Neyemi 6
6
Y'ap chache antrave Neyemi
1Sanbala, Tobija, Gechèm, moun peyi #Ney 2.19; 3.1,3; 4.7 Arabi a, ansanm ak tout rès lènmi nou yo vin konnen nou te fin rebati miray la. Pat gen okenn twou ladan l ankò. Men lè sa a, nou pat ankò moute gwo batan pòtay yo. 2Sanbala ak Gechèm voye yon mesaje vin di m yo ta renmen kontre avè m lavil Ak-Kefirim, nan Fon Ono a. Men yo menm, yo t'ap chache yon jan pou yo fè m mal. 3Se konsa mwen voye mesaje bò kote yo avèk repons sa a:
— M okipe ak yon travay enpòtan, m pa ka desann. Si m kite travay la pou m ale kote nou, li pral sispann.
4An kat fwa, yo voye fè m menm envitasyon an. Chak fwa, mwen voye menm repons lan ba yo. 5Lè sa a, Sanbala voye yon senkyèm mesay ban mwen. Men fwa sa a, li renmèt yon lèt nan yon anvlòp tou louvri bay yonn nan moun k'ap sèvi l yo pou mwen. 6Men #Lik 23.2 sa ki te nan lèt la:
Gen yon sèl bri k'ap kouri nan mitan moun lòt nasyon yo: Se Gechèm ki di m sa. Li tande l ak de zòrèy li. Ou menm ak pèp jwif la, nou fè lide pran lezam. Se poutèt sa n'ap rebati ranpa a. Yo di se ou menm y'a nonmen wa yo. 7Ou menm rive ranje ak kèk pwofèt pou yo mache fè konnen nan tout lavil Jerizalèm se ou menm ki wa peyi Jida a. Kounyeya, tout bri sa yo pral rive nan zòrèy wa a. Se poutèt sa, mwen mande ou pou ou vin kote m pou nou fè yon ti pale ansanm sou koze a.
8Mwen voye reponn li:
— Tou sa ou di la a se manti. Se ou menm menm ki fè koze a.
9Yo t'ap chache kraponnen nou pou rete travay la. Yo t'ap di nan kè yo: Talè konsa y'a dekouraje avèk travay la, li p'ap janm fini. Aa, Bondye! Ban m fòs non! Fè m pa dekouraje!
10Yon #Jer 36.5 lòt jou ankò, m t al wè Chemaja, pitit gason Delaja, pitit pitit Metabeyèl, lakay li, paske li menm li pat ka sòti. Li di m konsa:
— Ann al nan Tanp Bondye a, nan mitan kote yo mete apa pou Bondye a! Ann al kache kote yo mete apa pou Bondye a! N'a fèmen tout pot yo byen fèmen, paske y'ap vin touye ou. Wi, aswè a menm, y'ap vin touye ou!
11Mwen reponn li:
— Se pa mwen ki pou kouri al kache. Epitou, yon moun tankou mwen pa pral kache nan Tanp lan pou m sove lavi m. Non! Mwen pa prale!
12Lè m #Eze 13.17 kalkile, mwen wè se pat Bondye ki te ba l mesay sa a pou mwen. Se Tobija ak Sanbala ki te peye l pou l te di m sa. 13Konsa, mwen ta pran nan kraponnaj, mwen ta fè sa l di m fè a, epi mwen ta fè bagay mwen pa gendwa fè. Yo menm, lè sa a, yo ta pran sa pou pale m mal, yo ta fè m wont. 14O #Ney 13.29 Bondye mwen, pa bliye sa Tobija ak Sanbala te fè! Pa bliye Nadya, fanm ki pwofèt la, ansanm ak lòt pwofèt yo ki t'ap chache kraponnen m!
Travay ranpa a fini
15Se konsa, apre senkannde jou travay, ranpa a te fin repare. Lè sa a, nou te rive sou vennsenkyèm jou nan mwa Eloul la. 16Lè #Ney 4.1,7; Sòm 126.2; 127.1 lènmi nou yo vin konn sa, lè moun lòt nasyon k'ap viv nan vwazinay nou yo wè sa, yo te wont. Yo rekonèt si travay la te fini se paske Bondye nou an te vle l.
17Pandan tout tan sa a, chèf peyi Jida yo te kenbe kontak ak Tobija. Yonn t'ap voye lèt bay lòt. 18Te gen anpil moun nan peyi Jida a ki te pou Tobija paske se bofis Chekanya, pitit Arak la, li te ye. Lèfini Jokanan, pitit gason li a, te marye ak pitit fi Mechoulam, pitit Berekya a. 19Yo te konn ap fè lwanj Tobija devan m, yo t'ap di tout bèl bagay Tobija te fè. Epi apre sa, y'al rapòte l tou sa m te di. Tobija menm t'ap voye lèt ban mwen pou kraponnen m.
Chwazi Kounye ya:
Neyemi 6: HAT98
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Haitian Creole DC Bible © Societé Biblique Haïtienne, 1998.