LUKA 9
9
Isu my abangnai leaung holai nyhreichi ai pato nai
(Mt 10.5–15; Mk 6.7–13)
1Naibaly mymy ly holai nyhreichi ai palau achu iy vawinam bawibawichi tleaung y sa thai naira hawi, aly peang ai naira hawi, no nairachi hawi sa ai nai py pei. 2Hunaibaly Tameuh i peang nai leu thui ai nai hawi, no naichi ai hawi sa ai nai py pato. 3Naibaly mymy ly nichi teng y, “Khuleaung chei ai nai vui cheaungvawi mo, jibo mo, tako mo, tangka mo, ati sai py syn u moh; baichu nyhrei py syn u moh.#Lk 10.4–11; Ataw 13.51 4Naibaly nangchi i lyn nai yhm ngierei y ly ango u ryp, hu i dengdairei theu u. 5Naibaly nangchi ai kawn y nai ngierei ly huni avang i dengdairei nangchi theu nai khala ly mymychi ai pany hai ai nai nangchi i kheu padawi i spryh katheng u,” napi. 6Naibaly nichi amsa i avang tleirei y chei preiprei iy, Satang Kahawi thui pi i no naichi ai py hawi sa pi.
Samrang Heroda i paleung khrukhra nai
(Mt 14.1–2; Mk 6.14–29)
7Naibaly areng Heroda ly huni atiti sa nai bawibawi ly thai bo: naibaly phyreichi my ly, “Johan ly dei nai angthau teang nai bo hi ly,” napi.#Mt 16.14; Mk 8.28; Lk 9.19 8Phyreichi my ly, “Elija amteng nai bo hi ly,” napi; phyreichi my ly, “Jangni i amo ami mo angthau teang nai bo hi ly,” nanai deaungkho y ni ly dawn tamang tyh bo. 9Naibaly Heroda ly, “Johan ai kaimy lu tameang khyp bo; na i py hina tanrei kai ni i satang thai nai ly ami mo?” napi. Naibaly mymy ai niu ai nai ngai bo.
Isu my khumi sang pangreichi ai pacho nai
(Mt 14.13–21; Mk 6.30–44; Jh 6.1–14)
10Naibaly amtaw thau naichi ly vawi teang iy ni teng y mychi i atiti sa naichi bawibawi thui pi. Naibaly mymy ly nichi ai hawi iy Bethsaida avang napi naira y chei takhra bo. 11Na i py khumi mipuichi ly pany iy mymy ai hui u bo; naibaly ni my ly nichi ai kawn i Tameuh i peang nai satang thui pi, naibaly no hawi sa pi ai nai aly ngai nai ngierei ai ly hawi sa pi. 12Naibaly kani kareu bo; naibaly holai nyhreichi ly ni teng y chei i, “Achi ahawi tengtang i avang y hawi, hlau y chei iy anga ra yhm hawi cha ai naira nga thai ai nai khumi mipuichi ai pato kyh; achi ly ka-vymra y awm lawh ly,” napi. 13Mymy ly nichi teng y, “Nangmychi my cha ai nai pei u,” napi. Naibaly nichi my ly, Hini khumi bawibawichi i vui cha ai nai van pi y baly tako phi pangrei hawi, ngo amai nyhrei ny y baly ati sai by y leang,” napi. 14(Neampacho ka-cheang sasa naimy sang pangrei tahm awm ngaw khyh.) Naibaly mymy ly abangnaichi teng y, “Vui pang vui pangrei mo kamkawm kamkawm ateh hai u,” napi. 15Naibaly nichi ly hunai kamta sa i ateh hai bawibawi. 16Naibaly mymy ly tako phi pangrei hawi, ngo amai nyhrei py la iy kani mang y khen, naibaly kawn nai leu thui iy theng baw theng baw i, khumi mipuichi i mo y pawi pi ai nai abangnaichi teng y pei. 17Naibaly nichi ly cha i kajeu kawi u bebe; nichi i cha nai kamthom py teaung holai nyhrei kawi teang.
Petera ly Isu i satang pany hai nai
(Mt 16.13–19; Mk 8.27–29)
18Naibaly hina nai awm, mymy tlairei chiu sa nai thym khala y abangnaichi ly mymy teng y awm; naibaly mymy ly nichi teng y, “Khumi mipuichi my kai ai ami napi mo?” nanai deng. 19Naibaly nichi my ly, “Baptis sa nai keung Johan na a,’ ang napi; na i py phyreichi my ly, ‘Elija na a,’ ang napi; phyreichi my ly, ‘Jangni i amo ami mo angthau teang bi nai bo,’ ang napi,” nanai pathang.#Mt 14.1–2; Mk 6.14–15; Lk 9.7–8 20Naibaly mymy ly nichi teng y, “Tumbaly nangchi ly kai ai ami napi mo?” napi. Naibaly Petera my, “Tameuh i Krista ne,” nanai pathang.
Isu mymy patang ai nai hawi dei ai nai thui pi nai
(Mt 16.21–28; Mk 8.30—9.1)
21Naibaly huni leu ly ami teng y py thui pi y ai nai leu pei kheng i, 22“Khumi i Chapo ly atiti neangneang patang ai nai tla: miteaung kehchi hawi, pathyp pi nai keung kalenchi hawi, Reita patiu nai keungchi my ngai y nai awm ai nai tla, ni ai padei ai nai tla, kani thomrei kani y pathau teang bi ai nai tla,” napi.
23Naibaly mymy ly khumi bawibawichi teng y, “Ami py kai teng y abang ai nai ngai baly, amy i kangai khai su iy amy i kraws apu naimy abang sy.#Mt 10.38; Lk 14.27 24Ami py amy i hengra apalawi ai nai ngai nai ngierei ly tama ai; ami py kaimy deaungkho y amy i hengra tama nai ngierei ly, huni khumi kypkyp ly apalawi ai. 25Ami py hini khaileaung pri bomrei ngo sy, amy ai ataphra iy tamo lawh sy, ni i vui ati amran ai mo? 26Ami py kaimy ai hawi kai i leu ai py kaji hai nai ngierei ly, Khumi i chapo ly mymy i nang parai naira hawi, Ampo i nang parai naira hawi, kani pri amtaw thau nai kachaichi i nang parai naira py apu naimy ang jeu nai neng khala y ly, huni khumi ai ly ang kaji hai teang ai. 27Teng khyp kang thui pi, hi i angdo nai phyreichi ly Tameuh i peang nai niu y ryrei ly deira den py pateng ai ny y,” napi.
Awm nai sai takhra nai
(Mt 17.1–8; Mk 9.2–8)
28Naibaly hina nai awm, huni leu thui nai bo y kani tajarei mo khala, mymy ly Petera hawi, Johan hawi, Jakob ai py hawi iy chiu sa ai nai mawi asang parai naira chei kalau.#2 Pet 1.17–18 29Naibaly ni ly chiu sa nai thym khala ly, ni i meimai awm nai sai ly takhra lawh i, ni i ateaung py kaleung nai alaukau na. 30Naibaly khen cham, khumi leaung nyhrei mymy hawi leu arum, hunini ly Mosi nini Elija ne; 31nini ly nang parai naira amthyp nai amteng i, Jerusalem y ni i dei ai nai sai satang arum. 32Na i py Petera hawi ahawi nini py i kamhm ngam; naibaly anglaw iy ni i nang parai naira hawi, ni teng y khumi leaung nyhrei angdo nai niu. 33Naibaly hina nai awm, hunini Isu hawi amprei nai thym khala y Petera my Isu teng y, “Sara, kaichi i vui hi y awm ai nai hawi parai; kaichi my taichy thomrei so si ba, nang i vui harei, Mosi i vui harei, Elija i vui harei,” napi; mymy ly leu thui ai nai py pany y. 34Naibaly huna nai leu thui nai thym khala y khupanym my khiu iy mymychi ai deng i, khupanym theung y kun ai nai thym khala y jei u bo. 35Naibaly khupanym theung i nai raawi theu i, “Hini ly kai i Chapo, kai i vawi nai ne; mymy i leu tangai u,” napi.#Is 42.1; Mt 3.17, 12.18; Mk 1.11; Lk 3.22 36Naibaly raawi beang bo nabaly Isu leaungrei ai niu khyh bo. Naibaly nichi leu katheu y i hunai thym khala i mychi i atiti niu naichi ly ami teng y py thui pi y.
Isu my deayngdi teng i vawinam patheu nai
(Mt 17.14–18; Mt 9.14–27)
37Naibaly hina nai awm, nichi ly khawn mang y mawi i nai kathiu nai bo y, khumi mipui ka-teng ny y nai mymy ai lamchung. 38Naibaly khen cham, mipuichi theung y khumi leaungrei aeu i, “Sara, kai i chapo ai khen ai nai kang takeng, kai i chapo leaungrei awm kalei khyh. 39Khen cham, vawinam my nam i aeu neangneang lawh thla; hunaibaly pachi phawn tla sobam pa-rei kyn hai i, ni ai khrikhri pa-rei thi deung hai iy khai pra bo. 40Naibaly nang khi y abangnaichi teng y patheu ai nai katakeng, na i py nichi so thai y pasi lawh, napi. 41Naibaly Isu ly pathang i, “Aw, vai deung kangthau ym naira by y nai hawi, kateng so y naichi awi, kai ly nangchi teng y mana tanrei kang awm nai iy kang kham hai thai ai mo? Nang i chapo ai ly hi y hawi ba,” napi. 42Naibaly ni ly jeu nai thym khala y vawinam my ly ni ai atlym hai khup iy khri pa-rei kyn hai lawh. Na i py Isu ly vawinam ai jo i, deaungdi ai ly hawi sa iy ampo teng y pei ali teang bo. 43Naibaly khumi bawibawichi my Tameuh i nang parai nai sai lyh parai.
Isu ly mymy dei ai nai thui pi bi nai
(Mt 17.22–23; Mk 9.30–32)
Hunaibaly khumi bawibawichi ly ni i atiti sa nai ngierei lyh parai nai thym khala y mymy ly abangnaichi teng y, 44“Hini leu ly nangchi i kano y kun sy: Khumi i Chapo ai ly khumichi i kiu y patiu hai ai,” napi. 45Na i py ni i leu thui nai ly nichi dawn ai nai pany y, nichi pany thai y ai nai heu pi vui nai ne; hini leu thui nai satang py mymy teng y khy deng vam y.
Ami len keh mo?
(Mt 18.1–5; Mk 9.33–37)
46Naibaly, “Achi theung y ami len keh ai mo?” nanai aei u.#Lk 22.24 47Hunaibaly Isu my nichi i paleung y dawn nai ai ly pany i, deaungdichy leaungrei ai pahawi iy, mymy i ahawi y angdo hai i nichi teng y, 48“Ami py kai i amyn deaungkho y hini deaungdichy ai kawn nai ngierei ly kaimy ai kawn nai bo; ami py kai ai kawn nai ngierei ly kai ai pato nai keung ai kawn nai bo; nangchi bawibawi tleaung y theang keh nai ly huni ly len keh,” napi.#Mt 10.40; Lk 10.16; Jh 13.20
Nangchi ai paka y nai khumi ly nangchi mang y asa nai
(Mk 9.38–40)
49Naibaly Johan my, “Areng, kaichi ly ami mo nang i amyn y vawinamchi ai patheu nai niu, naibaly ni ly achi teng y abang nai ny y nai deaungkho y kaichi my paka veng na a,” nanai pathang. 50Isu my ly ni teng y, “Paka reng moh, nangchi ai paka y nai khumi ly nangchi mang y asa nai na a” napi.
Samari avang my Isu ai ngai y nai
51Naibaly hina nai awm, mymy ai pahawi kalau ai nai neng tym kasa iy, mymy ly Jerusalem y chei ai nai tau tanga i, mo mang y khumichi ai pato; 52naibaly nichi ly chei iy mymy i vui sa pi rym ai nai Samari khumichi i avang harei y kun. 53Naibaly my i meimai y Jerusalem mang y tapai ai nai amny nai deaungkho y nichi ly mymy ai kawn y. 54Hunaibaly ni teng y abang nai Jakob nini Johan ly huni pany baly, “Areng, hinichi ai kang pawn ai nai kani mang i dengdairei mai palau kathiu ai nai avo na a?” napi.#2 Ar 1.9–16 55Na i py mymy ly hi iy nini ai preng. 56Naibaly nichi ly avang takhra y chei vui.
Isu i abangnai khumi lawn ai ngai naichi
(Mt 8.19–22)
57Naibaly nichi ly tako nai thym khala y ami mo neampacho leaungrei mymy teng y, “Nang i chei naira tleirei y kai abang ai,” napi. 58Naibaly Isu my ni teng y, “Khivachi py kho awm, salo mang i tavochi py tabu awm, na i py Khumi i Chapo ly anga naira ha py by y,” napi.
59Naibaly mymy ly khumi takhra teng y, “Kai teng y abang,” napi. Na i py ni my ly, “Areng, ngaai ai up hai veng rai si ba,” napi. 60Na i py mymy ly ni teng y, “Kadeichi ly mychi i kadei ai up u sy bei; na i py nang ly chei ly, Tameuh i peang nai satang amthang hai bei,” napi. 61Naibaly khumi takhra my py, “Areng, kai abang ai, na i py dengtheungchi ai leu kahawi y pavum veng rai si ba,” napi.#1 Ar 19.20 62Na i py Isu my ni teng y, “Ami py li thawn naira taveang kiu y amkhaw iy, nithun mang y khen nai ly, Tameuh i peang naira khumi lawn ai nai ataing y leang,” napi.
Chwazi Kounye ya:
LUKA 9: KCL02
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Khumi Common Language Bible © Bible Society of Myanmar, 2005.