1Mos. 49
49
Tiboiet Jakob pasilepa
1Lepa geti sogainangan si Jakob tatogania samba kuanangan, “Paruru kam sene, kabe'be'ku. Kupaagaiakenia katubumui aponia nuaili kam ka gogoi sibabara:
2Paruru kam, ale tatogat Jakob,
arepmake Israel, ukkuinu.
3Si Ruben, togakku sibebbukat,
ekeu le karonanku, samba puroronku siboiki.
Ekeu le simagege katalagat sangamberi togakku.
4Ekeu malabbei ipanganyak kele oinan,
bailiu ta'aan sipuboboiki;
aipoi amerep ekeu pasamba sinanalepku kabe'be',
anupalolit pereman ukkuinu.
5Simeon samba si Lewi sipusasaraina;
pamateira tupakei ka pugegege.
6Ta' kutu'tut pukerekat bagatda,
samba ta'kututut bagat parurukatda.
Aipoi rapamatei kabagat golu le,
masitataake geget banteng addeat muangka baga.
7Tutelei le pugogolura, kalulut katainia.
Tutelei le oddoi tubutda, kalulut gegenia.
Kupasabu le geti sia ka sangalio Israel.
Kupasaragai le geti sia katalagat sangamberi bangsa.
8Jehuda, nutakep le geti tetekat saggaknu;
raumun le geti ekeu sasarainam
samba murappo kamatam.
9 #
4Mos. 24:9; Pamoil. 5:5 Jehuda kelean le singa sibau tubu;
imateiake saggaknia, lepa toili karumunnia;
purapponangan samba muligri,
samba berisara sirimanua simaeme masisuruakenia.
10Si Jehuda masiukkaake geti tutura purimataat,
reddenannia muparenta te geti teret buru-buru.
Tai bangsa raambit le geti upeti,
samba murappo sialei purereddet katubunia.
11Togat kalideinia iapraake ka loina,
ka loinat anggur bulat simaeru.
Taptapnangan bibiletnia pasamba anggur,
anggur kele bonan logau.
12Bonan le matania kalulut mulo anggur,
bulau sonnia kalulut mulo susu.
13Si Zebulon mukuddu geti kabebet koat;
sangamberi kapa' mura'ra' ka bebet buggeinia;
pat aili ka Sidon puteterat kupkumennia.
14Si Isakhar nenda kelean le kaliddei simaron
sipuliligri ka paoggangan karakjak bairanennia.
15Itconangan kopet iginia kudduat nenda
samba kopet laingenia laggai nenda,
iageti pulukuknangan masibairat bairanen,
samba ibesiake mugalai sibailiu pagugulet.
16Ekeu Dan, nuparenta le geti bangsam,
ekeu ibailiu kele suku bagei ka Israel.
17Ekeu kele ulou kabebet enungan,
ulou simalaga son ka bebet polou,
sipasipipila bukkut reret kuro
pat bele' sipukukuro.
18Oi Tuhan, katuaragat siake'Nu, nenda le kungengena.
19Gad, ralalaba le geti ekeu sipararaurau,
tapoi bailoknia nuraurau le sia geti.
20Asyer, komennu simananam simalilimai,
nupatarek le geti komen ka tai rimata.
21Naftali, kelean le simasusura sibebela;
bulat malainge le tatogania.
22Josep kele kalidei sibau tubu,
kaliddei simaeppak kabebet bubuakat,
sipababalau ka igrit leleu.
23Saggak masisaggangi simakope,
ikukurunia pasamba silogui samba rourou.
24Tapoi si Josep riuriu le ron parania,
riuriu le ron rourounia
kalulut paroman Taikamanua simagege,
Taikamanuan Jakob, Sijago Israel.
25Taikamanuan ukkuinu masiropake ekeu;
Sipulugege' masisukatake ekeu
pasamba urat sibara ka manua
samba oinan sibara katei polak.
Pasamba toga samba jaui,
26gandum samba ogo'.
Panukanan Taikamanuan ukkuinu
sisaliu kayot sangamberi leleu simakope baja'.
Bule sangamberi panukanan nenda tugorosot ka utet Josep, samba kabukkut utenia.
Nia le kilibet baga katalagat sasarainania.
27Benjamin kelean le jo'jot leleu simasabbak.
Simanseman labanangan ibania.
Sinoibo parubeinangannia.”
28Nenda te sipulurua suku Israel, samba tiboiet sitiboakenen ukkuira kateteret aikau panukanan ka senenda tatogania.
Matei si Jakob samba turateiake
29Lepa geti kaunangan tiboiet si Jakob ka tatogania: “Taan mauju kutoili kele taikebbukatku. Rateiake kam aku geti kabebera, 30#1Mos. 23:3-20 kabagat ngaliu ka Makhpela, isit kabelaiat sulu Mamre ka laggai Kanaan. Ai sakingan si Abraham ngaliu samba mone ka bebenia sibara kai Efron tai Het addeat ibailiuake ratei. 31#1Mos. 25:9-10, 35:29 Sedda turateiake si Abraham samba si Sara, si Ishak samba si Ribka; samba sedda leuet kurateiake si Lea. 32Mone samba ngaliu sibabara sedda aisakingan ka tai Het. Rateiake kam aku sedda.” 33Lepa aikau tiboiet si Jakob ka tatogania, perep ai perep, lepa mateinia.
Chwazi Kounye ya:
1Mos. 49: MWV
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
@LAI 2015