San Lucas 22
22
Jesuca cuwapomin tsachi
1Junni aman casa ma fiesta queloinue lebadura iton bibuca finun fiesta. 2Junnasa mantá tan patelelabe mantaca micariminlabe tenpalaquinue niyaque Jesuca toteno podeicaichunanque. Tsachila quiralaquinasa yaca catuntsan joe latinue tsachilaca jelechi. 3Junni chunca paluca Jesube penenaminla manca Judas Iscariote jominue. Aman yucan ya tsachichibi wito, 4mantá tan patelelachica jisa carinue. Junni yalachica jito, yalabenan Diosichi yaca cuidaimin capitanlabenan cuenta quinue Jesuca niya quiraque yalachi cuwapono podeiyanaeque. 5Aman patelelari junca meráto, son tito yachi cala cuwalaquechinayoe latinue. 6Junni aman Júdari se joe tito, junte nechi tenca cato nenaminue Jesuca niyaque cuwapono jonunca. Niya quiraque Jesuca tsachila itonte encanato cuwaponoca tenca cato nenaminue.
Fiesta ano finunca
7Junni casa fiesta fenue lebadura iton bibuca finun fiesta. Jun mate opisa náca toteto fimin jominlanue. 8Aman junni Jesuri yachi paluca tsachilaca erenue yape fiesta ano dalaquisa. Pédrobe Juánbeca erechinato, yalabe itsantinue:
—Nulari pueblobi fiesta ano dalaquinachin! tinue chiquila filaquichun.
9Junni yalanan itsanlatinue:
—¿Aman tile dalaqueyanan? latinue.
10Junni Jesunan itsantinue:
—Nula meralaquede! Pueblobi wilainaminnan, pi nana jun janamin unilabe tulailaichunae tinue. Nulari yachi beneca ya fecári jilaina! tinue. 11Junni jun ya tsacuminbe itsanlatina: Chiquilaca micarimin tsachi rocainae tilatina! fiesta ano fichun tamoca micuwasa. Junbi casa ma fiesta anoca yachi tsachilabe pefino muquee tinae latina! tinue. 12Junni aman tsanlatinunsi, jamobi wa tamoca micuwachunae tinue. Jun tamochi mesa, plato, titiya jera jochunae tinue. Junni nulari jun tamochi fiesta ano fichun jera selaquinana! tinue.
13Jesús tsanque mantanunsile, tsanquebi jilainue. Junni Jesús tsanque paca josa, jun tsanquenan patinue. Junni junbi casa ma fiesta ano fichun jera selaquinue.
14Junni aman ano fino órate Jesube yachi mantá tanlabe ano fichun chuminlanue. 15Aman ano finato, Jesús yalabe itsantinue:
—Aman lari capadeseituminnan, nulabe duque in fiesta ano fino muquinaminhe. 16Junni nulabe tsarasica pachinayoe: Itsan fiesta ano filaquinato, tenhintsan jominue la Diosi mantanasanan tsachilachi tenchi puyano jochunaeque. Junni lari tsanhino fecári in fiesta anoca manfituanae tinue.
17Aman Jesús tsantisi, bino copa cato, Diosibe acradeseito, yachi tsachilachi cuwanato itsantinue:
—Nen, inca nula tala cuchilaquede! tinue. 18Meralaquede! Binoca numanan mancuchituanae Diosi jera miya ito mantá cano fecári.
19Junni ano filaquinato, Jesuri bibu cato, Diosibe acradeseito, pisuleto, yalachi cuwanue. Aman cuwanato, itsantinue:
—La nulachi tenchi puyano joyoe tinue. Junni in biburi lachi puca jochunae tinue. Aman nulanan laca mantenhito, jun tsannan quilaquina! tinue.
20Junto ano fitobi, bino copacaman cato, Diosibe acradeseito, yalachi cuwanato itsantinue:
—Diosi tsachilabe casan fiqui pánae jutsa piyarino joyoeque. Nulachi tenchi asan larito puyano joyoe jutsa piyarichun. Junni in binori lachi asan jochunae tinue. 21Junni meralaquede! tinue. Laca cuwapono jun tsachi labe ano pefinae. 22Aman tsachi ica jun joto puyabi jichinayoe. Diosi laca tsanquenan paca joe puyano joeque. Laca cuwapomin tsachi mantimini duque padeseichunae tinue.
23Junni tsantinan, Jesube penenaminlari yala tala beco beco panhacaalaquinue mo tsanquichunanque.
Fe mantá tan jochi timinla
24Junni aman Jesube penenaminlari pacaalaquinue yala tala mo fe mantá tan joinhinque. 25Junni Jesuri yalabe itsantinue:
—Diosica tennatuminla tala mantaminlari sonbaque mantaminla joe. Tsan josanan yalabe mantaiminlari ya mantaminlaca pato, ayudaiminla joe timinla joe. 26Junni nula tala mantimini uyan quiraque jolajochunae tinue. Nula talari fe mantá tanlari uyanlaca fécari epe tsachila cuwenta joto ayudainola jochunae tinue. Mantá tanla jotonan, weyanlabe mantaiminla cuwenta nenanola jochunae. 27Junni tenca calaquede! tinue. ¿Mo fe mantá tachunan? ¿Ano poto cuwacaca fimin tsachi fe mantá tachunan, o ano poto cuwamin tsachi fe mantá tachunan? ¿Ano poto cuwacaca fiminni fe mantá tan jochunaco? tinue. Aman la mantimini nulabe penenato, mantá tanla cuwenta nenatiyoe; lari mantaiminla cuwenta nenayoe tinue.
28Junsi Jesús itsantinue:
—Aman tsan josanan la padeseito nenasanan, nulari laca puratuto labe penenamin jominlae. 29Junni meralaquede! Lachi Apa Diosi laca mantá tan suwacae yape miya josa. Junto laman nulaca mantá tan suwanayoe yape labe pemantalaquisa. 30Lari miya inunbi, nulanan labe ano pefiminla jochunae tinue. Nulari mantato chudinunbi chudito, jerale chunca palu bolon israelítalaca pemantalaquichunae tinue.
Jesús Pédrobe pato, yaca purachunae tinunca
31Junsi aman Jesuri Simón Pédrobe itsantinue:
—Simón, meráde! tinue. Nulaca yucan cachi tica joe pele tenca isa carichique. Tricoca petse larichun nisi wecacarinonan, yucan nulaca tsansi wecacarichi tica joe tinue nulachi tencaca pele pochique. 32Junni lari nuchi tenchi rocaiyoe yape nu Diosica tennano peleitusa. Aman nuri sonban tenca manhitobi, weyan acolaca, soquilaca sonba tenca mansuwana! tinue.
33Junni Pedro jun fiquica meráto, Jesube beconan pato itsantinue:
—Miya, lari nuca numanan puratuanae tinue. La nube parejo doino jototiya, o puyano jototiya, nucari numanan puratuanae tinue.
34Aman Jesunan beco pato itsantinue:
—Pedro, meráde! tinue. Nuri amana quepen laca purachunae. Nu walpa apaca capatusanan peman ne laca natiya miitoyoe tichunae tinue.
Jesús padeseino queloinanunca
35Junni Jesús yachi tsachilabe itsantinue:
—Nanni matuleri nulaca cala iton, tolo iton, sapato iton ereca jomanyoe. Junni titiya iton nenasanan, ¿titiya falta jomiyan? tinue.
Yalari falta itominhe latinue. 36-37Junni Jesús itsantinue:
—Meralaquede! Diosichi Pilabi laca jera chuteca jun fiquiri tsarasi patichunae tinue. Junni aman laca criminalilaca cuwenta culpa quilaquichunaeque chuteca joe. Junni tsanque chuteca josanan, jun tsannan ichunae tinue. Jun tenchi amana la nulaca uyan quiraque mantaquechinayoe tinue: Junni cala tatori, calaca tanjilaina! Tolo tatori, yacanan tanjilaina! Espadanan itotori, espada ticatiya calaquina! tinue. Cala itotori, panuca osito espada calaquina! tinue.
38Aman yachi tsachilari jun fiquica merasi, itsanlatinue:
—Miya, quirade! Palupe espada talarayoe latinue.
Aman Jesuri yape josa! tinue.
Getsemaní postote Jesús rocainunca
39Aman Jesula fiesta ano finun tamochi nechi losi, Olibo tinun du minu jilainue. Aman jun du minu duque jimin jominlanue. Junni Jesuchi tsachila yaca benechi pejilainue. 40Junni jun postobi fetobi, Jesuri yalabe itsantinue:
—Nulanan Diosibe rocailaide! tinue jutsa quituchun.
41Tsantisi, yalaca purato, jabile jinue su walato fein tsansiteri. Junchi jito telenhito, Diosibe 42itsanque rocainue:
—Apa, nuchi munajanari, la padeseino jonunca polarisa tenjae. Tsan josanan, lachi tenca munateri tsanhisa tenjatue. Aman nuchi tenca munateri tsanquisa tenjae tinue.
43Junni anjeli jamochi nechi patato, Jesube quiraito sonba tenca cuwanue. 44Junsi Jesuri tsanque puyano joyoeque tencabi padeseinato, nantanancari sonba rocainue. Chipi larinan, asan wa tsoroca tsan tobi patinue. 45Junto Diosibe rocaitobi manwiruito, yachi tsachilachica manjanasa, yalari laquichi catson tsominlanue. 46Junni yalabe itsantinue:
—¿Nulari niyaito catson tsolarayun? tinue. Mancupato Diosibe rocailaide! tinue jutsa manquituchun.
Jesuca canunca
47Aman Jesuri cuenta caquinasanan, polisialabe duque tsachilabe layaito jalainue. Junni yalaca tanjamin tsachiri Judas jominue. Yari chunca paluca Jesube penenaminla manca jominue. Junto Jesuca mo tito saludaibi janue. 48Jesús mantimini yabe itsantinue:
—Judas, ¿nuri ti quichun laca mo tito saludaito cuwaponayun? tinue. ¿Ti quichun laca tsachi ica junca tsanque cuwaponayun? tinue.
49Junni Jesube pejinaminlari niyan quilaquechinanunca tenhilainue. Junca tenhito, Miya, ¿chiquilari yalaca espadachi quintsan junhun? latinue. 50Tsantisi, manca Jesube penenamin tsachiri espadaca laricato, mantá tan patelechi peyunchi tsa nan tala punquica balequinue. 51Aman Jesús mantimini yalaca tsanlaquitude! tito, punqui bajicaca taquirato, manse suwanue.
52Aman mantá tan patelelabe Diosichi yabi mantá tan capitanlabe mantá tan unicalabe layaito, Jesuca cabi jaca jominlanue. Junni Jesús yalabe itsantinue:
—¿Ti quichun laca espada tanla, chide tanla, tarinminca cuwenta cabi jalainayun? tinue. 53Diosichi yabi ma cura nulachite micarito chuminca calaquitue. Tsanni amana nulachi óra joe. Yucan mantano óra joe tinue.
Pedro Jesuca quiratumanyoe tinunca
54Junni aman Jesuca cato, fécari mantá tan patelechica tanjilainue. Junni Jesuca junchi tanjilainasanan, Pedro comabile benechi jinaminue. 55Aman weyanlari patelechi selate nin quito, nin lobaito chuminlanue. Junni Pédronan yalabe pechudinue. 56Junni aman Pedro tsente chuminca peyun sona manca yaca duque quiranaminnan, yaca manmiito, in tsachiri Jesube penenaminhe tinue. 57Pedro mantimini te, yaca natiya quiratumanyoe tinue. 58Aman nanni inale manca tsachi yaca quirato, nunan Jesúlabe penenaminhe tinue. Junni Pédrori itsantinue: Te, lari itomanyoe tinue. 59Aman man óra tsansi poletobi, manca tsachiri tsarasica pánayoe tito itsantinue:
—In tsachiri Jesula cuwenta Galilea to tsachi joe. Junto yabe penenamin jonhoda tinue.
60Junni Pedro junca merasi, ¿Tica wari tsanlatinayun? tinue. Lari yaca natiya quiratumanyoe tinue. Junni Pedro tsantinasaleri, walpa apaca panue. 61Junni walpa pánasale, Miya Jesuri tamochi nechi Pédroca quiraerenue. Junni Pedro Jesuchi fiquica mantenhinue. Jesús Pédrobe itsantica jominue: Amana walpa apaca capatusanan, laca peman neca quiratumanyoe tichunae tica jominue.
62Junni Pedro jun fiquica mantenhito, sela dechi jito duque warenue.
Jesuca lucarinunca
63Aman Jesuca taminlari yaca lucarinato, tedechi quilaquinue. 64Junni yachi cacaca doto, yaca quito, Diosichi mantate nuchi tencabi miiniide! latinue mo nuca quinunca. 65Junto Jesuca yucacuranato, duque seiton fiquicanan palaquinue.
Jesuca culpa quichi tinunca
66Aman tseinasa israelita mantaminla tala layailainue. Mantá tan unicala, mantá tan patelela, mantaca micariminla jominlanue. Junto Jesuca yalachica tanjasa carito, yabe 67itsanlatinue:
—Chiquilabe pade! tilatinue. ¿Nuri Diosi wenteca jun Cristo joyun? tilatinue.
Junni Jesús beconan pato itsantinue:
—Lari Cristo joyoe tinari, laca natiya quereilaituchunae tinue. 68O la nulabe ticatiya panhanari, nulari natiya tulanlaquituchunae, nin laca manlarilaquituchunae tinue. 69Tsan josanan, amanale nechi la tsachi ica jun joto Diosichibi chuanae tinue. Ya tsara sonban joto, yachi tsa tede nanchi laca chutechunae tinue yape yabe pemantasa.
70Junni jerale mantaminlari jun fiquica meráto, Jesube itsantilatinue:
—¿Junni nuri Diosichi Nao joyun? tilatinue.
Jesuri tsanyoe tinue. 71Aman junca merasi, mantaminlari yala tala itsanlatinue:
—Wari yanan tsantinan, uyan testicolaca munaralaratiyoe yape yaca culpa quilaquisa. Ya tsantinaminca chiquilari meralaquinayoe tilatinue.
Trenutno odabrano:
San Lucas 22: cof
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2012, Wycliffe Bible Translators, Inc. All rights reserved.
