Málkúsi 4
4
Ashuŋne lepúʼ ánɛ mbhi‑etsō
(Mat 13.1-9; Lúk 8.4-8)
1Yɛɛ́so á shʉʼ nzéŋ ńzī á lezīʼne epuɔ leswhī leswhī, á akʉŋɛ́ mía ntshi Ŋgaliléa. Alāʼ á pú ŋkɔ́ʼ ńcúʼte á lezēŋ yí, ńzá záa tɛ á zíʼ ŋkó á ntē akɛnūʼ, ńnáŋ éwú á ndo ntshi. Alāʼ á zɛ́t á legʉ̄ŋ ntshi, á ndo ŋgia. 2Á lɔk meshuŋne lepúʼ, ńzíʼne á wɔ́p menu tɛ nzáne. Ńzíʼne á wɔ́p amɔ̄ʼ anu ndé ŋ́gɛ: 3«Pɛ echʉ́ nnɛ̄t njúʼ. Mmɔʼ ŋiŋ a le gʉ̄ɔ á ŋkāʼ yí á mbhií etsō#4.3 Jʉ́ɔ́ Mat 13.3.. 4Ŋ́kó á lephi etsō mɛ́t, emɔ̄ʼ mesa é whʉte á ndo mɛnzhɛ. Meséŋ é shʉʼ ntsókte, ḿbú mpfɛ́t. 5Emɔ̄ʼ mesa, é whʉte ánɛ ajʉʼ metɔ́. Ájʉʼ zīi atsáʼ á té tswhi ŋgɔ́ éwú ú. Éshʉʼ ŋgákne ésáʼ, melaʼ mīi, atsáʼ á té ajʉʼ mɛ́t tɛ esɛ̄h ɛ́. 6Táʼ, nu á shʉʼ nnɔ̄ŋ ŋkyáa, ńtɔ̄ etsō mɛ́t, é zó, melaʼ mīi, meŋgaŋ é lɛ te tswhī ŋgɔ́ éwú ú. 7Emɔ̄ʼ mesa é whʉte á ajʉʼ mmɔʼ tepɔŋ mvēŋ, pɔ́ a pɔ́p é púte esáʼ, tepɔŋ mvēŋ mɛ́t á pú ŋkwɛ́t etsō, é fém, tɛ é té kūʼ á lezēm ɛ́. 8Emɔ̄ʼ mesa é le ké ŋgwhʉte ajʉʼ atsáʼ mbɔŋ. Éshʉʼ esáʼ, ńtswhí, ńzém á mbɔŋɔ́, tɛ mɛ́ gʉɔ amɔ̄ʼ ajʉʼ, éfāʼ, é tɔ́k etsi mɛ́ le phīī, nzhɛ megēm tɛ́t. Amɔ̄ʼ ajʉʼ á kó nnɔ̄ŋ ŋgyáa nzhɛ megēm ntokó. Amɔ̄ʼ á kó nnɔ̄ŋ ŋgyáa nzhɛ ŋkhʉ. » 9Yɛɛ́so á gē emakne, ńdé ŋ́gɛ: «Ŋiŋ a wiɛ metuúŋ á lelɔk njúʼ ejʉʼ, á júʼ. »
Yɛɛ́so a lɔkɔ meshuŋne lepúʼ tɛ́ eshúŋnɛ melaʼ akɔ̄?
(Mat 13.10-15; Lúk 8.8-10)
10Alāʼ á ghʉ nnáŋ tɛ ŋgʉ̄ɔ, epuɔ pīi é nzɛ́t á nzem Yɛɛ́so, pɔ́ a meziŋ‑ntō ntsɔp pīa, é zɛ́tte á yí ŋ́gɛ, a ekɛ́ʼte meshuŋne lepúʼ eshúŋ á wɔ́p. 11Á lé á mbū pɔ́p ŋ́gɛ: «Ndém a le ghʉ̄ ŋ́gɛ, pɛ pwɔ̄, e ezhɛ́ ntsem zīi, e é ánɛ Lefɔ Ndém. Ḿbiŋ ŋgɔ́ mé epuɔ mendɛʼɛ, meŋ ndɔ̄ɔk ashuŋne lepúʼ tɛ́ eshúŋne á mbū pɔ́p. 12Púp, a elɔk mbō páʼ mɛ́ le tí ŋ́gɛ:
«Pɔ́ echʉ́ nnɛ̄t ncʉ̄te ejʉʼ, ḿbīŋ le azō jʉ́ɔ,
ńchʉ́ nnɛ̄t nzwíʼte ejʉʼ, ḿbīŋ le azō júʼ,
ḿbɔ́k á wɔ́p á lepiŋ nzem á mbū Ndém,
Ndém á lekne mefa mɔ́p. »
Yɛɛ́so a á ega ŋkɛ́ʼtɛ ashuŋne lepúʼ ánɛ mbhi‑etsō
(Mat 13.18-23; Lúk 8.11-15)
13Yɛɛ́so, á zéŋ nzɛ́tte á wɔ́p ŋ́gɛ: «Pɛ te njúʼɔ ashuŋne lepúʼ jʉɔ ɔ́ páʼa, épiŋ eshʉʼ eghʉ páʼ lā, tɛ́ ejúʼ etsi emɔ̄ʼ é? 14Mbhi‑etsō a á páʼā, ńdɔkɔ mbhīɛ ashuŋne Ndém. 15Emɔ̄ʼ epuɔ é swhí ndo mɛnzhɛ zīi, ashuŋne mɛ́t á whʉ éwú. Pɔ́ lɛɛ̄ ŋgē etswí ashuŋne mɛ́t, Sɛ́ta á shʉʼ efhó á ntē pɔ́p efók. 16Emɔ̄ʼ epuɔ é zéŋ ŋgɔ́ páʼ ajʉʼ metɔ́ zīi, ashuŋne á whʉ éwú lā. Ntií epuɔ jʉɔ mɛ́t e lɛɛ̄ ŋgē ejúʼ ashuŋne Ndém, ńdɔ̄k lekāk tɛ́ ntswí. 17Táʼ, pɔ́ té cʉ́ʼ ashuŋne mɛ́t, á kó á ntē pɔ́p tɛ ntsēŋɛ meŋgaŋ á. Ńdɛ nnáʼ ŋkúʼte áa ánɛ aleʼé alāʼ. Mɛ́ lɛ ŋgē elʉɔ́ʼ á wɔ́p, kɛɛ mmɔʼ ŋgʉɔ̄ʼ mé lɛ ŋgē eshʉʼ ánɛ pɔ́p, melaʼ mīi pɔ́ é kúʼte anu Ndém lɛ́ɛ, pɔ́ lɛ ŋgwáʼ anu Ndém mɛ́t. 18Emɔ̄ʼ é piŋ eswhí á ajʉʼ tepɔŋ mvēŋ zīi ashuŋne mɛ́t á whʉ éwú, pɔ́ juúʼ ashuŋne Ndém, 19ḿbiŋ nté á ndaá nnɛ̄t ánɛ etsō ndo esī atsetsáʼ, ńté á ntshí ntē ánɛ lewūʼ esī atsetsáʼ tsīi, é gɔ́ áa mepɔp, ńzéŋ nté á ntshí ntē wɔ́p ánɛ emɔ̄ʼ etsō ndɛʼɛ, ecū muɔ mɛ́t é pú ŋkwɛ́t anu Ndém á ntē pɔ́p, tɛ á pí, té zém ntá. 20Emɔ̄ʼ epuɔ é kó ŋgɔ́ páʼ ajʉʼ atsáʼ mbɔŋ zīi, ashuŋne Ndém á whʉ éwú. Epuɔ mɛ́t é juúʼ ashuŋne Ndém, ŋ́kúʼte, ŋ́gɔ́ páʼ taʼ mvem ecū mīi, a zémɛ mvem megēm tɛ́t, mmɔʼ é kó nnɔ̄ŋ nzémɛ mvem megēm ntokó, mmɔʼ é kó nnɔŋ nzémɛ mvem ŋkhʉ lā. »
Ashuŋne lepúʼ ánɛ láam
(Mat 5.15; 10.26; Lúk 8.16-18; 11.33; 6.38)
21Yɛɛ́so á zéŋ ndé á mbū pɔ́p ŋ́gɛ: «Ŋiŋ a gɔ elɛ́tte á láam, ḿbiŋ efāʼ ŋgwʉ́ŋ ndɔk ŋkápte kɛ? Ḿbiŋ ntshí á ekesī‑ekó kɛ? Ŋgáŋ, mbɔ a a tshí ánɛ azō mé athʉ́. 22Pɛ ezhɛ́ á légɛ akʉ̄ɛ akʉ̄ɛ zīi, á ndʉɔne lʉɔne, Ndém a a fú eghʉ mɛ́ ejʉ́ɔ. Akʉ̄ɛ akʉ̄ɛ zīi á ntsem, a eghʉ̄ mɛ́ ezhɛ́. 23A gɔ́ éyi ŋiŋ a wɛɛ̄ metuúŋ á lelɔk njúʼ ejʉʼ, á júʼ. »
24Yɛɛ́so á zéŋ ndé á mbū pɔ́p ŋ́gɛ: «Pɛ epá ntií zīi, pɛ lɔkɔ njúʼɔ anu. Efʉʼ zīi pɛ lɔkɔ efʉ̄ʼɛ azō tɛ́ ŋgyáa á mbū ŋiŋ, Ndém a shʉʼ elɔk efʉʼ mɛ́t, tɛ́ efʉʼ azɛ́ eyá, tɛ ezéŋ etswiʼne, 25melaʼ mīi, Ndém a shʉʼ etswiʼne azō á mbū ŋiŋ yīi, a á nzi ŋgwɛ̄. Ŋiŋ yīi, a te azō wɛ, a egɔ̄ á yí ŋkú mbɔɔ méŋ agáʼ yīi, a á nzi ŋgwɛ̄. »
Ashuŋne lepúʼ ánɛ nzwɛt ajū mīi e é sáʼ
26Yɛɛ́so á zéŋ ndé ŋ́gɛ: «Pɛ ejʉ́ɔ ajū mīi Lefɔ Ndém é swhií aziɛ́, é swhií páʼ ŋiŋ a gʉɔ á ŋkāʼ, ḿbhīɛ nzwɛt etsō. 27Ŋ́gē enɔŋ elíi ŋkɔʼɔ́‑atswɛt, njhʉ̄ e elá, a ezīɛ, etsō mɛ́t é nɔŋ esáʼa, ńtswhíɛ, á piŋ nnɔ̄ŋ te nzhɛ́ páʼ á tsia épúp ɔ́. 28Atsáʼ yí méŋwɛ̄t mé ghʉʉ̄, etsō é tswhí. É gē ezi, ésáʼ, ŋ́gɔ́ páʼ mvēŋ lā, ḿbáte, ńdūʼ alɔŋ, ḿbáte, ńtó menēk tɛ nzá ánɛ alɔŋ. 29Etsō é shʉʼ nnáŋ tɛ ŋkūʼ á lefaʼ, ŋgaŋ á lɛ ŋgʉ̄ɔ efāʼ, melaʼ mīi afʉʼ lefaʼ etsō á kuʼ. »
Ashuŋne lepúʼ ánɛ mɔ́ lesa nzwɛt azō
(Mat 13.31-32; Lúk 13.18-19)
30Yɛɛ́so á zéŋ ndé ŋ́gɛ: «Ḿpɛ gɔ elɔ̄k akɔ̄ eshúŋ páʼ Lefɔ Ndém é épúp é? Ḿpɛ gɔ elɔ̄k eziɛ́ ntií ashuŋne lepúʼ ŋghíte é? 31É swhií mmɔʼ ntií lesa sésōk tsīi, mɛ́ maʼa, é kʉɔ́k kʉɔkeé, tɛ mmɔʼ nzwɛt ajū mīi e é ndo esī atsetsáʼ ega, ŋ́kʉɔ́k épúp, e te éwú ú. 32Mɛ́ gɔ́ tɛ mbhī, é tswhí, ésak ntɔ́k etsō tsem tsīi, mɛ́ ke phīī. Mbū é tó éwú, éfáŋte tɛ ŋgɔ́ yīi, meséŋ é gɔ eshʉ̄ʼ éwú, ḿbáʼ meŋka mɔ́p. »
33Á páʼa tɛ́ Yɛɛ́so a le lɔ̄k ntií meshuŋne lepúʼ tɛ nzáne páʼ ecʉɔ, tɛ́ ndɔk ntswī ŋke mbɔŋ á mbū epuɔ, ánɛ páʼ pɔ́ é kuʼ á lejūʼ. 34Yɛɛ́so a lɛɛ́ te nnéŋɛ té lɔk ashuŋne lepúʼ eshúŋne á mbū epuɔ ɔ́. A epiŋɛ nnáŋa tɛ ŋkūʼɔ afʉʼ zīi, pɔ́ a nnɔ yí é nnɔ, a ekɛ́ʼte eshúŋ á wɔ́p.
Yɛɛ́so a á ega ncɔ́kɔ ntshi pɔ́ afēm
(Mat 8.23-27; Lúk 8.22-25)
35Á kó ŋgɔ́ mbwɛɛ́t‑njhʉ̄ aleʼé mɛ́t, Yɛɛ́so á lé á mbū nnɔ yí ŋ́gɛ: «Ḿpɛ etó ntshi, ŋ́gʉ̄ɔ mé nzéŋ mmɔʼ. » 36Nnɔ yí é fhó á nnɔ alāʼ, ńtó ntswɛ́tte á yí á ntē akɛnūʼ zīi, a á nnáŋ éwú. Ńdɔ̄k á yí ŋgʉ̄ɔ. Emɔ̄ʼ mekɛnūʼ é le pú ntshíte á lezēŋ yí. 37Mmɔʼ mía mía afēm á veŋne ntúʼ á ndo ntshi. Ḿbēkne ntshi nnéŋ á ntē akɛnūʼ, tɛ á cʉ́ʼɛ efāʼa á lelō. 38Á piŋ ŋgɔ́ mbɔ Yɛɛ́so a á nnɔ̄ŋ amɔ̄ʼ ajʉʼ, á nzem akɛnūʼ, ńzápa athū zí ánɛ atɔɔ́‑athū, ńnɔŋ ndíi. Nnɔ yí é ziɛ á yí, ńzɛ́tte á yí ŋ́gɛ: «Mɔʼɔ́ wek, ḿpɛ é ega ŋgɔ̄ á mmiī páʼa, o nɔŋ te ŋgémɛ lɛ̄?» 39Yɛɛ́so á ziɛ, ńcɔ́k á afēm, ńzéŋ ndé mé ntshi ŋ́gɛ: «Láŋtɛ. Kwhʉ́ lɛ zyɛ́t. » Afēm á záʼa lɛ kók. Ntshi é pwɛ́t lɛ jɔʼ. 40Yɛɛ́so á piŋ nzɛ́tte nnɔ yí ŋ́gɛ: «Além zɛ́ á tsɔ́ʼɔ ejʉɔ ntií melaʼ akɔ̄? Pɛ lɔkɔ nzɛ́t áa te fɛ́ nnɛ̄t ŋgyá mé meŋ lɛ́?» 41Pɔ́ jʉ́ɔ ajū mīi á tɔ́k, mía mía ecɔʼ á pú ŋgɔ́ á wɔ́p, pɔ́ sɛnne nnɛ̄t, ńzɛ́tte á tsetsɛlɛ pɔ́p ŋ́gɛ: «Eziɛ́ ntií ŋiŋ e é páʼa ŋgɔ́ ejʉɔ, tɛ afēm pɔ́ ntshi é júʼu nchu yí í?»
Chwazi Kounye ya:
Málkúsi 4: ybb
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© CABTAL