Matyiu 25
25
1Ipangiya ja Hěvěn i ka kwanudwěndi jomu ja behila be nângâkidi litwa labu, na puma ka lata n‘ ubayi. 2Betano be diyaki na bokeli, betano betiketike. 3Be diyakindi betiketike be nangâki litwa labu, ndi be nânge mavulě na bâ: 4ndi be diyakidi na bokeli be nângâkindi mavulě o beva beabu na litwa labu. 5O ubayi a bembakidi, ka bâ‐ba tikanidě na yanakidě. 6O bulu ’tema ka ukenyu mua yamwě, na, Umbwakiyani, ubayi u vakandi; pumakani, ka bonganakiyi mâ ni. 7Ka behila těbeně běhěpi bea ’muwa, ka bâ‐ba bongwanidě litwa labu. 8Ka be diyakidi betiketike bea vâ na bea bokeli, na, Věki hwě ni mavulě manyu; ’kabojana litwa lahu lo dimindi. 9Ndi ka bea bokeli bea timbwana, na, Hanga nonaně; o banga ma koke na hwě n‘ inyěni; ndi tâmâkâ o valani o ba hamakidě, wa hambani manyu mětě. 10O bâ‐ba kěkidi ka hamba, k‘ ubayi mâ‐a pâ; ba diyakidi kokěngo, ka bâ‐ba ngiya na mâ o diba; ka jâmbě ja dibwě. 11Kwěi, ka behila bepâkwě bea pâ tepě, na, Upangiyi, Upangiyi, dubwakiya hwě. 12Ndi ka mâ‐a yavwana, na, Pâkwěpâkwě Mbi vâki n‘ inyěni, na, Mba ’wě inyěni. 13Nandi, pepwakani, ’kabojana wa ’wěni buhwa na b‘ iwěla ja Mwana moto i ka pâyě.
14Ipangiya ja Hěvěn i t‘ ona moto a vala ekěndâ o ’tomba ya bo, a ndakiyedi hayi baju, ka mâ‐a vě bâ jumba jaju. 15Ka mâ‐a vě umbâkâ talěnt itano, upâkwě ibale, upâkwě pâkâ; moto uěhěpi hohonganěngo na ngud‘ ’aju: ka mâ‐a paniya o vala o ’kěndâ. 16A věkudwě talěnt itano, o mâ‐a vali ka hamba na jâ, ka mâ‐a kova ipâkwě itano. 17Yâ nyanga tě te ya a věkudwě ibale, ka mâ‐a kova tepě ipâkwě ibale. 18Ndi a věkudwě pâkâ, a kěkindi ka tonga o he, ka mâ‐a kuta dâlě ja upangiyi muaju. 19Ulingo uyaba tombango ka upangiyi mua bahayi těbaně a pâ ka hohonganě na bâ. 20A věkěkudwě talěnt itano, a viya ka mâ‐a vana talěnt ipâkwě itano, na, Upangiyi, o věki ’mba talěnt itano: yěněkěte, mbi kovango ipâkwě itano na jâ. 21Ka upangiyi muaju a vâ na mâ, na, O hi bwam‘ ’âvě uhayi uyamu mu‘ ikěngě; o viyi ka diya n‘ ikengě o belombo behâlě, mbi ka těděnd‘ âvě oba ya belombo beitě: ngakiya o mbya ya upangiyi muâvě. 22A věkudwě tepě talěnt ibale, ka mâ‐a viya, na, Upangiyi, o věki ’mba talěnt ibale; yěněkěte, mbi kovindi ipâkwě tepě ibale na jâ. 23Ka upangiyi muaju a vâ na mâ, na, O hi bwamu, âvě uhayi mu‘ ikěngě; o viyi ka diya n‘ ikěngě o belombo behâlě, mbi ka těděnd‘ âvě oba ya belombo beitě: ngakiya o mbya ya upangiyi mwâvě. 24A věkudwě talěnt pâkâ ka mâ‐a viya, na, Upangiyi, mbi yowakiděte na o moto ukolo, o benjaka o âvě‐o ha liyakidi, na o yolakě o âvě‐o ha mwanjidi: 25ovaně nd‘ umba‐mbi bangakidi, k‘ umba‐mba vala ka kuta talěnt ’âvě o he; yěněkěte, a nângindi eâvě měte. 26Ka upangiyi muaju a timbwana mâ, na, Âvě uhayi ube na mua henga! o yowakiděte na mbi benjakandi o ’mbambi ha liyakidi, n‘ umba‐mbi yolakě o umba‐mbi ha mwanjakidi; 27o lukakindi o vě dâlě jamě a bapepengani, te mbi ka timbwěndi eamě na nyeno o ipâ jamě. 28Nandi nângânâki mâ ni talěnt těně, n‘ inyěni wa vi yâ ni o a jadi jomu ja talěnt. 29Ikabojana uěhěpi a janidi a ka věwěndi, na mâ‐a bě na beitě; nd‘ a ha ’bě ně a ka nângânwěndi tombe n‘ ibeaju be janidi. 30Uhwakani uhayi u ha ’bě n‘ itinga o ivititi via yaviděngo; ovoně o ka diyi mbembe n‘ ikalidě ja mahonga.
31O Mwana moto a ka viyě n‘ ivenda jaju, na enjěl ja hole jěhěpi i ka diyi na Ju, vâkâna A diyendi o ’ka y‘ ivenda jaju. 32Betomba beěhěpi be ka yolaněndi o boho boaju: na Mâ‐a ka palwakidě bâ, pani ka utati u palwakidě medâmbě meaju o mbodi ’jaju. 33A ka tědi medâmbě o ’nâ ’aju eyomi, ndi mbodi o ya ’měngwě. 34Vâkâna Upolo a ka vwi na ba jadi o ’nâ ’aju eyomi, na, B‘ ibâtâ ja Paia, vakani, jigakani ipangiya i kenjakudwě ’nyěni oviya jali ja he; 35ikabojana Mbi diyakindi na nja, k‘ inyěni wa jedi ’Mba ni; Mbi diyaki na ’vělě, k‘ inyěni wa mâtidi ’Mba ni; Mbi diyaki mwěngi, k‘ inyěni wa ngidi ’Mba ni; 36Mbi diyakind‘ uhamba, k‘ inyěni wa bâtidi ’Mba ni; Mbi diyaki Mbi běki, k‘ inyěni wa lumbiyi ’Mba ni; Mbi diyakindi o meboka, k‘ inyěni wa pâni o ’Mba mbi jadi. 37Vâkâna bayamu ba timbwani Mâ, na, Upangiyi ho yěněki l‘ Âvě na nja, ka hwě hwa jed‘ Âvě ove? na ba evělě, ka hwě hwa mâtidě Âvě ove? 38Ho yěněki l‘ Âvě mwěngi, ka hwě hwa ngid‘ Âvě ove? na b‘ uhamba, ka hwě hwa bâtid‘ Âvě ove? 39Nja ’gombe eahu e yěněkid‘ Âvě běki, na o meboka, ka hwě hwa viya Âvě o jadi? 40Nd‘ Upolo a ka timbwani bâ, na, Pakwěpâkwě Mbi vâki n‘ inyěni, na, Bwěsě k‘ inyěni o hakidini ’mbâkâ uhâlě wa ba tě b‘ ina ekaba, o hakiyendi Mbi yâ. 41Ndi A ka vâ tepě na ba ’nâ eměngwě, na, Věngěměkěni o ’Mbambi jadi, inyěni ba di hâkwěngo, o veya via ’gombe yěhěpi, vi kenjakudwě děvil na enjěl jaju. 42Ikabojana Mbi diyaki na nja, nd‘ o věyi ’Mba ni beja: Mbi diyaki na evělě, nd‘ o mâtidi ’Mba ni: 43Mbi diyaki mwěngi, ndi wu ngakidi ’Mba ni; uhamba, ndi wu bâtâkidi ’Mba ni: Mbi běkě, na o meboka, nd‘ o lumbakiyi ’Mba ni. 44Ndi ba ka timbwana tepě Mâ, na, Upangiyi, ho yěněki l‘ Âvě na nja ove, na ba ’vělě, na ba mwěngi, na b‘ uhamba, na b‘ ibě, na ba meboka, ndi ho hane Âvě ove? 45Ndi A ka yavwani bâ, na, Pâkwěpâkwě, Mbi vâki n‘ inyěni, na, Bwěsě k‘ inyěni o ha hakidini ’mbâkâ uhâlě ekaně wu hakiyi ’Mba ni. 46Ekaba ba ka ’landi o ivomudwě ja ’gombe yěhěpi, ndi bayam‘ o ’měnâ ya ’gombe yěhěpi.
Trenutno odabrano:
Matyiu 25: BNG1895
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Published by the American Bible Society in 1895.
