Mǒhtûlû̌hǎhtûsa 11
11
Babǔlû hǐhtû htò̌yô̤̌
1Dǒ sakhû̌lû̌ akhanu, lǒ̤bò kòyò ô̌ dǒ hǎkhû̌ tôbǎ bò̌bò numî̌, ayô̤̌ ô̌pwǎ tôcǒ nô̤̌pwǎ dě asî hî̌bǎ sô̌sô̌ pwǎ lû̌û. 2Bǎ asî ô̌ dǒ gǎ lṳmṳ̌htò̌ tôkhô dě a hè akhanu, asî cû̌kè̌shǐ khôdûkhû̌ dǒ Sǐna#11:2 Sǐnagǎ mî̌ tokhlǒkhlǒ dě kòyò kaǎ kû̌ Babǔlûgǎ. gǎkû tôkû, dě asî cû̌ô̌ lô̌khô bǎnu.
3Dě asî hî̌ kè̌khî lû̌û tôpwa̤ kû̌ tôpwa̤ kû̌, “Cû̌ pa cû̌bô̌ wô̤̌wô̤̌ lû̌û lǒ̤hǎlî̤glǒ dě ma̤shotuklǔ yǎ tǎ,” dě a bô̌htò̌ hǐhtû htò̌yô̤̌ kû̌ lǒ̤hǎli̤glǒ dě pô̤̌khô lǒ̤hǎli̤glǒ gǔ iměcu lû̌û ayanu a noǎ lô̌khô ta̤i tocǒ dǒ asô̌sô̌ kû̌ sǒcònu. 4Htodě asî hî̌ lô̌khô kû̌, “Cû̌, pa cû̌ ma̤htò̌nǎ wî̤̌dû̌ tôwî̤̌ dě pa bô̌htò̌ hǐhtûhtò̌yô̤̌ dǒ a htò̌yô̤̌ tǒ̤dǒ mǒkhû̌ tômè tǎ, pa gǔ ma̤ pô̤̌nu htodě pami̤ lṳ̌shilṳ̌gǎ pě, htokhôtô̤̌ pa cû̌ô̌ pusǔpeshe pe lû̌û dǒ hǎkhû̌ tôbǎ nutô̤̌.”
5Dě Cǒmara tûjû̌pwa̤ hèlò̤ kè̌ pwǎ wî̤̌ kû̌ hǐhtûhtò̌yô̤̌ dǒ kòyòhǎkhû̌phû̌ ata̤bô̌htò̌ nu pwǎ. 6Dě a hî̌ kû̌, “Kè̌mò̌, kòyò hǒtokhlǒ a kè̌ ô̌pwǎ tô khlilèphû̌ nô̤̌pwǎ, a kè̌ hî̌bǎ pwǎ tôcǒ nô̤̌ dě a kè̌ sahtò̌ ma̤ ta̤ pô̤̌o numî̌ htû̌nô̌kò pě asî sǎyṳ ma̤ ta̤titètè̌ bǎbǎ a gǔ ma̤htûhtò̌bò̌ lô̌khô pě. 7Cû̌, pa hèlò̤ ma̤dô̌shǐdô̌klabò asîyô̤̌ dě no sî̌ganǎ̤ pe tǎ̤ asî tôpwa̤ kû̌ tôpwa̤ ayô̤̌ tǎ̤mǎ̤ tǎ.”
8Pô̤̌nukhû̌khî, Cǒmara tûjû̌pwa̤ hèlò̤ ma̤ pushǔpeshe cû̌kè asî dǒ hǎkhû̌ tôběbò, dě a bô̌htò̌ htûpe asî wî̤̌dû̌ nutôwî̤̌ tô̤̌. 9Bǎnukha Cǒmara tûjû̌pwa̤ ma̤dô̌shǐdô̌kla lǒ̤bò kòyò ô̌ bǎ hǎkhû̌ hǒtôbǎ ayô̤̌ akhû̌akhî, kòyò kaǎkè wî̤̌ nutôwî̤̌ ami̤ kû̌ Wî̤̌babǔlû (Babǔlû mî̌ apwe̤ sô̌sô̌ kû̌ ma̤shû̌shu shû̌shǎ ma̤lûpò̌lûshe). Pô̤̌nudě sahtò̌ bǎ Wî̤̌babǔlû nudě Cǒmara tûjû̌pwa̤ ma̤ pushǔpeshe cû̌kè asî dǒ hǎkhû̌běkhû̌ lǒ̤bò.
Phashemǎ akhlialè lò̤tutṳ̌ tǒ̤dǒ PhaAbraha
10Hǒomî̌ ta̤wě̤mǎnǎ Phashemǎ akhlialè tokhlǒ awe̤akè hǒ.
Bǎ Shisǔkè hto ginǐ̤ně, dě Phashemǎ ô̌ aně tôya̤ akhanu, a phû̌ô̌lò̤ Khûarǔbasa. 11Bǎ Phashemǎ phû̌ô̌lò̤ hto Khûarǔbasa akhanu a ô̌ pô̤̌ aně yè̤̌ya dě a phû̌ô̌lò̤ pô̤̌ aphû̌pwa̤khû tokhlǒ kû̌ aphû̌pwa̤mǒ̤ tokhlǒ.
12Bǎ Khûarǔbasa ně ô̌ sushi kû̌ yè̤̌ně akhanu, a phû̌ô̌ Khûshelǎ. 13Bǎ Khûarǔbasa phû̌ô̌ hto Khûshelǎ akhanu, a ô̌ sělě pô̤̌ aně lǐ̤ya̤ kû̌ suně dě a phû̌ô̌ nṳ̌pô̤̌ aphû̌pwa̤khû tokhlǒ kû̌ aphû̌pwa̤mǒ̤ tokhlǒ.
14Bǎ Phashelǎ ně ô̌ sushi akhanu aphǔô̌lò̤ Khûěba. 15Bǎ a phû̌ô̌lò̤ hto Khûěba akhanu a ô̌ sělě pô̤̌ aně lǐ̤ya̤ kû̌ suně dě a phû̌ô̌ nṳ̌pô̤̌ aphû̌pwa̤khû tokhlǒ kû̌ aphû̌pwa̤mǒ̤ tokhlǒ.
16Bǎ Phaěba ně ô̌ sushi kû̌ lǐ̤ně akhanu aphû̌ô̌ Khûphělè. 17Bǎ a phû̌ô̌lò̤ hto Khûphělè akhanu, a ô̌ sělěpô̤̌ aně lǐ̤ya̤ kû̌ sushi dě a phû̌ô̌ nṳ̌pô̤̌ aphû̌pwa̤khû tokhlǒ kû̌ aphû̌pwa̤mǒ̤ tokhlǒ.
18Bǎ Phaphělè ně ô̌ sushi akhanu, a phû̌ô̌lò̤ Khûru. 19Bǎ a phû̌ô̌lò̤ hto Khûru akhanu, a ô̌ sělě pô̤̌ aně ginǐ̤ya̤ kû̌ lǐ̤sô̌tôně dě a phû̌ô̌ nṳ̌pô̤̌ aphû̌pwa̤khû tokhlǒ kû̌ aphû̌pwa̤mǒ̤ tokhlǒ.
20Bǎ Pharu ně ô̌ sushi kû̌ ginǐ̤ně akha nu a phû̌ô̌lò̤ Khûseru. 21Bǎ aphǔô̌lò̤ hto Khûseru akhanu, a ô̌ sělě pô̤̌ aně ginǐ̤ya̤ kû̌ susô̌tôně dě aphǔô̌lò̤ nṳ̌ pô̤̌ aphû̌pwa̤khû tokhlǒ kû̌ aphû̌pwa̤mǒ̤ tokhlǒ.
22Bǎ Phaseru ně ô̌ sushi akhanu, a phû̌ô̌lò̤ Khûnakhò. 23Bǎ a phû̌ô̌ hto Khûnakhò akhanu, a ô̌ sělě pô̤̌ aně ginǐ̤ya̤ dě a phû̌ô̌lò̤ nṳ̌pô̤̌ aphû̌pwa̤khû tokhlǒ kû̌ aphû̌pwa̤mǒ̤ tokhlǒ.
24Bǎ Phanakhò ně ô̌ ginǐ̤shi kû̌ lǐ̤sô̌tôně akhanu, a phû̌ô̌lò̤ Khûterǎ. 25Bǎ a phû̌ô̌ hto Khûterǎ akhanu, a ô̌ sělě pô̤̌ aně tôya̤ kû̌ shǐlǐ̤sô̌tôně dě aphǔô̌lò̤ nṳ̌pô̤̌ aphû̌pwa̤khû tokhlǒ kû̌ aphû̌pwa̤mǒ̤ tokhlǒ.
26Bǎ Phaterǎ něô̌ susô̌tishi akhanu, a phû̌ô̌lò̤ Khûabra, Khûnakhò kû̌ Khûhara.
Phaterǎ akhlialè tokhlǒ awe̤akè
27Hǒomî̌ ta̤wě̤mǎnǎ Phaterǎ akhlialè tokhlǒ awe̤akè hǒ. Phaterǎ phû̌ô̌lò̤ Khûabra, Khûnakhò kû̌ Khûhara. Dě Phahara phû̌ô̌lò̤ tṳtṳ̌ pô̤̌ Khûlòtǎ. 28Bǎ Phahara sikè dǒ Wî̤̌ǔra, Babǔlûgǎkû, bǎ wî̤̌ dǒ a ô̌phijǎlò̤ nutôwě̤ akhanu, apha Phaterǎ ô̌htûpwa̤pe pwǎ. 29Htodě Khûabra kû̌ Khûnakhò dě a phî̌phû̌ phî̌ma lô̌khô. Khûabra ama nî̌ ami̤ kû̌ Mǒ̤sarè̌, Khûnakhò ama nî̌ ami̤ kû̌ Mǒ̤mǐlôkha, dě Mǒ̤mǐlakha mî̌ Phahara aphû̌pwa̤mǒ̤. Phahara numî̌ Mǒ̤mǐlakha kû̌ Mǒ̤isakha apha hǒhǒ. 30Mǒ̤sarè̌ nî̌ a shôdôphû̌ akhû̌akhî, a phû̌ô̌ gû̌ kòyò tôpwǎ̤ tô̤̌.
31Phaterǎ ô̌ bǎ Wî̤̌ǔra, Babǔlûgǎkû nudě a kaǎnǐ̤ aphû̌ Khûabra kû̌ adè̌ Mǒ̤sarè̌ kû̌ ali̤ Phahara aphû̌ Khûlòtǎ dě a hǎhtò̌cû̌kè lô̌khô dǒ Khanagǎ. Bǎbǎkǎlè bǎ asî cû̌tǒ̤ pepwǎ dǒ Wî̤̌hara akhanu, a ô̌ lô̌khô bǎnu.
32Phaterǎ ně ô̌ ginǐ̤ya̤ kû̌ yè̤̌ně dě a sikè bǎ Wî̤̌hara akûnu.
Chwazi Kounye ya:
Mǒhtûlû̌hǎhtûsa 11: KXF
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Wycliffe USA