1Mos. 50
50
1Rappoakenangan si Josep tubunia ka ukkuinia pasamba musou samba sigguknangan ukkuinia. 2Lepa parentaakenangan si Josep siagai masikelaake tubu simamatei addeat pusinginan tubut Jakob. 3Pusinginan nenda ujuna epat pulu ngagogoi, teteret tupakei addeat pusinginan tubu simamatei. Tai Misir muleppei goni rubeiat ka Jakob, ujunia pitu pulu ngagogoi.
4Kele ailepa teteret puleppei goni, kuanangan si Josep sipugagalai kai rimata, “Segeakekam tiboiet nene katubut rimata, 5‘Kateteret ukkuiku amalegrengan imatei, koniakenangan aku mupalelengan katubunia, kurateiakenia karatei sinarekngakenennia ka laggai Kanaan. Lulut nenda obaake aku kuei masirateiake ukkuiku. Lepa nenda toili aku.’ ”
6Lepa kuanangan rimata, “Kenannan masirateiake ukkuinu kele sipinaleleknu katubunia.”
7Lepa ei si Josep masirateiake ukkuinia. Sangamberi sipugagalai kai rimata, sikebbukat uma purimataat samba sangamberi siabeu ka Misir, mei simakere pasamba si Josep. 8Sikalalepnia, sasarainania, samba sasarainan ukkuinia sabagei mei leuet. Sarat tatoga sigoiso samba terimeura tukaddiuake ka kupkumen Gosyen. 9Pasukan sipukekereta samba sipukukuro le moi, pat patunanda nenda bulat mananta.
10Kele arasege ka kudduat pasibobokat gandum ka Goren-Haatad, ka isit kabelaiat sulu bagat oinan Jordan, pugerirangan simakope reureu baga samba nganga simagok. Baraakenangan si Josep punen puleppei goni, pitu ngagogoi ujunia. 11Kele araitco sipulaggai ka Kanaan pupuleppet goni ka Goren-Haatad nenda, kuarangan, “Bulat mangelei baga punen puleppei goni sirimanua ka Misir nenda!” Nenda te lulunia kudduat nenda tuoniake Abel-Mizraim.
12Kise' te ragalaiake tatogat Jakob aponia sitoneakenen Jakob katubudra. 13#Pugap. 7:16 Ambitrangan tubut Jakob simamatei ka Kanaan samba rateiakerangannia kabagat ngaliu Makhpela, ka isit kabelaiat sulu Mamre, ka mone sinakit Abraham kai Efron tai Het nenda, addeat ibailiuake purateiat. 14Lepat airateiake ukkuinia si Josep, toilinia ka Misir pasamba sasarainania samba sangamberi sirimanua sipasitututnia masirateiake ukkuinia nenda.
Si Josep masipusuibi bagatda sasarainania
15Lepat ailango ukkuira, kuarangan sakebbut Josep, “Kipa ke ioba si Josep isiliake katai'ta siburu?” 16Lulut nenda kaurangan patonekat nene kai Josep, “Kepei matei ukkuita, 17koiniakenangan kai masikua katubum kele kise, “Appeake sele sigalaira sakebbunu siburu katubum.” Oto, sibailiu pagugulet Taikamanua panindogiet ukkuita, kutiddou kai, appeake sele sigalaimai.” Pusounangan si Josep kateteret aisilo patonekat nenda.
18Lepa oi sasarainania nenda murappo kamatania samba masikua, “Kai nene paguguletnu.”
19Tapoi kuanangan si Josep katubutda, “Bui numaloto; aipoi ta'momoi kugalaiake kele galajet Taikamanua. 20Apakerean bagamui masigalai katai katubuku, tapoi Taikamanua masisiliake katai nenda ibailiu puerukat, bule sipuaaili siburu nenda maigi sirimanua sipuririmanua kineiget moi tupaarau. 21Bui imakarat bagam. Kususunnake le geti pakeietmui samba tatogamui.” Kise te aipusuibi bagatra si Josep pasamba titiboat simamoile, pat mangeleinangan bagatra.
Kamateiat Josep
22Si Josep mariuriu le ikuddu ka Misir pasamba saeppunia; aipurimanua teret sangotu pulu ngarura. 23Ai itco peile si Josep punuteteu Efraim. Aiaili peile masipuuku tatogat Makhir, iete punuteteu Manasye, sibailiu bakkat togania. 24Kuanangan si Josep katubut sasarainania, “Kamateiatku amalegrengan, tapoi Taikamanua ipasikeli le geti kam samba ambitnangan bela barania ka laggai nene, ka laggai sipinalelekNia pasamba suppa kai Abraham, Ishak samba Jakob.” 25Lepa koinakenangan sasarainania si Josep musuppa, kuanangan, “Mupalelengan kam katubuku, ke' iambit kam Taikamanua ka laggai nenda, ambitmuan leu geti tubuku simamatei.” 26Lepa geti matei si Josep ka Misir, katetert ainia sangotu pulu ngarura. Kaurangan pusinginan tubunia simamatei samba galakngakerangania ka bagat peti simamatei.
Chwazi Kounye ya:
1Mos. 50: MWV
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
@LAI 2015