Matyiu 26
26
1E diyakindi, o Jisus a běkidi mepako těkame meěhěpi pa, ka Mâ‐a vâ na beyokwedi beaju, na, 2Wa dimbakiyani na, hwi ’bale tombango i ndi ’sango ja Ikunduwa: Mwana moto a ka kândudwěndi ka weywě o krâs. 3Jâ ndi ja prist ja meolo, na balěndi, na batodu ba bato, ja yolaně o ikenga ja prist eněně, a ma tubakwě na Kaiefas, 4ba ka hohonganakě ugono muabu u ka nângâně Jisus, na bâ‐ba weya Mâ. 5Ka bâ‐ba vâ, na, Hanga o buhwa bo‘ isango, o banga etoko ya diya bato omě.
6O Jisus a diyakidi o Bethani, o ndabo ’a Saimân ya ’gâlani, 7mwajo a vakind‘ o Mâ‐a jadi, a di na egala ya alabastěr ya mavulě ma kango m‘ ihambe ikolo, ka mâ‐a hovidě mâ o molo muaju o Mâ‐a diyakidi diyango a jaka. 8Nd‘ o beyokwedi beaju be yěni nonaně, be numbakindi, na, Imbaniya těkadi i lě ja nde? 9Ikabojana mavulě tě ma kango ekama ma ma diyate ma hambakudwě ihambe iněně, na jâ ja věwě mekuge. 10O Jisus a yowakidě yâ, ka Mâ‐a vâ na bâ, na, O haka li mwajo njuke nande? a hi ’Mba ehavu eyamu. 11Ikabojana mekuge me te n‘ inyěni egombe yěhěpi; ndi Mba diye n‘ inyěni egombe yěhěpi. 12Ikabojana o yeně a hoviděngo mavulě tě ma kango ekama o nyolo ’amě, a hi yâ itongwě jamě. 13Pâkwěpâkwě, Mbi vâki n‘ inyěni, na, Iboko viěhěpi via sango tě ’yam‘ ekaně vi ka hamanudwě o he yěhěpi, ovoně ekae tepě ya mwajo těkaně e di hango, e ka languěndi iyongidě jaju.
14Jâ ndi j‘ umbâkâ wa jomu na bebale, a tubakwě na Judas Iskariot, a vala o prist iněně i jadi, 15ka mâ‐a vâ na bâ, na, O ka vě li mbi nde, vâkâna mbi věndi ’nyěni Mâ? Ka bâ‐ba panga na mâ mabo ma dâlě malalo. 16A ’mbwakiyendi egombe e kândâkě Mâ oviya ’gombe těyeně.
17Buhwa boa bohoboho bo‘ isango ja pěmbě e ha ’bě na ilanda, ka beyokwedi bea viya o Jisus a jadi, na, O ka vaha lě hwě ho kenjakě Âvě iboko vi ka jě isango j‘ Ikunduwa ove? 18Ka Mâ‐a vâ, na, Kěkěni o mboka ’něně o moto ua giligili, wa vwi na mâ, na, Uyokwidi a ma vwi, na, Egombe ’amě ya bě ndi piělě; Mbi a tatandi isango j‘ Ikunduwa o ndabo ’âvě na beyokwedi beamě. 19Ka beyokwedi bea ha ka Jisus a levaki bâ; ka bâ‐ba kenjě isango.
20O kolo e diyaki ya pâ, ka Mâ‐a diya na jomu na bebale. 21O bâ‐ba diyakidi ba jaka, ka Mâ‐a vâ, na, Pâkwěpâkwě, Mbi vâki n‘ inyěni, na, umbâkâ ua njamba ’anyu ndi a ka kândě ’Mba. 22Ba yěněki ngěbě ’něně, ka bâ‐ba yalě o vâ o Mâ‐a jadi, moto moto, na, Upangiyi, a i ’mba? 23Ka Mâ‐a timbwana na bâ, na, A dubakě n‘ Umba ikadu o sěngě, mâ nd‘ a ka kândě ’Mba. 24Mwana moto a ’landi, pani ka yâ e di Mâ lěndudwěngo: ndi maguga na moto tě a ka kândě Mwana moto! e diyakindi bwamu na moto těně t‘ au jakwě. 25Jâ ndi ja Judas, a kândâkiyi Mâ, a timbwana, na, Paia o, a nd‘ umba? Ka Mâ‐a vâ na mâ, na, O vâki nonaně.
26O bâ‐ba diyakidi ba jaka, ka Jisus a nângâ pěmbě, ka Mâ‐a vambiya yâ ibâtâ, ka Mâ‐a buka yâ, ka Mâ‐a vě yâ beyokwedi beaju, na, Nângâkâni, jakani; ekaně e nyolo ’amě. 27Ka Mâ‐a nângâ sěngě ya kâpi, ka Mâ‐a vě akeva, ka Mâ‐a vě bâ yâ, na, Mâtâki yâni ’nyěni běhěpi; 28ikabojana ekama ndi makiya mamě ma panga ya kya ma hoviyedi iyidě ja bobe boa baitě. 29Ndi Mbi vâki n‘ inyěni, na, Mba mâte pě njo ’pâkwě ebuma tě ya ukâdi ekae, kabo buhwa těboně o ’Mbambi ka mâtě yâ ya kya n‘ inyěni o ipangiya ja Paia.
30O bâ‐ba běkidi viembo tumbuděngo, ka bâ‐ba puma nala o ukodi mua Âlivi.
31Ja ndi ja Jisus ja vâ na bâ, na, Inyěni běhěpi o ka kâbândini o nyanga ’amě na bulu těkabo, ’kabojana e lěndwěngo, na, Mbi ka bweyandi Utati, na medâmbě mea mwanga me ka pajanganaka. 32Ndi Umba‐mbi ka pumbuwě pě, Mbi ka ’landi o bohoboho n‘ inyěni o Galili. 33Ka Pitě a timbwana na vâ na Mâ, na, Tombekete běhěpi be kâbâkâte o nyanga ’vě, ndi mbi ’bě na ngudi e kâbâkě. 34Ka Jisus a vâ na mâ, na, Pâkwěpâkwě Mbi vâki na nâvě, na, Na bulu těkabo, na kuba na kâkâlâkâ, o ka hâhiyi ’Mba nj‘ ilalo. 35Ka Pitě a vâ na Ju, na, Tombete na hwě na nâvě ndi ho ka wě, mba hâhiy‘ Âvě. Yâ nyanga tě te ya beyokwedi běhěpi e vâkidi.
36Jâ ndi ja Jisus ja viya na bâ o mwanga u ma tubakwě, na, Gěthsěmani, ka Mâ‐a vâ na beyokwedi, na, Diyakani okava, o ’Mba‐mb‘ ’ala ka kaliya okavoně. 37Ka Mâ‐a nângâ Pitě, na bana ba Zěbadi babale, ka Mâ‐a yalě ngěbě ’něně na nyolo vâhâ mětě. 38Jâ ndi jaju ja vâ na bâ, na, Ilina jamě i yěněkě ngěbě ’něně mětě piělě n‘ iwedo; vengakiděni okava, o ka pepwanaki ’Mba ni. 39Ka Mâ‐a piya kwěi, ka Mâ‐a kwa na boho boaju, a ka kalakiya, na, Paia‐o, oningě na e t‘ e hamaka, ndi sěngě tě ya kâpi ekaně e tombake ’Mba; ndi hanga nyang‘ ’amě e vahakě, ndi ka ’vě o pangakě. 40Ka Mâ‐a vala o beyokwedi be jadi, ka Mâ‐a kâbidě bâ ba yaka viyâ, ka Mâ‐a vâ na Pitě, na, E lě nde! wa yâlěni o pepuwi n‘ Umba iwěla jâkâ ě? 41Pepwakani n‘ inyěni o ka kalakiyani, o banga wa ngiyani o iyějudwě: ilina mětě i kokěngo ndi nyolo e ibě na ngudi. 42Ka Mâ‐a vala pě njo ibale, ka Mâ‐a kaliya, na, Paia‐o, ipě sěngě tě ya kâpi ekaně e ibě na ngudi e tombakě ’Mba, kabo Mba mâtâ yâ, upango muâvě u hamake. 43Ka Mâ‐a viya, ka Mâ‐a kâbidě pě bâ‐ba yaka viyâ; ’kabojana mihâ mabu ma diyaki ma bě bodilo. 44Ka Mâ‐a dika bâ, ka Mâ‐a vala pě, ka kaliya njo ilalo, ka Mâ‐a vâte yâ ndaga tě. 45Ka Mâ‐a viya o beyokwedi beaju be jadi, ka Mâ‐a vâ na bâ, na, Yakani nandi, yâjâkâni; umbwakiyateni, iwěla ja bě ndi piělě, Mwana moto a kândudwěndi o benâ bea bato babe. 46Umwakani, ho kěkeni: a kândâkě ’Mba a běndi piělě.
47O Mâ‐a diyakidi a kalaka, ka Judas, umbâkâ ua jomu na babale, a viya na ’bumbu eněně na mekwala na metumbe oviya prist iněně na batodu ba bato ba jadi. 48Nandi a kândâkiyi Mâ, a věki bâ ndembo, na, Uamě a ka pyâpyě vâkâna mâ ndi Mâ ně; bweyaki Mâ ni ndu. 49Ka mâ‐a hungana o vala o Jisus a jadi, na, Mbolo, Paia: ka mâ‐a pyâpyâ Mâ. 50Ka Jisus a vâ na mâ, na, Nwěla, o ma viya lě ka ha nde? Jâ ndi jabu ja nangidě makadu o Jisus a jadi, ka bâ‐ba nângâ Mâ. 51Umbwakiyate, umbâkâ ua ba diyaki na Jisus a hambid‘ enâ ’aju, ka mâ‐a hoduwa ukwala muaju, na kokaka uhayi mua prist eněně, ka mâ‐a lena mâ ditâ jaju. 52Jâ ndi ja Jisus ja vâ na mâ, na, Timbakě ukwala muâvě o iboko viaju: ’kabojana ba nângâkě mekwala běhěpi ba ka nyangi na mekwala. 53O piviyaki na Mbi ’bě na ngudi E kalakiyě Paia, na Mâ‐a vě ’Mba wâwâ jomu ja ligion na ligion ibale ja enjěl? 54Ndi Malěndwě ma Anyambě ma ka timwě lě na‐e, kakana e ka diyi nonaně? 55Ka Jisus a vâ na bebumbu o iwěla tědině, na, O ma viyandini o ’Mba mbi jadi na mekwala na beposa ka nângâ ’Mba ona mwibi? Mbi ma diyaki diya Mbi yokwanakidě o těmpěl buhwa ka buhwa, o bweyi ’Mba ni. 56Ndi yěhěpi ekae e hamakindi na ovaně nd‘ o Malěndwě ma basâki ma ka timwě. Jâ ndi ja beyokwedi běhěpi ja dika Mâ, ka bâ‐ba kweya.
57Ba bweyakidi Jisus ba valanaki Mâ o Kaiefas prist eněně a jadi, o balěndi na batodu ba diyaki yolaněngo. 58Ndi Pitě a vitanakidi Mâ yaviděngo o ikenga ja prist eněně, ka mâ‐a ngiya ovoně, ka mâ‐a diya na benami iyěně ja bea madikanido. 59Prist iněně, na batodu, na ba ’hoka běhěpi, ba butakindi ndaga ja bovelaka opěla Jisus, na ovaně nd‘ o bâ‐ba ka weyě Mâ. 60Ndi bu duwaka; tombekete tali ja bojowa iitě i vakidi, ndi bu duwaka. Nd‘ o madikanido ka tali ja bojowa ibale ja viya. 61Ka jâ‐ja vâ, na, Ekaně a vâki, na, Mbi te na ngudi o buludě těmpěl y‘ Anyambě, n‘ Umbâ‐mba longa yâ na hwi ’lalo. 62Ka prist eněně a těmě, ka mâ‐a vâ na Ju, na, Wa timbwanaka ’lombo? E lě nde ya ’kaba e pakwaka o pěl‘ ’âvě? 63Ka Jisus a diya dâ. Ka prist eněně a vâ na Ju, na, Mbi kanakiyand‘ âvě na Anyambě ya eměnâ, na, langwakiya hwě ipě o ndi Kraist Mwana ua Anyambě. 64Ka Jisus a vâ na ju, na, O vâkândi nonaně: Mbi vâki n‘ inyěni tepě, na O ka yěněndini Mwana moto diyango o ’nâ eyomi ya ngudi, okava kělěbě, A vaka na bevindi bea oba. 65Jâ ndi ja prist eněně ja nya ngâi jaju, na, A kilind‘ Anyambě; ho lě pi na nja mala ě ma tali? Yěněkěteni, o yokindini mětě ikila jaju ja Anyambě. 66O pikilakiya li na‐e? Ka bâ‐ba timbwana, na, A lukango n‘ iwedo. 67Jâ ndi jabu ja tuwa malě o boho boaju, ba ka bomaka Mâ; bâkâ ba bweyaka Mâ mabanjo. 68Na, Âvě Kraist, sâkâkâ hwě, Nja a bweyaki Âvě?
69Ndi Pitě a diyakindi o ipumanido j‘ ikenga; k‘ itângâ ja viya o mâ‐a jadi, na, Âvě tepě o diyaki na Jisus ya Galili. 70Ndi a hâhâkindi o boho boabu boa běhěpi, na, Mba ’wě ka ’vě o vâkě. 71O mâ‐a pumakidi o ’lěmbě, k‘ itângâ ipâkwě ja yěně mâ, ka jâ‐ja vâ na ba diyakid‘ omě, na, Ekaně tepě a ma diyaki na Jisus ya Nazarěth. 72Ka mâ‐a hâhâ pě n‘ ikana, na, Mba ’wě momo těně. 73Kwěi ka ba těměkidi piělě ba viya o Pitě a jadi, na, Pâkwěpâkwě, âvě tepě uabu, ‘kabojana mbâhi ’âvě ya dimbanakiya. 74Jâ ndi jaju ja yalě o kila na o kana, na, Mba ’wě momo těně. Elěngiaha tepě kuba e kâkâlâkâ. 75Ka Pitě a yongidě ndaga ya Jisus e vâki na ju, na, Na kuba na kâkâlâkâ, o ka hâhi ’Mba nj‘ ilalo. Ka mâ‐a puma o uhěngě, a ka yaka nangudi.
Trenutno odabrano:
Matyiu 26: BNG1895
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Published by the American Bible Society in 1895.
