khû akhlialè dǒ a ô̌ bǎ asî akhlialèkû nutokhlǒ hǒ. Bǎ shidû̌bǐ hto hǎkhû̌ akhanu, asî akhlialè tokhlǒ ô̌peshe cû̌bò dǒ hǎkhû̌ tôbǎbò.
Chwazi Kounye ya:
Mǒhtûlû̌hǎhtûsa 10: KXF
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Wycliffe USA