LUKA 8
8
Isu teng y abang nai neampachychi
1Naibaly hina nai ne, hunai bo y mymy ly leu thui ai nai hawi, Tameuh i peang nai Satang Kahawitym hai prei ai nai hawi, avang kalen y py avang katheang y py amki prei i, holai nyhreichi py mymy teng y awm. 2Neampachy amichi mo, vawinam my nam nai hawi ali naichi hawi, no hawi sa pi veng naichi py mymy teng y awm teang; nichi ly Mari, mymy i taku theung i dengdairei vawinam saryhrei theu nai Makdilini napi nai ly, Heroda i yhmtheaung kry nai keung#Mt 27.55–56; Mk 15.40–41; Lk 23.49 3Chuza i aju Joanna py, Susanna py, takhra neangneangchi py ne; nichi ly mymychi i yhmtheaung dengdairei nichi ai kry.
4Naibaly khumi mipui ka-teng ny y nai achu i, avang tleirei i khumichi py ni teng y chei nai deaungkho y mymy ly pata nai leu thui pi: 5“Ti hei nai khumi ly ti hei ai nai amawi; naibaly hei nai khala y phyrei ly lam teng y tla i, khumichi my chiu iy tavochi my cha khrai. 6Naibaly phyrei ly thaithi tleaung y tla i prau praw: na i py khaileaung ni y nai deaungkho y jei ryp veng. 7Naibaly phyrei ly kabeng aleng theung y tla i, kabeng aleng ly vanrei prau hai i vawi pajeang veng. 8Naibaly phyrei ly khaileaung kahawira y tla i prau iy chungvairei peung,” napi. Naibaly huni leu thui thym khala y, “Ami py thai ai nai kano awm baly thai sy,” nanai aeu.
Pata nai leu i patyp nai
(Mt 13.10–17; Mk 4.10–12)
9Naibaly abangnaichi my ly ni teng y, “Hini pata nai leu ly ati mana nai sai mo?” nanai deng. 10Naibaly mymy ly nichi teng y, “Tameuh i peang naira i leu kathiuchi ly nangchi pany ai nai pei bo; na i py khumi takhrachi teng y naini nichi ly niu iy py niu thai y ai nai hawi, kano y thai iy py dawn naira pany thai y ai nai, pata nai leu harei thui khyh.#Is 6.9–10
Isu my ti hei nai keung i pata nai ai thui pachai nai
(Mt 13.18–23; Mk 4.13–20)
11Pata nai leu ly hini ne: Choh ti ly Tameuh i leu ne. 12Naibaly lam teng y tla naichi ly leu thai naichi ne, naibaly diabola ly jeu i, nichi ly ym y iy pahengra ngo thai y ai nai, nichi i paleung theung i nai leu la pi praw veng. 13Naibaly thaithi tleaung y tla nai ly hinichi he: nichi ly leu thai baly kawn prai naimy tangai ryp; na i py tangjyn den py ngo y i tanarei chy ym iy parawi nai neng tym khala ly anawn ali veng ryp. 14Naibaly kabeng aleng theung y tla nai ly hinichi he: nichi ly leu thai nai bo y vawi iy, heng khala y dawn nai saichi hawi, nang nairachi hawi, tlamsa nairachi my achih hai i athai thawn y. 15Naibaly khaileaung kahawira y tla nai ly hinichi he: paleung kateng kahawi naimy leu thai iy patawm jojo i hawihai palai athai.
Teaung tleng nai maisi yhm
(Mt 4.21–25)
16“Ami py maisi thawn iy laawm tleng vai y; kun nai ngiereichi kangvang niu thai ai nai khai naira y khai khyh.#Mt 5.15; Lk 11.33 17Pheaung y ai nai apha nai ati sai py by y, pany y ai nai hawi amteng y ai nai leu kangviu ati sai py by y.#Mt 10.26; Lk 12.2 18Hunaibaly nangchi i thai nai sai ly mana awm mo, nanai amkym u me ba; ami py atiti awm nai ngierei teng y ly ang pei panawi bi ai; ami py atiti by y nai ngierei teng i nai ly mymy i awm yb nai angchi, nanai athang khai nai raurei py la pi ra ai,” napi.#Mt 25.29; Lk 19.26
Isu i amhm hawi amnauchi
(Mt 12.46–50; Mk 3.31–35)
19Naibaly ni i amhm hawi amjo amnauchi ly mymy teng y chei tapai, na i py khumi mipui awm mamang nai deaungkho y ni i ahawi y tym thai y. 20Naibaly ni teng y, “Ngamhm hawi ngamjo ngamnauchi ly nang ai niu ai ngai nai angam mang y angdo u jo ho!” nanai thui pi. 21Naibaly mymy ly nichi teng y, “Tameuh i leu thai iy patawm naichi ly kai i amhm hawi kai i amjo amnau na a,” nanai pathang.
Isu my ali khu aham hai nai
(Mt 8.23–27; Mk 4.35–41)
22Naibaly huna nai thym khala y kanirei nai ly mymy ly abangnaichi hawi paleung y atang i nichi teng y, “Ang vai mang y angpeang u sina,” napi. 23Hunaibaly akan iy angpeang nai thym khala y mymy ly i ngym veng; naibaly ang y ali khu theu i, nichi i paleaung ly tui kawi dudu i, nichi ly khri pa-rei ka-jei awm na. 24Naibaly nichi ly mymy i ahawi y athui iy palaw i, “Areng, Areng, kaichi tama ai bo he,” napi. Naibaly mymy ly anglaw iy ali hawi tui sampyh ai py jo; naibaly aham i rym ryp bo. 25Naibaly mymy ly nichi teng y, “Nangchi i ym naira ly ma mang y awm mo?” napi. Naibaly nichi ly jei i lyh parai nai, “Hini ly ami kha? Ali hawi tui sampyh malawn py leu pei i tangai lawh ly,” na u lengleang.
Isu my vawinam nam nai khumi ai hawi sa pi nai
(Mt 8.28–34; Mk 5.1–20)
26Naibaly nichi ly Kalili pri kataw i Kerasin pri y tym. 27Naibaly kacheng y angkhyh nai bo y avang i khumi, vawinam my nam nai ami mo leaungrei ni hawi avum. Huni khumi ly kanih akhiu y nai kra parai bo, den py yhm y awm y, tapreaung y awm lawh. 28Naibaly ni ly Isu ai niu baly aeu iy, ni i mo y ambeu i athorei my, “Isu, Salo Kangteng Tameuh i Chapo awi, kai hawi nang hawi ati amtawm naira awm mo? Hini kang takeng nai bo he, kai ai patang hai moh kyh jemjem ba,” napi. 29(Isu my vawinam ai ly huni khumi i taku theung i dengdairei theu ai nai leu pei veng bo. Huni khumi ai ly vawinam my nam jojo i, amichi my deaungki hawi sengkry py thiu kawm iy typ ryhryh i py, ni ai kawm naira ly leu hai bawi iy, vawinam my ni ai daichi ka-vym y paryh jojo.) 30Naibaly Isu my, “Nang i amyn ami mo?” nanai deng. Naibaly ni my ly, “Neang Neang,” napi; (ni i taku theung y vawinam neangneang kun nai deaungkho y.) 31Naibaly angawm kalawi by y naira y chei ai nai leu pei y ai nai Isu teng y takeng u. 32Naibaly huni mawi y ly eu kanghu pui tlai bo; naibaly nichi ly hunichi i taku theung y kun thai ai nai leu pei ai nai ni teng y takeng. Naibaly mymy ly avo, napi. 33Naibaly vawinamchi ly huni khumi i taku theung i nai theu iy, euchi i taku theung y kun bo: naibaly eu kanghu ly angthiu mang y angpreng kathiu iy ang y taba i, tui pathai i dei thleang.
34Naibaly khawn nai keungchi ly huni atiti sa nai niu i, angpreng iy avang y py, hlau y py thui pi. 35Naibaly mana lawh mo, nanai khen ai nai chei u hawm i nichi ly Isu teng y tym, naibaly vawinam theu vui nai khumi ly kanih akhiu iy paleung kari awm naimy Isu i kheu keung y ateh nai niu i nichi ly jei u. 36Naibaly niu naichi ly vawinamchi my nam nai ai hawi sa pi nai sai ly nichi teng y thui pi. 37Naibaly Kerasin pri tengtang i khumi bawibawichi ly khrikhri pa-rei jei nai deaungkho y ni ai ly mymychi teng i dengdairei chei veng ai nai takeng; naibaly mymy ly paleaung y atang iy ali teang bo. 38Na i py vawinamchi theu veng nai khumi my ly Isu teng y awm jo ai nai takeng. 39Na i py Isu my ly, “Nang i yhm y vawi ly, Tameuh my nang i vui mana tanrei ang sa pi nai sai ly thui pi,” nanai pato veng. Hunaibaly tako iy avang kalen bawibawi theung y ly Isu my mymy i vui mana tanrei ang sa pi nai sai ly aeu hai.
Ja-ira i chaniu hawi Isu i kanih nam nai neampachy
(Mt 9.18–26; Mk 5.21–43)
40Naibaly Isu ly ali teang khala ly khumi mipuichi my ajeng bawibawi nai deaungkho y ni ai kawn u. 41Naibaly khen cham, khumi leaungrei, amyn Ja-ira, achura yhm miteaung keh ly jeu i, Isu i kheu keung y ambeu iy my i chaniu harei awm khyh nai, saneng holai nyhrei mo dei vi dei vi nai deaungkho y mymy i yhm y jeu ai nai takeng. 42Naibaly Isu ly chei nai thym khala y khumi mipuichi ly mymy ai i meimeaung na.
43Naibaly neampachy leaungrei, saneng holai nyhrei thi ahaw nai, ni i yhmtheaung awm nai ngierei ly daitangchi teng y khei krai bo, 44ami py hawi so pi thai y bo; ni ly mymy i nithun mang chei iy ni i kanih tawn y nam; naibaly mymy i thi ahaw nai ly tlenrei khyh my akyn praw ryp. 45Naibaly Isu my, “Kai ai nam nai ly ami mo?” napi. Naibaly “Kai ny y leang,” napi bawibawi i, Petera hawi my i ahawichi ly “Areng, khumi mipuichi my ang i meimeaung iy anui meimeaung na chy bo,” napi. 46Na i py Isu my, “Ami mo kai ai nam khyp, kai theung i dengdairei sa thai naira theu, nanai kai pany,” napi. 47Naibaly neampachy ly aheu thai y, nanai pany i, kaso tahyn theu naimy chei iy, my i mo y ambeu: naibaly ni ai nam nai sai hawi, tlenrei khyh my ni i no hawi praw nai sai ly khumi bawibawi ka-niu y thui pi. 48Naibaly ni my ly mymy teng y, “Lo awi, nang i ym naira my ang hawihai nai bo, awmnem naimy tako ba,” napi.
49Naibaly leu katheu nai thym khala y achura yhm miteaung keh i yhm dengdairei khumi leaungrei jeu i, “Nang i chaniu ly dei veng bo, Sara ai ly akawm hai y han,” napi. 50Isu my ly huna nai leu thai iy, “Jei moh, ym phai ym ryp, hunaibaly ni ai paheng teang ai,” napi nai pathang. 51Naibaly yhm y tym baly Petera, Johan, Jakob, deaungdi i amhm ampo, nichi ai ny y baly ami ai py kun ai nai pei y. 52Naibaly khumichi bawibawi ly vo ryry nai paleung y atum ryry; hunaibaly ni my ly, “Vo u moh, mymy ly dei y leang, i ngym nai teu,” napi. 53Naibaly nichi ly dei nai pany nai deaungkho y panui hai lawh veng. 54Na i py Isu my ly ni i kiu y amkhaw iy, “Lo awi, angthau,” nanai palau. 55Naibaly ni i phailo kun teang i angthau praw; naibaly ni ai pacho ai nai leu pei. 56Naibaly ni i amhm ampo my lyh parai bo, na i py ni my ly huni atiti sa nai ly ami teng y py thui pi y ai nai napi kheng.
Chwazi Kounye ya:
LUKA 8: KCL02
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Khumi Common Language Bible © Bible Society of Myanmar, 2005.