Málkúsi 5
5
Yɛɛ́so a á ega njūŋɔ mesī ánɛ ŋiŋ
(8.28-34; Lúk 8.26-39)
1Yɛɛ́so pɔ́ a nnɔ yí é tó ntshi, ŋ́kó á nzéŋ mmɔʼ, á ntē alāʼ epuɔ Jeláza. 2Á lɛ ŋgē efhó á ntē akɛnūʼ etó, mmɔʼ ŋiŋ á shʉʼ ntswɛ́tte á yí, mbɔ esī e lē ŋgɔ á yí, á fhɔ́ɔ á lewu tɔ́, ájʉʼ zīi, mɛ́ lɛɛ́ ntúŋɔ mepfhō éwú. 3A lɛɛ́ nnáŋa á lewu tɔ́ mɛ́t, ŋ́gɔ́ yīi ŋiŋ a le gɔ́, a á le kūʼ á lekwɛ̄t á yí í, tɛ mbɔɔ á lelɔk ŋkhʉ atʉɛ́. 4Ńzi ŋgē egɔ́ épúp, mbɔ mɛ́ gɛ enéŋɛ akʉɔʼté á mekhu yí, ńdɔkɔ meŋkeŋkhʉ atʉɛ́ ŋkwɛ́tɛ, a eshūŋ meŋkeŋkhʉ atʉɛ́ nzáʼ ezáʼe, ḿbiŋ mbwɔ́ʼte akʉɔʼté. Ŋiŋ a á le pīŋ nzéŋ ŋ́kūʼ á lezɔ̄pte á yí í. 5Á lɛ́ ŋgɔ́ɔ efʉʼ metsem, ŋ́kɔʼɔ́‑atswɛt pɔ́ táŋ‑azokó, a egʉɔ nzóko á lewu tɔ́ mbɔɔ á ndo mekwɛ̄t ŋkɛ́lɛ, ńnɔŋɔ ŋgāʼtɛ mé ŋghi teté, ḿbiŋɛ ndɔ̄kɔ metɔ́ nnéŋɛ meféŋ ánɛ yí. 6Páʼ a á jʉ́ɔ á Yɛɛ́so á zɛ́t tɛ éwú lā, á lɛ ŋkʉ̄te eshʉ̄ʼ ńnɔ̄ŋ á esī, á mvhɔ yí. 7Ńnɔŋ ŋgāʼtɛ mé ŋghi teté ŋ́gɛ: «Yɛɛ́so Méŋ Ndém tɛ‑athʉ́‑lephū, o tswíi akɔ̄ á mbū meŋ ŋ̄? Meŋ á lɔk lezēŋ Ndém, ḿbúʼ mbū á mbū wu, te néŋ á gá á ntē ŋgʉɔ̄ʼ. » 8A lɛɛ́ ndʉ́ɛ́ épúp melaʼ mīi, Yɛɛ́so a á cɔ́k esī zīi, e genɛ á yí ŋ́gɛ: «Esī, fhó ánɛ ŋiŋ wuɔ ntó. » 9Yɛɛ́so á zɛ́tte á yí ŋ́gɛ: «Lezēŋ cú é lɛ awɔ́?» Á pwɛt ŋ́gɛ: «Lezēŋ tsá é lɛ Atʉtʉ, melaʼ mīi pek é tɛ nzá. » 10Ḿbiŋ nchʉ́ nnɛ̄t mbúʼ mbū ŋ́gɛ, ńdɛ́ʼ Yɛɛ́so á tó á wɔ́p ŋgyá tɛ ŋgia é sak. 11Á le gē egɔ́ épúp, mmɔʼ mía akɛt mekúna, á gɔ́ á ndo lekwɛ̄t mpfɛ́tɛ etsō. 12Mesī mɛ́t é swíŋte á Yɛɛ́so ŋ́gɛ: «Lɛ ntswī, pek egʉɔ ŋkó ánɛ mekúna pi. » 13Yɛɛ́so á véŋ, mesī mɛ́t é lɛ ntó ŋgʉɔ ŋ́kó ánɛ mekúna pwɔ̄. Akɛt mekúna jɔ̄ á pú ntáka, éfɛ́ ŋkʉŋɛ́, ŋgʉ̄ɔ á mía. Pɔ́ lɛ ajūɔ ntsāʼ pīa, ḿbú ŋgʉ̄ɔ á mía tɛ mmī. 14Wɔ pfɛ́nne‑mekúna mɛ́t é kʉ mbīŋ nzem, ésáʼ anu jʉɔ mɛ́t, éshúŋ epuɔ á ntē tésɔŋ mbɔɔ á ntē mekap alāʼ. Epuɔ enáte eshʉ̄ʼ, ńjʉ́ɔ ajū mīi á tɔ́k. 15Ŋ́gē eshʉʼ á lezēŋ Yɛɛ́so, ŋiŋ yīi mesī é kɛ ánɛ yí lā, á náŋ éwú, ḿmāʼ menzhó, mbɔ leghi tsí é ndáʼ eshʉ̄ʼ. Pɔ́ yiŋ, ńjʉ́ɔ á gɔ́ ŋiŋ yīi, atʉtʉ mesī á kɛ ánɛ yí lā. Ecɔʼ é pú ŋgɔ̄ á wɔ́p.
16Epuɔ pīi, pɔ́ njʉ́ɔ ajʉɔ anu á letɔ̄k, é pɛ́te eshúŋ á wɔ́p ajū mīi, á tɔ́k ánɛ ŋgaŋ mesī wuɔ mɛ́t, mbɔɔ ánɛ mekúna. 17Epuɔ é júʼ, ńdɛ nzī á leswīŋte á Yɛɛ́so ŋ́gɛ, a efhó á alāʼ pɔ́p ŋgʉ̄ɔ. 18Yɛɛ́so á gē ezíʼ ekó á ntē akɛnūʼ, ŋiŋ yīi mesī é tó ánɛ yí lā, á swíŋte á yí ŋ́gɛ, pɔ́ yí e elɛ ŋgʉ̄ɔ. 19Yɛɛ́so a te véŋ. Ḿbiŋ ndé á mbū yí ŋ́gɛ: «Piŋ nzem mé mba ju, ńjʉ́ɔ atseŋ ŋgyā jú, ḿbɛ́te eshúŋ á wɔ́p ajū mīi, Atsyapuɔ a á ghʉ ánɛ wu. Éshúŋ á wɔ́p páʼ a á wɛ apɔŋɔ́ ntē ánɛ wu. » 20Ŋiŋ mɛ́t á gʉɔ, ńtɔ́ktɛ ánɛ amɔ̄ʼ apak alāʼ, mɛ́ tɔ́ŋ lɛ Metésɔŋ-Legēm, ésáʼa anu mbɔŋ zīi, Yɛɛ́so a á ghʉ ánɛ yí, éshúŋɔ epuɔ. Epuɔ metsem é júʼ, á pú ŋkʉ̄ʼne á wɔ́p.
Yɛɛ́so a tsyaā egɔ ntsem, ńtsyā á lewhʉ̄
(Mat 9.18-26; Lúk 8.40-56)
21Yɛɛ́so á zéŋ ndɔ̄k akɛnūʼ, ḿbīŋ nzem mé ezi mmɔʼ nzéŋ. Epuɔ tɛ nzá é cúʼte á lezēŋ yí, á tshí á akʉŋɛ́ ntshi. 22Mmɔʼ ŋiŋ á shʉʼ. Lezēŋ tsí é gɔ́ lɛ Jayilus, ŋ́gɔ́ ŋiŋ á nnɔ epuɔ pīi, pɔ́ cʉtɛ menu á ŋgyā aswiŋte. Ńdɛ ŋgē ejʉ́ɔ á Yɛɛ́so, ŋ́gʉɔ ŋgwhʉ̄ á mekhu yí. 23Ńchʉ́ nnɛ̄t mbúʼ mbū á mbū yí ŋ́gɛ: «Méŋ agáʼ méŋ ga eyi menzwí, a á gɔ tɛ ncʉ́ʼɛ ŋgɔ̄ áa ŋkwhʉ̄ɛ, lɛ eshʉ̄ʼ nzápa mbū mú ánɛ yí, ńtswí á yí á mbū lewhʉ̄, a egɔ́ éwú. » 24Yɛɛ́so á véŋ, pɔ́ yí é nɔŋ ŋgʉ̄ɔ, nnɔ epuɔ tɛ nzá é gɔ́ á nzem, ŋ́ŋyɛ̄nɛ á yí ŋkɔʼɔ́ ŋkɔʼɔ́, ńzhɛ̄nɛ á yí. 25Mmɔʼ menzwí a lɛ nnɔ mɛ́t, mbɔ mɛ́sɔ̄ a á náŋ ánɛ yí ŋguʼ ntsɔp pīa mé legēm. 26A le gɔ́ mbɔ, a á jʉ́ɔ ŋgʉɔ̄ʼ tɛʼ á mba megaŋ afho ntií ntiī. Ńtsēŋ ezi ŋkāp ntsem ánɛ agɔ mɛ́t, ḿbiŋ ncʉ́ʼ yīi a ete, agɔ zí, á tswiʼne ŋgʉ̄ɔ mé mvhɔ. 27Á júʼ páʼ mɛ́ shúŋɔ menu ánɛ Yɛɛ́so, éshʉ̄ʼ azí ŋkó á nnɔ, éfhó mé nzem, ḿpfēŋ nzhó Yɛɛ́so. 28Mbɔ a á ndáʼ nnéŋ á ntē yí á légɛ: «Meŋ ndɛ mpfēŋ áa nzhó zi ndaʼ, mbɔ meŋ a te. » 29Ḿpfēŋ épúp, agɔ zí á lɛ nzáʼa efʉʼ mɛ́t efʉʼ mɛ́t, á júʼ á mbe nnɛ̄t yí páʼ, yí é te.
30Yɛɛ́so á lɛ njúʼ páʼ mmɔʼ mbʉʼ e é tó ánɛ yí, ḿbēkne nnɛ̄t á nnɔ epuɔ, ńzɛ́tte ŋ́gɛ: «Awɔ́ a á pfeŋ nzhó za ā?» 31Megaŋ nnɔ pí é zɛ́tte á yí ŋ́gɛ: «Wu méŋwɛ̄t é si njʉ́ɔ páʼ, epuɔ é si ŋŋyɛ̄nɛ á wú ŋkɔʼɔ́ ŋkɔʼɔ́, o ó piŋ ŋgāa nzéŋ ńzɛ́tte ŋ́gɛ, awɔ́ a á pfeŋ á wú lɛ́ ɛ̄?» 32Yɛɛ́so á ké ŋŋūa ejʉʼ, éfāʼa ŋiŋ yīi, a á ghʉ ajʉɔ anu mɛ́t. 33Ecɔʼ é gɔ menzwí wɔ̄, á zi á levɛt, melaʼ mīi a á si nzhɛ́ɛ ajū mīi, á tɔ́k ánɛ yí. Éshʉʼ ŋgwhʉ̄ á mekhu Yɛɛ́so, ḿbɛ́te eshúŋ á yí ndeŋ ndeŋ, ajū mīi á tɔ́k. 34Yɛɛ́so á lé á mbū yí ŋ́gɛ: «Maá, agɔ jú á mi, melaʼ mīi o ó fɛ́ nnɛ̄t ŋgyá á mbū meŋ. Gʉɔ mé apwɛne. O ó pú ntē. »
35Yɛɛ́so á zɛ́t nzhɛ á eshúŋnɛ, emɔ̄ʼ epuɔ é fhó á mba Jayilus, ḿmɔʼ tɛŋgyā epuɔ pīi, é cʉtɛ ŋgyā aswiŋte, éshʉʼ ndé á mbū Jayilus ŋ́gɛ: «Méŋ wu a á ndáʼ ŋkwhʉ́, te zóko ŋgēnɛ á nziʼnɛ. » 36Ŋ́gē elé, Yɛɛ́so á nɔŋ njúʼɔ, ŋ́ghʉ̄ páʼ a ka júʼ ú lā, ńdé á mbū Jayilus ŋ́gɛ: «Te pɔ́k azō, fɛ́ áa nnɛ̄t ju ŋgyá mé meŋ. » 37Pɔ́ Jayilus é nɔŋ ŋgʉ̄ɔ, Yɛɛ́so a te véŋ ŋ́gɛ, ŋiŋ a egɔ́ á nzem yí í. Ńdaʼ Piɛ pɔ́ Jáak mbɔɔ Jáaŋ méŋ mɔ́ Jáak. 38Pɔ́ kó á mba Jayilus, Yɛɛ́so á jʉ́ɔ, epuɔ é gɔ́ si nzāpa nnɛ̄t, ńdāa, ńdéŋtɛ meŋguŋ. 39Á kó á ŋgyā, ńzɛ́tte á wɔ́p ŋ́gɛ: «Pɛ zapa nnɛ̄t zɛ, ńdā akɔ̄ páʼa ā? Mɔ́ a ka kwhʉ́ ɛ́, á si ndí lií. » 40Pɔ́ júʼ épúp, ńcʉ́ʼɛ nzwī Yɛɛ́so zwi. Á tswi pɔ́ fhó á ŋgyā mbú ntó tɛ mmī, á lɔk á mɔʼɔ́ mɔ́ pɔ́ mía mɔ́ mbɔɔ nnɔ yí wɔ̄, ŋ́kó á ŋgyā yīi, apfhō mɔ́ á éwú. 41Á tá apū mɔ́ mɛ́t ŋkímne, ńdé á mbū yí ŋ́gɛ: «Talita kum», ńdɔkɔ ŋ́gɛ: «Mɔ́ ŋgɔ, meŋ mé tswii á mbū wu, ziɛ̄. » 42Mɔ́ menzwí mɛ́t á lɛ ndū á esī lɛ glɛ, ńzī á leziŋ. Epuɔ ejʉ́ɔ épúp, á pú ntsyā á wɔ́p tɛʼ. Mɔ́ mɛ́t a le wɛ̄ ŋguʼ ntsɔp pīa mé legēm. 43Yɛɛ́so á chʉ́ nnɛ̄t mbé á mbū pɔ́p ŋ́gɛ, ndɛ́ʼ pɔ́ ghʉ tɛ ŋiŋ á zhɛ́ ajū mīi, á tɔ́k. Ḿbiŋ ntswī ŋ́gɛ, mɛ́ efāʼ azō ŋgyá mɔ́ mɛ́t a epfɛ́t.
Chwazi Kounye ya:
Málkúsi 5: ybb
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© CABTAL